Jesus Mamillit Angka Apostelna

Nunga sada satonga taon dipatandahon si Johannes Pandidi molo Jesus i biru-biru ni Debata. Tingki mulai marbarita Jesus, adong ma piga-piga halak na gabe siseanna, i ma si Andreas, si Simon Petrus, si Johannes, ra si Jakkobus (na saama dohot si Johannes), si Pilippus, dohot si Bartolomeus (na laos digoari si Natanael). Alai, di pudian ni ari, lam godang ma na gabe siihuthon Kristus.​—Johannes 1:45-47.

Saonari, nunga rade be Jesus mamillit angka na laho gabe apostelna. Nasida ma na laho dilatik jala na gabe ale-ale ni Jesus. Alai andorang so i, laho do Jesus tu dolok, ra dolok na jonok tu Laut Galilea jala ndang dao sian Kapernaum. Martangiang ma Jesus disi saborngin manipat, laho mangido bisuk dohot pasu-pasu sian Debata. Marsogotna i, dijou ibana ma angka siseanna jala dipillit ma 12 halak sian nasida gabe apostelna.

Dipillit Jesus do onom siseanna na dipaboa di mula ni parsiajaran on gabe apostelna. Dipillit do muse si Mateus, i ma na hea gabe sijalo pajak. Asing ni i, si Judas (na laos digoari si Tadeus jala “anak ni si Jakobus”), si Simon halak Kana, si Tomas, si Jakobus anak ni si Alpeus, dohot si Judas Iskariot.​—Mateus 10:2-4; Lukas 6:16.

Hea do na 12 halak i rap dohot Jesus, jala tangkas do ditanda Jesus nasida. Adong do sian nasida keluarga ni Jesus. Umpamana, songon si Johannes dohot si Jakobus. Tubu ni inanguda ni Jesus do nasida. Asing ni i, anak ni bapa uda ni Jesus do si Jakobus anak ni si Alpeus. Ai adong do na mandok molo si Alpeus i anggi ni si Josep, ama ni Jesus.

Tontu, mura do Jesus mangingot goar ni angka apostelna. Alai songon dia molo hamu? Boi do diingot hamu angka goar ni nasida? Asa boi lam mura, ingot ma adong dua na margoar si Simon, dua na margoar si Jakobus, jala dua na margoar si Judas. Dung i, na saama dohot si Simon (Petrus), i ma si Andreas, jala na saama dohot si Jakobus (anak ni si Sebedeus), i ma si Johannes. Saonari nunga taingot be goar ni ualu apostel i. Na opat nai, i ma si Mateus sijalo pajak, si Tomas na mardua roha, si Natanael na dijou sian toru ni hau, jala na parpudi i ma si Pilippus dongan ni si Natanael.

Sian luat Galilea do sisean ni Jesus na sampulusada i. Si Natanael sian Kana, si Pilippus, si Petrus, dohot si Andreas sian Betsaida. Alai di pudian ni ari pinda do si Petrus dohot si Andreas tu Kapernaum, huta ni si Mateus. Si Jakobus dohot si Johannes tading di Kapernaum manang inganan na jonok tusi, jala disi do nasida manjala dengke. Holan si Judas Iskariot na manghianat tu Jesus i do na sian Judea.