Disuru Jesus ma 70 Siseanna Marbarita

Taon 32 M ma tingki i, hira-hira tolu taon dung tardidi Jesus. Baru dope ibana dohot siseanna sian Perayaan Tabernakel di Jerusalem. Jala ndang dao dope nasida sian i. (Lukas 10:38; Johannes 11:1) Onom bulan andorang so mate Jesus, umgodang do tingkina marbarita di Judea manang di bariba ni Sunge Jordan na di luat Perea. Ai ringkot do marbarita di luat i.

Nunga hea Jesus marbarita saleleng piga-piga bulan di Judea dung Paska taon 30 M jala mamolus do ibana sian Samaria. Hira-hira dung Paska taon 31 M, marsitutu ma halak Jahudi na di Jerusalem laho mambunu ibana. Alani i, marbarita ma ibana di Galilea saleleng sada satonga taon. Godang do na mangihuthon ibana disi. Diajari Jesus ma angka apostelna jala didok ma tu nasida, “Laho ma hamu jala baritahon ma, ‘Nunga jonok Harajaon banua ginjang i.’” (Mateus 10:5-7) Saonari, denggan ma diatur ibana ulaon marbarita di Judea.

Laho mamungka ulaon i, dipillit Jesus ma 70 halak na gabe siseanna. Disuru ma nasida dua halak sapardalanan. Borhat ma nasida mamaritahon Harajaon tu luat na ‘bidang sisabion, alai otik angka panabi’. (Lukas 10:2) Parjolo ma nasida laho tu inganan na laho sitopoton ni Jesus. Dipamalum nasida ma na marsahit jala dipaboa ma barita na uli dos songon naung dibaritahon Jesus.

Tu jabu ni angka halak do nasida mangajari, ndang tu sinagoga. Didok Jesus ma, “Molo masuk hamu tu sada jabu, jumolo ma dok hamu, ‘Dame ma di hamu di jabu on.’ Molo adong disi na olo manangihon barita na uli taringot tu hadameon, sahat ma damemuna tu ibana.” Aha do barita sipasahaton ni nasida? Jesus mandok, “Dok ma tu nasida, ‘Nunga jonok Harajaon ni Debata tu hamu.’”​—Lukas 10:5-9.

Sarupa do parenta na nilehon ni Jesus tu 70 halak i dohot tu 12 apostelna sataon andorang so i. Didok ibana ma ndang sude olo manjalo nasida. Alai gabe rade ma angka halak na olo manangihon manjalo haroro ni Jesus. Gabe maima-ima ma nasida tu harorona jala marsiajar sian ibana.

Ndang sadia leleng, mulak ma na 70 halak i tu Jesus. Las situtu ma roha ni nasida jala didok ma, “Tuan, dohot do angka suru-suruan na jahat tunduk tu hami tingki hupangke hami goarmu.” Las situtu ma roha ni Jesus mambege i jala didok ma, “Huida do nunga madabu Sibolis songon hilap sian langit. Hulehon do tu hamu huaso laho mandege ulok dohot hala.”​—Lukas 10:17-19.

Dung i dipapos Jesus ma roha ni nasida, na boi do adopan ni nasida angka hasusaan, dos songon na mandege ulok dohot hala. Asing ni i, boi do pos roha ni nasida na laho didabu Sibolis sian surgo di ari na naeng ro. Diurupi Jesus ma muse nasida mamboto na rumingkot. Didok ma, “Unang ma las rohamuna ala tunduk tu hamu angka suru-suruan na jahat i. Alai, marlas ni roha ma hamu ala nunga tarsurat goarmuna di banua ginjang.”​—Lukas 10:20.

Las situtu ma roha ni Jesus jala dipuji ma Amana ala diloas angka halak na lea mangulahon ulaon na ringkot on. Didok Jesus ma tu angka siseanna, “Marlas ni roha ma halak na mangida angka na niidamuna. Hudok ma tu hamu, lomo do roha ni torop panurirang dohot angka raja naeng mangida na niidamuna alai ndang diida nasida, jala naeng mambege na binegemuna alai ndang dibege nasida.”​—Lukas 10:23, 24.