Songon Dia do Asa Marlas ni Roha?

Dipaboa Jesus do muse taringot ringkot ni martangiang. Alai adong dope parsiajaran na asing na dipaboa Jesus lobi sian sahali. Tingki mambahen tanda halongangan manang mukjizat Jesus di Galilea, adong na mandok pamimpin ni suru-suruan na jahat do mangurupi ibana mangulahon i. Jala songon i do muse didok di Judea.

Tingki dipalao Jesus suru-suruan na jahat sian sahalak baoa na bisu, longang ma roha ni torop halak. Alai didok angka musuna ma, “Marhite Beelsebul pangulu ni suru-suruan na jahat i do ibana palaohon suru-suruan na jahat i.” (Lukas 11:15) Adong muse na asing na mangido asa dibahen Jesus tanda halongangan, laho mamboto ise do Jesus sasintongna.

Diboto Jesus do na laho manguji ibana nasida. Alani i didok ibana ma, tarbagi do harajaon molo marbadai. Jala didok ma, “Molo tarbagi do Sibolis, songon dia ma boi hot harajaonna?” Dung i didok ma muse, “Molo marhite huaso ni Debata ahu palaohon suru-suruan na jahat i, patuduhon naung ro do Harajaon ni Debata tu hamu.”​—Lukas 11:18-20.

Tingki didok Jesus marhite “huaso ni Debata”, tontu diingot na manangihon i do na masa tu halak Israel najolo. Marhite huaso ni Debata do si Musa mambahen tanda halongangan di jolo ni si Firaun. Jala marhite huaso ni Debata do tarsurat Sampulu Patik ni Debata di dua batu. (2 Musa 8:19; 31:18) Songon i ma, “huaso ni Debata” manang tondi parbadia do na mangurupi Jesus palaohon suru-suruan na jahat dohot pamalumhon na marsahit. Sasintongna, nunga ro Harajaon ni Debata tu tonga-tonga ni angka musuna. Ai disi do Raja ni Harajaon i, i ma Jesus na mambahen angka tanda halongangan.

Tingki dipalao Jesus suru-suruan na jahat, umbalga do huaso ni Jesus sian huaso ni Sibolis. Dos ma on songon baoa na gogo na manaluhon panjaga istana. Dung i dipaboa Jesus ma muse tudosan taringot tu suru-suruan na jahat na kaluar sian sahalak baoa. Molo ndang diulahon ibana be na denggan, mulak ma muse suru-suruan na jahat i tu ibana raphon pitu nai suru-suruan na jahat. Alani i, gabe umjahat ma ibana sian mulana i. (Mateus 12:22, 25-29, 43-45) Songon i ma na laho masa tu bangso Israel.

Adong ma sahalak borua na manangihon Jesus mandok, “Marlas ni roha ma borua na manubuhon jala na manusui ho!” Dirimpu ibana do holan ala gabe ina ni Jesus na mambahen si Maria marlas ni roha. Las situtu do roha ni borua Jahudi molo boi gabe ina ni panurirang, tarlumobi ma gabe ina ni Messias. Alai dipaboa Jesus ma tu borua i na mambahen sasahalak marlas ni roha, “Halak na manangihon hata ni Debata jala na mangulahon i do na marlas ni roha!” (Lukas 11:27, 28) Ndang dibahen Jesus umsangap si Maria sian na asing. Ai ndang parpamilion manang ulaon ni sasahalak na mambahen marlas ni roha. Alai marlas ni roha ma halak molo tongtong manomba Debata.

Songon na niulahon ni Jesus di Galilea, disonggak ibana ma halak na mangido tanda halongangan. Didok ibana, ndang adong be tanda halongangan silehonon, asing ni “tanda halongangan sian panurirang Jona”. Di tingki ngolu ni si Jona, adong dua tanda halongangan na masa. Tolu ari ibana di butuha ni dengke jala muba halak Ninive ala manangihon baritana. Didok Jesus ma muse, “Adong do dison na umbalga sian si Jona.” (Lukas 11:29-32) Umsangap do muse Jesus sian si Salomo, na didapothon ratu Seba alani bisukna.

Didok Jesus ma muse, “Ndang bahenon ni halak lampu naung digalahi tu inganan na buni manang tu toru ni karanjang. Alai bahenonna do i tu inganan na timbo.” (Lukas 11:33) Songon lampu na buni do didok Jesus ajaran dohot tanda halongangan na binahenna di jolo ni nasida. Ala ndang dilehon nasida rohana, gabe ndang diantusi nasida tujuan ni Jesus mangulahon i.

Nunga dipalao Jesus suru-suruan na jahat jala nunga dipamalum ibana sahalak baoa na bisu. Alai ndang taronjar roha ni nasida mamuji Debata jala paboahon angka ulaon ni Jahowa tu na asing. Alani i, didok Jesus ma tu angka musuna i, “Manat ma, so tung haholomon do panondang na di ho i. Alani i, molo tiur do saluhut dagingmu jala ndang adong disi na holom, gabe tiur ma i songon lampu na manondangi ho.”​—Lukas 11:35, 36.