Taargai ma Artanta di Partondion

1, 2. (a) Aha do tolu arta na arga na dilehon Jahowa? (b) Aha do na laho taulas di artikel on?

JAHOWA do na ummora di hasiangan on, ala Ibana do nampuna sasude. (1 Kron. 29:11, 12) Nang pe songon i, burju do Jahowa tu sude. Mandok mauliate do hita ala dilehon Jahowa arta di partondion tu hita, i ma (1) Harajaon ni Debata, (2) pangkobasionta, dohot (3) hasintongan na sian Bibel. Alai molo ndang manat hita, boi do gabe ndang taargai be arta na dilehon Debata. Ingkon tongtong do taargai jala tahaholongi arta on, ala didok Jesus, ”Ai ia disi artamuna, disi do nang rohamuna.”​—Luk. 12:34.

² Taulas ma cara patoguhon holong dohot pangargaionta tu Harajaon ni Debata, pangkobasionta, dohot hasintongan. Tingki taulahon i, huhut ma tarimangi songon dia cara patoguhon holong tu arta di partondion.

 3. Di tudosan ni Jesus, aha do na diulahon sahalak baoa laho manuhor sada mutiha? (Ida gombar di mula ni parsiajaran.)

³ Jaha Mateus 13:45, 46. Dipaboa Jesus do sada tudosan taringot baoa na manuhor jala manggadis mutiha (mutiara). Sada tingki, dapotna ma sada mutiha na ummarga sian angka mutiha na hea diida ibana. Lomo hian rohana asa mandapot mutiha i. Digadis ibana ma sude barangna asa boi manuhor i. Boi do dapot rohamu sadia arga mutiha i di ibana?

 4. Aha do na laho taulahon molo tahaholongi Harajaon ni Debata?

⁴ Aha do na taparsiajari sian tudosan ni Jesus? Hasintongan taringot Harajaon ni Debata dos songon mutiha na arga. Molo tahaholongi Harajaon ni Debata songon baoa na mangkalomohon mutiha i, tontu taulahon do manang aha pe asa boi gabe rayat ni Harajaon i. (Jaha Markus 10:28-30.) Taida ma taringot tu dua halak na patuduhon i.

 5. Aha do na diulahon si Sakeus ala holong rohana tu Harajaon ni Debata?

⁵ Sahalak sijalobeo do si Sakeus. Mamora do ibana ala mangkorus hepeng ni halak. (Luk. 19:1-9) Sada tingki, dibege si Sakeus ma Jesus paboahon taringot Harajaon ni Debata. Las hian rohana mambege i jala lomo rohana marhamubaon. Didok ibana, ”Tuhan, satonga ni angka artangki ma hulehon tu angka na pogos; jala ia adong na huangati, siopat lompit ma hupaulak.” Dipaulak si Sakeus ma sude hepeng na dihorus ibana jala ndang diulahon be i.

 6. Aha do na dipauba sahalak borua sian dirina, jala boasa songon i?

⁶ Adong sahalak borua na lesbian (borua marjolmahon borua). Ibana sahalak pemimpin ni organisasi na satolop tu ulaon homoseksual. Pigapiga taon naung salpu, dibege ibana ma taringot Harajaon ni Debata, dung i marsiajar ma ibana. Ala nunga mamboto taringot Harajaon ni Debata, lomo rohana marhamubaon. (1 Kor. 6:9, 10) Ala holong rohana tu Jahowa, ditadingkon ma organisasina i jala ndang lesbian be ibana. Tardidi ma ibana taon 2009. Sataon dungkon i, merintis biasa ma ibana. Sian on taboto, ala holong do rohana tu Jahowa umbahen na boi ibana marhamubaon jala pasidingkon giotgiot ni rohana.​—Mrk. 12:29, 30.

 7. Songon dia asa tongtong togu holongta tu Harajaon ni Debata?

⁷ Asa boi gabe rayat ni Harajaon ni Debata, ingkon marhamubaon do hita asa lam denggan marparange. (Rom 12:2) Alai, ingkon marsitutu do hita asa unang humurang holongta tu Harajaon ni Debata. Unang gabe humurang holongta alani arta dohot giotgiot ni daging na sala. (Poda 4:23; Mat. 5:27-29) Asa tongtong togu holongta tu Harajaon ni Debata, adong do arta na asing na dilehon Jahowa tu hita.

 8. (a) Boasa didok apostel Paulus pangkobasionta songon arta di ”inganan na mura matapor”? (b) Songon dia do si Paulus patuduhon na dihaholongi ibana pangkobasionna?

⁸ Disuru Jesus do hita mangajarhon jala pasahathon barita na uli taringot Harajaon ni Debata. (Mat. 28:19, 20) Didok apostel Paulus, ulaon on dos songon arta na di bagasan gunsi na sian tano liat. (2 Kor. 4:7; 1 Tim. 1:12) Ala mardosa, dos ma hita songon gunsi na sian tano liat. Alai barita na tapasahat dos songon arta na arga na boi mangalehon ngolu salelengna tu hita dohot tu na mambege. I do alana didok si Paulus, ”Alai saluhutna i huula ala barita na uli, anggiat dohot ahu partohap disi.” (1 Kor. 9:23) Marsitutu do si Paulus paboahon taringot Harajaon ni Debata tu na asing. (Jaha Rom 1:14, 15; 2 Timoteus 4:2.) Ala holong rohana tu barita na uli, on mambahen ibana barani marbarita nang pe godang na mangalo. (1 Tes. 2:2) Songon dia do hita maniru si Paulus?

 9. Aha do na taulahon laho patuduhon holong tu pangkobasion?

⁹ Sada cara na diulahon si Paulus laho patuduhon holong tu pangkobasionna, i ma marhite marbarita tu na asing. Songon si Paulus dohot halak Kristen di abad na parjolo, hita pe marbarita sian jabu tu jabu, di inganan na ribur, manang didia pe hita pajumpang dohot halak. (Ul. 5:42; 20:20) Talului ma cara laho marbarita tu godang halak. Molo tolap do hita, boi do gabe perintis ekstra manang perintis biasa, marsiajar bahasa na asing, pinda tu inganan na asing di negaranta, manang pinda tu negara na asing.​—Ul. 16:9, 10.

10. Aha do laba na didapot si Irene ala marsitutu ibana marbarita na uli?

¹⁰ Si Irene, sahalak donganta na so marhasohotan di Amerika Serikat. Lomo rohana marbarita tu halak na marbahasa Rusia. Taon 1993, dohot ma ibana tu kelompok na marbahasa Rusia di New York. Tingki i, hirahira 20 penyiar do di kelompok i. Dung 20 taon, didok si Irene ma, ”Ndang pola malo dope ahu marbahasa Rusia.” Alai, diurupi Jahowa do ibana dohot penyiar na asing marbarita tu halak na mamangke bahasa i. Saonari, adong onom huria na marbahasa Rusia di New York. Godang do na diurupi ibana marsiajar Bibel, jala 15 sian nasida nunga tardidi. Pigapiga sian nasida adong na karejo di Betel, merintis, jala gabe sintua. Didok si Irene, ”Molo huingot citacitaku na asing najolo, ndang adong na boi mambahen las rohangku songon na huulahon saonari.” Mansai arga do pangkobasion i di si Irene!

11. Nang pe adong na mangalo, aha do labana molo tongtong hita marbarita?

¹¹ Molo arga do pangkobasion i di hita, tontu tatiru do apostel Paulus na tongtong marbarita nang pe ndang dijangkon. (Ul. 14:19-22) Umpamana, hirahira taon 1930 sahat tu 1944, godang do donganta di Amerika Serikat na dianiaya. Alai tongtong do nasida marbarita. Tingki diorai pamarenta, laho do nasida tu pengadilan jala monang di godang kasus. Taon 1943, dipaboa donganta si Knorr ma taringot sada hamonangan ni angka donganta di Mahkamah Agung Amerika Serikat. Didok ibana, ala tongtong angka donganta marbarita, i do na mambahen nasida dialuhon tu Pengadilan. Alai, ndang adong na boi mangambati hita laho marbarita. Tarida ma i sian hiras ni roha ni donganta marbarita di liat portibi on. Alani i, angka donganta di inganan na asing pe gabe mandapot hak laho marbarita. Tangkas ma, ndang adong na boi mangambati hita ala tapatudu holong tu pangkobasionta.

12. Aha do na laho ulahononmuna?

¹² Molo arga do pangkobasion i di hita, tontu ndang holan godang ni jam dinas na taharingkothon. Alai, taulahon do manang aha pe laho ”mangkatindangkon barita na uli”. (Ul. 20:24; 2 Tim. 4:5) Alani i, aha do na laho taajarhon tu na asing? Taulas ma muse arta na asing na dilehon Debata.

13, 14. Aha do panimpanan ni arta na didok Jesus di Mateus 13:52, jala songon dia do hita mangisi i?

¹³ Arta na patoluhon na dilehon Jahowa, i ma hasintongan naung taparsiajari. Jahowa do Mual ni hasintongan. (2 Sam. 7:28; Ps. 31:6) Ala songon Ama na burju, lomo do rohaNa mangalehon hasintongan on tu hita. Nunga godang hasintongan na tadapot marhite manjaha Bibel dohot publikasi, jala ro tu kebaktian dohot parpunguan. Molo lam godang hasintongan na tadapot, adong ma di hita panimpanan ni arta, i ma hasintongan ”na imbaru dohot naung leleng”. (Jaha Mateus 13:52.) Diurupi Jahowa ma hita mangisi panimpanan ni artanta molo talului hasintongan i dos songon na mangalului arta na buni. (Jaha Poda 2:4-7.) Songon dia do hita mangulahon i?

¹⁴ Ingkon ringgas do hita mamparsiajari Bibel dohot publikasinta. On mangurupi hita mangantusi hasintongan na ”imbaru”, na so hea dope taboto. (Jos. 1:8, 9; Ps. 1:2, 3) Edisi Watch Tower na parjolo, na dipabinsar bulan Juli 1879, patudoshon hasintongan i tu bunga na buni di holangholang ni ramba. Asa boi mandapot bunga i, ingkon manat do sasahalak mangalului i. Molo nunga didapot bunga i, tontu lomo dope rohana mangalului godang bunga sisongon i. Suang songon i, lomo do rohanta mandapot godang hasintongan. Ingkon marhiras ni roha ma hita mangalului godang hasintongan.

15. Boasa tadok pigapiga hasintongan i naung ”leleng”, jala na dia do na dihalomohon hamu?

¹⁵ Tingki marsiajar Bibel, tadapot do pigapiga hasintongan na mansai arga. Tadok do hasintongan i naung ”leleng”, alana i do na parjolo taparsiajari. Hasintongan na dia ma i? Mulana, taparsiajari do molo Jahowa i Sipanompa, jala marsangkap na denggan tu jolma. Taparsiajari do taringot Debata na manuru anakNa tu portibi on asa mate laho paluahon hita sian dosa dohot hamatean. Taparsiajari do muse taringot Harajaon ni Debata na laho manalpuhon sude sitaonon, asa marlas ni roha hita mangolu salelengna di tano on.​—Joh. 3:16; Pgk. 4:11; 21:3, 4.

16. Aha do na porlu taulahon molo adong na muba taringot pangantusion na sian Bibel?

¹⁶ Sipata, olo do adong na muba sian pangantusion taringot tu sada surirang manang ayat di Bibel. Molo masa sisongon i, ringkot do talehon tingki laho mamparsiajari jala mangarimangi i. (Ul. 17:11; 1 Tim. 4:15) Na porlu taboto, ndang holan imbar ni pangantusion na leleng dohot na imbaru, alai ingkon manat do tasulingkiti taringot tu pangantusion na imbaru. Molo taulahon songon i, nunga tabahen be pangantusion na imbaru tu panimpananta taringot hasintongan. Aha do labana molo taulahon i?

17, 18. Songon dia do tondi parbadia mangurupi hita?

¹⁷ Didok Jesus, boi do tondi parbadia mangurupi hita mangingot naung hea taparsiajari. (Joh. 14:25, 26) Songon dia do i mangurupi hita tingki marbarita? Rimangi ma pengalaman ni donganta si Peter. Taon 1970, tingki marumur 19 taon dope ibana, nunga mangurupi di Betel Inggris. Tingki marbarita sian jabu tu jabu, pajumpang ma ibana tu sahalak baoa na marjanggut. Disungkun ma atik na lomo do roha ni baoa i marsiajar Bibel. Baoa i sahalak guru ni halak Jahudi. Songgot ma rohana tingki didok si Peter na laho ajaranna ibana taringot Bibel. Laho manguji si Peter, disungkun baoa i ma, ”Molo husungkun ho, mamangke bahasa aha do buku Daniel disurat?” Didok si Peter ma, ”Mamangke bahasa Aram.” Didok si Peter muse, ”Songgot do roha ni baoa i ala huboto alusna! Boasa boi huboto alusna? Nunga hujaha hian Joujou Paboahon dohot Sadarlah! na dipabinsar pigapiga bulan naung salpu, jala dipaboa do disi taringot buku Daniel na disurat mamangke bahasa Aram.” (Dan. 2:4) Tangkas ma, boi do tondi parbadia mangurupi hita mangingot hatorangan naung hea tajaha jala naung tapamasuk tu panimpanan ni artanta.​—Luk. 12:11, 12; 21:13-15.

¹⁸ Molo tahaholongi hasintongan na taparsiajari sian Jahowa jala mandok mauliate hita alani i, tontu pamasukonta do i tu panimpanan ni artanta. Molo tongtong taulahon on, lam rade ma hita mangajari na asing.

19. Boasa ingkon tajaga artanta di partondion?

¹⁹ Di artikel on, nunga taparsiajari ringkot ni mangargai arta di partondion. Alai ingkon manat do hita. Unang gabe humurang holongta tu arta on holan alani Sibolis dohot portibi on. Molo ndang manat, boi do gabe ganggu rohanta alani parkarejoan na parohon godang hepeng, marsangkap naeng mamora, manang manenganengahon hamoraon. Dipaingot apostel Johannes do hita, na laho salpu do portibi on dohot giotgiot ni rohana. (1 Joh. 2:15-17) I do na mambahen hita ingkon mandok mauliate jala manjaga artanta di partondion.

20. Aha do siulahononmu laho manjaga artamuna di partondion?

²⁰ Unang ma paloas manang aha pe mambahen humurang holongmuna tu Harajaon ni Debata. Marhiras ni roha ma marbarita, jala tongtong ma patogu holong tu pangkobasionmuna. Tongtong ma mangalului hasintongan na sian Bibel. Molo diulahon hamu on, ”masiarta parbanua ginjang na so ra suda ma hamu, na so hadonohan panangko jala na so targagat ngitngit”.​—Luk. 12:33, 34.