Taringot tu na Gabe Sisean

Nunga dipaboa Jesus parsiajaran na ringkot tingki mangan ibana di jabu ni pamimpin ni halak Parise. Tingki borhat ibana tu Jerusalem, godang ma halak mangihuthon ibana. Tutu do rade nasida mangihuthon Jesus nang pe godang tanggung jawabna?

Tingki mardalan, didok Jesus ma, “Ndang boi gabe siseanku manang ise pe na ro tu ahu alai humolong rohana tu amana, tu inana, tu tunggane boruna, tu ianakhonna, tu haha anggina, tu ibotona dohot tu dirina sandiri sian tu ahu.” (Lukas 14:26) Gabe tarsonggot ma nasida mambege i. Aha do lapatan ni hata ni Jesus i?

Ndang didok Jesus na so boi angka siseanna mangkaholongi keluarga ni nasida. Alai ingkon humolong do roha ni nasida tu Jesus sian tu keluarga. Unang ma songon baoa na di tudosan ni Jesus, na so ro tu ulaon ni halak na manggokkon ibana ala baru mangoli.​—Lukas 14:20.

Taparrohahon ma hata ni Jesus na mandok ingkon humolong roha ni sahalak sisean tu ibana sian “tu dirina sandiri”. Lapatanna, rade ibana mate laho patuduhon holongna tu Jesus. Tangkas ma, tanggung jawab na balga do gabe sisean ni Kristus jala ingkon jolo manat dipingkiri.

Ingkon olo do sahalak sisean manaon hasusaan dohot paraloan, ai didok Jesus do, “Manang ise na so manuhuk hau partinaonanna jala na so mangihuthon ahu ndang boi gabe siseanku.” (Lukas 14:27) Jala ingkon olo do sahalak sisean manaon parungkilon songon na ditaon Jesus. Gariada didok Jesus do na laho dibunu musuna ibana.

Alani i, ingkon manat do dipingkiri angka halak i aha do na laho diadopi nasida molo gabe sisean ni Kristus. Dung i dipaboa Jesus ma sada tudosan, “Umpamana, ise sian hamu na naeng pajongjongkon sada menara so jolo hundul mangetong sipalaoonna laho mangida atik na tuk do hepengna pasaehon i? Molo ndang, olo do holan fondasina na boi pajongjongonna, alai ndang tolap ibana pasaehon i.” (Lukas 14:28, 29) Andorang so gabe sisean ni Jesus, ingkon tangkas do botoon ni nasida tanggung jawab ni sahalak sisean. Dipatangkas Jesus ma muse on marhite tudosan na asing:

“Molo adong sahalak raja rap dohot 10.000 tentarana naeng marporang mangalo raja na asing rap dohot 20.000 tentarana, nda jolo hundul ibana mangido poda sian na asing atik na boi do ibana monang? Alai molo dihilala ibana ndang tolapsa, suruonna ma sahalak suruan mangido pardamean tingki dao dope musuna i.” Laho patangkashon podana, didok Jesus ma, “Alani i ingot ma, ndang adong nanggo sahalak pe sian hamu na so manadingkon sude artana na boi gabe siseanku.”​—Lukas 14:31-33.

Alai ndang holan tu nasida didok Jesus hata on. Sude na naeng mangihuthon Kristus, ingkon olo do mangulahon na nidokna i. Lapatanna ingkon rade do nasida agoan artana nang ngoluna. Alani i, ingkon jolo dipingkiri jala ditangiangkon do andorang so gabe sisean ni Jesus.

Dung i dipaboa Jesus ma hata na hea didok ibana tu angka siseanna tingki marjamita di dolok, na mandok “hamu do sira ni tano on”. (Mateus 5:13) Boi do sira mambahen asa unang mura busuk sipanganon. Suang songon i ma, boi do angka siseanna mangurupi asa unang sega parange dohot parale-aleon ni halak tu Debata. Didok Jesus ma muse, “Denggan do sira i alai molo mago do ansim ni sira i, aha be bahenon laho paansimhon i?” (Lukas 14:34) Diboto nasida do, ndang ansim be sira molo marcampur tu na asing jala ndang adong be guna ni i.

Tarida do sian hata ni Jesus i, gari naung leleng gabe siseanna pe boi do gabe ndang togu be. Molo ndang togu be nasida, ndang adong be gunana, dos songon sira naung mago ansimna. Rehean ni halak ma nasida jala sogo ma roha ni Debata tu nasida nang pe hea dibaritahon goar ni Debata. Dijujui Jesus ma angka siseanna asa unang gabe songon i, didok ma, “Manang ise na marpinggol, dibege ma i.”​—Lukas 14:35.