Si Abraham do Ama ni Nasida manang Sibolis?

Di Jerusalem dope Jesus mangarayahon Perayaan Tabernakel. Dung i dipaboa Jesus ma parsiajaran na ringkot. Andorang so i, adong ma halak Jahudi na mandok tu ibana, “Pinompar ni si Abraham do hami. Ndang hea hami diparhatoban manang ise pe.” Dialusi Jesus ma, “Huboto do hamu pinompar ni si Abraham. Alai naeng dibunu hamu do ahu, ala ndang dijalo hamu hatangki. Angka na huida tingki rap dohot Damang, i do na huhatahon. Alai na dibege hamu sian amamuna, i do diulahon hamu.”​—Johannes 8:33, 37, 38.

Tangkas do na pinaboa ni Jesus disi, asing do Amana tu ama ni nasida. Alai ndang diantusi halak Jahudi na nidokna i. Didok ma muse, “Si Abraham do amanami.” (Johannes 8:39; Jesaya 41:8) Tutu, pinompar ni si Abraham do nasida. Alani i, dirimpu nasida ma togu haporseaon ni nasida songon si Abraham ale-ale ni Debata.

Songgot do roha ni nasida mambege alus ni Jesus, “Molo na tutu do hamu anak ni si Abraham, ulahononmuna do ulaon ni si Abraham.” Ai tiruon ni dakdanak do amana. Alani i didok Jesus ma, “Alai naeng bunuonmuna do ahu, ala hupaboa hasintongan na hubege sian Debata. Ndang bahenon ni si Abraham songon i.” Dung i didok Jesus ma, “Diulahon hamu do na niulahon ni amamuna.” Gabe sungkun-sungkun ma roha ni nasida mambege i.​—Johannes 8:39-41.

Alai ndang diantusi halak Jahudi dope ise maksud ni Jesus. Didok nasida ma, “Ndang alani seks na so patut hami tubu. Sada do Amanami i ma Debata.” Tutu do Debata ama ni nasida? Jesus mandok, “Molo Debata do Amamuna, haholonganmuna do ahu. Ai ro pe ahu tuson, Debata do na marsuru ahu. Ndang alani lomo ni rohangku sandiri ahu ro, alai Ibana do na marsuru ahu.” Dung i didok Jesus ma, “Boasa ndang diantusi hamu na hudok? Ai so ditangihon hamu hatangki.”​—Johannes 8:41-43.

Tangkas do dipaboa Jesus aha na masa molo ndang dijalo nasida ibana. Didok Jesus ma, “Sibolis do amamuna jala lomo do rohamuna mangulahon lomo ni roha ni amamuna i.” Didok ma muse, “Pambunu do ibana sian mulana jala ndang hot ibana di hasintongan.” Didok Jesus muse, “Manang ise na ro sian Debata, tangihononna do hata ni Debata. Alai ndang olo hamu manangihon, ala ndang sian Debata hamu.”​—Johannes 8:44, 47.

Muruk ma halak Jahudi mambege i, ninna ma, “Nda sintong do molo hudok hami halak Samaria ho jala na sinonggopan ni suru-suruan na jahat?” Dialo nasida do ibana. Alai dialusi Jesus ma, “Ndang na sinonggopan ni suru-suruan na jahat ahu, Damang do na hupasangap alai ndang dipasangap hamu ahu.” Alani i, didok ibana ma, “Manang ise na mangoloi hatangku ndang mate be ibana saleleng ni lelengna.” Maksud Jesus dison, ndang na so mate angka apostel dohot angka na mangihuthon ibana. Alai ndang hilalaon ni nasida hamatean na saleleng ni lelengna alani “hamatean na paduahon”.​—Johannes 8:48-51; Pangungkapon 21:8.

Gabe sala mangantusi do halak Jahudi tu hata ni Jesus. Didok ma, “Tangkas ma huboto hami na sinonggopan ni suru-suruan na jahat do ho. Ai mate do si Abraham songon i nang angka panurirang. Hape didok ho manang ise na manangihon hatam, ndang mate ibana. Umbalga ma ho sian amanami si Abraham? . . . Ise ma ho didok roham?”​—Johannes 8:52, 53.

Tangkas ma dipatuduhon Jesus na Messias ibana. Alai ndang pintor dialusi ibana hata ni nasida. Didok ma, “Molo ahu pasangaphon diringku, ndang marlapatan hasangaponki. Damang i do na pasangaphon ahu, na nidokmuna i Debatamuna. Ndang ditanda hamu Ibana, alai ahu hutanda do Ibana. Molo hudok ndang hutanda Ibana, pargabus ma ahu songon hamu.”​—Johannes 8:54, 55.

Dipaboa Jesus ma muse taringot tu ama ni nasida. Didok ma, “Marlas ni roha do amamuna si Abraham naeng marnida harorongku, saut do i diida ibana, gabe las ma rohana.” Porsea do si Abraham tu janji ni Debata jala lomo do rohana naeng mangida Messias. Alai ndang porsea halak Jahudi, didok ma, “So gok dope umurmu 50 taon, sian dia ma diida ho si Abraham?” Dialusi Jesus ma, “Tutu do na hudok on tu hamu, andorang so adong si Abraham, nunga adong ahu.” Maksud ni Jesus disi, i ma hangoluanna tingki di surgo.​—Johannes 8:56-58.

Muruk situtu ma halak Jahudi mambege i. Naeng didanggur nasida ma Jesus, alai martabuni ma ibana.