Didia do Halak Naung Mate?

1-3. Aha do sungkunsungkun taringot halak naung mate, jala songon dia do angka agama mangalusi on?

DIPABOA di Bibel, sada tingki ”ndang adong be hamatean”. (Pangungkapon 21:4) Songon na taparsiajari di pasal 5, alani tobusan boi hita mangolu salelenglelengna. Alai, sahat tu saonari tongtong dope mate jolma. (Parjamita 9:5) Olo do sungkunsungkun rohanta, aha do na masa tu halak naung mate?

² Sungkunsungkun sisongon on jotjot ro tu rohanta tingki marujung ngolu halak na tahaholongi: Tudia do ibana laho? Diida ibana dope hita? Boi do urupanna hita? Boi dope pajumpang dohot ibana?

³ Marragam do alus sian angka agama taringot tu halak naung mate. Deba mandok, molo halak na burju laho tu surgo, alai halak na jahat tu api na roko. Deba nai mandok, molo mate, laho ma tondina mandapothon keluargana naung jumolo marujung ngolu. Adong muse mandok, molo mate sasahalak, diuhumi dung i ditubuhon ma ibana muse gabe halak na asing.

 4. Dia do pardos ni ajaran ni angka agama taringot tu na mate?

⁴ Nang pe marragam alus ni angka agama taringot tu halak naung mate, alai sarupa do na niajarhon nasida. Didok nasida, molo mate jolma mangolu dope tondina. Tutu do i?

5, 6. Aha do na masa tu halak naung mate?

⁵ Diboto Jahowa do aha na masa tu halak naung mate. Dipaboa Ibana do tu hita dung mate sasahalak, ndang adong be ibana. Balik ni hangoluan do hamatean. Jadi, dung mate sasahalak ndang adong be pingkiran dohot pangkilalaanna jala ndang adong be na tongtong mangolu sian ibana.a Halak naung mate ndang boi marnida, marbinege manang marpingkir.

⁶ Raja Salomo manurathon, ”Alai anggo halak naung mate ndang diboto agia aha.” Ndang adong be holong ni rohana dohot sogo ni rohana jala ”ndang adong be masa ulaon, manang panimbangon, manang parbinotoan, manang hapistaran anggo di bagasan parbeguan [kuburan] sitopotonmu sogot”. (Jaha Parjamita 9:5, 6, 10.) Psalmen 146:4 paboahon tu hita, molo halak naung mate nunga mago sude ”sangkapsangkapna”.

 7. Aha do dipaboa Jesus taringot halak naung mate?

⁷ Tingki mate si Lasarus, didok Jesus tu angka siseanna, ”Nunga modom si Lasarus, alealenta i.” Alai, na nidok ni Jesus ndang na modom songon na somal si Lasarus, alai na mate do. Ala didok ibana muse, ”Nunga mate si Lasarus.” (Johannes 11:11-14) Dipatudos Jesus halak na mate songon na modom. Ndang didok ibana si Lasarus di surgo manang mandapothon keluargana naung jumolo marujung ngolu. Jala, ndang adong didok si Lasarus di api na roko manang ditubuhon muse ibana gabe jolma na asing. Alai, dipatudos Jesus do si Lasarus naung mate songon na renges modom. Dipaboa muse di Bibel, andorang so dipahehe boru ni si Jairus didok Jesus do, ”ndang na mate ibana, na modom do!”

 8. Sian dia taboto jolma ditompa Debata ndang na laho mate?

⁸ Na laho mate do si Adam dohot si Hawa ditompa Debata? Ndang! Ditompa Jahowa nasida tipak jala asa mangolu salelenglelengna. Tingki ditompa jolma, disuanhon do roha hangoluan salelenglelengna tu bagasan roha nasida. (Parjamita 3:11) Songon natuatua, ndang lomo rohana mangida ianakhonna dung magodang gabe matua jala mate. Songon i ma pangkilalaan ni Jahowa tu hita. Molo sangkap ni Debata asa mangolu salelenglelengna hita, boasa ma mate hita?

 9. Boasa ndang na maol oloan ni si Adam dohot si Hawa parenta ni Jahowa?

⁹ Tingki di porlak Eden, dipaboa Jahowa do tu si Adam, ”Jadi do panganonmu sian nasa hau di bagasan porlak on. Alai, anggo sian hau parbinotoan ni na denggan dohot na roa, ndang jadi panganonmu; ai sadari dipangan ho sian i, sai na mate do ho.” (1 Musa 2:9, 16, 17) Ndang na maol mangoloi parenta on jala tama do Jahowa manontuhon na denggan manang na ndang. Molo dioloi nasida Jahowa, patuduhon na unduk do nasida tu pamarentaonNa jala patuduhon hamauliateonna tu sude na nilehon ni Jahowa tu nasida.

10, 11. (a) Songon dia do dibahen Sibolis mangotootoi si Adam dohot si Hawa? (b) Boasa ndang tama be nasida dapotan asi ni roha ni Jahowa?

¹⁰ Alai, ndang dioloi si Adam dohot si Hawa Jahowa. Didok Sibolis tu si Hawa, ”Tongon do didok Debata, na so jadi panganonmuna sian saluhut hau angka na di porlak on?” Dialusi si Hawa ma, ”Jadi do panganon nami sian parbue ni hau angka na di porlak on. Alai anggo sian parbue ni hau, na di parsitongaan ni porlak i didok Debata do: Unang pangan hamu sian i, jala unang jama hamu, asa unang mate hamu.”​—1 Musa 3:1-3.

¹¹ Didok Sibolis ma muse, ”Ndang na tutu hamu mate. Ai diboto Debata do, sadari dipangan hamu sian i, tonggor ma matamuna, gabe doshon Debata hamu umboto na denggan dohot na roa.” (1 Musa 3:4-6) Lomo roha ni Sibolis asa diboto si Hawa na boi do ibana mamillit aha na denggan dohot na so denggan tu dirina sandiri. Alai, margabus do Sibolis. Dung i dipangan si Hawa ma parbue ni hau i jala dilehon tu si Adam. Diboto si Adam dohot si Hawa do na so boi panganonna parbue ni hau i. Tingki dipangan, nasida mamillit ndang mangoloi parenta ni Jahowa naung tangkas dipaboa tu nasida jala on patuduhon na so unduk nasida tu Jahowa. Alani i, ndang tama be si Adam dohot si Hawa dapotan asi ni roha ni Jahowa!

12. Songon dia do pangkilalaan ni Jahowa ala dilaosi si Adam dohot si Hawa parentaNa?

¹² Pangalaosion ni si Adam dohot si Hawa on mambahen jut roha ni Jahowa! Songon dia do pangkilalaanmu molo dialo ianakhonmu parentamuna hape nunga loja hamu pagodanggodang nasida? Hansit do rohamu?

13. Tingki didok Jahowa tu si Adam ”tu tano do ho mulak sogot” aha do lapatanna?

¹³ Ala ndang dioloi si Adam dohot si Hawa parenta ni Jahowa, ndang mandapot hangoluan salelenglelengna be nasida. Didok Jahowa tu si Adam, ”Ai tano do ho, jala tu tano do ho mulak sogot.” (Jaha 1 Musa 3:19.) Lapatanna, dung mate si Adam gabe tano ma jala ndang adong be ibana.​—1 Musa 2:7.

14. Boasa ma mate jolma?

¹⁴ Molo dioloi si Adam dohot si Hawa parenta ni Jahowa, tongtong ma nasida mangolu sahat tu saonari. Alai, ala ndang dioloi parenta ni Jahowa, gabe mardosa jala mate ma nasida. Dosa dos songon sahit turunan na tatean sian natuatuanta. Sude hita nunga ditubuhon di bagasan dosa, alani i do hita gabe mate. (Rom 5:12) Alai, ndang songon on sangkap ni Debata tu jolma. Ndang lomo roha ni Debata jolma mate, didok di Bibel hamatean i ”musu”.​—1 Korint 15:26.

15. Songon dia do parbinotoan na sintong taringot hamatean boi paluahon hita?

¹⁵ Parbinotoan na sintong taringot hamatean paluahon hita sian angka pandapot na sala. Diajarhon Bibel tu hita halak na mate ndang mangkilala na hansit manang na lungun. Ndang boi be nasida mangkatai manang mangurupi hita jala pabiarbiarhon hita. Hita pe tongtong ndang boi mambahen sisongon i tu nasida. Godang agama mangajarhon mangolu dope tondi ni na mate jala boi dope urupanta nasida molo talehon hepeng tu na manangiangkon. Alai, molo taboto parbinotoan na sintong taringot hamatean, ndang boi be hita dipaotooto.

16. Gabus aha do na diajarhon ni godang agama taringot halak na mate?

¹⁶ Dipangke Sibolis do agama na so sintong manggabusi hita asa tahaporseai na mangolu dope tondi ni na mate. Godang agama mangajarhon, mangolu dope tondi ni na mate. Songon i do diajarhon agamamu tu hamu manang songon na diajarhon Bibel do dihaporseai hamu? Saonari, dibahen Sibolis dope gabus laho padaohon jolma sian Jahowa.

17. Boasa ajaran api na roko ndang pasangaphon Jahowa?

¹⁷ Aha na diajarhon ni godang agama mambahen songgot rohanta. Songon na diajarhon ni deba agama, halak na jahat dipasiaksiak di api na roko salelenglelengna. Alai ajaran sisongon on ndang na pasangaphon Jahowa. Alana, ndang hea dibahen Ibana songon i tu jolma! (Jaha 1 Johannes 4:8.) Songon dia do hamu mangida sada ama na manguhum anakna, manutung tangan ni anakna i tu api? Sogo do rohanta mangida i jala ndang lomo rohanta mardongan tu jolma sisongon i. Lomo do roha ni Sibolis molo songon i pangkilalaanta mangida Debata Jahowa!

18. Boasa ndang porlu habiaranta halak naung mate?

¹⁸ Deba agama mangajarhon gabe tondi do jolma molo mate. Agama na asing muse mandok ingkon habiaran do halak na mate, ala nasida boi mangurupi manang manusai hita. Godang na manghaporseai ajaran on gabe mangalehon pelean tu na mate. Taingot ma, ndang mangkilala manang aha be na mate. Alani i, unang ma mabiar hita tu nasida. Jahowa do sitompa hita. Ibana do Debata na sintong jala holan Ibana do na tama sombaonta.​—Pangungkapon 4:11.

19. Aha do labana di hita molo taboto hasintongan taringot tu na mate?

¹⁹ Dung taboto hasintongan taringot tu na mate, malua ma hita sian gabus ni angka agama. Jala, hasintongan on mangurupi hita mangantusi bagabaga ni Jahowa di ngolunta dohot pangkirimonta tu ari na naeng ro.

20. Aha do na laho taparsiajari di pasal na mangihut?

²⁰ Najolo, sahalak naposo ni Jahowa na margoar si Job mandok, ”Ia dung mate baoa i, tung tagamon ma ulahanna mangolu?” (Job 14:14) Tutu do halak naung mate boi mangolu muse? Na nidok ni Jahowa tu hita marhite Bibel, mangapuli rohanta. Taparsiajari ma on di pasal na mangihut.