Dipahehe ma Si Lasarus

Dung pajumpang Jesus tu si Marta dohot si Maria, laho ma nasida tu kuburan ni si Lasarus. Di liang batu do ibana dikubur jala adong do batu manutup kuburan i. Didok Jesus ma, “Handit hamu ma batu i.” Ala ndang diboto si Marta na laho bahenon ni Jesus, didok ma, “Nunga bau i Tuan, ai nunga opat ari ibana dikubur.” Alai didok Jesus ma, “Ndang naung hudok tu ho, molo porsea ho idaonmu ma hasangapon ni Debata?”​—Johannes 11:39, 40.

Dihandit ma batu i. Diida Jesus ma tu ginjang jala martangiang ma ibana, “Mauliate ma di Ho Amang, ala ditangihon Ho do ahu. Huboto do sai ditangihon Ho do ahu. Alai hudok pe on, alani jolma natorop na jongjong dison do, asa porsea nasida na Ho do marsuru ahu.” Martangiang do Jesus di jolo ni nasida. Gabe diboto nasida ma Jahowa do na mangalehon huaso tu ibana. Dung i, gogo ma dijouhon ibana, “Lasarus, hehe ma ho!” Kaluar ma si Lasarus, lilit dope abit tu patna dohot tu tanganna songon i nang tu bohina. Didok Jesus ma muse, “Bungkai hamu ma i, asa boi ibana mardalan!”​—Johannes 11:41-44.

Gabe porsea ma angka halak na mangapuli si Maria dohot si Marta, ai diida nasida do na binahen ni Jesus. Alai adong do na paboahon na masa i tu halak Parise. Alani i, marpungu ma halak Parise dohot angka malim kepala di Sanhedrin, i ma pengadilan tinggi ni halak Jahudi. Dohot do marpungu sintua ni malim, i ma si Kayapas. Adong ma sian nasida na mandok, “Aha ma sibahenonta? Ai nunga godang dibahen ibana tanda halongangan. Molo tapasombu ibana songon i, sude ma halak porsea tu ibana, gabe ro ma halak Rom mangarampas bagas joronta on dohot bangsonta.” (Johannes 11:47, 48) Nang pe diboto nasida angka tanda halongangan manang mukjizat na binahen ni Debata marhite Jesus, alai ndang las roha ni nasida. Holan hasangapon ni nasida do na dipingkiri nasida.

Marhite haheheon ni si Lasarus, tangkas ma tarida na sala do hata ni halak Saduse na mandok ndang adong haheheon. Halak Saduse do si Kayapas, alani i didok ibana ma, “Ndang adong diboto hamu manang aha, jala ndang diboto hamu, tumagon do mate sahalak jolma paluahon sada bangso, sian apala mate sude bangso i.”​—Johannes 11:49, 50; Ulaon ni Apostel 5:17; 23:8.

Alai ndang sian rohana ibana mandok hatana i. Debata do na mambahen ibana mandok i. Maksud ni si Kayapas, ingkon dibunu do Jesus asa tongtong adong na mangihuthon ajaran ni angka pamimpin agama. Alai marhite hatana i, disurirangkon ibana ma taringot tu hamamate ni Jesus laho paradehon tobusan. Diparade do i tu sude “anak ni Debata na marserak”, ndang holan tu halak Jahudi.​—Johannes 11:51, 52.

Alani hata ni si Kayapas i, naeng dibunu nasida ma Jesus. Anggota ni Sanhedrin do nang si Nikodemus. Burju do ibana tu Jesus. Alani i, paboaonna do on tu Jesus? Ndang taboto, alai olo do ra alani i pintor laho Jesus sian Jerusalem. Ai ndang dapot dope tingki naung ditontuhon Debata asa mate ibana.