Dalan, Hasintongan, Dohot Hangoluan

Tontu las do rohamuna mambege barita na uli, ndang i? Adong do barita na mansai uli tu hamu dohot tu keluargamuna.

Dibahen do i di Bibel. Martaon-taon naung salpu, dilehon Debata Jahowa do tondi parbadiana tu piga-piga baoa laho manurathon barita na uli i. Di buku on taparsiajari ma barita na uli na sinurat ni si Mateus, si Markus, si Lukas, dohot si Johannes.

Adong do halak na mandok goar ni buku na opat i, Injil manang Barita na Uli taringot tu Jesus. Dipaboa do di angka buku i, marhite Jesus do Debata paluahon angka jolma. Jala dung gabe Raja Jesus di Harajaon ni Debata, lehononna ma pasu-pasu tu halak na porsea tu ibana.​—Markus 10:17, 30; 13:13.

Ra, sungkun-sungkun do rohamuna, ‘Boasa pola ingkon opat halak na manurat hangoluan ni Jesus dohot na niajarhonna?’

Umpamana rimangi ma adong sahalak guru na tarbarita. Adong ma opat halak na mangihuthon ibana. Siopat halak i jongjong di humaliang ni guru i. Na parjolo, sijalo pajak, na paduahon dokter, na patoluhon sijala dengke jala ale-ale ni guru i. Na paopathon, i ma sahalak na poso na mamparrohahon sude na masa i. Jala ibana do na umposo sian nasida. Marasing-asing do cara ni nasida paboahon hatorangan taringot tu guru i. Alai sintong do sudena. Jala molo tajaha sude buku na opat i, tadapot ma godang hatorangan na mambahen hita lam tangkas mananda guru i, i ma Jesus.

Sijalo pajak i manurat hatoranganna tu halak Jahudi. Alani i, disurat ibana ma angka hatorangan i mamangke cara na mura diantusi halak Jahudi. Alai ndang sai sarupa na sinurat ni dokter i, tu na sinurat ni sijalo pajak i. Gariada, gumodang do disurat ibana taringot tu Jesus na pamalumhon na marsahit. Dung i, ale-ale ni guru i manurat pangkilalaan dohot parange ni guru i. Jala baoa na poso i, manurathon hatorangan na jempek alai tangkas. Alai na rumingkot sian sudena i, sintong do sude na sinurat ni nasida. Hatorangan ni na opat halak i mangurupi hita lam mananda pangalaho ni Jesus, ulaonna, dohot na niajarhonna.

Sipata adong do na mandok “Barita na uli na sinurat ni si Mateus”, manang “Barita na uli na sinurat ni si Johannes”. Tutu, boi do didok songon i. Alana sudena i marisi “barita na uli taringot tu Jesus Kristus”. (Markus 1:1) Alai sasintongna, sada do barita na uli taringot tu Jesus, i ma na adong di buku na opat i.

Godang do parsiajar Bibel na mambandingkon hatorangan dohot angka na masa na adong di buku na opat i. Dung i, disusun nasida ma muse na masa i mangihuthon urutanna. Umpamana, songon si Tatian na sian Siria. Ibana mandok, sintong do sude hatorangan na adong di buku na opat i. Jala tarida do na sian Debata angka na sinurat ni apostel i. Di taon 170 M, dibahen ibana ma buku na marisi taringot tu hangoluan ni Jesus mangihuthon urutanna. Digoari do buku i Diatessaron.

Songon i ma nang di buku Jesus—Dalan, Hasintongan, dohot Hangoluan. Disusun do buku on mangihuthon urutanna. Alai tumangkas do hatorangan na dipaboa di buku on. Alana saonari, nunga lam taantusi be lapatan ni surirang dohot tudosan ni Jesus. Jala nunga taboto lapatan ni hata ni Jesus dohot ulaonna, gabe taboto ma dia na parjolo masa di hangoluan ni Jesus. Asing ni i, penemuan ni angka ahli mangurupi hita mangantusi hatorangan na sinurat ni angka apostel i, dohot na tinuju ni nasida. Tutu, ndang boi tangkas taboto sude urutan ni angka hatorangan di buku na sinurat ni angka apostel i. Alai di buku Jesus—Dalan, Hasintongan, dohot Hangoluan, disusun do angka hatorangan i mangihuthon urutan na boi dapot roha.

Tingki dijaha hamu buku on, rimangi ma aha do laba ni parsiajaran i tu hamu dohot tu keluargamuna. Ingot ma hata ni Jesus tu si Tomas, “Ahu do dalan dohot hasintongan dohot hangoluan. Ndang adong na boi ro tu Ama i molo so marhite ahu.”​—Johannes 14:6.

Marhite buku Jesus—Dalan, Hasintongan, dohot Hangoluan, diurupi ma hita laho mangantusi Jesus do “dalan”. Lapatanna, holan marhite-hite Jesus do hita martangiang tu Jahowa. (Johannes 16:23; Rom 5:8) Jala holan marhite-hite ibana do hita boi marale-ale tu Debata.

Jesus do “hasintongan”. Lapatanna, sintong do sude hata ni Jesus. Jala sintong do sude na niulahonna. Godang do surirang na “saut” marhite-hite ibana. (2 Korint 1:20; Johannes 1:14) Sude surirang i patuduhon, marhite Jesus ma saut sude sangkap ni Debata.​—Pangungkapon 19:10.

Jesus do “hangoluan”. Lapatanna, marhite tobusanna boi ma tadapot “hangoluan na saleleng ni lelengna”. (1 Timoteus 6:12, 19; Epesus 1:7; 1 Johannes 1:7) Jala gabe “hangoluan” do ibana di marjuta halak naung mate. Ai paheheonna do nasida asa mangolu saleleng ni lelengna di Paradeiso.​—Johannes 5:28, 29.

Ingkon taargai do angka ulaon ni Jesus laho pasauthon sangkap ni Debata. Anggiat ma las rohamuna marsiajar sian Jesus, i ma “dalan dohot hasintongan dohot hangoluan”.