‘Mangihutton Bogas ni Patna’

1-2. Menurut sada referensi ni Bibel, boasa dipatudos Jesus tu sahalak pemandu? Paboa ma ilustrasina.

BAYANGKON ma molo dohot hamu bergabung tu grup pendaki gunung. Dalan na ikkon dilewati hamu berbahaya jala margambo. Alai adong do pemandu na marpengalaman mandongani hamu. Nang pe nga dao ibana mardalan di jolo alai ala tinggal do bogas ni patna di gambo i, dang panik manang mabiar hamu. Alana boi do diihutton hamu bogas ni pat ni pemandu i.

² Sude halak Kristen dipatudos do songon pendaki gunung na mardalan mangalewati daerah na berbahaya, i ma portibi na jahat on. Alai dilean Jahowa do pemandu na sempurna tu hita, i ma Anakna Jesus Kristus. Adong do bogas ni pat ni Jesus na boi taihutton. (1 Ptr. 2:21) Menurut sada referensi ni Bibel, dipatudos si Petrus do Jesus tu sahalak pemandu. Songon pemandu na maninggalhon bogas ni patna, Jesus pe ditinggalhon do bogas ni patna asa boi taihutton. Saonari, taalusi ma tolu sukkun-sukkun on: Aha do artina mangihutton bogas ni pat ni Jesus? Boasa ikkon taihutton bogas ni patna i? Jala songon dia do carana mangihutton i?

 3. Aha do artina mangihutton bogas ni pat ni sasahalak?

³ Aha do artina mangihutton bogas ni pat ni sasahalak? Molo di Bibel hata “dalan” dohot ‘pat’ jotjot do dipakke lao mandok standar na diihutton sasahalak di ngoluna. (1 Mus. 6:9; Poda 3:23) Pengalaman ni sasahalak na boi tiruon, sarupa do i songon bogas ni pat na boi diihutton. Jadi mangihutton bogas ni pat ni sasahalak lapatanna maniru teladanna.

 4. Aha do artina mangihutton bogas ni pat ni Jesus?

⁴ Attong, aha do artina mangihutton bogas ni pat ni Jesus? Mangihutton bogas ni pat ni Jesus artina mangihutton teladanna. Songon ayat tema ni artikel on, didok si Petrus sitiruon na denggan do Jesus ala martahan nang pe dianiaya. Alai dang holan i, godang nai dope na boi tatiru sian Jesus. (1 Ptr. 2:18-25) Termasuk ma i, sude na dihatahon dohot na diulahon ibana.

 5. Boi do hita jolma na so sempurna maniru Jesus na sempurna?

⁵ Boi do hita jolma na so sempurna maniru Jesus na sempurna? Boi. Alana na didok si Petrus ikkon berupaya do hita sian nasa gogotta mangihutton teladan ni Jesus, dang na ikkon sempurna. Dung i boi ma taulahon hata ni si Johannes na mandok, ‘Ihutton ma bogas ni pat ni Jesus.’​—1 Joh. 2:6, surat na di toru.

6-7. Boasa boi lam jonok hita tu Jahowa molo taihutton bogas ni pat ni Jesus?

⁶ Molo taihutton bogas ni pat ni Jesus, lam jonok ma hita tu Jahowa. Boasa songon i? Alasan na parjolo, ala sai diulahon Jesus do lomo ni roha ni Jahowa. (Joh. 8:29) Jadi molo taihutton bogas ni pat ni Jesus las ma roha ni Jahowa tabaen. Jala molo berupaya hita marale-ale tu Jahowa, gabe olo ma Bapakta na di surgo i jonok tu hita.​—Jak. 4:8.

⁷ Alasan na paduahon, ala sempurna do Jesus maniru Jahowa. I do alana didok Jesus, “Manang ise na mangida au, nungnga diida ibana Damang i.” (Joh. 14:9) Jadi tatiru ma sifat ni Jesus dohot cara ni ibana mangurupi akka halak. Misalna asi do roha ni Jesus mangida na marsahit kusta, mangida borua na marsahit na parah, jala diapuli ibana do akka halak na marlungun ni roha alani hamatean. (Mrk. 1:40, 41; 5:25-34; Joh. 11:33-35) Molo tatiru Jesus na maniru Jahowa do hita disi. Jala molo tatiru Jahowa, gabe lam jonok ma hita tu Ibana.

 8. Boasa boi tataluhon portibi on molo taihutton bogas ni pat ni Jesus?

⁸ Molo taihutton bogas ni pat ni Jesus, gabe dang taihutton be portibi on. Di borngin andorang so mate Jesus, didok ibana do, “Nungnga hutaluhon portibi on.” (Joh. 16:33) Maksud ni Jesus di ayat on, dang terpengaruh ibana tu cara marpikkir dohot pangalaho ni halak na di portibi on. Sai diingot Jesus do tujuanna disuru tu tano on, i ma pabadiahon goar ni Jahowa. Saonari godang do di portibi on na boi mambahen hita dang fokus manomba Jahowa. Alai molo tatiru Jesus, torus hita fokus manomba Jahowa, boi ma hita “manaluhon” portibi on.​—1 Joh. 5:5.

 9. Aha do na ikkon taulahon asa dapotta hangoluan na saleleng ni lelengna?

⁹ Molo taihutton bogas ni pat ni Jesus, dapotta ma hangoluan saleleng ni lelengna. Hea do disukkun sahalak bawa na mora tu Jesus songon dia carana mandapot hangoluan na saleleng ni lelengna. Didok Jesus ma, “Ihutton ma au.” (Mat. 19:16-21) Hea do muse didok Jesus tu halak Jahudi na so porsea tu ibana songon on, “Diihutton [biru-birukku] do au. Lehonokku do hangoluan na saleleng ni lelengna tu nasida.” (Joh. 10:24-29) Jala tu si Nikodemus, anggota ni Sanhedrin na lomo rohana mambege ajaran ni Jesus, didok Jesus do, ‘Na patuduhon haporseaon tu [au] do na mandapot hangoluan na saleleng ni lelengna.’ (Joh. 3:16) Molo porsea hita tu Jesus, pasti taihutton do sude na diajarhon dohot na diulahon ibana. Hasilna, dapotta ma hangoluan na saleleng ni lelengna i.​—Mat. 7:14.

10. Songon dia do carana asa lam takkas tatanda Jesus? (Johannes 17:3)

¹⁰ Asa boi taihutton bogas ni pat ni Jesus, ikkon jolo takkas do tatanda ibana. (Jaha Johannes 17:3.) Asa lam takkas tatanda Jesus, ikkon torus do taparsiajari akka sifatna, cara marpikkirna, dohot parettana. Dang soal sadia leleng hita di hasittongan, ikkon torus do berupaya hita mananda Jahowa dohot Jesus, Anakna i.

11. Aha do na disurat di bukku Mateus, Markus, Lukas, dohot Johannes?

¹¹ Disurat do parngoluan ni Jesus di bukku Mateus, Markus, Lukas, dohot Johannes. Disurat do disi akka na diulahon Jesus, na dihatahon ibana, dohot songon dia pakkilalaanna. Jadi, asa lam takkas tatanda Jesus, tajaha ma opat bukku on. Molo taulahon i, gabe boi ma taihutton teladan ni Jesus. (Heb. 12:3) Hira na ditinggalhon Jesus do bogas ni patna di opat bukku i. Jadi molo taparsiajari opat bukku i, sarupa do i songon na mangihutton bogas ni pat ni Jesus.

12. Asa godang manfaat na tadapot sian bukku Mateus, Markus, Lukas dohot Johannes, aha do na ikkon taulahon? 

¹² Dang godang manfaat na tadapot sian opat bukku i molo holan tajaha sambing. Ikkon tabahen do tikki lao mamparsiajari bukku i, jala mangarimangi cara mangulahon i. (Bandingkon tu Josua 1:8.) Saonari, tabahas ma dua cara asa boi taulahon na taparsiajari sian opat bukku i.

13. Songon dia do carana asa menarik tikki mamparsiajari opat bukku i?

¹³ Na parjolo, pakke ma cara na menarik. Bayangkon ma situasina asa boi dibege, dirasahon, jala diida hamu aha na masa. Asa mura hamu mambayangkon i, pakke ma alat riset na disediahon organisasi ni Jahowa. Ida ma ayat sebelumna dohot ayat na mangihut. Lului ma muse informasi taringot tu halak dohot inganan na dipaboa di ayat i. Bandingkon ma akka ayat na disurat di bukku Mateus, Markus, Lukas dohot Johannes. Bisa jadi adong informasi na menarik na disurat di sada bukku, alai dang adong disurat di bukku na asing.

14-15. Songon dia do carana asa boi taulahon na taparsiajari sian opat bukku i?

¹⁴ Na paduahon, ulahon ma i. (Joh. 13:17) Tikki taparsiajari sada kisah sian opat bukku i, tasukkun ma diritta, ‘Boha do carakku mangulahon na huparsiajari on? Songon dia do carana asa boi hupakke na huparsiajari i lao mangurupi dongan na asing?’ Pikkirhon ma sasahalak na porlu diurupi. Dung i lului ma tikki na pas lao paboahon parsiajaran na dapotmuna sian kisah i. Lambok jala denggan ma i paboa tu ibana.

¹⁵ Saonari taparsiajari songon dia mamakke dua cara i. Taulas ma kisah ni ina na mabalu na diida Jesus di bagas joro.

16. Jaha Markus 12:41, ceritahon ma songon dia situasi di bagas joro.

¹⁶ Pakke ma cara na menarik. (Jaha Markus 12:41.) Bayangkon ma situasina, kejadian i masa tanggal 11 Nisan 33 M. Dang gok be saminggu nai mate Jesus. Sadari i, godang do dipakke Jesus tikkina lao mangajari di bagas joro. Alai ditentang akka pamimpin agama do ibana. Adong do muse na so porsea na sian Debata dijalo Jesus huasona i. Na deba nai, dibahen do sukkun-sukkun lao menjebak ibana. (Mrk. 11:27-33; 12:13-34) Dung i, lao ma muse Jesus tu inganan na asing di bagas joro i, ra tu Alaman ni Akka Borua. Disi, diida Jesus ma poti inganan ni pelean. Dang dao sian i hundul ma ibana, jala diparrohahon ma akka halak mandabuhon hepeng tu poti i. Diida ibana do akka na mora mandabuhon godang hepeng logam tu poti i. Boi do ra dibege Jesus soara ni hepeng logam i dabu tu bagas poti i.

17. Sesuai tu Markus 12:42, aha do na diulahon ina na mabalu i?

¹⁷ Jaha Markus 12:42. Dung i, diida Jesus ma sahalak “ina na mabalu na pogos”. (Luk. 21:2) Massai susa do ngoluna. Alani pogosna ikkon berjuang do ibana asa boi mangan tiap ari. Alai nang pe songon i lao do ibana mangalean sumbangan. Didabuhon ibana ma dua hepeng logam na otik argana. Alani otikna, ra dang tarbege dabu hepeng i tu poti pelean i. Diboto Jesus do sadia godang na didabuhon ibana, dua lepton. I ma hepeng logam na massai otik argana di tikki i. Lao manuhor sada amporik pe dang cukkup. Hape pidong amporik ma pidong na ummura tikki i.

18. Sesuai tu Markus 12:43, 44, aha do didok Jesus taringot sumbangan ni ina na mabalu i?

¹⁸ Jaha Markus 12:43, 44. Hona do tu roha ni Jesus na dibahen ina na mabalu i. Dijou ibana ma akka siseanna, jala dipatudu ma tu nasida ina na mabalu i. Didok ibana, “Unggodang do na dipamasuk ina na mabalu na pogos on, sian sude na dipamasuk halak na asing.” Dung i didok Jesus ma muse, “Sude do nasida [khususna halak na mora] pamasukkon sian lobi-lobi ni hamoraonna. Alai anggo ina na mabalu on nang pe pogos, dilehon ibana do sude na adong di ibana.” Ala holan i nama hepengna, tikki dipamasuk ina na mabalu i hepengna sisaotik i tu poti pelean, hira na pasahatton ngoluna ma ibana tu Jahowa.​—Ps. 26:3.

19. Aha do na boi taparsiajari sian hata ni Jesus taringot ina na mabalu i?

¹⁹ Ulahon ma i. Tasukkun ma diritta, ‘Aha do na boi huparsiajari sian hata ni Jesus taringot tu ina na mabalu i?’ Nang pe massai susa ngoluna, alai dilean ibana do sumbangan tu Jahowa. Jala na undenggan do na dilean. Diboto Jesus do, nang pe otik na boi tarleanna diargai Jahowa do sumbanganna i. On ma parsiajaran na penting tu hita: Molo talean na undenggan sian nasa rohatta dohot sian nasa ngolutta tu Jahowa, diargai Ibana do i. (Mat. 22:37; Kol. 3:23) Las do roha ni Jahowa molo tabahen nasa tolapta manomba Ibana. Termasuk ma i mangalean tikki dohot gogo lao marpungu dohot marbarita.

20. Aha do na boi taparsiajari sian kisah ni ina na mabalu i?

²⁰ Sian kisah ni ina na mabalu on, aha dope na boi taparsiajari? Pikkirhon ma sasahalak na porlu dipatogu. Papos ma rohana, na las do roha ni Jahowa tu ibana. Misalna, adong do ditanda hamu donganta borua na matua na marsahit-sahit, jala na marmetmet ni roha ala dang boi be jotjot marbarita na uli? Manang adong do diboto hamu donganta bawa na marsahit parah na tong marmetmet ni roha ala dang boi be taratur marpungu tu Bale Harajaon? Tahatahon ma “na denggan lao patoguhon” nasida. (Eps. 4:29) Pakke ma kisah ni ina na mabalu i lao patoguhon nasida. Jala papos ma rohana molo talean na undenggan tu Jahowa, las do rohana. (Poda 15:23; 1 Tes. 5:11) Tapuji ma nasida ala berupaya mangalean na undenggan tu Jahowa, dang soal otik manang godang. Molo tabahen songon i na mangihutton bogas ni pat ni Jesus do hita disi.

21. Aha do na porlu taulahon asa lam godang manfaat na tadapot sian bukku Mateus, Markus, Lukas, dohot Johannes?

²¹ Mandok mauliate do hita ala disurat do parngoluan ni Jesus di bukku Mateus, Markus, Lukas, dohot Johannes. Gabe lam mura ma hita maniru ibana jala mangihutton bogas ni patna. Alani i tabahen ma opat bukku on gabe bahan pelajaran pribadi manang pelajaran keluargatta. Taingot ma, asa lam godang manfaat na tadapot tikki marsiajar, ikkon tapakke do cara na menarik jala taulahon na taparsiajari i. Asing ni mamparsiajari na diulahon Jesus, porlu do tong taparsiajari hatana. Di artikel na mangihut tabahas ma hata parpudi ni Jesus andorang so mate ibana, asa boi tabuat parsiajaranna tu hita.