“Holong ni Kristus i do na Mangonjar Rohanami”

1-2. (a) Songon dia do perasaanta tikki tarimangi parngoluon dohot pelayanan ni Jesus? (b) Aha do na lao tabahas di artikel on?

TIKKI mate halak na tahaholongi pasti masihol do hita tu ibana. Mulana lungun do rohatta molo taingot muse tikki lao mate ibana, apalagi ma molo haccitan ibana di tikki i. Alai lam leleng boi do muse las rohatta tikki taingot akka na diajarhon, diulahon, dohot dihatahon ibana tu hita.

² Dos songon i ma, lungun do rohatta tikki manjaha taringot sitaonon ni Jesus sahat tu na mate ibana. Piga-piga minggu sebelum jala dukkon sae Borngin Parningotan, talean do tikkitta lao mangarimangi pengorbanan ni Jesus na massai balga i. (1 Kor. 11:24, 25) Alai las do rohatta tikki mangarimangi sude na hea diajarhon dohot diulahon Jesus tikki di tano on ibana. Dipatogu do muse rohatta tikki mangarimangi aha na diulahon Jesus saonari jala na lao bahenonna di ari na naeng ro. Molo tarimangi on sude jala tarimangi holongna tu hita, gabe tergerak ma hita lao patuduhon pangargaion tu ibana. Di artikel on, tabahas ma songon dia carana patuduhon i.

 3. Boasa mandok mauliate hita alani tobusan?

³ Gabe tamba do pangargaiotta molo tarimangi parngoluon dohot parmate ni Jesus. Tikki di tano on Jesus, diajarhon ibana do akka pasu-pasu na lao dibahen Harajaon ni Debata. Mandok mauliate do hita muse tu tobusan alana marhite tobusan i gabe boi hita marale-ale tu Jahowa dohot tu Jesus. Molo porsea hita tu Jesus, gabe adong ma harapanta mangolu salelengna jala boi pajuppang muse tu akka halak na tahaholongi naung mate. (Joh. 5:28, 29; Rom 6:23) Sasittongna dang tama hita mandapot sude pasu-pasu i jala dang tarbalos hita sude naung dilehon Jahowa dohot Jesus tu hita. (Rom 5:8, 20, 21) Alai adong do na boi taulahon lao patuduhon pangargaiotta tu nasida. Songon dia ma carana?

 4. Songon dia do si Maria Magdalena patuduhon pangargaion tu akka na dibahen Jesus tu ibana? (Ida gambar.)

⁴ Taida ma contoh ni sahalak borua Jahudi i ma si Maria Magdalena. Susa do ngoluna ala disiksa pitu suru-suruan na jahat jala merasa putus asa ma ibana alani i. Jadi bayakkon ma songon dia las ni rohana tikki dipalua Jesus ibana sian akka suru-suruan na jahat i! Ujungna gabe sisean ni Jesus ma ibana jala dipakke ibana ma tikki, gogo, dohot artana lao mendukung pelayanan ni Jesus. (Luk. 8:1-3) Nang pe diargai si Maria sude na dibahen Jesus tu ibana, alai tikki i dang diboto ibana adong dope ulaon na umbalga na lao bahenon ni Jesus di ari na naeng ro. Lao dilehon Jesus do ngoluna humokkop sude jolma asa “ganup na patuduhon haporseaon tu ibana” mandapot hangoluan saleleng ni lelengna. (Joh. 3:16) Nang pe dang diboto si Maria dope i, alai dipatudu ibana do pangargaion tu Jesus jala toktong setia. Tikki dipakkuhon Jesus di hau partinaonan, jongjong do si Maria di labbungna lao patuduhon na parduli do ibana tu Jesus jala lomo rohana patoguhon akka dongan na disi. (Joh. 19:25) Dung mate Jesus, lao ma si Maria dohot dua borua na asing mamboan rempah-rempah tu kuburan ni Jesus. (Mrk. 16:1, 2) Dipasu-pasu do si Maria alani kesetiaanna i. Boi ma ibana pajuppang dohot Jesus naung dipahehe jala makkatai tu ibana. Sada hasangapon do on di ibana, alana dang sude sisean ni Jesus na boi mandapot kesempatan i.​—Joh. 20:11-18.

 5. Songon dia do hita patuduhon pangargaion tu sude na dibahen Jahowa dohot Jesus tu hita?

⁵ Hita pe boi do patuduhon pangargaion tu sude na dibahen Jahowa dohot Jesus tu hita. Tapakke ma tikki, gogo, dohot artatta lao mendukung ulaon Harajaon. Misalna boi ma hita dohot mambangun jala mangarawat akka bangunan na dipakke lao manomba Jahowa.

 6. Boasa boi tadok tobusan i hadiah tu hita secara pribadi?

⁶ Tikki tarimangi holong ni Jahowa dohot Jesus tu hita, gabe holong ma rohatta tu nasida. (1 Joh. 4:10, 19) Gabe lam tamba ma muse holongta dung taboto bermanfaat do tobusan ni Jesus tu hita secara pribadi. On ma na disadari si Paulus. Mandok mauliate do ibana alani tobusan. Boi ma i taida sian suratna tu halak Galatia na mandok, “Anak ni Debata . . . makkaholongi au jala na mangalehon ngoluna humokkop au.” (Gal. 2:20) Alani tobusan, ditarik Jahowa do hita asa boi gabe ale-alena. (Joh. 6:44) Dipatogu do rohatta ala taboto diida Jahowa do akka na denggan sian diritta jala massai arga do ditobus Ibana hita asa boi gabe ale-alena. Pasti gabe lam tamba ma holongta tu Jesus. Alani i, tasukkun ma diritta, ‘Aha na boi hubahen lao patuduhon holongku tu nasida?’

 7. Songon na taida di gambar, songon dia do hita sude patuduhon na holong rohatta tu Jahowa dohot tu Jesus? (2 Korint 5:14, 15; 6:1, 2)

⁷ Ala holong rohatta tu Debata dohot tu Kristus gabe tergerak ma hita makkaholongi na asing. (Jaha 2 Korint 5:14, 15; 6:1, 2.) Sada carana patuduhon holongta, i ma molo semangat hita marbarita na uli tu sude halak. Unang ma tabeda-bedahon halak alani ras, suku, keadaan ekonomi, manang alani latar belakangna. Molo marbarita hita tu sude halak, on patuduhon na taulahon do lomo ni roha ni Jahowa “asa malua saluhut jolma jala boi mandapot parbinotoan na bagas taringot tu hasittongan i”.​—1 Tim. 2:4.

 8. Songon dia carana patuduhon na tahaholongi akka dongan?

⁸ Cara na asing patuduhon na holong rohatta tu Jahowa dohot tu Jesus i ma molo tahaholongi akka dongan. (1 Joh. 4:21) Taparrohahon ma akka donganta khususna tikki masa hasusaan tu nasida. Tahibur ma akka dongan na lungun rohana ala mate halak na dihaholongi nasida. Takunjungi ma akka dongan na marsahit jala tapatogu ma akka dongan na kecil hati. (2 Kor. 1:3-7; 1 Tes. 5:11, 14) Tatangiakkon ma nasida ala taboto “margogo do tangiang ni halak na mangulahon na sittong”.​—Jak. 5:16.

 9. Aha dope na porlu taulahon lao patuduhon na holong rohatta tu akka dongan?

⁹ Asing ni i molo tahaholongi akka donganta, berupaya ma hita asa toktong mardame dohot nasida. Tatiru ma Jahowa na rade manalpuhon hasalaan. Olo do Ibana mangalehon Anakna mate lao manobus dosatta. Alani i ikkon olo ma hita manalpuhon hasalaan ni akka donganta. Unang ma hita songon hatoban na jahat na dipaboa di ilustrasi ni Jesus. Nang pe nga dihapus raja utangna na massai balga, alai dang olo ibana marasi ni roha jala manghapus utang ni donganna hatoban na holan saotik. (Mat. 18:23-35) Molo adong parsoalanmuna dohot sahalak dongan di huria, olo do hamu berinisiatif asa mardame tu ibana sebelum ro tu Borngin Parningotan? (Mat. 5:23, 24) Molo diulahon hamu i, on patuduhon na massai holong do rohamuna tu Jahowa dohot tu Jesus.

10-11. Songon dia do akka sintua patuduhon holongna tu Jahowa dohot tu Jesus? (1 Petrus 5:1, 2)

¹⁰ Songon dia do akka sintua patuduhon na holong do roha ni nasida tu Jahowa dohot tu Jesus? Sada cara na penting, i ma mamparrohahon na porlu di biru-biru ni Jesus. (Jaha 1 Petrus 5:1, 2.) Tarida ma i sian hata ni Jesus tu Apostel Petrus. Dung tolu hali disoadahon si Petrus Jesus, pasti menyesal do ibana jala bertekad ma si Petrus lao patuduhon holongna tu Jesus. Dung dipahehe Jesus, disukkun ibana ma tu si Petrus, “Simon, anak ni si Johannes, holong do roham tu au?” Tottu pos rohatta holong do roha ni si Petrus tu Jesus jala berupaya do si Petrus mangulahon manang aha pe na patuduhon holongna tu Tuanna i. Didok Jesus ma muse tu si Petrus, “Lehon ma mangan anak ni biru-birukki.” (Joh. 21:15-17) Saleleng ngoluna dibuktihon si Petrus do na holong rohana tu Jesus. Diparmahani ibana do akka biru-biru ni Jesus.

¹¹ Akka sintua, songon dia do hamu patuduhon na massai penting hata ni Jesus tu si Petrus i di hamu? Piga-piga minggu sebelum jala dukkon sae Borngin Parningotan, patudu ma na holong rohamuna tu Jahowa dohot tu Jesus. Bahen hamu ma kunjungan penggembalaan jala urupi ma akka dongan na so aktif asa mulak muse tu Jahowa. (Hes. 34:11, 12) Asing ni i, berupaya ma hamu patoguhon akka parsiajar Bibel dohot akka halak na baru ro tu Borngin Parningotan. Las do rohatta menyambut nasida alana lomo rohatta asa gabe sisean ni Jesus nasida.

12. Boasa gabe barani hita molo tarimangi hata ni Jesus di Johannes 16:32, 33?

¹² Di borngin andorang so mate Jesus, didok ibana tu siseanna, “Susa do hamu dibahen portibi on, alai unang ma mabiar hamu! Ai nungnga hutaluhon portibi on.” (Jaha Johannes 16:32, 33.) Boasa boi barani Jesus mangadopi musuna jala toktong setia sahat tu na mate? Ala Jahowa do na diandalhon ibana. Diboto Jesus do muse akka siseanna lao mangadopi tantangan na sarupa, alani i dipangido Jesus ma tu Jahowa asa dijaga akka siseanna i. (Joh. 17:11) Boasa on mambahen hita barani? Alana dao do umgogo Jahowa sian sude musutta. (1 Joh. 4:4) Jadi pos ma rohatta molo taandalhon Jahowa pasti boi do taatasi biar ni rohatta jala gabe barani.

13. Songon dia do si Josep na sian Arimatea patuduhon habaranion?

¹³ Taida ma contoh ni si Josep sian Arimatea. Halak na sangap do ibana di halak Jahudi. Anggota ni Sanhedrin manang pengadilan tinggi agama Jahudi do ibana. Alai tikki di tano on Jesus dang barani si Josep bertindak. Didok si Johannes “sisean ni Jesus do [si Josep], alai dang dipaboa ibana tu halak na asing, ala mabiar do ibana tu halak Jahudi”. (Joh. 19:38) Sasittongna lomo do roha ni si Josep mambege barita taringot Harajaon ni Debata, alai dang dipaboa ibana tu na asing na porsea do ibana tu Jesus. Bisa jadi mabiar do ibana dang dipasangap halak Jahudi i be ibana. Nang pe songon i Bibel mandok dung mate Jesus, “dibaranihon ibana ma dirina mandapotton si Latus lao mangido bakke ni Jesus”. (Mrk. 15:42, 43) Dang mabiar be si Josep patuduhon na sisean ni Jesus do ibana.

14. Aha do na ikkon diulahon hamu molo mabiar hamu tu jolma?

¹⁴ Hea do hamu mabiar songon si Josep? Maila do hamu paboahon na Saksi Jahowa hamu tu dongan sikkola manang dongan sakarejomuna? Ragu do hamu naeng gabe parbarita manang tardidi ala khawatir tu pandangan ni halak? Unang ma paloas akka perasaan sisongon i mangabbati hamu mangulahon na sittong. Torus ma tangiakkon i tu Jahowa. Pangido ma tu Jahowa asa barani hamu mangulahon lomo ni rohana. Tikki diida hamu songon dia Jahowa mangalusi tangiangmuna, gabe lam togu ma hamu jala barani.​—Jes. 41:10, 13.

15. Dung dipataridahon Jesus dirina tu akka sisean, aha ma pengaruhna tu nasida? (Lukas 24:52, 53)

¹⁵ Lungun hian do roha ni akka sisean tikki mate Jesus. Coba tabayakkon songon dia perasaan ni nasida. Nungnga mate be dongan ni nasida jala hira na so adong be harapan ni nasida. (Luk. 24:17-21) Alai tikki dipataridahon Jesus dirina tu nasida diurupi Jesus do nasida mangattusi songon dia ibana menggenapi akka surirang ni Bibel. Asing ni i, dilehon Jesus do tugas na penting tu nasida. (Luk. 24:26, 27, 45-48) Opat pulu ari dukkon i tikki nakkok Jesus tu surgo, dang lungun be roha ni akka sisean. Gariada marlas ni roha do halak i dung mamboto nungnga dipahehe be Tuan ni nasida jala rade do Tuanna i mangurupi nasida mangulahon tugasna. Las ni roha i ma na mangonjar roha ni nasida asa toktong semangat manomba Jahowa.​—Jaha Lukas 24:52, 53; Ul. 5:42.

16. Songon dia hita boi maniru akka sisean ni Jesus?

¹⁶ Songon dia do hita boi maniru akka sisean ni Jesus? Las ma rohatta mamuji Jahowa ganup ari, dang holan piga-piga minggu sebelum jala dukkon sae Borngin Parningotan. Alani i berupaya ma hita mangutamahon Harajaon ni Debata di ngolutta. Godang do donganta na marhasil mangulahon i. Misalna adong do na menyesuaihon jadwal karejo ni nasida asa boi marbarita, marpungu, jala taratur mambahen ibadat keluarga. Adong do muse na mambahen sederhana parngoluonna asa boi lam godang mangurupi huria manang pinda tu inganan na makkaporluhon parbarita. Dang berfokus mangalului arta songon na asing. Memang dang mura mangulahon on. Ikkon torus do hita berupaya asa toktong melayani Jahowa. Marjanji do Jahowa na lehononna do pasu-pasu tu hita molo tautamahon Harajaonna di ngolutta.​—Poda 10:22; Mat. 6:32, 33.

17. Aha do tekadmuna? (Ida gambar.)

¹⁷ Tarpaima do hita tu acara Borngin Parningotan ari Selasa tanggal 4 April. Alai piga-piga minggu sebelum jala dukkon sae Borngin Parningotan, porlu do tarimangi parngoluan dohot hamatean ni Jesus, jala holong na dipatudu ibana dohot Jahowa tu hita. Contohna, bahen ma tikki lao manjaha jala mangarimangi akka peristiwa na adong di tabel “Minggu Parpudi Hangoluan ni Jesus”. Ida ma i di Lampiran B12 Bibel Terjemahan Tano na Imbaru. Tikki dijaha hamu taringot parngoluon ni Jesus di Bibel, jaha ma akka ayat na boi mambahen lam tamba pangargaionmuna, holong, habaranion, dohot las ni rohamuna. Dung i pikkirhon ma songon dia hamu boi patuduhon pangargaionmuna i. Pos ma rohamuna pasti diargai Jesus do sude na dibahen hamu lao mangingot ibana.​—Pgk. 2:19.