Boha do Didok di Bibel taringot Bencana Alam?

Dang Debata na mambahen bencana alam na masa saonari, justru parduli do Ibana tu akka korban na hona bencana alam. Alani i di Harajaon ni Debata disingkirhon do sude na mambahen jolma susa, termasuk ma i bencana alam. Alai saonari pe dilehon Debata do saran na denggan di Bibel asa boi jolma tetap martahan nang pe hona dampak ni bencana alam.—2 Korint 1:3.

• Aha do na mambuktihon molo bencana alam i dang hukuman sian Debata?

• Tutu do bencana alam i tanda ni ari parpudi?

• Songon dia do cara ni Debata mangurupi akka halak na hona bencana alam?

• Adong do ayat ni Bibel na boi mangurupi hita menghadapi bencana alam?

• Akka ayat ni Bibel na boi menghibur halak na hona bencana alam

Sian Bibel boi do taboto na hea dipakke Debata kekuatan alam lao manghukum jolma. Alai asing do i sian bencana alam saonari.

• Mate do halak na burju dohot halak na jahat dibahen bencana alam na masa saonari. Alai asing do i tu na disurat di Bibel. Tikki dipakke Debata kekuatan alam lao manghukum jolma, dipastihon Ibana do holan halak na jahat na mate. Contohna tikki dihancurhon Debata najolo kota Sodom dohot Gomora, dipastihon Ibana do selamat si Lot dohot boruna na dua i, ala burju do si Lot. (1 Musa 19:29, 30) Tikki i diida Debata do roha ni setiap halak, jala holan halak na jahat do na dipamate Ibana.—1 Musa 18:23-32; 1 Samuel 16:7.

• Biasana dang adong tandana molo naeng terjadi bencana alam, jala molo pe adong tandana holan saotik do halak na mamboto i. Alai asing do tikki Debata naeng mamakke kekuatan alam lao manghukum halak na jahat. Jolo dibahen Ibana do peringatan tu akka jolma. Alani i molo diparrohahon halak peringatan i, boi ma nasida selamat sian bencana i.—1 Musa 7:1-5; Mateus 24:38, 39.

• Sebenarna ulaon ni jolma do na mambahen lam parah bencana alam. Boasa boi tadok songon i? Alana disegai nasida do alam jala dipajongjong do bangunan di inganan na rawan hona bencana, songon gempa, banjir, dohot cuaca ekstrim. (Pangungkapon 11:18) Jadi molo susa jolma alani bencana dang boi tasalahon Debata, ai alani hasalaan ni nasida do i.—Poda 19:3.

Tutu! Nungnga dipaboa di Bibel na lao masa bencana alam saleleng “panutup ni jaman on” manang saleleng “ari parpudi”. (Mateus 24:3; 2 Timoteus 3:1) Contohna taringot tu tikkitta on didok Jesus do, “Masa ma haraparon dohot gempa di godang inganan.” (Mateus 24:7) Alai satokkin nai na lao disingkirhon Debata do sude na mambahen hita marsak jala menderita, termasuk ma i bencana alam.—Pangungkapon 21:3, 4.

• Dihibur Debata do roha ni nasida marhite ayat ni Bibel. Marhite Bibel dipapos do rohatta na parduli Debata tu hita jala na marsak pakkilalaanna mangida hita menderita. (Jesaya 63:9; 1 Petrus 5:6, 7) Adong do muse di Bibel janji ni Debata na paboahon dang na lao masa be bencana alam.—Ida ma “Akka ayat ni Bibel na boi menghibur halak na hona bencana alam”.

• Dipakke Debata do akka halak na manomba Ibana lao mangurupi halak na hona bencana alam. Dipakke Debata do akka naposona na di tano on ala ditiru nasida do sifat ni Jesus. Songon na dipaboa di Bibel, dihibur Jesus do “roha ni halak na mandele” dohot ‘roha ni sude halak na marsak’. (Jesaya 61:1, 2) Jadi berupaya do halak na manomba Debata mangulahon na sarupa.—Johannes 13:15.

  Dipakke Debata do muse akka na manomba Ibana lao mangurupi akka halak na hona bencana alam marhite mangalehon sumbangan dohot mangalehon na porlu di nasida.—Ulaon ni Apostel 11:28-30; Galatia 6:10.

Adong! Nang pe Bibel i dang bukku petunjuk tu bencana alam, alai adong do ayat ni Bibel na boi mangurupi hita. Contohna:

• Rencanahon ma aha na lao diulahon hamu tikki masa bencana. Bibel mandok, “Molo dibereng halak na marbisuk adong jea, martabuni do ibana.” (Poda 22:3) Denggan do tarencanahon aha na porlu taulahon tikki masa situasi na berbahaya. Misalna tasiappon ma perlengkapan na porlu taboan, tatottuhon ma didia lokasi na aman tikki ro bahaya, jala marlatik ma hita dohot keluarga mangulahon i.

• Porlu do taingot na ummarga ngolutta sian arta. Bibel mandok, “Dang adong na taboan tikki tubu hita tu portibi on jala dang adong na taboan molo dung mate hita.” (1 Timoteus 6:7, 8) Porlu do hita rela maninggalhon jabutta dohot artatta asa boi taselamatton diritta tikki ro bencana. Taingot ma, ummarga do ngolutta sian arta.—Mateus 6:25.