Jesus Mamillit Siseanna

Dung 40 ari di padang pasir, laho ma Jesus mandapothon si Johannes Pandidi andorang so mulak tu Galilea. Tingki diida ro Jesus mandapothon ibana, didok si Johannes ma tu halak na di lambungna, “Ida ma, ibana do Biru-biru ni Debata na manesa dosa ni portibi on! Ibana do halak na hutaringoti i tingki hudok, ‘Umbalga do sian ahu halak na ro di pudingku, ai nunga adong ibana andorang so adong dope ahu.’” (Johannes 1:29, 30) Nang pe parjolo si Johannes tubu sian Jesus, alai diboto ibana do naung mangolu Jesus di surgo andorang so ro tu tano on.

Piga-piga minggu andorang so i, dipangido Jesus ma tu si Johannes asa tardidi ibana. Alai tingki i, ndang porsea si Johannes molo Jesus i Messias. Ibana mandok, “Ahu pe ndang hutanda hian ibana. Alai, asa patar do ibana tu bangso Israel umbahen na ro ahu mandidihon dohot aek.”​—Johannes 1:31.

Dipaboa si Johannes ma muse tu sude halak na adong disi taringot tu na masa tingki tardidi Jesus. Ninna ma, “Huida do tondi parbadia turun sian langit na songon darapati jala songgop do tondi parbadia i tu atasna. Ahu pe ndang hutanda hian ibana. Alai Debata na marsuru ahu asa mandidihon dohot aek, mandok tu ahu, ‘Molo diida ho turun tondi parbadia jala songgop tu atas ni sasahalak, ibana ma na laho mandidihon dohot tondi parbadia.’ Nunga huida i masa jala nunga hupaboa na Anak ni Debata do ibana.”​—Johannes 1:32-34.

Marsogot nai, ro ma Jesus tu si Johannes Pandidi na rap dohot dua siseanna. Didok si Johannes ma, “Ida ma, ibana do Biru-biru ni Debata!” (Johannes 1:36) Alani i, gabe diihuthon sisean ni si Johannes Pandidi i ma Jesus. Na sada goarna si Andreas. Na sada nai goarna si Johannes. Ibana ma na manurat na masa on. Ra tubu ni inang uda ni Jesus do ibana, i ma si Salome, anggi ni si Maria, tunggane boru ni si Sebedeus.

Tingki diida Jesus si Andreas dohot si Johannes mangihuthon ibana, disungkun Jesus ma, “Aha do dilului hamu?”

Dialusi nasida ma, “Ale Rabbi, didia do ho maringanan?”

Didok Jesus ma, “Beta ma asa diboto hamu.”​—Johannes 1:37-39.

Hira-hira jam opat botari ma tingki i. Gabe rap ma nasida dohot Jesus sahat tu borngin. Saama do si Andreas dohot si Simon na laos digoari si Petrus. Alani i didok ibana ma tu si Simon, “Nunga jumpangnami Messias i.” (Johannes 1:41) Diboan si Andreas ma ibana tu Jesus. Ra, laos di tingki i do ditogihon si Johannes muse si Jakobus donganna saama mandapothon Jesus. Alai, ndang pola disurat si Johannes taringot tusi.

Marsogot nai, pajumpang ma Jesus dohot si Pilippus halak Betsaida. Huta i adong di topi ni Laut Galilea di sabola utara, jala disi do huta ni si Andreas dohot si Petrus. Didok Jesus ma tu si Pilippus, “Ihuthon ma ahu.”​—Johannes 1:43.

Dung i pajumpang ma si Pilippus dohot si Natanael, na laos digoari si Bartolomeus jala didok ma, “Nunga jumpangnami halak na pinaboa ni Patik ni si Musa dohot na Sinurat ni Angka Panurirang i. Jesus anak ni si Josep na sian Nasaret i do ibana.” Alai ndang porsea si Natanael, ninna ma, “Tarbahen ma na denggan ro sian Nasaret?”

Didok si Pilippus ma, “Beta ma asa diida ho.” Tingki diida Jesus ro si Natanael mandapothon ibana, didok ma, “Ida ma, halak Israel na tutu do ibana jala ndang adong gabus di ibana.”

Disungkun si Natanael ma, “Sian dia ditanda ho ahu?”

Dialusi Jesus ma, “Nunga huida ho di toru ni hau ara i, andorang so dijou si Pilippus dope ho.”

Longang ma si Natanael ninna ma, “Ale Guru, ho do Anak ni Debata. Ho do Raja ni Israel.”

Didok Jesus ma, “Ala na hudok i do huida ho di toru ni hau ara i, umbahen na porsea ho? Idaonmu dope muse angka na umbalga sian on.” Didok Jesus ma muse, “Tutu do na hudok on tu hamu, idaonmuna ma bungka langit jala idaonmuna ma naik turun suru-suruan mandapothon Anak ni jolma i.”​—Johannes 1:45-51.

Dung i, borhat ma Jesus dohot angka siseanna i sian Rura Jordan tu Galilea.