Hata ni Jesus Mambahen Songgot Roha ni Halak

Tingki mangajari di sinagoga di Kapernaum, dipaboa Jesus ma ibana do roti na sian surgo i. Dipatangkas Jesus do muse hatorangan i tu halak na nilehonna mangan marhite mukjizat manang tanda halongangan, di topi ni Laut Galilea sabola timur.

Didok Jesus ma muse, “Mangallang manna do angka ompumuna tingki di padang pasir, alai mate do nasida.” Dung i didok ibana ma muse, “Ahu do roti na turun sian banua ginjang i. Manang ise na mangallang roti on, mangolu ma ibana saleleng ni lelengna. Roti silehononku, i ma dagingku, na naeng lehononku asa mandapot hangoluan portibi on.”​—Johannes 6:48-51.

Di ari Paska taon 30 M, dipaboa Jesus do tu si Nikodemus taringot tu holong ni Debata tu sude jolma. Dipaboa Jesus do na dilehon Debata Anakna gabe Sipalua. Saonari, lam dipatangkas Jesus do muse na ingkon allangon ni nasida dagingna. Lapatanna, ingkon porsea do nasida tu tobusan asa boi dapot ni nasida hangoluan na saleleng ni lelengna.

Alai sogo do roha ni nasida mambege hata ni Jesus i. Didok nasida ma, “Boha ma bahenon ni ibana mangalehon dagingna i allangonta?” (Johannes 6:52) Lomo do roha ni Jesus asa diboto nasida, molo daging na nidokna i ndang dagingna sandiri.

Didok Jesus ma, “Molo ndang dipangan hamu daging ni Anak ni jolma i jala ndang diinum hamu mudarna, ndang dapotmuna hangoluan. Manang ise na mangallang dagingku dohot na manginum mudarhu dapotna ma hangoluan na saleleng ni lelengna. . . . Ai sipanganon na tutu do dagingku, jala siinumon na tutu do mudarhu. Manang ise na mangallang dagingku jala na manginum mudarhu tongtong ma ibana marsada dohot ahu, jala ahu marsada dohot ibana.”​—Johannes 6:53-56.

Tarsonggot ma halak Jahudi mambege i! Dirimpu nasida do daging dohot mudar ni Jesus i sandiri na laho allangon dohot inumon ni nasida, na mambahen nasida mangalanggar Patik ni Debata. (1 Musa 9:4; 3 Musa 17:10, 11) Alai ndang i na nidok ni Jesus. Sasintongna, Jesus naeng patuduhon sude halak na naeng mangolu saleleng ni lelengna ingkon patuduhon haporseaon tu daging dohot mudar na pinelehonna gabe tobusan. Gariada godang do sian angka sisean i na so mangantusi hatana i. Adong do na mandok, “Ndang tarjalo hatana i. Ise ma na olo manangihon i?”​—Johannes 6:60.

Diboto Jesus do na marungut-ungut angka siseanna i. Didok ibana ma, “Na gabe tartuktuk do hamu alani hatangki? Lam boha ma molo diida hamu nangkok Anak ni jolma i tu inganan haroroanna hian? . . . Aha na huhatahon tu hamu sian tondi parbadia do i jala i do na mangalehon hangoluan. Alai adong do deba sian hamu na so porsea.” Alani i, godang ma angka sisean i na manadingkon Jesus jala ndang diihuthon nasida be ibana.​—Johannes 6:61-64.

Disungkun Jesus ma tu apostelna na 12 i, “Ndang dohot hamu naeng laho?” Dialusi si Petrus ma, “Tuan, tung tu ise ma hami laho? Di ho do hata hangoluan na saleleng ni lelengna. Nunga porsea hami jala nunga huboto hami ho do na Badia ni Debata.” (Johannes 6:67-69) Nang pe ndang diantusi angka apostel i sude na niajarhon ni Jesus, alai tongtong do diihuthon nasida Jesus!

Tontu las do roha ni Jesus mambege alus ni si Petrus i. Alai didok Jesus ma, “Nda 12 halak do hamu hupillit? Alai adong do sahalak sian hamu na gabe sibolis.” (Johannes 6:70) Taringot tu si Judas Iskariot do na nidok ni Jesus. Ra, diida Jesus, nunga olo si Judas mangulahon na sala di tingki i.

Alai nang pe songon i, las do roha ni Jesus tu si Petrus dohot tu apostel na asing i. Ai tongtong do diihuthon nasida Jesus marbarita na uli.