“Paboaonmuna ma Taringot tu Au”

1-3. Songon dia do situasina tikki nakkok Jesus tu surgo maninggalhon akka apostelna, jala sukkun-sukkun aha do na porlu taboto alusna?

SANGA do putus asa akka apostel. Alai saonari las do roha ni nasida ala nga dipahehe Jesus. Dapot ni nasida do pengalaman na luar biasa saleleng piga-piga minggu. Saleleng 40 ari, jotjot do Jesus pataridahon dirina tu akka siseanna. Dilehon ibana do godang pengajaran jala dipatogu do nasida. Alai on nama parpudi sahali Jesus pataridahon dirina.

² Jongjong ma akka apostel di Dolok Jetun, jala manat ma diparrohahon nasida sude na didok Jesus. Dung sae Jesus makkatai, diangkat ibana ma tanganna jala dipasu-pasu ma akka siseanna i. Alai hira na satokkin do i dihilala nasida. Dung i, tarangkat ma ibana sian tano on! Sai diida akka siseanna i ma Jesus huhut naik ibana tu langit. Jala ujungna dang tarida be ibana ala nungnga ditutupi awan. Nungnga lao be ibana alai sai torus do diida nasida langit i.​—Luk. 24:50; Ul. 1:9, 10.

³ Peristiwa on ma na gabe titik balik di akka apostel. Aha ma na lao ulahonon ni nasida dung naik Jesus Kristus tu surgo? Pasti nungnga diurupi ibana nasida asa rade mangulahon tugas naung dimulai ibana sebelumna. Alai boha do cara ni ibana mangurupi nasida, jala boha do sikap ni nasida? Aha do pengaruhna tu halak Kristen saonari? Tadapot ma alusna di bindu sada sian bukku Ulaon ni Apostel. Alus ni on boi do patoguhon rohatta.

 4. Aha do na disurat si Lukas di mula ni bukku Ulaon ni Apostel?

⁴ Di ayat na parjolo sian bukku Ulaon ni Apostel, ditujuhon si Lukas do bukku on tu si Teopilus, sarupa songon tikki disurat ibana Injil Lukas.a Jadi sian on boi taboto lanjutan ni Injil Lukas do bukku on. Di mula ni bukku Ulaon ni Apostel, disurat ibana do secara singkat akka peristiwa na parpudi di Injil Lukas. Alai dang sarupa hata na dipakke, jala adong do perincian na baru.

5, 6. (a) Aha do na mambahen togu haporseaon ni akka sisean ni Jesus? (b) Aha do na ikkon diulahon halak Kristen saonari asa boi togu haporseaonna?

⁵ Boasa boi togu haporseaon ni akka sisean ni Jesus? Di Ulaon ni Apostel 1:3 didok taringot Jesus, “Dipatuduhon ibana do tu nasida naung mulak mangolu ibana. Dibahen ibana do godang tanda lao paposson roha ni nasida.” Molo sian bahasa aslina istilah na diterjemahon gabe “tanda lao paposson roha”, jotjot do dipakke di bidang kedokteran. Holan si Lukas do na mamakke istilah on ala sahalak “pangubati” ibana. (Kol. 4:14) Lapatan ni istilah i, i ma tanda na jelas, nungnga pasti, jala boi dihaporseai. Songon i ma akka tanda na dilehon Jesus. Jotjot do ibana pataridahon dirina tu akka siseanna. Sipata tu sasahalak, tu dua halak, manang tu akka apostel. Jala di sada tikki, dipataridahon ibana do dirina tu lobi sian 500 halak na porsea. (1 Kor. 15:3-6) Jadi tutu do on tanda na paposson roha!

⁶ Saonari on pe boi do togu haporseaon ni halak Kristen ala nungnga ‘godang tanda na paposson roha’. Adong do memang buktina molo Jesus hea mangolu di tano on, mate humokkop dosatta, jala mangolu muse? Adong. Akka halak na mangida akka peristiwa i nungnga paboahon i di Bibel. Molo manat taparsiajari akka na disurat nasida, boi do patoguhon haporseaotta. Taingot ma ikkon adong do bukti na kuat asa boi togu haporseaotta. Molo dang kuat bukti i, berarti na asal porsea do hita disi. Jala holan marhite haporseaon na togu do sasahalak boi mandapot hangoluan saleleng ni lelengna.​—Joh. 3:16.

 7. Aha do topik utama ni Jesus dohot akka siseanna tikki marbarita dohot mangajari?

⁷ ‘Dipaboa Jesus do muse taringot Harajaon ni Debata.’ Contohna, dipatorang ibana do taringot akka surirang na paboahon molo Messias ikkon marsitaonon jala mate. (Luk. 24:13-32, 46, 47) Dipatudu Jesus do na dirina sandiri Messias i, na lao gabe Raja di Harajaon ni Debata. Harajaon on ma na gabe topik utama ni Jesus tikki marbarita. Jala i do tong topik utama ni akka siseanna saonari tikki marbarita.​—Mat. 24:14; Luk. 4:43.

8, 9. (a) Aha do dua pemahaman ni akka apostel na sala? (b) Songon dia do Jesus mangurupi cara marpikkir ni nasida, jala aha do parsiajaranna tu halak Kristen saonari?

⁸ Tikki marpungu akka apostel di Dolok Jetun, i ma parpudi sahali nasida pajuppang dohot Jesus di tano on. Semangat do nasida manukkun, “Ale Tuan, na lao padengganonmu do saonari pamarettaon ni Debata tu halak Israel?” (Ul. 1:6) Sian sukkun-sukkun on, gabe tarida ma adong dua pemahaman ni nasida na sala. Na parjolo, dirippu nasida do molo Harajaon ni Debata i lao padenggatton pamarettaon ni halak Israel. Na paduahon, dirippu nasida di tikki i nama Harajaon i mamaretta. Alai songon dia do Jesus mangurupi cara marpikkir ni nasida?

⁹ Diboto Jesus do satokkin nai lao dipadenggan do pemahaman na parjolo i. Alana sappulu ari dukkon i, diida akka apostel i do dibentuk sada bangso na baru, i ma Israel ni Debata manang halak Kristen na dimiahi. Jadi dang dijalo Debata be halak Israel gabe bangso na pinillitna. Taringot pemahaman na paduahon i, dipaingot Jesus do nasida, “Holan Damang i do na marhak manottuhon andigan tikki dohot arina. Dang porlu botoonmuna i.” (Ul. 1:7) Jadi Jahowa do na manottuhon andigan tikkina. Bahkan sebelum mate Jesus didok ibana do, “Taringot tu ari dohot jamna dang adong na mamboto i, . . . holan Ama i do na mamboto.” (Mat. 24:36) Jadi saonari pe molo adong halak Kristen na sai torus mamikkiri andigan do panutup ni jaman on, sasittongna dang bagian ni nasida mamikkirhon i.

10. Sikap aha do na ikkon tatiru sian akka apostel, jala boasa?

¹⁰ Unang ma leas rohatta mangida akka apostel ni Jesus. Massai togu do haporseaon ni nasida, serep do rohana tikki dipasingot. Jala nang pe sala pemahaman ni nasida, alai on patuduhon denggan do sikap ni nasida. Toktong do dijaga nasida haporseaonna. Semangat do nasida paimahon bukti na lao bertindak do Jahowa. Ai nungnga jotjot didok Jesus tu akka siseanna, “Sai jaga ma hamu.” (Mat. 24:42; 25:13; 26:41) Saonari pe ikkon tapatudu do sikap na songon i. Apalagi ala nga mangolu di “ari parpudi” hita, ikkon lam tajaga ma haporseaotta.​—2 Tim. 3:1-5.

11, 12. (a) Tugas aha do na dilehon Jesus tu akka siseanna? (b) Aha do hubungan ni tondi parbadia tu tugas marbarita?

¹¹ Dipaboa Jesus do aha na ikkon diutamahon akka apostel. Didok ibana, “Molo dung ro tondi parbadia i tu hamu gabe margogo ma hamu. Paboaonmuna ma taringot tu au di Jerusalem, di sude luat na di Judea, di Samaria, sahat tu ujung ni tano on.” (Ul. 1:8) Jadi di Jerusalem ma parjolo sahali dibaritahon taringot haheheon ni Jesus i. Ai disi do Jesus dipamate. Mulai sian i gabe rarat ma barita i sahat tu sude luat na di Judea, Samaria, dohot tu inganan na undao.

¹² Molo taida hata ni Jesus i, jolo dipaboa ibana do taringot tondi parbadia, baru pe ditugasson akka siseanna marbarita. Di bukku Ulaon ni Apostel adong lobi sian 40 hali disurat taringot “tondi parbadia”. Sian bukku on gabe takkas ma taboto, dang boi hita mangulahon lomo ni roha ni Jahowa molo dang diurupi tondi parbadia. Jadi massai penting do asa jotjot hita martangiang lao mangido tondi parbadia. (Luk. 11:13) Apalagi saonari lam porlu do di hita tondi parbadia i.

13. Sahat tudia do ikkon dipaboa barita Harajaon i, jala boasa ikkon semangat hita mangulahon i?

¹³ Najolo akka sisean marbarita “sahat tu ujung ni tano on”, lapatanna sahat tu inganan na undao. Alai molo hita saonari marbarita do tu saluhut portibi on. Songon na di pasal sebelumna, las do roha ni Saksi Jahowa marbarita ala diboto nasida lomo do roha ni Debata sude halak mambege barita Harajaon. (1 Tim. 2:3, 4) Tugas on boi menyelamatton ngolu ni halak. Jadi semangat do hamu mangulahon on? On ma tugas na paling mambahen puas jala las rohamuna. Pasti leanon ni Jahowa do gogo tu hamu mangulahon i. Di Ulaon ni Apostel godang do dipaboa cara na denggan jala songon dia sikapta asa boi mangulahon tugas on.

14, 15. (a) Aha do na didok suru-suruan taringot haroro ni Kristus, jala aha do maksudna? (Ida surat na di toru.) (b) Aha do buktina molo Jesus ro muse mamakke cara na sarupa songon tikki ibana maninggalhon tano on?

¹⁴ Songon naung dipaboa di mula ni pasal on, tarangkat ma Jesus sian tano on jala ujungna dang boi be diida. Alai sai torus do 11 apostel i jongjong disi huhut mangida tu langit. Ujungna ro ma dua suru-suruan jala lambok ma didok tu nasida, “Hamu halak Galilea, boasa jongjong hamu huhut mangida tu langit? Ai anggo Jesus i, nang pe naung tarangkat ibana sian labbungmuna tu langit, na lao ro do ibana muse dos songon tikki diida hamu ibana nakkok tu langit.” (Ul. 1:11) Aha do maksud ni suru-suruan i? Na lao mulak do muse Jesus tu tano on gabe jolma songon na diajarhon godang agama? Daong. Sian dia taboto?

¹⁵ Tikki didok suru-suruan i na lao ro do muse Jesus “dos songon tikki diida hamu”, dang na berarti sarupa bentukna, alai carana do na sarupa.b Ai boha do haroa cara ni ibana tikki maninggalhon tano on? Holan akka apostel do na mangida songon dia Jesus maninggalhon tano on jala mulak muse tu Amana na di surgo. Tikki makkatai suru-suruan i, dang tarida be ibana. Dipakke Jesus do muse cara na sarupa tikki ro ibana gabe Raja. Buktina holan halak na marale-ale tu Debata do na mangattusi tanda naung ro Jesus gabe Raja. (Luk. 17:20) Ikkon taboto do buktina naung ro Jesus. Jala tapaboa ma i tu halak na asing, asa diattusi nasida naung jonok panutup ni jaman on.

16-18. (a) Sian Ulaon ni Apostel 1:13, 14, informasi aha do na taboto taringot parpunguan di abad na parjolo? (b) Aha do na boi taparsiajari sian si Maria omak ni Jesus? (c) Boasa massai penting parpunguan di halak Kristen saonari?

¹⁶ Boi ma tabayakkon massai las do roha ni akka apostel tikki ‘mulak tu Jerusalem’. (Luk. 24:52) Alai boha do tanggapan ni nasida tu petunjuk na dilehon Kristus? Molo taida Ulaon ni Apostel 1:13, 14, didok do molo nasida marpungu di sada “kamar parginjang”. Jala adong do informasi na menarik na taboto sian i. Najolo di Palestina, jotjot do dibahen sada ruangan di lantai atas, jala dibahen do tanggana sian luar. Kamar parginjang na didok dison mungkin jabu ni omak ni si Markus do, na disurat di Ulaon ni Apostel 12:12. Alai dang soal manang ise nappuna jabu i, ruangan i ma na dipakke akka sisean ni Jesus marpungu. Alai ise do na ro tu parpunguan i, jala aha do na diulahon nasida?

¹⁷ Parpunguan on dang holan tu akka apostel, manang tu akka bawa. Adong do “piga-piga borua” na ro, termasuk ma si Maria omak ni Jesus. On ma parpudi sahali goarna dipaboa di Bibel. Pasti dang na mangalului hasangapon ibana ro tusi. Alai serep do rohana lao manomba Debata rap dohot akka dongan sahaporseaonna. Pasti las do rohana ala dohot opat anakna marpungu, hape sebelumna dang porsea nasida tu Jesus, abangna. (Mat. 13:55; Joh. 7:5) Alai dung mate jala dipahehe Jesus, gabe muba ma nasida.​—1 Kor. 15:7.

¹⁸ Boasa ikkon marpungu akka sisean i? Didok di Bibel, “Dos ma roha ni nasida . . . marpungu lao martangiang.” (Ul. 1:14) Torus do parpunguan gabe bagian na massai penting di ibadat ni halak Kristen. Di parpunguan boi ma hita masipatoguan dohot akka dongan. Disi ma hita diajari jala mandapot petunjuk. Jala na terutama disi ma hita rap dohot akka dongan lao manomba Jahowa, Bapakta na di surgo i. Las do rohana tikki hita martangiang jala marende mamuji Ibana. Massai penting do i di hita. Alani i unang ma hea taabaihon parpunguanta!​—Heb. 10:24, 25.

19-21. (a) Aha do na boi taparsiajari sian si Petrus na berperan aktif di huria? (b) Boasa ikkon digattihon si Judas, jala aha do na boi taparsiajari sian cara ni akka apostel mangulahon i?

¹⁹ Saonari adong do masalah na ikkon dipasae akka sisean ni Kristus. Apostel Petrus ma na mangalului cara lao pasaehon i. (Ayat 15-26) Las do rohatta ala nungnga muba be si Petrus. Hape piga-piga minggu sebelumna, didok ibana do dang ditanda ibana Jesus sappe tolu hali. (Mrk. 14:72) Hita sude pe sipata mangulahon dosa do. Alai taingot ma, ‘burju do Jahowa jala rade manalpuhon hasalaan’ ni akka halak na olo muba.​—Ps. 86:5.

²⁰ Diattusi si Petrus do ikkon adong halak na manggattihon si Judas, ala nungnga dihianati ibana Jesus. Alai ise ma? Ibana ikkon halak na hea mangihutton Jesus tikki di tano on jala mangida haheheonna. (Ul. 1:21, 22) Sesuai do on tu janji ni Jesus, “Dohot do hamu hundul di 12 tahta lao mangadili 12 marga ni Israel. Ai nungnga diihutton hamu au.” (Mat. 19:28) Jahowa pe lomo do rohana na 12 apostel i gabe ‘12 batu fondasi’ ni Jerusalem na Imbaru. (Pgk. 21:2, 14) Alani i diurupi Debata do asa boi diattusi si Petrus molo si Judas menggenapi surirang na mandok, ‘Lok ma dibuat halak na asing jabatanna jala lok ma na asing na gabe pengawas.’​—Ps. 109:8.

²¹ Boha do cara ni nasida mamillit panggattina? Marhite mambahen undi. Somal do on diulahon najolo. (Poda 16:33) Alai on ma parpudi sahali disurat di Bibel taringot mambahen undi. Jadi mulai sian i, dang dipakke be ra cara sisongon on. Dang leleng dukkon i, dilehon ma tondi parbadia tu nasida. Alai taparrohahon ma boasa mambahen undi nasida. Tikki i martangiang do akka apostel, “Ale Jahowa, Ho do na mamboto roha ni sude jolma. Patudu ma ise do na dipillit Ho sian nasida na dua.” (Ul. 1:23, 24) Lomo do roha ni nasida asa Jahowa na mamillit. Ujungna tarpillit ma si Matias. Termasuk do ra ibana sian 70 sisean na hea disuru Jesus marbarita. Jadi, si Matias ma na gabe bagian sian “apostel na 12 i”.c​—Ul. 6:2.

22, 23. Boasa ikkon unduk hita tu akka dongan na manguluhon hita di huria?

²² Sian peristiwa on gabe taboto ma, massai penting do pengorganisasian di akka naposo ni Debata. Sahat tu saonari dipillit do akka bawa na martanggung jawab mengawasi huria. Manat do akka sintua mampartimbakkon akka petunjuk sian Bibel taringot persyaratan gabe pengawas. Martangiang do nasida mangido tondi parbadia. Alani i pos do roha ni akka dongan di huria, tondi parbadia do na mangalantik akka bawa i. Jadi toktong ma hita unduk tu akka pengawas di huria. Jala semangat ma hita bekerja sama dohot nasida.​—Heb. 13:17.

²³ Saonari nungnga lam togu be akka sisean ni Jesus i, ala nungnga diida nasida Jesus dipahehe jala nga terorganisasi be nasida. Alani i gabe rade ma nasida mangadopi aha na lao masa. Di pasal na mangihut tabahas ma taringot i.