“Lam Rarat ma Hata ni Jahowa”

1-4. Situasi na songon dia do na dihadapi si Petrus, jala boha do perasaanmuna molo menghadapi situasi na songon i?

BAYAKKON ma ditutup gerbang ni penjara, diboan ma si Petrus tu penjara ni Rom. Adong dua panjaga na mamboan ibana. Diratte do tangan ni si Petrus tu panjaga i, digiring ma ibana masuk tu selna. Holan dinding ni penjara i, rattena, dohot akka panjaga i do na boi diida. Jala saleleng piga-piga ari, sai dipikkiri do aha na lao masa tu ibana.

² Dipaboa ma tu si Petrus hukuman aha na lao dibahen tu ibana. Nungnga diputusson Raja Herodes Agrippa I lao dipamate ibana.a Bahkan lao diboan do si Petrus tu jolo ni akka halak dung ari Paska. Hukum mate na lao dibahen tu si Petrus i songon hadiah ma i tu akka halak. Serius do ancaman i, alana sebelumna marhasil do raja i pamatehon si Jakobus.

³ Aha ma hira-hira na dipikkirhon si Petrus di borngin sebelum dihukum mate ibana? Sebelumna nungnga hea didokkon Jesus tu si Petrus taringot songon dia parmatena. Didok do tu ibana, “Lehononmu ma tanganmu jala . . . boanonna ma ho tu inganan na so dihalomohon roham.” (Joh. 21:18, 19) Mungkin ro do tu pikkiran ni si Petrus di tikki i nama saut hata ni Jesus i.

⁴ Molo sarupa situasimuna songon si Petrus, boha do perasaanmuna? Godang do halak mandele molo diboto dang adong be jalan keluar tu situasina. Alai sebenarna molo taihutton Kristus, sadia borat pe situasi na tahadapi tetap do adong harapanta. Aha ma na boi taparsiajari sian si Petrus dohot halak Kristen tikki masa penganiayaan tu nasida? Tabahas ma jo.

5, 6. (a) Boasa dianiaya Raja Herodes Agrippa I huria Kristen, jala aha do na diulahon ibana? (b) Songon dia do perasaan ni huria Kristen tikki dipamate si Jakobus?

⁵ Songon na taparsiajari di pasal sebelumna, tarsonggot do huria Kristen tikki diboto nasida naung manomba Jahowa akka halak na sian bangso na asing, songon si Kornelius dohot keluargana. Alai dang holan nasida na tarsonggot. Akka halak Jahudi na so porsea tu Tuan i pe heran do tikki diida rap beribadat halak Kristen Jahudi dohot halak Kristen na sian bangso na asing.

⁶ Licik do si Herodes. Diida ibana do on sada kesempatan lao mambuat roha ni halak Jahudi, alani i dianiaya ma halak Kristen. Mungkin hea do dibege ibana na akrab Apostel Jakobus tu Jesus Kristus. Alani i “dibunu ibana ma si Jakobus abang ni si Johannes mamakke podang”. (Ul. 12:2) Pasti sitaonon na borat do on tu huria! Alana si Jakobus do sahalak sian tolu apostel na mangida Jesus mengalami transfigurasi jala na mangida akka mukjizat na asing. (Mat. 17:1, 2; Mrk. 5:37-42) Bahkan alani semangat ni si Jakobus dohot anggina si Johannes, didokkon Jesus do nasida “Akka Anak ni Ronggur”. (Mrk. 3:17) Jadi pasti lungun do roha ni huria di tikki i, ala barani jala setia do Apostel Jakobus.

7, 8. Aha do na diulahon huria tikki dipenjarahon si Petrus?

⁷ Las do roha ni halak Jahudi tikki dipamate si Jakobus, jala sesuai do i tu na diharappon si Agrippa. Alani i lam barani ma ibana menganiaya halak Kristen jala naeng pamateonna ma si Petrus. Ditakkup ma si Petrus songon na dipaboa di mula ni pasal on. Alai mungkin diingot si Agrippa do na hea akka apostel malua secara mukjizat sian penjara, songon na dipaboa di Pasal 5. Jadi disuru ma asa diratte tangan ni si Petrus tu dua panjaga. Jala adong 16 panjaga na bergiliran arian dohot borngin lao mamastihon dang boi ibana malua. Alana akka panjaga i do annon na dipamate molo sappe malua si Petrus. Aha ma na diulahon halak Kristen di situasi i?

⁸ Ulaon ni Apostel 12:5 mandok, “Saleleng dipenjarahon si Petrus, sai ditangiakkon huria do ibana.” Pasti sungguh-sungguh do huria manangiakkon ibana. Nang pe baru mate si Jakobus, dang gabe mandele nasida. Diboto nasida do massai penting tangiang i. Jala pos do roha ni nasida tangihonon ni Jahowa do tangiang ni nasida molo sesuai i tu lomo ni rohana. (Heb. 13:18, 19; Jak. 5:16) On ma parsiajaran na porlu diingot halak Kristen saonari.

 9. Aha do na boi taparsiajari sian halak Kristen di tikki ni si Petrus?

⁹ Adong do diboto hamu donganta na marsitaonon? Adong do ra nasida na mengalami penganiayaan, dang bebas beribadat ala diorai pamaretta, manang menghadapi bencana alam. Paboa ma goar ni nasida di tangiangmuna. Jala molo adong dongan na ditanda hamu menghadapi masalah keluarga, na marmetmet ni roha, manang menghadapi tantangan alani haporseaon ni nasida, tangiakkon hamu ma tong nasida. Jadi sebelum martangiang, tapikkiri ma akka ise na naeng tatangiakkon tu Jahowa, “Sitangihon tangiang”. (Ps. 65:2) Alana hita pe berharap do dibahen akka dongan songon i tu hita tikki tahadapi situasi na borat.

10, 11. Songon dia do suru-suruan ni Jahowa paluahon si Petrus sian penjara?

¹⁰ Mabiar do si Petrus menghadapi hukuman mate na lao dibahen tu ibana? Dang taboto songon dia perasaanna. Alai di borngin sebelum diboan ibana, renges do ibana modom di tonga-tonga ni dua panjaga i. Pos do rohana molo tung pe ikkon mate, pasti aman do ibana di tangan ni Jahowa. (Rom 14:7, 8) Terjadi ma peristiwa na so disangka ibana. Toppu ma tiur sel ni penjara i. Jongjong ma sada suru-suruan di jolona jala didungoi ma ibana. Dang boi panjaga i mangida suru-suruan i. Dung i malua ma ratte na di tanganna i jala bebas ma ibana!

¹¹ Didok suru-suruan i ma tu si Petrus, “Hatop, dungo ma ho! . . . Siap-siap ma ho, pakke ma sipatumi. . . . Pakke ma baju luarmi jala ihutton ma au.” Dioloi si Petrus do ibana. Ujungna kaluar ma nasida sian sel i. Dilewati nasida ma akka panjaga na di luar, jala sahat ma nasida di gerbang bosi. Pasti sukkun-sukkun do roha ni si Petrus boha carana nasida kaluar sian i. Alai dung jonok nasida tusi, “bukka sandiri do gerbang i”. Rap mardalan ma nasida, alai toppu ma ditinggalhon suru-suruan i si Petrus. Sadar ma si Petrus, dang parnidaan i. Tutu do nungnga bebas ibana!—Ul. 12:7-11.

12. Aha do manfaatna molo tarimangi songon dia Jahowa paluahon si Petrus?

¹² Pasti las hian do rohatta mamboto na sanggup do Jahowa menyelamatton akka naposona. Sebenarna raja na memenjarahon si Petrus didukung kuasa pemerintahan na paling gogo di tikki i. Alai boi do si Petrus malua sian penjara i tanpa perlawanan! Memang dang dibahen Jahowa mukjizat na sarupa tu sude naposona. Dang dibahen ibana mukjizat tu si Jakobus, jala di pudian ni ari tikki digenapi hata ni Jesus tu si Petrus, dang dibahen Jahowa be mukjizat tu ibana. Alani i, dang diharappon halak Kristen asa dipalua Jahowa nasida sian hasusaan secara mukjizat saonari. Alai taingot ma, dang berubah Jahowa. (Mal. 3:6) Satokkin nai, marhite Anakna paluaonna ma marjuta halak sian hamatean na dos songon penjara. (Joh. 5:28, 29) Molo tarimangi akka janji ni Jahowa i, gabe boi ma hita dipatogu tikki menghadapi sitaonon na borat.

13-15. (a) Boha do reaksi ni akka dongan na marpungu di jabu ni si Maria tikki ro si Petrus? (b) Taringot aha do na dibahas muse di bukku Ulaon ni Apostel, jala aha do na torus diulahon si Petrus tu huria?

¹³ Jongjong ma si Petrus di dalan i huhut marpikkir tudia ibana naeng lao. Jadi lao ma ibana tu jabu ni si Maria na so dao sian i. Nungnga janda si Maria. Balga do jabuna jala cukkup do manampung sude na di huria. Si Maria omak ni si Johannes Markus do ibana. Di peristiwa on ma parjolo sahali dipaboa goar ni si Johannes Markus di bukku Ulaon ni Apostel. Ibana do na di pudian ni ari dianggap si Petrus songon anakna. (1 Ptr. 5:13) Nungnga tonga borngin tikki i. Alai godang dope akka halak na di huria marpungu di jabu ni si Maria lao martangiang. Ditangiakkon nasida do asa dibebasson si Petrus. Alai dang disangka nasida songon i hatopna Jahowa mangalusi tangiang ni nasida!

¹⁴ Dituktuki si Petrus ma pintu ni gerbang ni jabu i. Dung i ro ma sahalak hatoban borua na margoar si Rode lao mangida ise na ro. Goar na umum do Rode di bahasa Junani, artina “Mawar”. Tarsonggot do ibana mambege soara ni si Petrus sian balik ni gerbang i! Alani tarsonggotna, gabe dang dibukka ibana pintu ni gerbang i. Alai gabe masuk do muse ibana tu jabu i paboahon tu akka dongan na marpungu i naung ro si Petrus. Didok nasida do naung rittik si Rode. Alai sai didok ibana do na tutu hatana i. Gabe adong ma na marpikkir, suru-suruan do i na menyerupai bohi ni si Petrus. (Ul. 12:12-15) Alai sai dituktuki si Petrus do pintu ni gerbang i, gabe lao ma nasida mambukka.

¹⁵ “Gabe tarsonggot ma nasida mangida ibana.” (Ul. 12:16) Disuru si Petrus ma asa tenang nasida, asa boi diceritahon aha na masa. Jala disuru ibana ma asa dipaboa i tu si Jakobus sisean i, dohot tu akka dongan. Dung i lao ma si Petrus asa unang sanga ro tentara ni si Herodes manakkup ibana. Lao ma si Petrus tu inganan na lebih aman jala marbarita do ibana disi. Songon na dipaboa di Ulaon ni Apostel 15, dohot do ibana pasaehon masalah taringot sunat. Dukkon i dang adong be dipaboa taringot ibana. Taringot Apostel Paulus dohot ulaonna marbarita nama na dipaboa di bukku Ulaon ni Apostel. Alai pos do rohatta tudia pe si Petrus lao, sai dipatogu ibana do haporseaon ni akka dongan. Dung ditinggalhon ibana jabu ni si Maria i, marlas ni roha do nasida alani ibana.

16. Aha do na mambahen las rohatta di ari na naeng ro?

¹⁶ Sipata olo do lobi sian na taharappon dilehon Jahowa pasu-pasu i tu akka naposona. (Poda 10:22) Alani las ni rohatta gabe songon na marnipi ma tahilala. Songon i ma perasaan ni akka dongan tikki mangida si Petrus. Di ari na naeng ro, taida ma pasauton ni Jahowa sude janjina di portibi on. Pasti dang tarhatahon songon dia las ni rohatta tikki masa i. Jadi molo tetap hita setia, torus ma hita marlas ni roha sahat tu saleleng ni lelengna.

17, 18. Boasa dipuji-puji akka halak si Herodes?

¹⁷ Tarsonggot do si Herodes tikki diboto na malua si Petrus. Gabe muruk ma ibana. Pittor diparettahon ma asa manat dipareso na masa i. Disuru ma diinterogasi akka panjaga i. Ujungna ‘dihukum ma nasida’. Mungkin dihukum mate do nasida. (Ul. 12:19) Jadi dang adong asi ni roha ni si Herodes Agrippa on. Alai torus do dipasombu Debata si Herodes mangulahon hajahatonna i?

¹⁸ Mungkin gabe maila do si Herodes manang merasa turun harga dirina ala dang saut dipamate si Petrus. Alai dang pola leleng, tarubati do perasaanna i. Dibahen ma sada pertemuan dohot akka musuna, ai naeng mardame do nasida dohot ibana. Tarpaima do si Herodes naeng marpidato di jolo ni godang halak. Dipaboa si Lukas do songon dia persiapan ni raja i tu pertemuan i. Didok, “Dipakke si Herodes ma pakkean harajaonna.” Didok sejarawan Jahudi Yosefus, sian perak do pakkean ni si Herodes i. Jadi molo hona cahaya, gabe marhillong ma raja i, gabe tamba ma sangapna. Mulai ma raja na ginjang roha i marpidato, dipuji-puji akka halak ma ibana, didok ma, “Soara ni debata do i dang soara ni jolma.”—Ul. 12:20-22.

19, 20. (a) Boasa dihukum Jahowa si Herodes? (b) Aha do na boi taparsiajari sian peristiwa ni si Herodes?

¹⁹ Dang pantas si Herodes mandapot pujian sisongon i! Ala holan Debata do na layak mandapot i. Sebenarna boi hian do si Herodes paingotton akka jolma i, manang dipatudu sian hatana na so setuju ibana tu pujian i. Alai dang diulahon i, gabe dihukum Debata ma ibana. Dos songon peribahasa na mandok, “Na lao hancur do halak na patimbohon dirina.” (Poda 16:18) Didok di Bibel, “Laos satokkin i, dibahen suru-suruan ni Jahowa ma ibana marsahit. . . . Diallangi akka gilok-gilok ma ibana laos mate.” (Ul. 12:23) Sesuai do na tarsurat on tu hata ni si Yosefus. Dipaboa ibana, toppu do Raja Herodes Agrippa marsahit jala disimpulhon raja i do na naeng mate ibana ala dipasombu ibana dirina dipuji-puji akka halak. Disurat si Yosefus do muse, mangolu dope Raja Agrippa i saleleng lima ari sebelum mate ibana.b

²⁰ Dang porlu hita heran molo adong halak saonari na torus mangulahon na jahat jala dang hona hukum. Ai “di bagasan huaso ni Sibolis do saluhut portibi on”. (1 Joh. 5:19) Alai sipata gabe susa do naposo ni Debata, ala boi bebas parjahat sian hukuman nang pe nungnga takkas mangulahon na sala. Jadi sian peristiwa ni si Herodes, yakin do hita pasti bertindak do Jahowa mangurupi naposona, ala holong do rohana tu na sittong dohot na tigor. (Ps. 33:5) Pasti diboto Jahowa do andigan tikki na pas mangalehon keadilan tu hita.

21. Aha do parsiajaran na penting na dipaboa di bukku Ulaon ni Apostel 12, jala boasa on patoguhon rohatta?

²¹ Adong do parsiajaran na penting dipaboa di bagian akhir ni bukku Ulaon ni Apostel 12. Didok, “Lam rarat ma hata ni Jahowa jala lam godang ma halak na gabe sisean.” (Ul. 12:24) On paingotton hita tu cara ni Jahowa mamasu-masu ulaonta marbarita saonari. Jadi bukku Ulaon ni Apostel 12, dang holan paboahon taringot si Jakobus na dipamate dohot si Petrus na marhasil malua. Alai bukku on paboahon cara ni Jahowa manggagalhon upaya ni Sibolis lao manghancurhon huria Kristen jala pasohon ulaon marbarita. Takkas do tarida dang adong serangan ni Sibolis i na marhasil. (Jes. 54:17) Alai anggo halak na marpihak tu Jahowa dohot tu Jesus Kristus, dang na lao hea gagal mangulahon ulaon marbarita. Pasti patoguhon rohatta do on. Jadi kesempatan na istimewa do boi dohot paboahon “hata ni Jahowa” saonari!