PASAL 3

“Digohi Tondi Parbadia”

Pengaruhna dung dilean tondi parbadia di ari Pentakosta

Dibuat sian Ulaon ni Apostel 2:1-47

1. Ceritahon ma songon dia situasina di Jerusalem tikki perayaan Pentakosta.

RAME hian do tikki i di akka dalan na di Jerusalem.a Tarida do di bagas joro nakkok timus sian langgatan. Jala diendehon halak Lepi do ende Hallel (Psalmen 113 sahat tu 118). Marsialus-alusan do nasida na marende i, digoari do i gaya antifonal. Godang do halak na ro di tikki i. Adong do sian inganan na massai dao, songon Elam, Mesopotamia, Kappadosia, Pontus, Mesir, dohot Rom.b Nasida ro lao mangarayahon ari Pentakosta, i ma perayaan ‘tikki nasida mambuat hasil panen na parjolo sahali sian ladangna’. (4 Mus. 28:26) Perayaan on dibahen setiap taon. On ma gabe tanda naeng berakhir panen barli jala naeng dimulai panen gandum. Jadi marlas ni roha do sude halak tikki perayaan i.

Peta na patuduhon tempat asal ni akka halak na mambege barita na uli di ari Pentakosta 33 M. 1. Akka luat: Libia, Mesir, Etiopia, Bitinia, Pontus, Kappadosia, Judea, Mesopotamia, Babel, Elamit, Media, dohot Partia. 2. Akka kota: Rom, Aleksanderia, Mempis, Antiokia (Siria), Jerusalem, dohot Babel. 3. Akka laut: Laut Tengah, Laut Hitam, Laut Merah, Laut Kaspia, Teluk Persia.

JERUSALEM—PUSAT IBADAT NI HALAK JAHUDI

Godangan peristiwa na disurat di piga-piga pasal na parjolo di bukku Ulaon ni Apostel terjadi di Jerusalem. Kota on adong di sepanjang pegunungan tengah di Judea, hira-hira 55 kilometer di sabola timur ni Laut Tengah. Di taon 1070 SM, ditaklukkon Raja Daud ma puncak ni Dolok Sion. On ma na gabe lokasi ni Jerusalem, jala berkembang ma i gabe ibukota ni Israel najolo.

Di jonok ni Dolok Sion, adong do Dolok Moria. Sesuai tu tradisi ni halak Jahudi, dison do si Abraham najolo naeng mamelehon si Isak. Hira-hira 1.900 taon ma i sebelum terjadi akka peristiwa na disurat di bukku Ulaon ni Apostel. Belakangan Dolok Moria on termasuk do bagian ni kota Jerusalem, i ma tikki dipajongjong si Salomo bagas joro ni Jahowa disi. Bangunan on ma na gabe pusat kegiatan dohot ibadat ni halak Jahudi.

Ro do sude halak Jahudi dohot akka bangso na asing tu bagas joro lao mangalehon pelean, beribadat, jala mangulahon akka perayaan na somal diulahon ganup taon. Diulahon nasida do i songon paretta ni Debata na mandok, “Tolu hali di bagasan sataon ikkon ro do akka bawa tu jolo ni Jahowa Debatamuna di inganan na pinillitna i.” (5 Mus. 16:16) Jala di Jerusalem do lokasi ni Sanhedrin Agung, i ma mahkamah agung Jahudi dohot dewan pemerintahan nasional.

2. Mukjizat aha do na terjadi di ari Pentakosta 33 M?

² Di musim semi taon 33 M hira-hira jam sia pagi, marpungu ma sekitar 120 sisean ni Jesus di sada jabu jala terjadi ma mukjizat na luar biasa. Torus do diingot i martaon-taon dukkon i. Toppu ma “tarbege soara sian langit songon soara ni alogo na gogo”. (Ul. 2:2) Gok ma soara i di jabu i. Diida nasida ma ro na songon dila ni api marserak tu atas ni ulu ni nasida.c Gabe “digohi tondi parbadia” ma nasida jala boi ma nasida makkatai di bahasa na asing. Tikki kaluar nasida sian jabu i, heran ma akka halak na ro tu Jerusalem ala boi akka sisean i “makkatai di bagasan bahasa ni nasida”.—Ul. 2:1-6.

3. (a) Boasa massai penting peristiwa na masa di ari Pentakosta 33 M di ibadat na sittong? (b) Tikki marjamita si Petrus, kucci na dia do na dipakke ibana sian tolu “kucci ni Harajaon”, jala aha do lapatan ni i?

³ Peristiwa na masa on gabe sejarah do di ibadat na sittong. Disi ma mulana dibentuk Israel ni Debata, i ma halak Kristen na dimiahi. (Gal. 6:16) Jala tikki marjamita si Petrus, dipakke ibana ma kucci na parjolo sian tolu “kucci ni Harajaon”. (Mat. 16:18, 19) Molo taingot kucci on lapatanna kesempatan na dibukka tu tolu kelompok lao manjalo pasu-pasu na istimewa sian Debata. Kucci na parjolo mangalean kesempatan tu halak Jahudi dohot proselit Jahudi, lao manangihon barita na uli jala dimiahi marhite tondi parbadia.d Gabe bagian ni Israel ni Debata ma nasida jala boi ma nasida mamaretta gabe raja dohot malim di Harajaon Mesianik. (Pgk. 5:9, 10) Di pudian ni ari dibukka ma kesempatan tu halak Samaria jala kesempatan na parpudi tu halak na so Jahudi. Aha ma na diparsiajari halak Kristen saonari sian peristiwa penting di ari Pentakosta 33 M?

“Marpungu ma Sude Sisean i di Sada Inganan” (Ul. 2:1-4)

4. Songon dia do perkembangan ni huria Kristen di abad na parjolo mulai taon 33 M?

⁴ Awalna hira-hira 120 do godang ni halak Kristen di abad na parjolo. Di ari Pentakosta 33 M, ‘marpungu ma nasida’ di sada kamar parginjang jala mandapot tondi parbadia ma nasida di ari i. (Ul. 2:1) Alai tamba do godang ni nasida alana holan di bagasan sadari i, marribu halak tardidi. Sian i ma mulana berkembang organisasi ni Jahowa sahat tu saonari. Semangat do nasida paboahon “barita na uli taringot tu Harajaon i di liat portibi on, asa saluhut bangso mambege barita i” sebelum ro panutup ni jaman on.—Mat. 24:14.

5. Aha do manfaat na didapot akka halak na dimiahi dohot ‘biru-biru na asing’ sian huria Kristen?

⁵ Marhite huria Kristen do halak na dimiahi dohot ‘biru-biru na asing’ mandapot petunjuk lao patoguhon haporseaon ni nasida. (Joh. 10:16) Dirasahon si Paulus do manfaat ni dukungan ni akka halak na di huria. Tikki dibahen ibana surat tu halak Kristen na di Rom, didok ibana do, “Ai massai lomo do rohakku naeng pajuppang dohot hamu asa hupaboa akka na boi patoguhon parale-aleonmuna tu Debata. Jala lomo do rohakku asa masipatoguan hita. Lam togu ma au alani haporseaonmuna, jala lam togu ma hamu alani haporseaokku.”—Rom 1:11, 12.

ROM—IBUKOTA NI SADA IMPERIUM

Saleleng masa akka peristiwa di bukku Ulaon ni Apostel, Kota Rom ma kota na umbalga jala na paling berkuasa secara politik di portibi on tikki i. Ibukota ni sada imperium do Rom. Jala wilayahna mulai sian Inggris sahat tu Afrika Utara, dohot sian Samudra Atlantik sahat tu Teluk Persia.

Marragam do kebudayaan, ras, bahasa, dohot kepercayaan di Kota Rom. Godang do dalan na dibangun di kota on, jala denggan do i dirawat. Gabe godang ma akka partiga-tiga sian sude luat na ro tu kota on. Di pelabuhan Ostia na jonok tusi, godang do ro kapal mamboan sipanganon dohot barang mewah tu kota on.

Di abad na parjolo M, adong lobi sian sajuta halak na tinggal di Rom. Olo do ra satonga sian pendudukna akka hatoban, i ma akka parjahat na dihukum, akka dakdanak na digadis manang na ditelantarhon natua-tuana, dohot akka tawanan na diboan halak Rom tikki marporang. Adong do tong sian nasida halak Jahudi na diboan sian Jerusalem. Alana hea do Jerusalem ditaluhon jenderal ni Rom na margoar si Pompeius di taon 63 SM.

Akka pendudukna na so hatoban godangan tinggal di rumah susun. Bergantung do ngolu ni nasida tu bantuan ni pamaretta. Dibangun akka kesar do akka bangunan na luar biasa megah asa bagak kota on. Contohna adong do akka teater dohot akka stadion na balga. Jala disi dibahen do akka pertunjukan drama, pertandingan gladiator, dohot perlombaan kereta kuda lao menghibur rakyat. Sudena on gratis do.

6, 7. Songon dia do huria Kristen saonari mangulahon tugas lao marbarita tu sude bangso?

⁶ Sarupa do tujuan ni huria Kristen saonari on dohot huria Kristen di abad na parjolo. Dilean Jesus do tugas tu akka siseanna na mambahen las roha ni nasida. Alai memang godang do tantangan mangulahon on. Didok ibana do tu nasida, “Bahen hamu ma saluhut halak sian nasa bangso gabe siseanku. Didi hamu ma nasida di bagasan goar ni Ama, Anak, dohot tondi parbadia. Ajari hamu ma nasida mangulahon sude naung huparettahon tu hamu.”—Mat. 28:19, 20.

⁷ Huria Kristen Saksi Jahowa ma na dipakke Jahowa saonari on lao mangulahon tugas na massai penting i. Pasti dang mura marbarita tu akka halak na marasing-asing bahasana. Alai dibahen Saksi Jahowa do publikasi berdasarhon Bibel di bagasan lobi sian 1.000 bahasa. Molo taratur hamu marpungu jala marbarita na uli dohot mambahen sisean, pasti parohon las ni roha do i. Sada kesempatan na istimewa do molo dohot hamu paboahon barita na uli, ala holan saotik do jolma di portibi on na mangulahon i.

8. Aha do manfaat na tadapot sian huria?

⁸ Asa boi hita bertekun jala marlas ni roha di ari parpudi na massai susa on, diparade Jahowa do akka dongan di liat portibi on lao patoguhon hita. Disurat si Paulus do tu halak Heber, “Taparrohahon ma akka donganta, asa boi hita manjujui na asing lao patuduhon holong ni roha dohot mangulahon na denggan. Unang ma tatinggalhon parpunguanta songon na somal diulahon piga-piga halak, alai tapatogu ma akka donganta. Jala lam marsitutu ma hita mangulahon i, ai nungnga lam jonok ari i.” (Heb. 10:24, 25) Hadiah sian Jahowa do huria Kristen ala disi ma hita boi masipatoguan. Jadi berupaya ma hita asa tetap jonok dohot akka dongan jala unang ma taabaihon parpunguanta!

“Mambege Akka Sisean i . . . Makkatai di Bagasan Bahasa ni Nasida” (Ul. 2:5-13)

Marbarita ma akka sisean ni Jesus tu halak Jahudi dohot proselit di dalan na rame. — “Tabege do nasida boi makkatai taringot tu ulaon ni Debata na balga di bahasatta be.”—Ulaon ni Apostel 2:11

9, 10. Aha do na diulahon Saksi Jahowa asa boi nasida marbarita tu akka halak di marragam bahasa?

⁹ Bayakkon ma pasti heran do akka halak Jahudi dohot akka proselit na ro tikki Pentakosta 33 M i. Pasti godang do halak na mangattusi bahasa Junani manang bahasa Heber ala i do bahasa na umum di tikki i. Alai dibege nasida do akka sisean i “makkatai di bagasan bahasa ni nasida”. (Ul. 2:6) Tersentuh do nasida mambege barita na uli dipasahat di bahasa ni nasida. Memang dang boi be halak Kristen saonari makkatai di bahasa na asing secara mukjizat. Alai godang do halak Kristen na marsiajar bahasa na baru, asa boi mangurupi huria na marbahasa na asing na adong di daerah ni nasida. Bahkan adong do na pinda tu negara na asing. Godang do halak na olo marsiajar Bibel ala dipasahat barita na uli i di bahasa ni nasida.

¹⁰ Contohna si Christine dohot pitu Saksi na asing. Kursus do nasida lao marsiajar bahasa Gujarati. Adong do dongan sakarejo ni si Christine sahalak borua na marbahasa Gujarati. Tikki pajuppang nasida, disapa ibana ma donganna mamakke bahasa i. Tersentuh do roha ni dongan sakarejona i. Jala penasaran do ibana boasa olo si Christine marsiajar bahasa na maol songon bahasa Gujarati. Dipaboa si Christine ma barita na uli tu ibana. Jala didokkon dongan sakarejona i ma, “Pasti barita na penting do na naeng dipaboa hamuna.”

11. Boha ma caratta marbarita tu akka halak na marbahasa asing?

¹¹ Memang dang sude hita boi marsiajar bahasa na asing. Alai nang pe songon i, boi do hita marbarita tu akka halak na marbahasa na asing. Sada carana, i ma mamakke aplikasi JW Language^®. Disi boi ma taparsiajari sapaan singkat di bahasa ni akka halak na di daerahta. Boi do tong taparsiajari disi piga-piga ungkapan na boi mambahen halak tertarik marsiajar Bibel. Tapaboa ma tu nasida situs jw.org jala tapatudu ma akka video dohot publikasi na adong di bahasa ni nasida. Molo tapakke i tikki marbarita, pasti las ma rohatta songon akka dongan na di abad na parjolo i.

HALAK JAHUDI DI MESOPOTAMIA DOHOT DI MESIR

Bukku The History of the Jewish People in the Age of Jesus Christ (175 SM–135 M) mandok, “Di Mesopotamia, Media dohot Babel, tinggal do disi keturunan ni Israel sappulu marga dohot keturunan ni harajaon Juda. Nasida ma na hea ditawan halak Asiria dohot halak Babel.” Menurut Esra 2:64, holan 42.360 do halak Israel na mulak tu Jerusalem sian penawanan di Babel taon 537 SM. Sejarawan Flavius Yosefus mandok, adong marpulu ribu halak Jahudi na “tinggal di sekitar ni luat Babel” di abad na parjolo M. Di abad patoluhon sahat tu palimahon M, dibahen nasida ma kitab Talmud Babel.

Godang do bukti na patuduhon nungnga tinggal halak Jahudi di Mesir mulai sian abad paonomhon SM. Di tikki i dipasahat si Jeremia do hata ni Debata tu halak Jahudi na tinggal di Mesir, termasuk na di Mempis. (Jer. 44:1, surat na di toru) Olo do ra godang halak Jahudi pinda tu Mesir saleleng penyebaran kebudayaan Junani. Si Yosefus mandok halak Jahudi do termasuk na parjolo sahali mangingani Kota Aleksanderia. Di pudian ni ari adong do bagian ni kota i na khusus diingani halak Jahudi. Di abad na parjolo M, penulis Jahudi na margoar si Filo mandok, adong sajuta dongan sabangsona na tinggal di sude luat di Mesir, mulai sian “pinggiran Libia sahat tu perbatasan Etiopia”.

“Jongjong ma si Petrus” (Ul. 2:14-37)

12. (a) Aha do kaitan ni surirang ni si Joel tu mukjizat na terjadi di ari Pentakosta 33 M? (b) Boasa tarpaima halak Kristen di abad na parjolo tu penggenapan ni surirang ni si Joel?

¹² “Jongjong ma si Petrus” makkatai tu godang halak na ro sian marragam bangso i. (Ul. 2:14) Dipatorang ibana ma tu nasida, molo mukjizat na terjadi tu akka sisean i sebenarna menggenapi surirang na disurat si Joel. Ai didok Jahowa do tu si Joel, “Usehonokku ma tondi parbadiakku tu sude jolma na ro sian marragam bangso.” (Joel 2:28) Tarpaima do halak Kristen di abad na parjolo tu penggenapan ni surirang ni si Joel on. Alana sebelum nakkok Jesus tu surgo, didokkon ibana do tu siseanna, “Pangidookku ma tu Damang i asa dilehon tu hamu pangurupi na asing.” Pangurupi na didok ni Jesus, i ma “tondi parbadia”.—Joh. 14:16, 17.

13, 14. Aha do na didok si Petrus asa tergerak roha ni akka halak bertobat, jala songon dia do hita boi maniru ibana?

¹³ Tegas do hata ni si Petrus di akhir ni jamitana tu halak na marpungu i. Didok ibana do, ‘Naeng ma takkas diboto hamu sude halak Israel aha na masa tu Jesus naung dipakkuhon hamu tu hau i. Anggiat ma pos rohamuna naung dibahen Debata ibana gabe Tuan dohot Kristus.’ (Ul. 2:36) Memang godang sian na mambege jamita ni si Petrus i, dang langsung mangida tikki dipamate Jesus di hau partinaonan i. Alai ala halak Jahudi do nasida, dohot do nasida bertanggung jawab tu kesalahan i. Nang pe balga kesalahan ni halak Jahudi, tetap do respek si Petrus makkatai tu nasida. Memang tegas do hatana alai tujuanna asa bertobat do nasida, dang na lao manudu. Jala dang tersinggung nasida mambege hatana i. Justru dung didok si Petrus hatana i “gabe marsak ma nasida”, jala didok ma, “Aha ma na ikkon bahenonnami?” Artina menyesal do nasida jala hona do hatana i tu roha ni nasida. Gabe tergerak ma nasida bertobat.—Ul. 2:37.

¹⁴ Hita pe tatiru ma cara ni si Petrus. Tapastihon ma barita na tapasahat i hona tu roha ni halak na mambege. Tikki marbarita hita, dang porlu taparsoalhon sude pandapot ni parjabu na sala. Justru dumenggan do molo tahatai topik na lomo roha ni nasida. Molo taulahon i, rade ma halak i manangihon hita jala gabe boi ma tapatudu songon dia na didok Bibel. Jotjot do gabe tertarik nasida manangihon barita na tapasahat ala denggan caratta pasahatton.

HALAK KRISTEN NA DI PONTUS

Adong do halak Jahudi na sian Pontus manangihon jamita ni si Petrus di ari Pentakosta 33 M. Pontus, i ma sada provinsi di bagian utara ni Asia Kecil. (Ul. 2:9) Pasti diboan nasida do barita na uli i dung mulak tu hutana. Alani i ma tikki dibahen si Petrus suratna na parjolo, ditujuhon do i tu akka halak na “marserak” di marragam inganan, termasuk na di Pontus.g (1 Ptr. 1:1) Sian i taboto ma godang do hasusaan dihadapi nasida alani haporseaon, songon paraloan dohot penganiayaan.—1 Ptr. 1:6.

Adong do paraloan na asing na dihadapi halak Kristen di Pontus. Taboto ma i sian surat na dijalo Kesar Trayanus sian si Plinius Muda, gubernur ni Provinsi Bitinia dohot Pontus di wilayah na dirajai Rom. Hira-hira taon 112 M tikki di Pontus, dibahen si Plinius ma di suratna naung tersebar ajaran Kristen tu sude halak, tu bawa, borua, na poso nang na matua, na mora nang na pogos. Dipaksa si Plinius do halak Kristen asa unang gabe halak Kristen be. Molo dang olo, dipamate ibana do. Dipalua ibana do na olo mamburai Kristus, manang na martangiang tu akka dewa manang tu patung ni si Trayanus. Alai disadari si Plinius do “halak na botul-botul mangihutton Kristus, dang boi dipaksa mangulahon i”.

g Hata Junani na diterjemahon gabe “marserak” biasana dipakke tu halak Jahudi. Jadi on patuduhon godang do halak Kristen na parjolo berasal sian halak Jahudi.

“Ikkon Tardidi do Hamu” (Ul. 2:38-47)

15. (a) Aha do na didokkon si Petrus tu halak Jahudi dohot tu proselit i, jala boha do tanggapanna? (b) Boasa boi tadokkon dang na pahatoppu sebenarna akka halak na tardidi di ari Pentakosta i?

¹⁵ Di ari Pentakosta 33 M, didokkon si Petrus ma tu halak Jahudi dohot tu proselit, “Muba ma hamu. Ikkon tardidi do hamu.” (Ul. 2:38) Ujungna tardidi ma hira-hira 3.000 halak di bagasan sadari i.e Mungkin di akka kolam na adong di Jerusalem do nasida tardidi manang di huta na di sakalilingna. Menurut hamu, pahatoppu do nasida tardidi? Daong, alana halak Jahudi dohot proselit i, parsiajar Bibel na ringgas do. Jala sian najolo nungnga gabe bangso na dipillit Jahowa nasida. Asing ni i halak na semangat do nasida. Buktina olo do nasida ro tu perayaan Pentakosta na dibahen setiap taon, hape dao do i sian hutana. Alai cerita on dang na patuduhon ikkon hatop-hatop tardidi parsiajar Bibel dohot akka anakkon ni Saksi. Ikkon jolo rade do roha ni nasida asa tardidi. Dung tardidi halak Jahudi dohot proselit i, berarti nga diakkui nasida be molo Jesus Kristus dipakke Jahowa lao pasautton lomo ni rohana. Jala mulai sian i, nungnga boi be nasida melayani Debata ala nungnga gabe siihutton Kristus nasida.

ISE DO AKKA PROSELIT?

Ditangihon “halak Jahudi dohot akka proselit” do barita na dipasahat si Petrus di ari Pentakosta 33 M.—Ul. 2:10, surat na di toru.

Si Nikolaus ma contohna, didok do ibana “proselit” sian Antiokia. Bahkan memenuhi syarat do ibana mangaradoti akka “ulaon na rikkot” lao mambagihon sipanganon ganup ari. (Ul. 6:3-5, surat na di toru) Proselit, i ma akka halak na so Jahudi naung maragama Jahudi. Dianggap do nasida halak Jahudi ala nungnga manomba Debata jala mangihutton Patik ni halak Israel. Dang olo be nasida manomba akka debata na asing, disunat do akka bawa, jala nungnga bergabung nasida tu bangso Israel.

Dung dibebasson halak Jahudi sian penawanan di Babel taon 537 SM, godang do nasida tinggal di luat na dao sian Israel. Alai torus do diihutton ajaran ni agama Jahudi. Alani i manang didia pe halak Jahudi tinggal, boi do akka halak di sekitar ni nasida mamboto agama Jahudi. Akka penulis najolo songon si Horatius dohot si Seneka paboahon, godang do halak sian marragam bangso na tertarik tu halak Jahudi dohot tu haporseaon ni nasida. Ujungna bergabung ma nasida tu halak Jahudi jala gabe proselit ma nasida.

16. Sian dia do taboto na rela berkorban halak Kristen na di abad na parjolo?

¹⁶ Dipasu-pasu Jahowa do akka halak na baru tardidi i. Didok muse di bukku Ulaon ni Apostel, “Marpungu ma sude akka na porsea i jala olo do nasida mambagi sude arta ni nasida tu akka donganna. Digadis nasida ma akka arta ni nasida. Dibagi ma tuhorna i tu sude, sesuai tu na porlu di ganup halak.”f (Ul. 2:44, 45) Rela berkorban do halak Kristen di abad na parjolo i, jala holong do roha ni nasida tu akka na baru tardidi i. Pasti las do rohatta maniru nasida.

17. Aha do na porlu diulahon sasahalak asa memenuhi syarat lao tardidi?

¹⁷ Adong do na porlu diulahon sasahalak molo naeng dibaktihon ibana ngoluna tu Debata jala tardidi. Ikkon adong do parbinotoanna taringot isi ni Bibel. (Joh. 17:3) Ikkon dipatudu ibana do haporseaonna, bertobat sian dosana jala ikkon botul-botul menyesali i. (Ul. 3:19) Ikkon muba do ibana jala disesuaihon pangalahona tu lomo ni roha ni Debata. (Rom 12:2; Eps. 4:23, 24) Dung diulahon i, martangiang do ibana lao mambaktihon dirina tu Debata, dukkon i tardidi ma ibana.—Mat. 16:24; 1 Ptr. 3:21.

18. Aha do kesempatan na istimewa na dilehon tu akka halak na olo tardidi?

¹⁸ Nungnga tardidi be hamu gabe siihutton Jesus? Molo nungnga, dilehon do kesempatan na istimewa tu hamu. Songon akka sisean ni Jesus di abad na parjolo na digohi tondi parbadia, hamu pe gabe boi ma dohot marbarita na uli jala pasautton lomo ni roha ni Jahowa!

a Ida ma kotak “Jerusalem—Pusat Ibadat ni Halak Jahudi”.

b Ida ma kotak “Rom—Ibukota ni Sada Imperium”; “Halak Jahudi di Mesopotamia Dohot di Mesir”; dohot “Halak Kristen na di Pontus”.

c “Dila ni api” na didok dison, dang maksudna benar-benar api. Alai on patuduhon ‘songon api’ na galak do na ro tu atas ni ulu ni nasida.

d Ida ma kotak “Ise do Akka Proselit?”

e Sebagai perbandinganna, tanggal 7 Agustus 1993, di parpunguan internasional ni Saksi Jahowa di Kiev, Ukraina, tardidi do 7.402 halak. Dipakke do onom kolam, jala saleleng dua jom sappulu lima menit ma acara pandidion i.

f On ma pengaturan sementara na dibahen asa boi terpenuhi kebutuhan ni akka halak na ro tu Jerusalem. Ai ulleleng do nasida tinggal disi asa boi godang marsiajar. Pengaturan on sumbangan sukarela do, dang sarupa tu ulaon ni komunis.—Ul. 5:1-4.