Surat sian Punguan na Mangaradoti Organisasi

Akka Parbarita Harajaon na Dihaholongi Hami,

Bayakkon ma hamu sahalak sian apostel na jongjong di Dolok Jetun. Dipatuduhon Jesus ma dirina tu jolomuna sebelum nakkok ibana tu surgo. Didok ibana ma, “Molo dung ro tondi parbadia i tu hamu gabe margogo ma hamu. Paboaonmuna ma taringot tu au di Jerusalem, di sude luat na di Judea, di Samaria, sahat tu ujung ni tano on.” (Ul. 1:8) Boha do tanggapanmuna?

Pasti borat do dirasa hamu tugas on. Ro do ra tu pikkiranmuna, ‘Holan saotik do hami sisean, boha ma caranami marbarita “sahat tu ujung ni tano on”?’ Diingot hamu ma muse sipasingot ni Jesus di borngin sebelum mate ibana na mandok, “Dang umbalga hatoban sian tuanna. Molo dibahen nasida na haccit tu au, bahenon ni nasida do songon i nang tu hamu. Molo dioloi nasida hatakku, oloan ni nasida do nang hatamuna. Alai bahenon ni nasida ma i sude tu hamu alani goarhu, ai dang ditanda nasida Ibana na manuru au.” (Joh. 15:20, 21) Huhut dipikkiri hamu hata i, ninna rohamuna ma, ‘Boha ma bahenokku torus marbarita tikki adong tantangan dohot penganiayaan?’

Songon i do ra tong na tapikkiri saonari on. Ai hita pe Saksi Jahowa ikkon marbarita do “sahat tu ujung ni tano on” lao manjuppangi “saluhut halak sian nasa bangso”. (Mat. 28:19, 20) Jadi, boha ma carana asa boi marhasil ulaon on khususna tikki adong tantangan?

Dipaboa do di bukku Ulaon ni Apostel songon dia Jahowa mangurupi akka apostel dohot halak Kristen di abad na parjolo M asa marhasil mangulahon tugas i. Bukku on dirancang lao mangurupi hamu mamboto jala mambayakkon akka peristiwa na disurat di bukku Ulaon ni Apostel. Godang do persamaan ni halak Kristen di abad na parjolo tu naposo ni Jahowa saonari. Dang holan ulaonta marbarita na sarupa, alai cara ni organisasi mangatur ulaon i pe sarupa do. Molo manat tapikkiri i, gabe pos ma rohatta na tutu do Jahowa torus mangarahon organisasina di tano on.

Harap do rohanami jala martangiang do hami asa anggiat marhite pembahasan sian bukku Ulaon ni Apostel on, lam dipatogu haporseaonmuna jala lam pos rohamuna na urupan ni tondi parbadia hamu. Sai anggiat ma taronjar rohamuna asa torus ‘paboahon taringot tu Harajaon ni Debata’ jala mangurupi akka halak asa selamat.—Ul. 28:23; 1 Tim. 4:16.