Parsiajari ma Akka Sifat ni Jahowa Sian Akka Toppaanna

 1. Boasa boi lam takkas ditanda si Job akka sifat ni Debata?

PASTI sering do si Job makkata-hatai dohot na asing saleleng ngoluna. Alai na paling berkesan di si Job, i ma tikki makkatai ibana dohot Jahowa. Tikki i, dijujui Jahowa do si Job asa mamparrohahon ulaon ni Jahowa na palongang roha. Gabe diboto si Job ma na massai marbisuk do Jahowa i. Jala gabe pos ma rohana na sanggup do Jahowa paradehon na porlu tu akka naposona. Misalna dipaingot ma si Job na sanggup do Jahowa paradehon siallangon ni binatang. Jadi pasti sanggup do Jahowa paradehon na porlu di si Job. (Job 38:39-41; 39:1, 5, 13-16) Dung diparrohahon si Job akka toppaan i, gabe lam takkas ma ditanda ibana akka sifat ni Debata.

 2. Boasa dang sai mura di hita mangarimangi akka toppaan ni Jahowa?

² Hita pe boi do lam godang marsiajar taringot Jahowa molo tarimangi akka toppaanna. Alai sipata dang mura mangulahon i. Molo tinggal di kota hita, olo do jarang taida akka toppaan ni Jahowa. Bahkan molo tung pe tinggal di huta hita, olo do dang sanga hita mangarimangi akka toppaan. Alani i di artikel on tabahas ma aha do manfaatna molo tabahen tikki lao mangarimangi akka toppaan ni Jahowa. Tabahas ma muse songon dia Jahowa dohot Jesus mamakke akka toppaan tikki mangajari, jala aha do na boi taulahon lao mandapot godang parsiajaran sian akka toppaan.

 3. Sian dia do taboto na lomo roha ni Jahowa asa dinikmati si Adam toppaanna?

³ Lomo do roha ni Jahowa asa dinikmati jolma akka toppaanna. Tikki ditoppa Debata si Adam, dilehon do tu ibana Paradeiso na massai uli gabe tempat tinggalna. Dilehon Jahowa do tugas tu si Adam lao mangurus jala mambahen taman i lam bidang. (1 Mus. 2:8, 9, 15) Sada hasangapon do tugas on di si Adam! Bayakkon ma las ni roha ni si Adam tikki diida ibana tubu suan-suanan dohot akka bunga. Dipangido Jahowa do muse si Adam lao mambahen goar ni akka binatang. (1 Mus. 2:19, 20) Sasittongna boi do Jahowa sandiri mangulahon i, alai dilehon Ibana do tugas i tu si Adam. Pasti sebelum diputusson si Adam aha goar ni binatang i, nungnga jolo manat diparrohahon ibana rupa dohot kebiasaan ni binatang i. Pasti dinikmati si Adam do tugasna on, jala gabe lam diattusi ibana ma na marbisuk do Jahowa i jala massai denggan do akka toppaanna.

 4. (a) Boasa ikkon taparrohahon akka toppaan? (b) Toppaan ni Jahowa na dia do na paling menarik di hamu?

⁴ Dipangido Jahowa do tu hita asa mamparrohahon akka toppaanna. Didok Ibana, “Bereng ma doppak langit, jala ida ma. Ise do na manoppa sudena i?” Takkas do taboto alusna. (Jes. 40:26) Jahowa do na manoppa sude na adong di langit, di tano on, dohot na di laut. Jala sian akka toppaan i, godang do na boi taparsiajari taringot Jahowa. (Ps. 104:24, 25) Pikkirhon ma muse songon dia Jahowa manoppa hita. Dibahen Ibana do hita asa boi menikmati sude toppaan na bagak na adong di sakalilingta. Dilehon Ibana ma muse kesanggupan tu hita lao mangida, mambege, maniop, mandai, dohot manganggo asa boi tanikmati marragam toppaan ni Jahowa.

 5. Sesuai tu Rom 1:20, aha do manfaatna tu hita mamparsiajari akka toppaan?

⁵ Dipaboa Bibel do muse alasan na asing boasa ikkon taparrohahon akka toppaan. On mangajarhon hita taringot sifat ni Jahowa. (Jaha Rom 1:20.) Misalna coba ma taparrohahon akka toppaan ni Jahowa jala songon dia i dirancang. Sian i gabe taboto ma na massai marbisuk do Jahowa i. Pikkirhon ma muse ragam ni akka sipanganon na boi tanikmati. Sian i gabe taboto ma na massai holong do roha ni Debata tu jolma. Tikki taida sifat ni Jahowa sian akka toppaanna, gabe lomo do rohatta lam mananda jala lam jonok tu Ibana. Saonari taida ma jo songon dia Jahowa mamakke toppaanna lao mangajari hita.

 6. Aha do na boi taparsiajari sian akka pidong na pinda tu inganan na asing?

⁶ Nungnga ditottuhon Jahowa tikkina. Ganup taon di ujung ni bulan Februari sahat tu pertengahan ni bulan Mei, boi do diida halak Israel burung bangau habang pinda tu utara. Didok Jahowa do tu halak Israel, “Haru burung bangau diboto do andigan tikkina lao pinda.” (Jer. 8:7) Nungnga ditottuhon Jahowa tikkina andigan pidong i pinda tu inganan na asing. Dos songon i ma, nungnga ditottuhon Jahowa tikkina andigan ro ari panguhumanna. Jadi saonari molo taida akka pidong pinda tu inganan na asing, gabe dipaingot do hita pasti hancurhonon ni Jahowa do portibi na jahat on di “tikki naung ditottuhon” Ibana.​—Hab. 2:3.

 7. Aha do na boi taparsiajari tikki taida pidong habang timbo? (Jesaya 40:31)

⁷ Dilehon Jahowa do gogo tu naposona. Marhite Panurirang Jesaya marjanji do Jahowa na lehononna gogo tu akka naposona na gale manang na kecil hati. “Dos songon na marhabong ma nasida songon lali na boi habang timbo.” (Jaha Jesaya 40:31.) Sering do diida halak Israel lali habang timbo dang pola loja mengepakkan sayapna. Boi pe songon i ala dimanfaatton lali i do arus udara. Sada sipaingot na penting do on. Haru tu akka pidong i dilehon Jahowa gogo, apalagi ma tu hita! Jadi tikki taida pidong habang timbo na so pola loja mengepakkan sayapna, taingot ma pasti lehonon ni Jahowa do gogo tu hita lao mangadopi masalahta.

 8. Aha do na diparsiajari si Job sian akka toppaan ni Debata, jala aha do na boi taparsiajari sian i?

⁸ Boi do Jahowa tahaporseai. Diurupi Jahowa do si Job asa lam porsea tu Ibana. (Job 32:2; 40:6-8) Tikki makkatai Jahowa tu si Job dipaboa Ibana do taringot toppaanna songon bintang, ombun, dohot ronggur. Dipaboa Jahowa do muse taringot akka binatang songon banteng dohot hoda. (Job 38:32-35; 39:9, 19, 20) Akka toppaan i dang holan patuduhon huaso ni Jahowa na massai balga. Alai tong do patuduhon holong dohot bisukna. Hasilna gabe lam porsea ma si Job tu Jahowa. (Job 42:1-6) Dos songon i ma tikki taparsiajari taringot akka toppaan, dipaingot do hita na umbisuk do Jahowa jala umbalga do huasona sian hita. Jadi pasti sanggup do Ibana jala lomo rohana manalpuhon sude sitaononta. Gabe lam togu do haporseaotta tu Jahowa mamboto on.

9-10. Aha do na boi taparsiajari taringot Jahowa sian mataniari dohot udan?

⁹ Takkas do diboto Jesus taringot toppaan. Alana rap do ibana dohot Bapakna lao manoppa alam semesta on. (Poda 8:30) Tikki di tano on Jesus, dipakke ibana do toppaan lao mangajarhon tu siseanna taringot Bapakna na di surgo. Tabahas ma piga-piga na diajarhon Jesus taringot toppaan.

¹⁰ Dipatudu Jahowa do holongna tu sude halak. Di Jamita na di Dolok, dipaboa Jesus do tu akka siseanna taringot mataniari dohot udan. Godang do halak na merasa hal na biasa do i, hape penting hian do na dua i asa boi jolma toktong mangolu. Sasittongna boi do dang dilean Jahowa mataniari dohot udan tu akka halak na so manomba Ibana. Alai Debata na parholong do Ibana. Dipabissar Ibana do mataniari jala diparo Ibana do udan tu sude halak. (Mat. 5:43-45) Dipakke Jesus do contoh on lao mangajari akka siseanna na lomo do roha ni Jahowa asa tahaholongi sude halak. Tikki taida bonom mataniari manang ro udan taingot ma holong ni roha ni Jahowa tu sude halak. Gabe tergerak ma rohatta maniru Jahowa patuduhon holong marhite marbarita na uli tu sude halak.

11. Boasa boi dipatogu rohatta tikki mengamati akka pidong?

¹¹ Diparade Jahowa do akka na porlu di hita. Di Jamita na di Dolok i didok Jesus do muse, “Parrohahon hamu ma akka pidong na di langit, na so manabur boni manang mamanen manang na so papunguhon hasil panen tu gudang. Alai, dilehon Amamuna na di banua ginjang i do sipanganon tu nasida.” Bisa jadi huhut diida akka na ro i habang akka pidong, didok Jesus ma tu nasida, “Ummarga do hamu kan sian akka pidong i?” (Mat. 6:26) Dipapos Jesus do rohatta sai diparade Jahowa sude na porlu di hita! (Mat. 6:31, 32) Sahat tu saonari, godang do naposo ni Jahowa na setia gabe dipatogu ala marsiajar sian akka toppaan. Sahalak donganta borua na poso na merintis di Spanyol hea do merasa kecil hati ala dang dapotna tempat tinggal na layak. Alai dung diida ibana akka pidong mangallang biji-bijian dohot buah-buahan, gabe dipatogu ma rohana. Didok ibana, “Cara ni Jahowa paradehon siallangon ni akka pidong i paingotton au pasti sanggup do Jahowa paradehon kebutuhanku.” Dang leleng dukkon i dapot ni donganta borua i ma tempat tinggal na layak.

12. Sesuai tu Mateus 10:29-31, aha do na boi taparsiajari taringot Jahowa sian akka amporik?

¹² Diargai Jahowa do hita secara pribadi. Andorang so disuru Jesus akka siseanna marbarita, diurupi Jesus do nasida asa unang mabiar tu paraloan. (Jaha Mateus 10:29-31.) Ditaringoti Jesus do sada pidong na ditanda halak Israel, i ma amporik. Mura do arga ni pidong i di tikki i. Alai didok ibana do tu akka siseanna, “Dang adong nanggo sada pe sian i na madabu tu tano na so diboto Amamuna.” Didok Jesus do muse, “Ummarga do hamu sian godang amporik.” Dipapos Jesus do roha ni akka siseanna na diargai Jahowa do nasida secara pribadi. Jadi dang porlu mabiar nasida tu penganiayaan. Pasti diingot akka sisean i do hata ni Jesus i tikki diida nasida akka amporik saleleng marbarita nasida di akka kota dohot huta. Dos songon i ma tikki diida hamu pidong na gelleng, ingot ma diargai Jahowa do hamu secara pribadi. Alana “ummarga do hamu sian godang amporik”. Marhite pangurupion ni Jahowa, boi do hamu marhasil mangadopi paraloan.​—Ps. 118:6.

13. Songon dia do asa lam godang parsiajaran na tadapot sian akka toppaan?

¹³ Songon dia do asa lam godang parsiajaran na tadapot taringot Jahowa sian akka toppaan? Parjolo, taparade ma tikki lao mengamati akka toppaan. Dung i, tapikkirhon ma aha do na boi taparsiajari taringot Jahowa sian toppaanna. Memang dang sai mura mangulahon on. Si Géraldine sahalak donganta borua sian Kamerun mandok, “Magodang di kota do au. Jadi ikkon berupaya do au asa boi mangamati akka toppaan.” Sahalak sintua na margoar si Alfonso mandok, “Husadari ma ikkon huparade do tikki asa boi huamati toppaan ni Jahowa sahalakku jala mangarimangi parsiajaran na boi hudapot taringot Jahowa sian toppaanna.”

14. Aha do na diparsiajari si Daud tikki mangarimangi toppaan ni Jahowa?

¹⁴ Dirimangi si Daud do akka toppaan ni Debata. Didok ibana do tu Jahowa, “Molo huida langit na binahenmi, songon i nang bulan dohot akka bintang na tinoppami, tung aha ma huroha jolma i, umbahen na diingot Ho ibana?” (Ps. 8:3, 4) Las do roha ni si Daud mangida akka bintang di langit tikki borngin. Alai dang holan i, dirimangi ibana do parsiajaran taringot Debata sian akka bintang i, jala gabe diboto ibana ma na luar biasa do huaso ni Jahowa. Asing ni i, hea do dirimangi si Daud songon dia ibana dibentuk tikki di bortian ni omakna. Dung dirimangi si Daud luar biasa do cara ni Jahowa manoppa ibana, gabe lam tamba ma pangargaionna tu bisuk ni Jahowa.​—Ps. 139:14-17.

15. Sifat ni Jahowa na dia do na boi tarida sian akka toppaanna? Bahen ma contoh. (Psalmen 148:7-10)

¹⁵ Songon si Daud, godang do toppaan di sakalilingta na boi mangurupi hita mananda Jahowa. Misalna pikkirhon ma taringot huaso ni Jahowa tikki dihilala hamu sinar ni mataniari. (Jer. 31:35) Pikkirhon ma muse taringot bisuk ni Jahowa tikki diida hamu pidong mambahen asarna. Jala pikkirhon ma rasa humor ni Jahowa tikki diida hamu anak ni biang marputar-putar lao makkarat ihurna. Rimangi ma holong ni Jahowa tikki diida hamu sahalak ina marmeami dohot anakna. Godang do kesempatan di hita lao marsiajar taringot Jahowa sian akka toppaanna. Alana sude do toppaan i mamuji Ibana, dang soal na balga, na gelleng, na jonok, manang na dao.​—Jaha Psalmen 148:7-10.

16. Aha do na ikkon taupayahon?

¹⁶ Debata na marbisuk do Jahowa i, parholong, marhuaso, jala denggan do sude toppaanna. Boi do taboto akka sifat ni Jahowa i dohot sifatna na asing molo taamati akka toppaan di sakalilingta. Alani i ikkon taratur ma tabahen tikki lao menikmati akka toppaan, jala tarimangi ma songon dia akka toppaan i mangajarhon hita taringot Jahowa. Molo taulahon i gabe lam jonok ma hita tu Debata na manoppa hita. (Jak. 4:8) Di artikel na mangihut, tabahas ma songon dia akka natua-tua boi mamakke toppaan lao mangurupi gelleng ni nasida asa lam jonok tu Jahowa.