“Songon dia do Halak na Mate Boi Dipahehe?”

1-2. Boasa porlu botoon ni halak Kristen taringot haheheon na tu surgo?

GODANGAN naposo ni Jahowa saonari, harapanna lao mangolu salelengna di tano on. Alai adong do deba halak Kristen na dipillit lao mangolu tu surgo. Lomo do roha ni halak Kristen na dipillit lao tu surgo naeng mamboto songon dia hangoluan di surgo. Porlu do botoon ni akka halak na naeng mangolu di tano on taringot i? Taida ma di artikel on, songon dia haheheon na tu surgo i parohon pasu-pasu tu akka halak na naeng mangolu salelengna di tano on. Dang soal aha harapanta, naeng mangolu di tano on manang di surgo, porlu do taboto taringot haheheon na tu surgo.

² Diurupi Debata do piga-piga sisean ni Jesus di abad na parjolo lao manuratton taringot haheheon na tu surgo. Didok Apostel Johannes do, “Anak ni Debata do hita saonari. Alai, ndang tangkas dope taboto manang na songon dia hita sogot. Na taboto, tingki dipataridahon Debata dirina, gabe songon Ibana ma hita.” (1 Joh. 3:2) Akka halak Kristen na dipillit lao tu surgo, dang mamboto songon dia nasida sogot molo dung dipahehe. Alai molo dung dipahehe nasida tu surgo, boi ma langsung diida nasida Debata. Memang, dang takkas dipaboa sude di Bibel taringot haheheon na tu surgo. Alai adong do dipaboa si Paulus hatorangan taringot i. Misalna, rap do annon akka halak na miniahan i dohot Kristus manghancurhon “sude pamarentaon, na marhuaso, dohot na marhagogoon”. Dohot ma muse “musu na parpudi”, i ma hamatean. Dung i, rap ma Jesus dohot na miniahan patundukkon dirina tu Jahowa jala pasahatton sasudena tu Ibana. (1 Kor. 15:24-28) Luar biasa do annon na masa on!b

 3. Songon na didok di 1 Korint 15:30-32, aha do manfaatna ala porsea si Paulus tu haheheon?

³ Boi do si Paulus martahan mangadopi godang hasusaan ala porsea ibana tu haheheon. (Jaha 1 Korint 15:30-32.) Didok ibana do tu halak Kristen na di Korint, “Ganup ari do ahu mangadopi hamatean.” Didok si Paulus do muse, ‘Hualo do angka binatang buas na di Epesus.’ Olo do ra na nidok ni si Paulus dison, na tutu ibana mangalo binatang buas di sada stadion di Epesus. (2 Kor. 1:8; 4:10; 11:23) Alai olo do ra maksudna, paraloan sian halak Jahudi dohot sian akka halak na asing na dos songon “binatang buas”. (Ul. 19:26-34; 1 Kor. 16:9) Jadi manang aha pe maksud ni si Paulus dison, pasti berbahaya do situasina di tikki i. Alai nang pe songon i, toktong do pos rohana manatap ari na naeng ro.​—2 Kor. 4:16-18.

 4. Boasa porlu torus taingot haheheon? (Ida gambar sampul.)

⁴ Hita pe saonari, mangolu di tikki na berbahaya do. Adong do donganta na gabe korban kejahatan. Na asing, tinggal di daerah na so aman ala masa porang. Akka donganta na asing muse, dang bebas marbarita na uli ala diorai ulaonta marbarita di daerah ni nasida. Alai toktong do nasida marbarita na uli nang pe dipenjara manang dipamate. Torus do nasida setia manomba Jahowa. Jala gabe sitiruon na denggan do on tu hita. Dang mabiar nasida, alana molo tung pe mate saonari, adong do janji ni Debata sipaimaon ni nasida di ari na naeng ro.

 5. Cara marpikkir na songon dia do na mambahen hita dang porsea tu haheheon?

⁵ Di tikki ni si Paulus, adong do cara marpikkir songon on, “Molo ndang dipahehe na mate, ‘ba mangan minum ma hita, ai mate do hita marsogot.’” Alani i, dipasingot si Paulus do halak Kristen asa unang terpengaruh tu cara marpikkir na berbahaya i. Sasittongna cara marpikkir sisongon i, nungnga adong sian najolo. Hata di Jesaya 22:13 do ra na dikutip si Paulus dison. Ai songon i do cara marpikkir ni halak Israel najolo i. Dang dipatudu nasida holong tu Debata, holan naeng marsonang-sonang do nasida. Sasittongna songon on do cara marpikkir ni halak Israel: “Tanikmati ma jo sadari on, ai so binoto boha sogot.” Sahat tu saonari pe, songon i do tong cara marpikkir ni godang jolma. Alai songon na disurat di Bibel, marjea do ujungna halak Israel alani cara marpikkir sisongon i.​—2 Kron. 36:15-20.

 6. Ala porsea hita tu haheheon, boasa ikkon manat hita mamillit dongan?

⁶ Ala porsea do hita na paheheon ni Debata do halak na mate, ikkon manat do hita mamillit dongan. Dipasingot do halak Kristen na di Korint asa unang mardongan tu akka halak na so porsea tu haheheon. Aha do parsiajaranna tu hita? Dang denggan molo torus hita mardongan tu halak na holan naeng marsonang-sonang, jala dang mamikkirhon ari na naeng ro. Alana, boi do i mambahen hita marpangalaho na so denggan. Jala ujungna gabe mangalo ma hita tu Debata. Takkas do dipasingot si Paulus, “Dungo ma hamu jala ulahon hamu ma na sintong, unang be sai mardosai hamu.”​—1 Kor. 15:33, 34.

 7. Songon na dipaboa di 1 Korint 15:35-38, sukkun-sukkun aha do na dibahen halak taringot tu haheheon?

⁷ Jaha 1 Korint 15:35-38. Olo do ra sasahalak dipengaruhi donganna asa unang porsea tu haheheon. Didok donganna i ma, “Songon dia do halak na mate boi dipahehe?” Porlu do taboto aha alus ni si Paulus taringot on. Alana, marasing-asing do pangattusion ni halak taringot na masa tu halak na mate. Alani i, taparrohahon ma alus ni Bibel.

 8. Tudosan aha do na dipakke si Paulus lao manggombarhon daging na dipakke tu surgo?

⁸ Molo dung mate sasahalak, gabe busuk do dagingna. Alai boi do Debata na manoppa saluhutna pahehehon ibana jala mangalehon daging na imbaru tu ibana. (1 Mus. 1:1; 2:7) Dibahen si Paulus do tudosan na patuduhon na so porlu Debata mamakke daging na leleng i lao pahehehon sasahalak. Didok si Paulus do, molo tasuan sada “boni” manang bibit, gabe suan-suanan na baru do i. Ujungna, asing do bentuk ni bibit i dohot bentuk ni suan-suanan na baru i. Jadi songon i ma bahenon ni Debata paradehon daging na imbaru na “hombar tu lomo ni rohana”.

 9. Aha do na didok di 1 Korint 15:39-41 taringot tu daging ni akka toppaan?

⁹ Jaha 1 Korint 15:39-41. Didok si Paulus do, dang sarupa daging ni akka toppaan ni Debata. Misalna, asing do daging ni lombu, pidong, dohot daging ni dekke. Akka toppaan na di langit pe, marasing-asing do. Misalna, asing do mataniari dohot bulan. Jala didok ibana do muse, “Angka bintang  i pe marasing-asing do hasangaponna.” Nang pe dang boi taida, alai akka ilmuwan mandok, marasing-asing do jenis ni bintang. Adong do na balga, adong na gelleng, adong na warna merah, warna bottar, dohot na kuning songon mataniari. Didok si Paulus do, “Asing do daging ni angka na di banua ginjang jala asing do daging ni angka na di tano on.” Aha do lapatan ni i? Molo na di tano on, mardaging sibuk. Alai molo na di surgo, mardaging songon suru-suruan.

10. Gabe mardaging na songon dia do akka na dipahehe tu surgo?

¹⁰ Didok si Paulus do muse, “Songon i ma na masa tu halak na mate. Busuk do dagingna na mate  i. Alai dung dipahehe, dapotna ma pamatang na so olo busuk.” Tottu molo dung mate sasahalak, busuk do dagingna jala gabe tano. (1 Mus. 3:19) Attong boasa didok molo dung dipahehe sasahalak “dapotna ma pamatang na so olo busuk”? Maksud ni si Paulus dison, dang halak na dipahehe di tano on, songon na dipahehe ni si Elia, si Elisa, dohot Jesus. Alai maksud ni si Paulus, i ma akka halak na dipahehe lao mardaging songon suru-suruan jala mandapot “hangoluan di banua ginjang”.​—1 Kor. 15:42-44.

11-12. Gabe mardaging songon dia do Jesus tikki dipahehe, jala songon dia do taringot akka halak na lao dipahehe tu surgo?

¹¹ Tikki di tano on Jesus, mardaging sibuk do ibana. Alai dung dipahehe, “gabe suru-suruan na mansai gogo na mangalehon hangoluan” ma ibana. Dung  i pe asa boi ibana mulak tu surgo. Songon  i do tong akka halak Kristen na lao dipahehe tu surgo. Dipahehe do nasida mardaging songon suru-suruan, asa boi mangolu di surgo. Didok si Paulus do, “Ala sarupa do hita songon jolma na ditompa sian orbuk i, songon  i ma nang hita haduan, sarupa ma hita songon ibana na ro sian banua ginjang  i.”​—1 Kor. 15:45-49.

¹² Ujungna dibahen si Paulus ma kesimpulan taringot tu haheheon on. Porlu do taingot, tikki dipahehe Jesus, dang mardaging sibuk ibana songon jolma. Alana didok si Paulus do, “ndang adong parbagianan ni sibuk dohot mudar di Harajaon ni Debata” na di surgo. (1 Kor. 15:50) Jadi tikki dipahehe akka apostel dohot akka halak na dipillit lao tu surgo, dang pakkeon ni nasida be mudar dohot sibuk na boi busuk. Tikki disurat si Paulus 1 Korint on, nungnga adong sisean ni Jesus na “mate” songon Apostel Jakobus. (Ul. 12:1, 2) Di pudian ni ari, mate do nang akka apostel na asing dohot akka halak Kristen na miniahan. (1 Kor. 15:6) Andigan do nasida dipahehe? Si Paulus mandok di ari na naeng ro pe nasida dipahehe. Jadi dang disi mate nasida dipahehe.

13. Saleleng ‘haroro’ ni Jesus, aha do na masa?

¹³ Dipaboa Jesus dohot si Paulus do taringot tu haroro ni Kristus. Saleleng haroro ni Kristus i, masa ma porang, gempa bumi, sahit, dohot akka hajahaton. Jala nungnga masa on mulai sian taon 1914. Alai adong dope tanda na asing na penting. Jesus mandok, dibaritahon ma barita na uli taringot tu Harajaon ni Debata “di liat portibi on, asa saluhut bangso mambege barita  i, dung pe  i asa ro ujungna”. (Mat. 24:3, 7-14) Si Paulus mandok, saleleng ‘haroro’ ni Tuan  i do dipahehe akka halak na dipillit lao tu surgo.​—1 Tes. 4:14-16; 1 Kor. 15:23.

14. Aha do na masa molo mate halak na dipillit lao tu surgo saleleng ‘haroro’ ni Kristus?

¹⁴ Saonari molo mate halak na dipillit lao mangolu tu surgo, langsung nama nasida dipahehe tu surgo. Sesuai do on tu na didok si Paulus di 1 Korint 15:51, 52. Didok ibana do, “Ndang sude hita mate, alai sude do hita paubaonna di bagasan satongkin, holan sangkidop mata saleleng tarbege soara ni tarompet na parpudi.” Di tikkitta saonari ma on masa. Dung dipahehe nasida, marlas ni roha situtu ma nasida ala toktong “rap dohot Tuan  i”.​—1 Tes. 4:17.

15. Aha do na lao ulahonon ni akka halak na dipahehe tu surgo?

¹⁵ Dipaboa Bibel do aha na lao ulahonon ni akka halak na dipahehe tu surgo. Didok Jesus do, “Manang ise na monang jala na mangoloi parentangku sahat tu ujungna, lehononku ma tu ibana huaso laho mangarajai angka bangso, songon huaso na hujalo sian Damang i. Parmahanonna ma angka bangso marhite tungkot bosi asa ropuhanna nasida songon gunsi na sian tano liat.” (Pgk. 2:26, 27) Diihutton nasida ma Jesus jala diparmahan nasida ma akka bangso mamakke tukkot bosi.​—Pgk. 19:11-15.

16. Songon dia do hamatean ditaluhon?

¹⁶ Ujungna, monang ma akka halak na miniahan on mangalo hamatean. (1 Kor. 15:54-57) Molo dung dipahehe nasida, dohot ma nasida manghancurhon akka na jahat sian portibi on di porang Armagedon. Adong do muse marjuta halak Kristen na malua sian “hasusaan bolon” jala selamat sahat tu tano na imbaru. (Pgk. 7:14) Nasida ma saksi mata na mangida songon dia hamatean ditaluhon. Idaon ni nasida ma marmilliar halak dipahehe di tano on. Bayangkon ma las ni rohatta molo dung masa i sude! (Ul. 24:15) Sude ma halak na setia tu Jahowa manaluhon hamatean na diwarisi nasida sian si Adam. Dung i, mangolu ma nasida saleleng ni lelengna.

17. Sesuai tu 1 Korint 15:58, aha do na ikkon taulahon?

¹⁷ Pasti mandok mauliate do hita tu hatorangan ni si Paulus taringot haheheon on. Alani i, taoloi ma poda ni si Paulus lao “mangulahon godang ulaon ni Tuhan i”. (Jaha 1 Korint 15:58.) Molo torus hita setia jala talehon na undenggan tu Jahowa, pos ma rohatta dapotta do hangoluan na saleleng ni lelengna. Pasti las situtu do annon rohatta, lobi sian na boi tabayangkon. Pos ma rohatta, dang sia-sia sude kerja kerasta mangulahon lomo ni roha ni Jahowa.