Sukkun-Sukkun sian na Manjaha

Di 2 Korint 6:14, ise do maksud ni si Paulus “halak na so porsea”?

Di 2 Korint 6:14 didok, “Unang ma marsada hamu dohot halak na so porsea.” Molo taida akka ayat dukkon i, boi ma taboto maksud ni si Paulus dison, i ma akka halak na so bagian ni huria Kristen. Lam dipatakkas ma muse on di akka ayat na asing na mamakke istilah na sarupa.

Misalna, dipissang si Paulus do halak Kristen na mamboan dongan sahaporseaonna tu pengadilan, tu “jolo ni halak na so mangulahon patik ni Debata”. (1 Korint 6:6) Maksudna dison, i ma akka hakim na adong di pengadilan Korint i. Di surat ni si Paulus na paduahon, didok ibana do ‘nungnga dipapitung Sibolis pikkiran ni akka na so porsea’. Ala nungnga hira ‘ditutup Sibolis be pikkiran ni nasida pakke kain’, gabe dang boi be nasida mangida barita na uli jala dang olo nasida manomba Jahowa. Alana di ayat sebelumna didok si Paulus, “Molo dipauba sasahalak rohana jala disomba Jahowa, bukka ma kain i.”—2 Korint 3:16; 4:4.

Memang adong do halak na so porsea na melanggar hukum jala na manomba patung. (2 Korint 6:15, 16) Alai dang sude halak na so porsea mangalo naposo ni Jahowa. Adong do nasida na olo manangihon barita na uli. Jala godang do nasida na menikah tu halak Kristen jala denggan do rumah tangga ni nasida. (1 Korint 7:12-14; 10:27; 14:22-25; 1 Petrus 3:1, 2) Alai di akka ayat i, torus do dipakke si Paulus istilah “akka na so porsea” tu akka halak na so bagian ni sidang Kristen, na marisi akka halak “na porsea tu Tuan i”.—Ulaon ni Apostel 2:41; 5:14; 8:12, 13.

Denggan do molo diihutton halak Kristen prinsip di 2 Korint 6:14 di ngolu ni nasida ganup ari. Jala sering do ayat on dipakke lao menasehati akka halak Kristen na naeng mangalului suami manang istri. (Mateus 19:4-6) Jadi, dang boi halak Kristen naung tardidi mangalului istri manang suami sian akka halak na so porsea. Alana dang sarupa prinsip, tujuan, dohot haporseaon ni nasida tu halak Kristen na sittong.

Alai boha molo akka halak naung marsiajar Bibel jala marpungu? Boha molo akka halak naung gabe parbarita na uli alai dang tardidi dope? Termasuk do nasida akka halak na so porsea? Daong. Alana dijalo nasida do barita na uli jala torus do nasida mambahen kemajuan asa boi mangalehon ngoluna tu Debata. Jadi, dang boi nasida didok termasuk tu akka halak na so porsea. (Rom 10:10; 2 Korint 4:13) Sebelum tardidi pe si Kornelius, didok do ibana “halak na makkabiari Debata”.—Ulaon ni Apostel 10:2.

Ala dang marlakku hata ni si Paulus di 2 Korint 6:14 tu nasida, attong boi do halak Kristen naung tardidi marhallet jala naeng menikah tu sahalak parbarita na uli na so tardidi dope? Dang boi. Boasa? Adong nasehat na tegas sian si Paulus tu halak Kristen naung mabalu. Didok ibana, “Boi ma ibana muli tu manang ise pe lomo ni rohana, asal ma tu halak na mangihutton Tuan i.” (1 Korint 7:39) Jadi menurut ayat i, ikkon tu “halak na mangihutton Tuan i” do halak Kristen naung tardidi menikah.

Aha do lapatan ni istilah “na mangihutton Tuan” dohot “na marhobas tu Kristus”? Dipakke si Paulus do akka istilah na songon on di Rom 16:8-10 dohot di Kolosse 4:7. Molo dijaha hamu akka ayat on, boi ma diattusi hamu lapatan ni akka istilah i, i ma ‘dongan saulaon’, ‘na setia tu Kristus’, ‘dongan na tahaholongi’, dohot ‘na toktong marhobas’.

Mulai andigan do sasahalak boi didok “marhobas tu Tuan”? Tikki disoadahon sasahalak dirina jala olo ibana mangalehon ngoluna tu Debata. Jesus pe mandok, “Manang ise na naeng mangihutton au, ikkon disoadahon do dirina jala ikkon dituhuk ibana do hau partinaonan i jala toktong ma diihutton au.” (Mateus 16:24) Jadi molo nungnga dilehon sasahalak ngoluna tu Debata, on patuduhon na diihutton ibana do Kristus jala olo ibana mangulahon lomo ni roha ni Debata saleleng ni ngoluna. Dung i, boi ma ibana tardidi jala gabe sahalak parbarita na uli na mambahen las roha ni Jahowa.a Jadi molo didok ikkon ‘menikah tu halak na mangihutton Tuan’, lapatanna ikkon tu halak naung patuduhon na porsea tu Debata jala nungnga tardidi lao gabe “hatoban ni Debata jala naposo ni Tuan Jesus Kristus”.—Jakobus 1:1.

Sipujion do molo adong halak na olo marsiajar Bibel dohot Saksi Jahowa jala olo mambahen kemajuan. Alai dang dilehon ibana dope ngoluna tu Debata jala dang marjanji dope ibana tu Debata lao mangulahon lomo ni rohana saleleng ni ngoluna. Jala dang dibahen ibana dope hamubaon. Jadi ikkon diulahon ibana do i sude sebelum diputusson ibana lao menikah.

Molo songon i, boi do halak Kristen naung tardidi marhallet tu sahalak parsiajar Bibel na mambahen kemajuan, tujuanna asa boi ibana menikah tu parsiajar Bibel i molo nungnga tardidi? Daong. Alana molo diboto parsiajar Bibel i do na ikkon tardidi ibana asa boi menikah tu halak Kristen i, boi do gabe dang denggan annon tujuanna tardidi.

Masuk akkal do nasehat na mandok ikkon tu halak na mangihutton Tuan sasahalak menikah. Alana molo nungnga gabe parbarita na uli sasahalak, dang leleng dukkon i pasti olo do ibana tardidi. Alai boha ma molo marhallet halak Kristen tu sasahalak naung leleng gabe parbarita na uli alai dang tardidi dope? Hape nga cukkup umurna, halak Kristen do keluargana, jala aktif do ibana di huria saleleng martaon-taon. Molo songon i na masa, pikkirhon ma on: Boasa ma dang olo ibana mangalehon ngoluna tu Jahowa? Boasa ma ragu-ragu ibana lao mangulahon i? Nang pe dang termasuk halak na so porsea ibana, alai dang boi dope ibana didok halak “na mangihutton Tuan i”.

Tu hita do manfaatna molo taihutton nasehat ni si Paulus taringot perkawinan on. (Jesaya 48:17) Molo nungnga dilehon halak na marhallet ngoluna tu Jahowa, boi ma togu perkawinan ni nasida. Alana nungnga rap marjanji nasida di jolo ni Jahowa lao setia tu pasanganna. Jala sarupa ma prinsip dohot tujuan ni ngolu ni nasida. Penting hian do on lao mambahen bahagia sada keluarga. Asing ni i molo tu ‘halak na mangihutton Tuan’ do sasahalak menikah, on patuduhon na setia do ibana tu Jahowa. Jala boi ma dapotna pasu-pasu na martahan saleleng ni lelengna. Alana didok Bibel, “Setia do [Jahowa] tu halak na setia.”—Psalmen 18:25.

[Surat na di Toru]

[Gambar]

“Setia do [Jahowa] tu halak na setia”