“Toktong ma Ho Marbarita, jala Unang ma Ho Mandele”

1-3. Aha do tujuan ni si Paulus ro tu Korint, jala aha do tantangan na diadopi ibana?

DI UJUNG ni taon 50 M, nungnga di Korint si Paulus. Kota na mora do Korint jala pusat perdagangan. Godang do halak Junani, Rom, dohot Jahudi tinggal disi.a Dang na lao marjualan manang mangalului karejo si Paulus ro tusi, na lao marbarita na uli do ibana. Alai porlu do tempat tinggal dohot karejo di si Paulus. Ai dang lomo rohana gabe beban di halak na asing, manang dianggap memanfaatton hata ni Debata lao parohon uttung tu dirina sandiri. Jadi aha ma karejo ni si Paulus?

² Diboto si Paulus do mambahen tenda. Dang karejo na mura i, alai rela do ibana mangulahon i lao memenuhi kebutuhanna. Attong dilului ibana do karejo na asing di kota on? Adong do tempat tinggal na cocok dapotna? Nang pe adong tantangan, dang moru semangat ni si Paulus marbarita.

³ Leleng do si Paulus tinggal di Korint, jala denggan do hasil ni ulaonna marbarita disi. Aha ma na boi taparsiajari sian ulaon ni si Paulus di Korint? Songon dia do i mangurupi hita di ulaon marbarita saonari?

4, 5. (a) Saleleng di Korint didia do si Paulus tinggal, jala aha do karejona? (b) Boasa boi diboto si Paulus mambahen tenda?

⁴ Dang leleng dung sahat si Paulus di Korint, pajuppang ma ibana dohot si Akuila dohot istrina si Priskilla manang si Priska. Halak Jahudi do nasida, jala murah hati. Tikki i, diparettahon Kesar Klaudius do asa “sude halak Jahudi maninggalhon kota Rom”, alani i ma pinda nasida tu Korint. (Ul. 18:1, 2) Diajak si Akuila dohot si Priskilla ma si Paulus rap tinggal jala karejo dohot nasida. Didok di Bibel, “Tinggal ma ibana di jabu ni nasida jala rap karejo dohot nasida. Ai rap sibahen tenda do nasida.” (Ul. 18:3) Di jabu ni si Akuila dohot si Priskilla ma si Paulus tinggal saleleng melayani di Korint. Mungkin disi do muse dibahen ibana piga-piga surat na belakangan gabe bagian ni Bibel.b

⁵ Songon na taboto, hea do si Paulus sikkola jala “diajari si Gamaliel”. Alai diboto ibana do mambahen tenda. Boasa boi diboto ibana? (Ul. 22:3) Biasa do halak Jahudi di abad na parjolo mangajarhon keterampilan tu akka gellengna nang pe marsikkola gellengna i. Asing ni i, sian Tarsus na di Kilikia do si Paulus. Terkenal do sian i kain na digoari cilicium. Kain on do na dipakke mambahen tenda. Mungkin tikki poso do si Paulus mamparsiajari keterampilan on. Dang karejo na mura mambahen tenda, ikkon ditonun, dipotong, jala dijait do bahanna i. Asing ni i kaku jala kasar do bahanna.

6, 7. (a) Songon dia do cara pandang ni si Paulus taringot karejona mambahen tenda, jala aha do na patuduhon sarupa cara pandang ni si Akuila dohot si Priskilla tu si Paulus? (b) Songon dia do halak Kristen saonari maniru semangat ni si Paulus, si Akuila, dohot si Priskilla?

⁶ Dang dianggap si Paulus karejona mambahen tenda na uppetting di ngoluna. Holan sekedar lao memenuhi kebutuhanna do i asa boi tetap marbarita, ai ‘dang dijalo ibana hepeng’ tikki marbarita na uli. (2 Kor. 11:7) Sarupa do cara pandang ni si Akuila dohot si Priskilla tu si Paulus taringot parkarejoan. Alana tikki ditinggalhon si Paulus Korint taon 52 M, dohot do si Akuila dohot si Priskilla pinda tu Epesus. Jala jabu ni nasida do na dipakke gabe inganan parpunguan disi. (1 Kor. 16:19) Di pudian ni ari mulak do nasida tu Rom, dung i ro muse tu Epesus. Jadi semangat do si Akuila dohot si Priskilla di ulaon marbarita. Dibahen do i na uppetting di ngoluna. Rela do nasida mangalehon manang aha pe lao mangurupi na asing. Alani i ma “sude huria na sian bangso na asing” mandok mauliate tu nasida.—Rom 16:3-5; 2 Tim. 4:19.

⁷ Ditiru halak Kristen saonari do semangat ni si Paulus, si Akuila, dohot si Priskilla. Bekerja keras do akka dongan memenuhi kebutuhanna asa boi tetap marbarita jala ‘unang manusai’ na asing. (1 Tes. 2:9) Godang do akka dongan na gabe perintis. Dilului nasida do karejo paruh waktu, manang karejo piga-piga bulan di bagasan sataon asa boi mendukung pelayanan ni nasida. Songon si Akuila dohot si Priskilla, rade do naposo ni Jahowa manjalo pengawas wilayah menginap di jabu ni nasida. Alana molo dipatudu nasida “burju ni roha”, gabe masipatoguan jala lam semangat ma nasida.—Rom 12:13.

8, 9. Boha do tanggapan ni si Paulus tikki dialo halak Jahudi ajaran na dipaboa ibana, jala gabe tudia do ibana marbarita?

⁸ Dung ro si Silas dohot si Timoteus sian Makedonia, diboan nasida ma godang silehon-lehon sian akka dongan tu si Paulus. (2 Kor. 11:9) Pittor “dipakke si Paulus ma sude tikkina lao paboahon hata ni Debata tu akka jolma”. (Ul. 18:5) Jadi, tarida do na so dibahen si Paulus karejo mangalului hepeng na uppetting di ngoluna. Alai godang do tantangan na diadopi ibana tikki marbarita tu halak Jahudi na disi. Sappe sanga do dang olo be si Paulus marbarita tu nasida, ala dang olo halak Jahudi i manjalo barita na uli taringot Kristus. Dipaspasson si Paulus ma pakkeanna jala ninna ma, “Manang na mahua hamu, hamu ma na martanggung jawab disi, ias do au sian mudarmuna. Mulai sian saonari lao nama au tu bangso na asing.”—Ul. 18:6; Hes. 3:18, 19.

⁹ Attong gabe tudia ma si Paulus marbarita? Lao ma ibana tu jabu ni si Titius Justus na di labbung ni sinagoga i. Mungkin si Titius on sahalak proselit Jahudi do. (Ul. 18:7) Jadi saleleng di Korint, tetap do si Paulus tinggal di jabu ni si Akuila dohot si Priskilla. Alai di jabu ni si Justus ma ibana marbarita tu akka halak, dang di sinagoga be.

10. Aha do na patuduhon molo si Paulus tetap olo marbarita tu halak Jahudi?

¹⁰ Aha do arti ni hata ni si Paulus na mandok, “Mulai sian saonari lao nama au tu bangso na asing”? Na so parduli be ibana tu sude halak Jahudi dohot proselit Jahudi, bahkan na olo manjalo barita na uli? Dang songon i maksudna. Alana, “si Krispus pamimpin ni sinagoga i rap dohot sude donganna sajabu gabe porsea do tu Tuan i”. Asing ni i, adong do anggota ni sinagoga i na mangihutton keputusan ni si Krispus. Didok di Bibel, “Godang do halak Korint na mambege barita na uli i gabe porsea jala tardidi.” (Ul. 18:8) Gabe terbentuk ma huria Kristen na baru di Korint. Jala jabu ni si Titius Justus ma dipakke gabe inganan parpunguan. Ala bukku Ulaon ni Apostel on disurat sesuai tu urutan waktu, jadi boi ma taboto dung dipaspasson si Paulus do pakkeanna baru pe bertobat halak Jahudi dohot akka proselit i. Sian on taboto ma halak na lentuk do si Paulus. Nang pe didok lao nama ibana marbarita tu bangso na asing, alai tetap do ibana marbarita tu halak Jahudi.

11. Songon dia do cara ni Saksi Jahowa maniru si Paulus tikki marbarita tu halak na mangakku Kristen?

¹¹ Godang do gareja di liat portibi on na mora jala boi mempengaruhi akka anggotana. Disuru do lao akka utusan injilna tu piga-piga negara dohot pulo, jala marhasil do nasida mambahen godang halak masuk tu gareja ni nasida. Alai nang pe mangakku nasida halak Kristen, tetap do diihutton nasida adat istiadatna, songon halak Jahudi na di Korint di abad na parjolo. Songon si Paulus, semangat do Saksi Jahowa mangurupi akka halak sisongon i asa boi mamboto ajaran na sittong sian Bibel. Adong do halak na so marlomo ni roha tu barita na tapaboa, jala berupaya do pamimpin agama menganiaya hita. Alai dang putus asa hita. Alana godang do sian nasida na marsitutu “marhobas tu Debata, alai dang diihutton nasida parbinotoan na sittong taringot tu Debata”. Jadi porlu do torus talului halak sisongon i.—Rom 10:2.

12. Aha do na didok Jesus lao paposson roha ni si Paulus?

¹² Sempat do dang olo be si Paulus marbarita di Korint. Alai di tikki borngin mandapot parnidaan ma ibana. Didok Tuan i ma tu ibana, “Unang pola mabiar ho, toktong ma ho marbarita, jala unang ma ho mandele. Sai na donganakku do ho, jala dang adong manang ise pe na boi parohon jea tu ho. Ai godang do halak di kota on na lao porsea tu au.” (Ul. 18:9, 10) Dipapos Jesus do roha ni si Paulus na jagaonna ibana sian akka musu, jala godang do annon halak di kota i porsea tu Jesus. Ujungna, “disi ma si Paulus tinggal saleleng sada satonga taon jala diajarhon ibana do hata ni Debata tu nasida”.—Ul. 18:11.

13. Peristiwa aha do na diingot si Paulus tikki diboan ibana tu kursi pengadilan, jala hata ni Jesus na dia do na paposson rohana?

¹³ Hira-hira dung sataon si Paulus di Korint, diida ibana ma songon dia Tuan Jesus mangurupi ibana. Tikki i, “marsada ma halak Jahudi mangalo si Paulus jala diboan ma ibana tu jolo ni kursi pengadilan”, na digoari bema. (Ul. 18:12, surat na di toru) Menurut piga-piga halak, sada panggung do bema. Dibahen do i sian marmer na biru dohot na bottar, na dihiasi godang ukiran. Mungkin letakna dibahen di tonga-tonga ni pasar na di Korint. Di jolo ni bema adong do inganan na bidang, siat do disi godang halak. Sian temuan arkeologis, dipaboa do molo bema jarakna holan piga-piga meter sian sinagoga dohot sian jabu ni si Justus. Tikki diboan si Paulus tusi, diingot ibana do ra na masa tu si Stepanus na mate martir najolo. Tikki i si Saulus dope goarna, setuju do ibana “dipamate si Stepanus”. (Ul. 8:1) Alai na lao masa do songon i tu si Paulus? Daong. Alana nungnga marjanji Jesus tu ibana, “Dang adong manang ise pe na boi parohon jea tu ho.”—Ul. 18:10.

14, 15. (a) Aha do tuduhan ni halak Jahudi tu si Paulus, jala boasa ditutup si Gallio kasus i? (b) Aha do na masa tu si Sostenes, jala aha do mungkin na diulahon ibana dukkon i?

¹⁴ Pejabat na hundul di kursi pengadilan, i ma gubernur Akaya na margoar si Gallio. Abang ni si Seneka do ibana, sahalak filsuf Rom. Jadi aha do na masa tu si Paulus dung sahat ibana di jolo ni kursi pengadilan i? Ditudu halak Jahudi ma si Paulus mangulahon na jahat. Didok nasida do, “Ditogihon ibana do akka jolma asa manomba Debata marhite dalan na maralo tu patik.” (Ul. 18:13) Ditudu nasida do si Paulus mempengaruhi akka halak asa margatti agama. Alai diida si Gallio dang adong “na sala manang na jahat” diulahon si Paulus. (Ul. 18:14) Dang olo si Gallio ikut campur tu masalah ni halak Jahudi. Jadi sebelum didok si Paulus hatana, nga ditutup si Gallio kasus i. Gabe muruk ma halak Jahudi i, jala dilampiasson nasida ma i tu si Sostenes pamimpin ni sinagoga na manggattihon si Krispus. Ditakkup ma si Sostenes jala ‘dipukkuli di jolo ni pengadilan i’.—Ul. 18:17.

¹⁵ Boasa dipasombu si Gallio halak Jahudi i mamukkuli si Sostenes? Mungkin ninna rohana si Sostenes do na mambahen gaor halak Jahudi i, jadi pantas do ibana dipukkuli. Alai aha pe alasanna adong do hasil na denggan sian na masa i. Piga-piga taon dukkon i dibahen si Paulus do suratna na parjolo tu huria Korint. Jala dipaboa do disi taringot sahalak donganta na margoar si Sostenes. (1 Kor. 1:1, 2) Sarupa do si Sostenes na dipaboa di surat i tu halak na dipukkuli i? Molo sarupa do, berarti dung peristiwa i gabe muba do si Sostenes jala porsea tu Jesus.

16. Songon dia do hata ni Jesus tu si Paulus i mangurupi hita di ulaon marbarita?

¹⁶ Taingot ma dung ditolak halak Jahudi i do barita na dipaboa si Paulus, baru pe dipapos Jesus rohana. Jesus mandok, “Unang pola mabiar ho, toktong ma ho marbarita, jala unang ma ho mandele. Sai na donganakku do ho.” (Ul. 18:9, 10) Hita pe torus ma taingot hata on, tarlumobi tikki ditolak barita na tapasahat. Unang ma hea hita lupa na boi do dijaha Jahowa roha ni akka halak, jala pasti tarikonna do halak na layak mangolu salelengna. (1 Sam. 16:7; Joh. 6:44) Hata ni Jesus i manjujui hita asa tetap sibuk di ulaon marbarita. Setiap taon adong marratus ribu halak na tardidi. On berarti adong do marratus halak na tardidi setiap ari. Molo taoloi paretta ni Jesus lao mambahen ‘saluhut halak sian nasa bangso gabe siseanna’, Jesus mandok, “Sai na donganakku do hamu sahat tu panutup ni jaman on.”—Mat. 28:19, 20.

17, 18. Aha do na diingot si Paulus tikki marlayar sian Kenkrea tu Epesus?

¹⁷ Pasti berpengaruh do sikap ni si Gallio i tu huria Korint na baru i. Alai dang taboto gabe dame do huria i manang lam muruk halak Jahudi tu nasida. Holan “piga-piga ari” nai nama si Paulus tinggal disi. Dipaboa ma tu akka dongan na di Korint, na lao borhat ibana tu inganan na asing. Di musim semi taon 52 M, direncanahon si Paulus ma naeng mulak tu Siria. Lao ma ibana tu pelabuhan Kenkrea, hira-hira 11 kilometer di sabola timur ni Korint. Alai sebelum ditinggalhon Kenkrea, “digusting si Paulus ma obukna alani sada janji na dibahen ibana tu Debata”.c (Ul. 18:18) Dung i, markapal ma ibana rap dohot si Akuila dohot si Priskilla menyeberangi Laut Aegea tu Epesus di Asia Kecil.

¹⁸ Tikki marlayar sian Kenkrea, diingot si Paulus do ra pengalamanna di Korint. Saleleng 18 bulan ibana melayani disi, godang do hasil na denggan. Dibentuk do huria na parjolo di Korint, jala di jabu ni si Justus do parpunguan. Godang do halak na porsea, termasuk si Justus, si Krispus, dohot donganna sajabu. Pasti holong do roha ni si Paulus tu nasida, ala ibana do na mangurupi nasida gabe halak Kristen. Di pudian ni ari, dibahen ibana do surat tu nasida. Disarupahon do nasida songon sada surat na tarsurat di rohana. Hita pe songon i do, pasti holong do rohatta tu halak na taurupi mananda ibadat na sittong. Dos do nasida songon “surat” na disuratton di rohatta!—2 Kor. 3:1-3.

19, 20. Aha do na diulahon si Paulus dung sahat ibana di Epesus, jala aha ma na boi taparsiajari sian si Paulus?

¹⁹ Dung sahat nasida di Epesus, pittor marbarita do si Paulus. “Lao ma ibana tu sinagoga, diajari ibana ma halak Jahudi jala diurupi ibana ma nasida mangattusi isi ni Surat na Badia.” (Ul. 18:19) Holan satokkin do nasida di Epesus. Nang pe dipangido halak Epesus asa ulleleng si Paulus disi, alai “dang olo ibana”. Didok si Paulus do, “Molo lomo roha ni Jahowa, ro do au muse manjuppangi hamu.” (Ul. 18:20, 21) Diboto si Paulus do massai godang na ikkon diulahon di Epesus. Alani i ma direncanahon ibana ro muse tusi. Alai dipasahat do rencanana i tu Jahowa. Pasti sitiruon na denggan do on tu hita. Molo adong cita-cita rohanitta, porlu do tabahen rencana lao meraih i. Alai ikkon taandalhon do Jahowa, talului petunjukna, jala berupaya bertindak sesuai tu lomo ni rohana.—Jak. 4:15.

²⁰ Ditinggalhon si Paulus ma si Akuila dohot si Priskilla di Epesus. Marlayar ma ibana muse tu Kaesarea. “Lao” ma ibana tu Jerusalem, dijuppangi ibana ma satokkin akka dongan na di huria i. (Ida keterangan tambahan sian nwtsty-IN di Ul. 18:22.) Dung i mulak ma ibana tu Antiokia Siria. Ujungna sae ma pardalanan utusan injil ni si Paulus na paduahon. Aha ma na masa di pardalanan utusan injilna na patoluhon?