Songon dia do Asa Toktong Togu Holongta tu Akka Dongan?

1-2. (a) Sian tolu sifat na dipaboa si Paulus, boasa didok ibana holong i do na “umbalga”? (b) Sukkun-sukkun aha do na lao tabahas?

TIKKI dibahas Apostel Paulus taringot haporseaon, paima-imahon janji ni Debata, dohot taringot holong, didok ibana, “holong ma na umbalga” sian na tolu i. (1 Kor. 13:13) Boasa didok ibana songon i? Molo di ari na naeng ro, dang porlu be hita patuduhon haporseaon tu janji ni Debata taringot tano na imbaru. Alana nga saut be sude na tapaima-ima i. Alai molo holong, ikkon torus do i tapatudu tu Jahowa dohot tu akka jolma. Gariada ikkon lam balga do holongta tu nasida sahat tu saleleng ni lelengna.

² Ala ikkon torus do hita patuduhon holong, tabahas ma tolu sukkun-sukkun on: Na parjolo, boasa ikkon marsihaholongan hita? Na paduahon, songon dia do hita patuduhon na marsihaholongan dohot akka dongan? Na patoluhon, songon dia do asa toktong togu holongta tu akka dongan?

 3. Boasa ikkon marsihaholongan hita?

³ Boasa ikkon marsihaholongan hita? Molo tapatudu holong tu akka dongan, on patuduhon na tutu do hita halak Kristen na sittong. Didok Jesus do tu akka apostelna, “Molo marsihaholongan hamu, botoon ni sude jolma ma na siseanku hamu.” (Joh. 13:35) Asing ni i, molo tapatudu holong boi do i mambahen hita toktong marsada. Didok si Paulus, “Holong ni roha do na boi mambahen jolma marsada.” (Kol. 3:14) Alai adong dope alasan na asing boasa ikkon marsihaholongan hita. Didok Apostel Johannes do tu akka donganna, “Manang ise na makkaholongi Debata, ikkon haholonganna do donganna.” (1 Joh. 4:21) Molo holong rohatta tu Debata, ikkon marsihaholongan do hita dohot akka donganta.

4-5. Boasa tadok molo holong rohatta tu Debata berarti ikkon tahaholongi do akka dongan? Paboa ma ilustrasina.

⁴ Boasa tadok molo holong rohatta tu Debata berarti ikkon tahaholongi do akka dongan? Asa boi taattusi i, bayakkon ma ilustrasi on. Adong do hubungan ni bagian-bagian ni dagingta tu jantungta. Boi do diboto dokter hatop do manang na dang denyut ni jantungta, holan manjama pergelangan ni tanganta. Sian i gabe diboto ibana ma songon dia kesehatan ni jantungta. Aha do na boi taparsiajari sian ilustrasi on?

⁵ Tikki dipareso dokter denyut ni naditta, boi ma diboto ibana songon dia kesehatan ni jantungta. Dos songon i ma, boi do taboto sadia balga holongta tu Jahowa molo tapareso sadia balga holongta tu akka dongan. Molo dang togu be holongta tu akka dongan songon najolo, on patuduhon na gale do tong holongta tu Jahowa. Alai molo torus tapatudu holong tu akka dongan, on patuduhon na togu do holongta tu Jahowa.

 6. Boasa ikkon manat hita molo tahilala lam gale holongta tu akka dongan? (1 Joh. 4:​7-9, 11)

⁶ Molo tahilala nungnga lam gale holongta tu akka dongan, ikkon manat do hita. Boasa? Alana i patuduhon nungnga lam gale be holongta tu Jahowa. I do alana takkas dipaingot Apostel Johannes tu hita, “Molo dang dihaholongi sasahalak dongan na niidana, dang boi ibana makkaholongi Debata na so niidana.” (1 Joh. 4:20) Aha do parsiajaranna tu hita? Asa las roha ni Jahowa, ikkon “marsihaholongan” do hita dohot na asing.—Jaha 1 Johannes 4:​7-9, 11.

7-8. Songon dia do caratta patuduhon holong tu akka dongan?

⁷ Jotjot do dipaboa di Bibel na ikkon “marsihaholongan” do hita. (Joh. 15:​12, 17; Rom. 13:8; 1 Tes. 4:9; 1 Ptr. 1:22; 1 Joh. 4:11) Alai sifat na adong di bagasan roha do holong i. Jala molo dang tapatudu i, dang boi diboto akka dongan na holong rohatta tu nasida. Attong songon dia ma carana patuduhon holong tu akka dongan? Tapatudu ma i sian na tahatahon dohot na taulahon.

⁸ Godang do carana lao patuduhon na holong rohatta tu akka dongan. Misalna didok do di Bibel, “Hatahon hamu na sittong tu donganmuna.” (Sak. 8:16) “Toktong ma hamu mardame dohot akka donganmuna.” (Mrk. 9:50) “Parjolo ma hamu pasangappon halak na asing.” (Rom. 12:10) ‘Burju ma hamu manjalo donganmuna na asing.’ (Rom. 15:7) ‘Rade ma hamu manalpuhon hasalaan ni na asing.’ (Kol. 3:13) “Toktong ma hamu masiurupan tikki masa hasusaan.” (Gal. 6:2) “Patogu hamu ma roha ni halak na asing.” (1 Tes. 4:18) “Apuli ma na asing.” (1 Tes. 5:​11, surat na di toru.) ‘Masitangiangan ma hamu.’—Jak. 5:16.

 9. Molo tapatogu donganta, boasa i patuduhon na holong rohatta tu nasida? (Ida gambar.)

⁹ Saonari, tabahas ma sada sian piga-piga cara na dipaboa di paragraf sebelumna. Didok si Paulus, “Patogu hamu ma roha ni halak na asing.” Molo tapatogu donganta, boasa i patuduhon na holong rohatta tu nasida? Menurut sada referensi ni Bibel, hata “patoguhon” na dipakke si Paulus di ayat i, boi do maksudna “sasahalak na jongjong manogu donganna na gale alani sitaonon.” Tikki tapatogu donganta na susa, sasittongna na taurupi do ibana asa toktong setia manomba Jahowa. Jala tikki tapatogu donganta i, on patuduhon na holong do rohatta tu nasida.—2 Kor. 7:​6, 7, 13.

10. Aha do hubungan ni asi ni roha dohot patoguhon akka dongan?

¹⁰ Sadalan do patoguhon tu asi ni roha. Boasa tadok songon i? Alana molo asi roha ni sasahalak, gabe taronjar do ibana lao patoguhon donganna na marsitaonon. Jadi ikkon jolo asi do rohatta tu sasahalak baru pe olo hita patoguhon ibana. Didok si Paulus, Jahowa i “Ama parasi roha, na lambok, jala Debata Sipangapul na sumurung.” (2 Kor. 1:3) Didok ibana muse, “Ama parasi roha, na lambok” do Jahowa. On patuduhon, na massai balga do asi ni roha ni Jahowa tu sude jolma. Jala di ayat i didok do Jahowa i “Ama” manang sumber ni asi ni roha, alana balga hian do asi ni rohana tu jolma. Asi ni rohana i ma na mangonjar Ibana lao mangurupi hita ‘asa margogo manaon sitaononta’. (2 Kor. 1:4) Songon aek sian mata mual na boi pasombuhon uas, songon i ma pangapulion na sian Jahowa. Boi do i mambahen hita margogo manaon sitaononta. Songon dia ma caratta maniru asi ni roha ni Jahowa jala patoguhon na asing? Carana, jolo tapatudu ma akka sifat na boi mambahen hita marasi ni roha tu na asing. Akka sifat aha ma i?

11. Songon na disurat di Kolosse 3:12 dohot 1 Petrus 3:​8, akka sifat aha do na ikkon tapatudu asa taronjar rohatta patoguhon akka dongan?

¹¹ Aha do na boi mambahen asa lam taronjar rohatta lao patoguhon akka donganta ganup ari? Ikkon sapakkilalaan ma hita dohot akka donganta, marsihaholongan, jala burju ma hita tu nasida. (Jaha Kolosse 3:12; 1 Petrus 3:8.) Boasa ikkon tapatudu akka sifat on? Alana molo boi tapatudu akka sifat on jala asi rohatta tu akka donganta, pasti gabe taronjar ma rohatta lao patoguhon nasida di tikki susa. Songon na didok Jesus, “Nasa na adong di roha, i do dihatahon pamangan. Alani i, dihatahon halak na burju do na denggan, ai akka na denggan do di rohana.” (Mat. 12:​34, 35) Tikki tapatogu akka donganta, disi ma hita patuduhon na holong rohatta tu nasida.

12. (a) Boasa ikkon tarimangi sipaingot ni Jesus? (b) Sukkun-sukkun aha do na lao tabahas?

¹² Hita sude lomo do rohatta asa ‘toktong marsihaholongan’. (1 Joh. 4:7) Alai adong sipaingot ni Jesus na ikkon taingot. Didok ibana, “Lam ngali ma holong ni godang jolma.” (Mat. 24:12) Dang didok Jesus na so marsihaholongan be annon akka siseanna. Alai ikkon manat do hita asa unang tatiru akka halak na di portibi on, na hurang makkaholongi donganna. Huhut mangarimangi on, tabahas ma jo alus ni sukkun-sukkun na massai penting on: Sian dia do taboto na togu dope holongta tu akka dongan?

13. Sian dia do taboto na togu dope holongta tu akka dongan?

¹³ Sada cara lao mamboto na togu dope holongta tu akka dongan, i ma molo tarimangi songon dia caratta mangadopi situasi na masa di ngolutta. (2 Kor. 8:8) Contohna didok Apostel Petrus do, “Na urrikkot sian saluhutna, marsitutu ma hamu marsihaholongan. Ai halak na marholong ni roha, rade do manalpuhon hasalaan.” (1 Ptr. 4:8) Olo do ra taida hahurangan ni donganta manang hea haccit rohatta dibahen nasida. Sian tanggapanta tikki masa situasi sisongon i, tarida ma na togu dope holongta tu nasida manang na dang.

14. Songon na didok di 1 Petrus 4:​8, aha do na ikkon taulahon? Paboa ma ilustrasina.

¹⁴ Saonari tabahas ma jo hata ni si Petrus nakkin. Di kalimat parjolo di ayat 8 i didok si Petrus, “Marsitutu ma hamu marsihaholongan.” Hata “marsitutu” na dipakke si Petrus dison boi do lapatanna “pahembangkon”. Dung i di kalimat na paduahon di ayat i didok si Petrus do muse, molo marsitutu hita marsihaholongan boi do i manutupi godang hasalaan. Ilustrasina: Bayakkon ma adong sada meja na godang nodana manang goresanna. Molo tapahembang kain di atas ni meja i, dang holan sada manang dua goresan na tartutup. Alai sude ma hahurangan ni meja i boi tartutup. Dos songon i ma molo marsitutu hita makkaholongi akka dongan, on boi mangurupi hita “manalpuhon” manang manutup godang hasalaan ni nasida, dang holan sada manang dua.

15. Molo togu holongta tu akka dongan, aha do na boi taulahon? (Kolosse 3:13)

¹⁵ Ikkon togu do holongta tu akka dongan asa boi hita manalpuhon hasalaan ni nasida, nang pe sipata maol mangulahon i. (Jaha Kolosse 3:13.) Molo tasalpuhon hasalaan ni donganta, on patuduhon na togu do holongta tu Jahowa jala lomo rohatta mambahen las rohana. Aha do muse na boi mangurupi hita asa unang pittor jut rohatta tikki mangida hahurangan ni akka donganta?

16-17. Songon dia do carana asa boi talupahon hahurangan ni donganta? Bahen ma ilustrasina. (Ida gambar.)

¹⁶ Akka na denggan sian donganta ma na sai taingot, unang ma akka na so denggan. Ilustrasina: Bayakkon ma hamu rap marpungu dohot akka donganmuna. Massai las do rohamuna di tikki i. Dung sae acara i, marfoto ma hamu. Dung i marfoto ma hamu dua hali nai, atik boha foto na parjolo i hurang denggan hasilna. Saonari nungnga adong be tolu foto naung dibuat hamu. Alai dung diparrohahon hamu, diida hamu ma adong di foto na parjolo i donganmuna na murhing bohina. Aha do na diulahon hamu? Dihapus hamu ma foto na hurang denggan i. Alana adong dope dua foto nai na denggan hasilna. Disi tersenyum do sude donganmuna i.

¹⁷ Boi do tasarupahon foto i songon akka kenangan na taingot. Pasti jotjot do hita rap marsaor dohot akka dongan. Alai olo do ra sada tikki adong donganta na makkatahon manang mangulahon na so denggan na mambahen haccit rohatta. Aha do na ikkon taulahon tu kenangan na so denggan i? Ikkon talupahon do i. Sarupa ma i songon menghapus foto na hurang denggan i. (Poda 19:11; Eps. 4:32) Boi do talupahon hahurangan ni donganta molo taingot godang nai dope kenangan na denggan tikki rap hita dohot nasida. Akka kenangan na denggan i ma na ikkon torus taingot jala taargai.

18. Parsiajaran penting aha do na ikkon taingot di pelajaran on taringot holong?

¹⁸ Boasa ikkon toktong togu holongta tu donganta? Songon naung tabahas nakkin molo tapatudu holong tu donganta, on patuduhon na holong do rohatta tu Jahowa. Songon dia carana patuduhon na holong rohatta tu akka dongan? Sada carana, tapatogu ma nasida. Molo asi do rohatta tu akka donganta, boi ma tapatogu nasida. Songon dia do asa toktong togu holongta tu akka dongan? Rade ma hita manalpuhon hahurangan ni nasida, nang pe sipata maol mangulahon i.

19. Boasa massai penting patuduhon holong tu akka donganta saonari?

¹⁹ Boasa massai penting patuduhon holong tu akka dongan saonari? Dipaboa si Petrus do alasanna, “Nungnga jonok ujung ni saluhutna. Alani i, . . . marsitutu ma hamu marsihaholongan.” (1 Ptr. 4:​7, 8) Ala nungnga lam jonok be ujung ni portibi na jahat on, aha ma na lao masa tu hita? Nungnga dipaboa Jesus hian tu akka siseanna, “Sogo ma roha ni sude jolma mangida hamu alani goarhu.” (Mat. 24:9) Ikkon toktong do hita marsada dohot akka donganta asa boi hita toktong martahan mangadopi akka hasusaan i. Molo marsihaholongan hita, dang na lao marhasil Sibolis mamola-mola hita. Alana, ‘holong ni roha do na boi mambahen hita marsada’.—Kol. 3:14; Plp. 2:​1, 2.