Torus ma Bahen Kemajuan Rohani Dukkon Tardidi

 1. Aha do na diulahon akka na poso asa boi nasida tardidi?

GANUP taon adong do marribu donganta na poso na tardidi. Termasuk do hamu disi? Pasti las hian do roha ni akka donganta sahaporseaon mangida hamu tikki tardidi, tarlumobi ma Jahowa! (Poda 27:11) Boi pe hamu tardidi ala nungnga godang do pengorbanan na dibahen hamu. Ringgas do hamu marsiajar Bibel. Olo do ra sappe piga-piga taon hamu marsiajar. Lam leleng hamu marsiajar, lam pos ma rohamuna Hata ni Debata do Bibel i. Asing ni i gabe lam holong ma rohamuna tu Pangarang ni Bibel i, i ma Jahowa. Ala nungnga lam holong rohamuna tu Jahowa, gabe olo ma hamu mangalehon diri tu Ibana jala ujungna tardidi. Keputusan na massai denggan do i.

 2. Aha do na lao tabahas di artikel on?

² Tikki naeng mambahen kemajuan hamu lao tardidi, godang do tantangan na manguji kesetiaanmuna tu Jahowa. Jala lam dewasa pe hamu, sai adong do tantangan na diadopi hamu. Berupaya do Sibolis mambahen asa unang holong be rohamuna tu Jahowa jala asa unang disomba hamu be Ibana. (Eps. 4:14) Alai boi do hamu monang mangalo Sibolis. Boi do hamu toktong setia tu Jahowa jala menepati janjimuna tu Ibana. “Marsitutu” ma mambahen kemajuan rohani asa gabe halak Kristen na toras hamu. (Heb. 6:1) Songon dia carana? Tabahas ma i di artikel on.

 3. Aha do na ikkon diulahon halak Kristen dung tardidi?

³ Dung tardidi, sude do hita porlu mangulahon nasehat na dilehon si Paulus tu halak Kristen di Epesus. Dijujui si Paulus do nasida asa gabe halak Kristen na “toras”. (Eps. 4:13, surat na di toru) Lapatanna ikkon torus do dibahen nasida kemajuan rohani. Disarupahon si Paulus do kemajuan rohani ni halak Kristen tu pertumbuhan ni bayi. Pasti las hian do roha ni natua-tua tikki tubu bayina. Alai dang mungkin salelengna ibana dakdanak, ikkon “magodang” do ibana. (1 Kor. 13:11) Songon i ma halak Kristen dung tardidi. Ikkon torus do hita mambahen kemajuan rohani. Saonari tabahas ma aha na boi mangurupi hita mangulahon i.

 4. Aha do na ikkon diulahon hamu asa boi mambahen kemajuan rohani? (Pilippi 1:9)

⁴ Berusaha ma asa lam tamba holongmuna tu Jahowa. Pasti holong do rohamuna tu Jahowa. Alai ikkon torus do diusahahon hamu asa lam tamba holong ni rohamuna i tu Ibana. Boha do carana? Dipaboa Apostel Paulus do i di Pilippi 1:9. (Jaha.) Ditangiakkon ibana do halak Kristen di Pilippi asa “lam martamba-tamba” holong ni nasida tu Jahowa. Sian on taboto ma molo holong i boi do martamba. Carana, torus ma tatambai ‘parbinotoan dohot bisukta’. Molo nungnga lam takkas tatanda Jahowa, gabe lam holong ma rohatta tu Ibana. Lam taargai ma akka sifatna dohot akka na diulahon Ibana tu hita. Hasilna gabe tergerak ma hita mambahen las roha ni Jahowa, jala dang taulahon be akka na mambahen haccit rohana. Alani i torus ma hita berusaha mangattusi lomo ni roha ni Jahowa, jala taulahon ma i.

5-6. Asa lam tamba holongta tu Jahowa, aha do na porlu taulahon?

⁵ Sada cara lao manambai holongta tu Jahowa, i ma maniru Anakna Jesus. Alana sempurna do Jesus maniru sifat ni Bapakna. (Heb. 1:3) Boi do tatanda Jesus molo taparsiajari opat bukku Injil, i ma Mateus sahat tu Johannes. Molo dang taratur dope hamu manjaha Bibel ganup ari, boi do dicoba hamu mulai manjaha sian bukku Injil. Molo dijaha hamu i, boi ma diboto hamu akka sifat ni Jesus na boi tatiru. Contohna, burju do Jesus jala mura dijonoki, olo do ibana mangabing dakdanak. (Mrk. 10:13-16) Akka siseanna pe leluasa do paboahon pandapot ni nasida tu Jesus. (Mat. 16:22) Ala sempurna do Jesus maniru Jahowa, berarti Jahowa pe mura do jonohan. Alani i, unang ma mabiar hita paboahon sude na di bagasan rohatta tu Ibana marhite tangiang. Pos ma rohatta tikki tapaboa sude na di rohatta tu Jahowa, dang uhumanna hita. Alana dihaholongi Ibana do hita jala parduli do Ibana tu hita.​—1 Ptr. 5:7.

⁶ Asi do roha ni Jesus tu akka halak. Apostel Mateus mandok, “Diida Jesus ma godang halak marpungu jala asi ma rohana mangida nasida. Ai disusai do nasida jala dang disarihon, dos songon biru-biru na so adong parmahanna.” (Mat. 9:36) Molo Jahowa songon dia? Didok Jesus, “Dang lomo roha ni Damang na di banua ginjang i mago apala sada pe sian na metmet on.” (Mat. 18:14) Sian on taboto ma, massai holong do roha ni Jahowa tu hita. Jadi molo tatanda Jesus lam holong ma rohatta tu Jahowa.

 7. Aha do manfaatna molo bergaul hamu dohot akka dongan na matang di huria?

⁷ Cara na asing asa lam balga holongmuna tu Jahowa jala boi hamu mambahen kemajuan rohani, bergaul ma dohot akka dongan na matang di huria. Marlas ni roha do nasida melayani Jahowa jala dang hea disolsoli nasida keputusanna i. Alani i, pangido ma asa diceritahon nasida pengalamanna saleleng melayani Jahowa. Jala sukkun ma pandapot ni nasida tikki naeng mambahen keputusan na penting. Alana “molo godang na mamodai, boi do gabe marhasil” rencanamuna i.​—Poda 11:14.

 8. Aha do na porlu diulahon hamu asa pos rohamuna tu ajaran ni Bibel?

⁸ Papos ma rohamuna tu ajaran ni Bibel. Songon naung tabahas di paragraf 2 nakkin, sai berupaya do Sibolis manegai hubunganmuna dohot Jahowa. Dipengaruhi ibana ma hamu asa ragu tu ajaran ni Bibel. Contohna taringot teori evolusi. Tikki gelleng hamu dang godang dope na diboto hamu taringot evolusi. Alai lam balga hamu, lam jotjot ma diparsiajari hamu i di sikkola. Aha na diajarhon gurumuna taringot evolusi hira na masuk akkal do ra begeon. Alai olo do ra dang hea dilului nasida bukti na patuduhon tutu adong Panoppa. Ingot ma prinsip na adong di Poda 18:17, “Molo adong parsoalan, songon na sittong do hata ni halak na parjolo mangalu-alu, alai molo dung ro alona manukkun, tarida ma ise na sittong.” Jadi unang ma pittor porsea hamu tu sude na diajarhon gurumuna di sikkola. Ikkon dipertimbangkon hamu do hasittongan na adong di Bibel. Riset hamu ma i sian akka publikasitta. Sukkun hamu ma akka dongan na sebelumna porsea tu evolusi.b Sukkun ma boasa gabe pos roha ni nasida adong do Panoppa na parholong. Molo olo hamu mangulahon i, gabe lam pos ma rohamuna tutu do adong Panoppa.

 9. Aha do na boi diparsiajari hamu sian pengalaman ni si Melisa?

⁹ Sahalak donganta na margoar si Melisa mandapot manfaat ala mambahen riset taringot akka toppaan.c Didok ibana, “Di sikkola jotjot do akka guru mangajarhon taringot evolusi. Hira na masuk akkal do ajaran i. Mulana dang olo au mambahen riset. Mabiar au so tung dapottu bukti na patuduhon tutu do ajaran evolusi i. Alai huingot ma lomo do roha ni Jahowa asa tabuktihon akka na tahaporseai. Jadi hubahen ma riset, hujaha ma bukku Apakah Ada Pencipta yang Mempedulikan Anda?, brosur Benarkah Kehidupan Diciptakan?, dohot brosur Asal Mula Kehidupan​—Lima Pertanyaan yang Patut Direnungkan. Anggiat ma boi hatop sae huparsiajari akka bukku on. Alana godang do dapottu manfaat sian i.”

10-11. Songon dia do hamu boi menolak pangalaho na so denggan? (1 Tessalonik 4:3,4)

¹⁰ Tolak ma pangalaho na so denggan. Tikki remaja hamu, kuat hian do keinginan lao mangulahon seks jala adong do ra na menggoda hamu asa mangulahon i. Sibolis pe lomo do rohana asa diulahon hamu seks na so patut. Alai boi do hamu menolak godaan i. Songon dia carana? (Jaha 1 Tessalonik 4:3, 4.) Martangiang ma hamu tu Jahowa. Paboa ma tu Jahowa perasaanmuna, jala pangido ma gogo asa boi hamu menolak i. (Mat. 6:13) Ingot ma lomo do roha ni Jahowa mangurupi hamu. Pos ma rohamuna molo dipaboa hamu perasaanmuna, dang dihakimi Ibana hamu. (Ps. 103:13,14) Manjaha Bibel ganup ari boi do tong mangurupi hamu. Si Melisa na dipaboa nakkin berjuang do mangalo keinginan na sala. Didok ibana, “Manjaha Bibel ganup ari mangurupi au asa unang menyerah. Gabe torus ma huingot appuna ni Jahowa do au jala porlu do au diurupi Ibana.”​—Ps. 119:9.

¹¹ Unang ma sahalakmuna mangatasi masalahmuna. Pangido ma bantuan sian natua-tuamuna. Memang dang sai mura paboahon i tu nasida, alai godang do manfaatna molo diulahon hamu i. Si Melisa mandok, “Martangiang do au asa boi barani paboahon masalahku tu bapa. Dung hupaboa i gabe tenang ma huhilala. Pasti las do roha ni Jahowa ala hubahen songon i.”

12. Songon dia do carana mambahen keputusan na denggan?

¹² Ihutton ma prinsip ni Bibel. Lam magodang hamu, lam godang ma keputusan na ikkon dibahen hamu. Alai ingot ma otik dope pengalamanmuna saonari. Attong boha ma asa unang dibahen hamu keputusan na manegai hubunganmuna tu Jahowa? (Poda 22:3) Donganta si Kari paboahon aha na mangurupi ibana mambahen keputusan na denggan. Diboto ibana do molo halak Kristen na matang dang ikkon mangihutton daftar peraturan taringot na boi dohot na so boi diulahon. Didok ibana, “Ikkon torus do huingot dumenggan do mangattusi prinsip ni Bibel sian holan sekedar mangihutton peraturan.” Tikki dijaha hamu Bibel sukkun ma dirimuna, ‘Sian ayat on, aha do na huparsiajari taringot cara marpikkir ni Jahowa? Adong do prinsip di ayat on na marguna di ngolukku? Aha ma manfaatna molo huulahon i?’ (Ps. 19:7; Jes. 48:17, 18) Molo dijaha hamu Bibel jala dirimangi hamu akka prinsipna, gabe ummura ma hamu mambahen keputusan na palashon roha ni Jahowa. Jala molo torus hamu mambahen kemajuan rohani, gabe lam diattusi hamu ma dang porlu daftar peraturan di hamu. Alana nungnga diattusi hamu cara marpikkir ni Jahowa.

13. Boasa ikkon manat hamu mamillit dongan? (Poda 13:20)

¹³ Pillit ma akka dongan na makkaholongi Jahowa. Songon naung tabahas di paragraf 7, dongan na tapillit berpengaruh do tu kemajuan rohanitta. (Jaha Poda 13:20.) Donganta si Sara sanga do dang marlas ni roha melayani Jahowa. Alai ujungna muba do ibana. Didok si Sara, “Burju hian do akka dongan di huria tu au. Dilean nasida do bantuan di tikki na pas. Adong sahalak donganta borua na mandongani au mempersiappon Joujou Paboahon ganup minggu. Donganta na asing mangurupi au mangalean komentar di parpunguan. Alani dukungan ni nasida, humulai ma muse pelajaran pribadikku jala hupadenggan ma isi ni tangiakku. Hasilna gabe lam togu ma hubunganku tu Jahowa jala marlas ni roha ma au muse.”

14. Aha do na diulahon si Julien asa dapotna dongan na burju?

¹⁴ Songon dia do carana mamillit dongan na burju? Sahalak sintua na margoar si Julien mandok, “Tikki poso au jotjot do au marbarita dohot akka dongan na semangat. Hasilna gabe lomo ma rohakku marbarita na uli, jala hubahen ma cita-cita gabe perintis. Husadari do muse, saleleng on hubatasi do pergaulanku holan tu na sebaya. Alani i ma gabe holan saotik donganku. Belakangan karejo ma au di Betel, jala dapottu ma disi akka dongan na burju. Diurupi nasida do au mamillit hiburan na denggan, gabe lam jonok ma au tu Jahowa.”

15. Sipasingot aha do na dilehon si Paulus tu si Timoteus? (2 Timoteus 2:20-22)

¹⁵ Boha do molo adong dongan di huria na mangalehon pengaruh na so denggan tu hamu? Ingot ma di abad na parjolo adong do halak Kristen na so denggan pangalahona, songon na dipaboa si Paulus. Alani i dipasingot ibana ma asa mandao si Timoteus sian nasida. (Jaha 2 Timoteus 2:20-22.) Taingot ma massai arga do hubungatta tu Bapakta Jahowa. Nungnga godang pengorbanan na tabahen asa boi hita akrab tu Ibana. Jadi unang ma taloas adong na manegai i.​—Ps. 26:4.

16. Cita-cita aha do na boi dibahen hamu?

¹⁶ Bahen ma cita-cita rohani. Bahen ma cita-cita na boi patoguhon haporseaonmuna jala mambahen hamu gabe halak Kristen na matang. (Eps. 3:16) Contohna boi do dibahen hamu jadwal asa taratur manjaha dohot marsiajar Bibel. (Ps. 1:2, 3) Berupaya ma hamu asa lam jotjot martangiang tu Jahowa jala asa lam denggan isi ni tangiangmuna i. Asing ni i, mulai sian saonari marbisuk ma hamu mamillit hiburan, jala atur ma asa unang habis tikkimuna tusi. (Eps. 5:15, 16) Pasti las do roha ni Jahowa mangida upayamuna lao mambahen kemajuan rohani.

17. Aha do manfaat na dapotmuna molo olo mangurupi na asing?

¹⁷ Boi do hamu gabe halak Kristen na matang molo olo hamu mangurupi na asing. Didok Jesus, “Umlas do roha ni halak na mangalehon sian na manjalo.” (Ul. 20:35) Contohna boi do dibahen hamu cita-cita lao mangurupi akka na matua dohot na marsahit di huria. Boi do ra diurupi hamu nasida mamakke perangkat elektronik manang berbelanja. Molo sahalak bawa hamu, bahen ma cita-cita gabe parhobas asa unggodang na boi diulahon hamu di huria. (Plp. 2:4) Cara na asing patuduhon holong tu akka halak, i ma marbarita na uli. (Mat. 9:36, 37) Jadi molo cocok do situasimuna, bahen ma cita-cita gabe perintis, melayani di Betel, manang dohot tu proyek pembangunan.

18. Molo olo hamu melayani sepenuh waktu, kesempatan aha do na boi dapotmuna?

¹⁸ Molo olo hamu melayani sepenuh waktu, dapotmuna ma godang kesempatan lao mangulahon akka tugas di organisasi. Contohna molo perintis do hamu, adong ma kesempatanmuna dohot tu Sikkola tu Parbarita Harajaon, melayani di Betel, manang dohot tu proyek pembangunan. Sahalak donganta perintis na margoar si Karen mandok, “Ala jotjot au marbarita na uli dohot akka dongan na matang, gabe lam akrab ma hubunganku tu Jahowa. Alani dukungan ni nasida, gabe lam ringgas ma au marsiajar Bibel, jala lam terampil ma au mamandu studi.”

19. Pasu-pasu aha do na dapotmuna molo torus mambahen kemajuan rohani?

¹⁹ Molo torus dibahen hamu kemajuan rohani, pasti dapotmuna do annon godang pasu-pasu. Gabe martujuan ma ngolumuna. (1 Joh. 2:17) Asing ni i, dang pola ikkon dihilala hamu na haccit ala mambahen keputusan na sala. Gariada gabe denggan ma ngolumuna jala marlas ni roha. (Poda 16:3) Teladanmuna i pe boi do patoguhon akka dongan na asing, na poso dohot na matua. (1 Tim. 4:12) Jala na paling penting, hilalaonmuna ma dame dohot las ni roha ala dibahen hamu las roha ni Jahowa jala lam togu hubunganmuna tu Ibana.​—Poda 23:15, 16.