Songon dia do Rupa ni Sibolis?

Na Didok Bibel

Dang boi taida Sibolis, alani i dang taboto songon dia rupana.—Epesus 6:11, 12.

Godang halak na manggombarhon Sibolis i songon hambing, adong tandukna, adong ihurna jala maniop garpu na balga. Piga-piga halak mandok, akka seniman najolo do na parjolo sahali manggombarhon Sibolis songon i. Akka seniman i mambahen gombaran songon i mangihutton dongeng manang carita taringot akka dewa.

Songon dia do Bibel manggombarhon Sibolis?

Adong do piga-piga tudosan na dipakke Bibel lao manggombarhon Sibolis. Alai tudosan i dipakke lao patuduhon pangalahona, dang rupana. Contohna, dipatudos Bibel do Sibolis i songon:

Suru-suruan hatiuron. Hira na burju do Sibolis tu jolma asa olo jolma mangihutton ibana jala mangalo Debata.—2 Korint 11:14.
Singa na marauang. Kejam do ibana tu akka halak na manomba Debata.—1 Petrus 5:8.
Naga na balga. Jahat situtu do ibana, gogo jala lomo rohana manggugai.—Pangungkapon 12:9.

Na didok Bibel taringot Sibolis

2 Korint 11:14, “Sibolis pe dipasuman-suman do dirina songon suru-suruan hatiuron.”

Lapatanna: Dioto-otoi Sibolis do jolma asa songon na burju ibana, dung i dioloi jolma ma ibana jala dialo Debata.
Epesus 6:11, “Pangke hamu ma perlengkapan porang na sian Debata asa togu hamu mangalo jorat ni Sibolis.”

Lapatanna: Dibahen Sibolis do marragam cara asa tarjorat jolma.
Jakobus 4:7, “Oloi hamu ma Debata. Alo hamu ma Sibolis, dung i lari ma ibana sian hamu.”

Lapatanna: Boi do jolma mangalo Sibolis molo dioloi nasida hata ni Debata.
1 Petrus 5:8, “Ai mardalani do musumuna Sibolis i songon singa na marauang mangalului sibondutonna.”

Lapatanna: Sogo do roha ni Sibolis tu akka halak na mangoloi Debata. Jala marsitutu do ibana asa unang marale-ale be jolma tu Debata.