Sai Dijaga Hamu do ‘Perisai Haporseaonmuna’?

1-2. (a) Hombar tu Epesus 6:16, boasa tahaporluhon “perisai, i ma haporseaon”? (b) Sungkun-sungkun aha do na laho taulas?

ADONG DO di hamu “perisai, i ma haporseaon”? (Jaha Epesus 6:16.) Tontu adong. Songon perisai na balga na boi manjaga sude pamatangta, haporseaon boi do manjaga hamu sian angka pengaruh na so denggan sian portibi on. Songon angka na rorang, kekerasan, dohot manang aha pe na maralo tu aturan ni Debata.

² Ala hita mangolu di “ari parpudi”, jotjot do diuji haporseaonta. (2 Tim. 3:1) Songon dia hamu boi mamareso naung togu do haporseaonmuna? Aha do na boi diulahon hamu laho patoguhon haporseaon i? Taulas ma alus ni sungkun-sungkun i.

 3. Aha do na diulahon angka tentara tu perisaina, jala boasa?

³ Najolo, jotjot do dilapisi angka tentara perisaina dohot kulit ni binatang. Dibahen angka tentara do miak tu kulit i asa tongtong denggan jala ndang tasikon. Molo diida tentara i adong na sega di perisaina, pintor hatop do i dipadenggan asa rade ibana laho marporang muse. Songon dia contoh i boi dipatudos tu haporseaonmuna?

 4. Boasa ingkon dipareso hamu haporseaonmuna, jala songon dia carana?

⁴ Songon tentara di tingki najolo, ingkon dipareso hamu do perisai, i ma haporseaonmuna asa tongtong rade laho marporang. Ingkon marporang do sude halak Kristen mangalo suru-suruan na jahat. (Eps. 6:10-12) Ingkon hita sandiri do na manjaga haporseaonta. Sian dia do diboto hamu naung togu haporseaonmuna tingki diuji? Ingkon martangiang do hamu asa diurupi Debata. Dung i, pangke ma Bibel asa boi diboto hamu aha na dihalomohon Debata laho ulahononmuna. (Heb. 4:12) Bibel mandok, “Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri.” (Poda 3:5, 6) Pingkirhon ma piga-piga situasi na diadopi hamu jala songon dia hamu mangadopi i. Umpamana, hea do hamu mangkilala susa di parhepengon? Tingki naeng mambahen keputusan, pos do rohamu tu janji ni Jahowa na disurat di Heber 13:5 na mandok, “Ndang tadingkononku ho jala ndang pasombuonku ho”? Pos do rohamu na laho urupan ni Jahowa hamu? Molo pos rohamuna, on patuduhon na denggan do dijaga hamu haporseaonmuna.

 5. Boasa olo tarsonggot hamu tingki mamareso haporseaonmuna?

⁵ Tingki dipareso hamu haporseaonmuna, olo do ra gabe tarsonggot hamu. Ra, adong do hahurangan di dirimuna na so diboto hamu saleleng on. Umpamana, gabe diboto hamu ma molo holso ni roha, gabus, dohot metmet ni roha nunga manegai haporseaonmuna. Molo masa i tu hamu, songon dia do carana asa boi dijaga hamu haporseaonmuna?

 6. Aha do contoh na patuduhon ndang sala holsoan?

⁶ Sipata, ndang sala hita holsoan. Contohna, holsoan do hita laho mamingkirhon aha na mambahen las roha ni Jahowa dohot Jesus. (1 Kor. 7:32) Molo taulahon dosa na balga, tontu tapingkirhon do carana asa padengganhon parale-aleonta tu Debata. (Ps. 38:19) Sai tapingkiri do carana mambahen las roha ni dongan saripe, jala mangurupi keluarga dohot dongan sahaporseaon.​—1 Kor. 7:33; 2 Kor. 11:28.

 7. Hombar tu Poda 29:25, boasa ndang pabiarhu hita tu jolma?

⁷ Alai molo paholsohu rohanta, boi do i mambahen sega haporseaonta. Contohna, olo do paholsohu hita taringot sipanganon dohot pangkean. (Mat. 6:31, 32) Olo do ra gabe sai tapingkirhon laho mangalului godang arta. On boi mambahen hita gabe holongan di hepeng. Jala boi do i mambahen gale haporseaonta dohot parale-aleonta tu Jahowa. (Mrk. 4:19; 1 Tim. 6:10) Manang olo do gabe paholsohu hita alani mamingkirhon pandapot ni halak taringot hita. Ra, gabe umbiar do hita molo direhei manang dianiaya sian ndang mambahen las roha ni Jahowa. Asa unang songon i, tapangido ma tu Jahowa asa unang mabiar hita tu jolma.​—Jaha Poda 29:25; Luk. 17:5.

 8. Aha do na ingkon taulahon molo adong na margabus taringot Jahowa dohot angka donganta?

⁸ Sibolis, i ma “ama ni gabus”. Marhite angka na nirajaanna, dipararat ibana do gabus taringot Jahowa dohot angka donganta. (Joh. 8:44) Umpamana, dibahen angka na murtad do gabus taringot organisasi ni Jahowa. Ra, dipaboa do gabus i di internet, di TV, manang di koran. Angka gabus i, i ma “api na sian panah ni Sibolis”. (Eps. 6:16) Aha do na ingkon taulahon molo adong halak na paboahon taringot gabus i tu hita? Unang ma tangihon i! Boasa? Alana pos do rohanta tu Jahowa dohot tu angka donganta. Gariada, ingkon tapasiding do angka halak na murtad. Unang ma olo hita mangkata-hatai dohot nasida nang pe lomo rohanta naeng mamboto taringot barita na dibahen nasida i.

 9. Aha do pengaruh ni metmet ni roha tu hita?

⁹ Metmet ni roha boi do mambahen gale haporseaonta. Sipata, ala mangadopi hasusaan, olo do gabe metmet rohanta. Jala ndang boi tapasiding angka hasusaan i. Alai molo sai tapingkirhon angka hasusaan i, olo do gabe ndang taingot be angka na denggan na dijanjihon Jahowa tu hita. (Pgk. 21:3, 4) Ala marmetmet ni roha, olo do gabe ndang margogo hita jala ndang be manomba Jahowa. (Poda 24:10) Alai, boi do tapasiding asa unang masa i tu hita.

10. Aha do na boi diparsiajari hamu sian pengalaman ni sahalak donganta borua?

¹⁰ Pingkirhon ma pengalaman ni sahalak donganta borua sian Amerika Serikat na tongtong manjaga haporseaonna tingki mangurus suamina na marsahit na posi. Dibahen ibana ma surat tu kantor pusat. Didok, “Susa do parngoluonnami jala jotjot do hami marmetmet ni roha, alai togu do pangkirimonnami. Mandok mauliate do ahu tu sude na dilehon Jahowa laho patoguhon haporseaonnami. Porlu do hami dipaingot jala dipatogu. On mangurupi hami asa tongtong setia tu Jahowa jala martahan mangadopi sitaonon na dipangke Sibolis laho mambahen gale haporseaonnami.” Sian pengalaman ni donganta on, taboto ma boi do tapasiding metmet ni roha! Songon dia carana? Ingot ma, sian Sibolis do pangunjunan na diadopi hamu. Pos ma rohamuna apulan ni Jahowa do hamu. Jala pangke ma angka naung diparade organisasi laho patoguhon haporseaonmuna.

11. Laho mamboto naung togu haporseaonta, aha do na ingkon tasungkun tu dirinta?

¹¹ Ra, dihilala hamu ingkon dipatogu do haporseaonmuna. Pingkirhon ma, piga-piga bulan na parpudi on, boi do dijaga hamu rohamuna asa unang paholsohu? Dipasiding hamu do angka halak na murtad jala ndang manangihon gabus na dipaboa nasida? Boi do hamu pasidingkon metmet ni roha? Molo marhasil hamu, on patuduhon naung togu do haporseaonmuna. Alai, ingkon tongtong do hamu jaga. Alana, adong do sinjata ni Sibolis na asing na boi mangela-ela hita. Taulas ma taringot i.

12. Aha do na masa molo holongan di hepeng hita?

¹² Holongan di hepeng boi mambahen gale haporseaonta jala gabe ndang talehon be na dumenggan tu Jahowa. Didok apostel Paulus, “Ndang adong sahalak tentara na mandalanhon tugasna huhut marsitutu mangalului hepeng. Ai naeng do bahenonna las roha ni komandanna.” (2 Tim. 2:4) Najolo, ndang diloas tentara ni Rom martiga-tiga. Aha do na masa molo ndang diihuthon sahalak tentara aturan i?

13. Boasa ndang boi sahalak tentara martiga-tiga?

¹³ Bayangkon ma situasi on. Di tingki manogot, piga-piga tentara marlatik do mamangke podang. Alai, adong sada tentara na so dohot marlatik. Laho do ibana martiga-tiga sipanganon tu onan. Dung botari, angka tentara naung marlatik i mamareso sinjata ni nasida jala patajomhon podangna. Alai tentara na martiga-tiga i, sibuk do paradehon sipanganon na laho digadis marsogotna i. Dung manogot, tompu ma ro musu menyerang nasida. Menurutmuna, tentara dia do na rade laho marporang jala mambahen las roha ni komandanna? Molo dohot hamu tu parporangan i, rap dohot tentara na dia do lomo rohamuna? Tentara naung marlatik i do manang na so marlatik?

14. Ala tentara ni Kristus hita, aha do na ummarga di ngolunta?

¹⁴ Dos do hita songon angka tentara na marlatik i. Na rumingkot di ngolunta, i ma mambahen las roha ni Komandanta, i ma Jahowa dohot Jesus. On ma na ummarga di ngolunta sian na adong di portibi on. Ingkon tongtong do talehon tingki dohot gogonta laho manomba Jahowa. Jala ingkon tajaga do perisainta, i ma haporseaon dohot perlengkapan porang na asing na sian Debata asa tongtong denggan.

15. Aha do sipasingot na didok si Paulus, jala boasa?

¹⁵ Ingkon sai jaga do hita! Boasa? Didok apostel Paulus, “manang ise na marsangkap naeng mamora” boi do gabe “lilu sian haporseaon”. (1 Tim. 6:9, 10) Hata “lilu” na didok dison, patuduhon boi do hita gabe sai mamingkirhon angka na so tahaporluhon. Jala boi do i mambahen hita sai mamingkirhon “angka sangkap haotoon dohot sangkap na parohon jea”. Alai ingot ma, on do sinjata na dipangke Sibolis laho mambahen gale haporseaonta.

16. Hombar tu Markus 10:17-22, aha do na ingkon tasungkun tu dirinta?

¹⁶ Ra, adong do hepengta laho manuhor angka barang. Alai sala do molo tatuhor barang hape ndang apala tahaporluhon? Pingkirhon ma sungkun-sungkun on: Nang pe boi tatuhor barang i, adong dope tingki dohot gogonta laho mamangke manang mangarawat barang i? Gabe humolong do rohanta tu angka barang i? Gabe songon baoa na manjua gokkon ni Jesus i do hita? (Jaha Markus 10:17-22.) Dumenggan do molo sederhana ngolunta jala mamangke godang tingki dohot gogo laho mangulahon lomo ni roha ni Debata!

17. Aha do na ingkon tongtong taingot?

¹⁷ Ingot ma, ganup ari marporang do hita. I do alana ingkon sai rade hita. (Pgk. 12:17) Ndang boi angka donganta na mamboan perisainta, i ma haporseaonta. Ingkon hita sandiri do na tongtong maniop perisainta.

18. Boasa tentara di tingki najolo ingkon gomos maniop perisai ni nasida?

¹⁸ Di tingki najolo, dipasangap do sahalak tentara ala barani di parporangan. Alai, gabe maila do ibana molo mulak ndang adong be perisaina. Sejarawan Rom na margoar si Tacitus mandok, “Sada hailaon na balga do molo ditadingkon sahalak tentara perisaina.” On ma sada alasan boasa ingkon gomos ditiop angka tentara i perisai ni nasida.

19. Songon dia hita boi gomos maniop perisai, i ma haporseaonta?

¹⁹ Boi do tatiop gomos perisai, i ma haporseaonta marhite tongtong ro tu parpunguan, jala mamaritahon taringot goar ni Jahowa dohot Harajaonna. (Heb. 10:23-25) Tajaha ma Hata ni Debata ganup ari jala martangiang ma asa diurupi Jahowa hita mangulahon lomo ni rohana. (2 Tim. 3:16, 17) Molo taulahon i, ndang adong sinjata ni Sibolis na boi mangalo hita. (Jes. 54:17) Ala adong “perisai, i ma haporseaon”, gabe dilinggomi ma hita. Togu ma hita jala tongtong rap saulaon dohot angka dongan. Jala boi do hita marhasil molo tongtong tajaga haporseaonta. Alai na rumingkot, sada hak istimewa do di hita ala marpihak tu Jesus tingki monang ibana mangalo Sibolis dohot angka na mangihuthon ibana.​—Pgk. 17:14; 20:10.