”Dame ni Debata . . . Sumurung sian Saluhut Roha”

1, 2. Aha do na masa tu si Paulus dohot si Silas di Pilippi? (Ida gombar di mula ni parsiajaran.)

RIMANGI ma na masa tu si Paulus dohot si Silas. Di tonga borngin dihurung jala dipasung do nasida di hurungan na mansai golap. Di tingki i, gabe misionaris do nasida. Hansit do tanggurung ni nasida ala dibalbali. (Ul. 16:23, 24) Andorang so i, disarat do nasida tu onan, tu jolo ni angka pangarajai jala diribak ma baju ni nasida. (Ul. 16:16-22) Warga negara Rom do si Paulus, jala ndang patut bahenon ni halak Pilippi songon i!a—Ida surat na di toru.

² Tingki di hurungan, ra dipingkiri si Paulus do taringot halak Pilippi dohot angka na masa di tingki i. Asing do kota i sian angka kota naung didalani ibana. Ingkon laho do halak Jahudi tu luar kota, tu topi ni sunge laho martangiang. (Ul. 16:13, 14) Ra, ala ndang adong nanggo sampulu halak Jahudi (baoa) disi, jadi ndang boi nasida pajongjongkon sinagoga. Ginjang do roha ni halak Pilippi ala warga negara Rom nasida. (Ul. 16:21) Olo do ra didok roha ni nasida ndang warga negara Rom si Paulus dohot si Silas ala halak Jahudi do nasida. Tutu, ndang taboto songon dia sasintongna, alai ndang patut nasida dihurung.

 3. Boasa gabe sungkunsungkun roha ni si Paulus? Jala songon dia do ibana mangadopi i?

³ Ra didok roha ni si Paulus do na laho diuhum mate nama ibana di Pilippi. Pigapiga bulan andorang so i, di Asia Kecil do si Paulus di bariba ni Laut Aegea. Tingki disi, mulahulak do tondi parbadia manundati nasida asa unang marbarita di pigapiga luat. Alai tondi parbadia manjujui nasida asa laho marbarita tu luat na asing. (Ul. 16:6, 7) Tudia do nasida dijujui? Tingki di Troas, mandapot parnidaan ma si Paulus. Di parnidaan i adong ma sahalak baoa mandok, ”Taripar ma ho tu Makedonia.” Tangkas ma, on tudutudu sian Jahowa! Dung i, pintor laho ma si Paulus tu Makedonia. (Jaha Ulaon ni Apostel 16:8-10.) Alai, aha do na masa muse? Dung sahat di Makedonia, dihurung ma ibana! Boasa dipaloas Jahowa on masa tu si Paulus? Sadia leleng do ibana dihurung? Ra olo do si Paulus sungkunsungkun, ”Boasa gabe songon on?” Alai tongtong do togu haporseaonna jala marlas ni roha. ”Martangiang ma si Paulus dohot si Silas mamuji Debata.” (Ul. 16:25) Dame ni Debata ma na mangapuli roha dohot pingkiran nasida.

4, 5. (a) Songon dia do situasinta boi sarupa songon na masa tu si Paulus? (b) Songon dia do situasi ni si Paulus gabe muba?

⁴ Hea do dihilala hamu songon na dihilala si Paulus? Ra hea do hamu mangido pangurupion sian Debata tingki mambahen haputusan. Jala dihilala hamu ma tondi parbadia manogunogu hamu. Alai dungkon i, gabe godang do ambatambat na diadopi hamu manang gabe muba parngoluonmuna. (Pjm. 9:11) Molo sai dipingkiri hamu i, olo do gabe sungkunsungkun rohamuna boasa dipaloas Jahowa on masa. Aha do na boi mangurupi hamu asa tongtong martahan, jala marhaposan tu Jahowa? Taida ma alusna sian aha na masa tu si Paulus dohot si Silas.

⁵ Tingki marende si Paulus dohot si Silas di hurungan, godang ma na masa, di na so panagaman ni nasida. Na parjolo, ro ma lalo na gogo. Pintor bungka ma angka pintu ni hurungan i jala martanggalan ma rantenasida. Dungkon i, disundati ibana do sahalak panjaga penjara asa unang maningkot, jala di pudian ni ari tardidi ma panjaga penjara i dohot keluargana. Manogotna i, disuru pejabat kota ma angka suruanna asa mamboan si Paulus dohot si Silas kaluar sian penjara jala mangido asa ditadingkon kota i. Tingki diboto angka pejabat kota na warga negara Rom do si Paulus dohot si Silas, diantusi nasida ma nunga sala pambahenan ni nasida. Jadi ditaruhon nasida ma si Paulus dohot si Silas asa kaluar sian kota i. Alai andorang so ditadingkon nasida kota i, marsangkap ma si Paulus dohot si Silas laho martading hata tu si Lidia na baru tardidi. Diparhaseang nasida do tingki laho patoguhon angka dongan na asing di Pilippi. (Ul. 16:26-40) Boi do tompu muba situasi!

 6. Aha do na laho taulas?

⁶ Aha do parsiajaranna tu hita? Boi do urupan ni Jahowa hita marhite cara na so panagamanta, alani i unang ma paholsohu tingki ro pangunjunan. Tontu, ndang tarhalupahon ni si Paulus parsiajaran na dapotna sian i. Taboto ma on sian suratna tu angka dongan di Pilippi taringot holso dohot dame ni Debata. Di artikel on, taulas ma hata ni si Paulus na disurat di Pilippi 4:6, 7. (Jaha.) Dung i, taida ma muse parsiajaran na asing di Bibel, taringot cara ni Jahowa mangurupi naposoNa. Jala taulas ma annon songon dia ”dame ni Debata” boi mangurupi hita martahan jala tongtong marhaporseaon tingki ro pangunjunan.

 7. Aha do parsiajaran na dipaboa si Paulus tu angka dongan di Pilippi, jala aha do na boi taparsiajari sian i?

⁷ Tingki dijaha angka dongan di Pilippi surat ni si Paulus, aha do na diingot nasida? Ra diingot nasida do na masa tu si Paulus dohot si Silas, jala diingot do ra halongangan na binahen ni Jahowa laho mangurupi nasida. Aha do poda ni si Paulus tu nasida? ’Unang ma holsoan, martangiang ma jala hilalaonmu ma dame ni Debata.’ Si Paulus paboahon, ”sumurung sian saluhut roha” do dame ni Debata. Aha do lapatan ni hata on? Pigapiga terjemahan ni Bibel paboahon lapatanna, i ma ”dumenggan sian sude na sinangkap ni jolma” manang ”sumurung sian sude pamingkirion ni jolma”. Jadi na nidok ni si Paulus disi, ”dame ni Debata” lobi sian na boi tapingkirhon. Tingki masa sitaonon, olo do ndang taboto songon dia cara mangadopi i, alai Jahowa mamboto songon dia carana. Urupanna do hita marhite cara na so panagamanta.​—Jaha 2 Petrus 2:9.

8, 9. (a) Nang pe masa sitaonon tu si Paulus tingki di Pilippi, aha do labana? (b) Boasa boi marpos ni roha angka dongan di Pilippi tu na sinurat ni si Paulus?

⁸ Tontu, lam togu ma roha ni angka dongan di Pilippi alani surat ni si Paulus. Jala dirimangi nasida do pangurupion ni Jahowa tu nasida di bagasan sampulu taon on. Nang pe diloas Jahowa masa sitaonon tu si Paulus dohot si Silas di kota i, alai gabe boi do nasida ”mampartahanhon dohot [marhite uhum] pahothon barita na uli”. (Plp 1:7, Bibel siganup ari) Ndang barani be angka pejabat kota manggugai huria Kristen na baru di Pilippi. Ra, ala dipaboa si Paulus do na warga negara Rom ibana. Gabe boi ma si Lukas maringanan disi dung ditadingkon si Paulus dohot si Silas kota Pilippi. Jala boi ma urupan ni si Lukas huria Kristen disi.

⁹ Tingki dijaha angka dongan di Pilippi surat ni si Paulus, diboto nasida ma ndang sian pamingkirion ni si Paulus na sinuratna i. Nunga dihilala si Paulus pangunjunan na borat. Jala tarhurung do ibana di Rom tingki manurathon surat i tu angka dongan. Alai, tongtong do dipatudu ibana ”dame ni Debata”.​—Plp. 1:12-14; 4:7, 11, 22.

10, 11. Aha do na ringkot taulahon tingki holsoan, jala aha do na laho ulahonon ni Jahowa?

¹⁰ Aha do na boi mangurupi hita asa ’unang mangkolsohon agia aha’ jala mangkilala ”dame ni Debata”? Hata ni si Paulus tu angka dongan di Pilippi patuduhon, ingkon martangiang do hita tingki holsoan. Paboa ma holso ni rohamuna di bagasan tangiang. (Jaha 1 Petrus 5:6, 7.) Molo nunga martangiang tu Jahowa, pos ma rohamuna na ramotanNa do hamu. Unang ma lupa mandok mauliate alani pasupasu naung tajalo. Jala ingot ma, na ”tarpatupa [Jahowa] do andul lumobi sian na tapangido manang tapingkiri”.​—Eps. 3:20.

¹¹ Songon si Paulus dohot si Silas, songgot do ra rohanta di pangurupion ni Jahowa tu hita. Ra, ndang alani marhite tanda halongangan, alai ala sai dilehon do na tahaporluhon. Na didok disi, ndang holan hundul hita manang ndang porlu mangulahon manang aha. Alai ingkon taulahon do na hombar tu tangiangta. (Rom 12:11) Gabe boi ma dipasupasu Jahowa ulaonta. On patuduhon na marsitutu do hita di tangiangta i. Ingot ma, boi do Jahowa mangulahon lobi sian na tahirim dohot na tapangido. Sipata songgot do rohanta di pangurupionNa. Taulas ma pigapiga pengalaman na paposhon rohanta tu huaso ni Jahowa na boi mangurupi hita.

12. (a) Aha do na diulahon Raja Hiskia tingki ro Raja Sanherib mangondam ibana? (b) Parsiajaran aha do na boi taida sian cara ni Jahowa pasaehon parsoalan?

¹² Godang do disurat di Bibel songon dia cara ni Jahowa mangurupi di na so panagaman. Umpamana, di tingki ni Raja Hiskia ro ma si Sanherib raja ni Assur manaluhon angka kota di Juda, asing ni Jerusalem. (2 Raj. 18:1-3, 13) Dung i ro ma si Sanherib mangondam halak Jerusalem. Aha do na diulahon Raja Hiskia? Parjolo, martangiang ma ibana tu Jahowa mangido pangurupion dohot manjalo tudutudu marhite panurirang Jesaya. (2 Raj. 19:5, 15-20) Dung i, dilehon ibana ma guguan na pinangido ni si Sanherib. (2 Raj. 18:14, 15) Tingki dihaliangi tentara Assur kota i, diparade si Hiskia do angka na porlu. (2 Kron. 32:2-4) Songon dia do ujungna? Disuru Jahowa ma sada surusuruan laho mangaripashon 185.000 tentara ni si Sanherib di bagasan saborngin. Pangurupion on ro di na so panagaman ni si Hiskia!​—2 Raj. 19:35.

13. (a) Parsiajaran aha na tadapot sian na masa tu si Josep?(b) Aha do na masa tu si Sarah di na so panagamanna?

¹³ Taulas ma muse na masa tu sahalak naposo na margoar si Josep. Tingki dihurung ibana di Misir, ra ndang adong tubu di rohana gabe parhuaso paduahon di Misir, manang dipangke Jahowa ibana paluahon keluargana sian haraparon. (1 Mus. 40:15; 41:39-43; 50:20) Tangkas ma, pangurupion ni Jahowa lobi sian na dihirim ni si Josep. Rimangi ma muse taringot ompung boru ni si Josep, i ma si Sarah. Nunga adong anakna sian hatobanna. Alai hirim do rohana asa adong tubuna di hatuaonna? Hatutubu ni si Isak, lobi sian na dihirim ni si Sarah.​—1 Mus. 21:1-3, 6, 7.

14. Aha do na paposhon rohanta tu Jahowa?

¹⁴ Tutu, saonari ndang boi be tahirim asa bahenon ni Jahowa tanda halongangan laho mangurupi hita andorang so ro tano na imbaru. Jala ndang tapangido tu Jahowa asa mambahen tanda halongangan di ngolunta. Alai, longang do rohanta mangida cara ni Jahowa mangurupi naposoNa najolo, jala ndang muba dope Ibana! (Jaha Jesaya 43:10-13.) On paposhon rohanta asa mangasahon Ibana. Pos ma rohanta lehononNa do gogo na tahaporluhon hombar tu na di halomohon rohaNa. (2 Kor. 4:7-9) Parsiajaran aha do na boi tadapot sian si Hiskia, si Josep, dohot si Sarah? Boi do Jahowa mangurupi hita nang pe maol situasi manang sitaononta, molo tongtong hita marsihohot tu Ibana.

15. Aha do na boi mangurupi hita mangkilala ”dame ni Debata” nang pe marsitaonon, jala boasa on boi masa?

¹⁵ Songon dia do hita mangkilala ”dame ni Debata” nang pe marsitaonon? Ingkon tongtong do togu paralealeonta tu Jahowa. Hita boi maraleale tu Ibana alani pelean tobusan ni Jesus Kristus. Sada halongangan na di parade Jahowa do tobusan on. Marhite tobusan, boi ma disesa dosanta, boi ma ias panggora ni rohanta, jala boi ma hita pajonokkon diri tu Ibana.​—Joh. 14:6; Jak. 4:8; 1 Ptr. 3:21.

16. Aha do na masa molo nunga tajalo ”dame ni Debata”? Bahen ma tudosan.

¹⁶ Aha do na masa molo nunga tadapot ”dame ni Debata na sumurung sian saluhut roha”? Bibel paboahon on boi mangaramoti rohanta dohot pingkiranta. (Plp. 4:7) Bahasa asli ni hata ”mangaramoti” dibuat sian istilah militer, lapatanna sada kelompok tentara na ditugashon laho manjaga sada kota. Angka halak na tinggal di kota Pilippi dijaga punguan tentara sisongon i. Boi ma nasida renges modom ala diboto adong na manjaga kotanasida. Suang songon i ma, molo adong ”dame ni Debata” di hita, ndang mabiar jala ndang holsoan be hita. Diramoti Jahowa do hita jala lomo do rohaNa asa marhasil hita. (1 Ptr. 5:10) Gabe ndang marsak be hita jala ndang marmetmet ni roha.

17. Aha do na boi mangurupi hita marhaposan tu Jahowa tingki masa haporsuhon bolon?

¹⁷ Masa nama haporsuhon bolon. (Mat. 24:21, 22) Ndang tangkas taboto aha na masa tu hita ganup marsadasada. Alai, unang ma pola paholsohu hita. Nang pe ndang taboto aha na laho ulahonon ni Jahowa, alai tatanda do Debatanta. Taboto do aha naung diulahon Ibana tu angka naposoNa najolo. Aha pe na laho masa, na laho pasauton ni Jahowa do sangkapNa. Jala boi do pasautonNa i marhite cara na so panagamanta! Alani i, tingki adong na diulahon Jahowa tu hita, boi ma tahilala ”dame ni Debata na sumurung sian saluhut roha” marhite cara na baru.