Cara Manolukhon Pangalaho na Imbaru Jala Tongtong Patuduhon I

1, 2. (a) Boasa boi hita patuduhon pangalaho na imbaru? (b) Angka pangalaho na imbaru aha do na laho taparsiajari sian Kolosse 3:10-14?

DUA HALI ma hata ”jolma na imbaru” disurathon di Bibel. (Eps. 4:24; Kol. 3:10) Na didokna dison, i ma parange ’na ditompa suman tu Debata’. Boi do hita patuduhon parange on? Boi. Suman tu Debata do jolma ditompa, alani i boi do tatiru parange ni Debata.​—1 Mus. 1:26, 27; Eps. 5:1.

² Ala jolma na mardosa do hita, adong dope giotgiot na sala di rohanta. Boi do i masa alani hasomalan di luatta. Alai diurupi Jahowa do hita asa mangulahon lomo ni rohaNa. Taulas ma pigapiga parange na didok jolma na imbaru. (Jaha Kolosse 3:10-14.) Dung i, taulas ma songon dia mangulahon on di parngoluonta.

 3. Paboa ma sada parange sian pangalaho na imbaru.

³ Si Paulus patorangkon, sada sian pangalaho na imbaru i ma ndang paimbarimbarhon. Ibana mandok, ”Ndang mardiaimbar disi Junani manang Jahudi, na marsunat manang na so marsunat, bangso na leban manang bangso na so maju dope, hatoban manang anak mata.” Unang ma didok roha ni sasahalak na dumenggan dirina sian na asing alani suku, marga, bangso manang alani tanggung jawabna di huria. Boasa? Ala ’sada do hita saluhutna di bagasan Kristus’.​—Kol. 3:11; Gal. 3:28.

 4. (a) Songon dia do naposo ni Jahowa maradophon halak na asing? (b) Aha do na boi mangambati halak Kristen asa marsada?

⁴ Molo nunga tasolukkon parange na imbaru, tapasangap jala taargai do na asing, ndang soal sian dia haroroanna, suku, manang margana. (Rom 2:11) Di pigapiga inganan, maol do mangulahon on. Umpamana, songon di Afrika Selatan, hea do dipapulik pamarenta inganan ni halak mangihuthon sukuna be. Adong do Sitindangi Ni Jahowa di negara i. Alani i, dipangido Punguan Na Mangaradoti Organisasi ma angka dongan asa olo marsaor tu halak sian suku dia pe. Di bulan Oktober 2013, dibahen ma program khusus asa donganta na sian marragam suku boi rap marsaor.

5, 6. (a) Pengaturan aha do na dibahen di sada negara laho mangurupi naposo ni Debata asa marsada? (Ida gombar di mula ni parsiajaran.) (b) Songon dia do hasilna?

⁵ Dibahen ma pengaturan asa di ari Sabtu manang Minggu, donganta na marbahasa na asing manang suku na asing boi rap marsaor. Rap marbarita ma nasida, rap marpungu, manang ro tu jabu ni dongan sian suku na asing. Marratus do huria na mangulahon pengaturan on, jala godang laporan na denggan na dipaboa tu kantor cabang. Longang do roha ni halak na so Sitindangi mangida on. Sahalak sian pemimpin ni agama mandok, ”Ndang Sitindangi Ni Jahowa ahu nian, alai pinuji do hamu. Denggan do hamu diuluhon di ulaon marbarita, nang pe sian marragam suku.” Songon dia do pandapot ni angka dongan taringot tu pengaturan on?

⁶ Di mulana, maila do donganta si Noma na marbahasa Xhosa manogihon donganta sian huria na marbahasa Inggris asa ro tu jabuna. Alai dungkon rap marbarita jala ro tu jabu ni dongan na kulit putih gabe pos ma rohana. Didok ibana ma, ”Sarupa do hape hita dohot nasida!” Jadi tingki ro donganta sian huria bahasa Inggris laho marbarita dohot dongan sian huria bahasa Xhosa, ditogihon si Noma ma nasida asa mangan di jabuna. Songgot do rohana mangida donganta sintua na kulit putih, ala olo hundul di kotak na sian palastik. Mandok mauliate do nasida alani pengaturan on. Gabe tamba ma dongan ni nasida jala tongtong do nasida marsaor dohot angka dongan sian marragam suku.

 7. Boasa ingkon tongtong tapatudu asi ni roha?

⁷ Sai adong do sitaonon ni naposo ni Jahowa sahat tu na diripashon portibi ni Sibolis on. Tahilala do maol ni mangalului parkarejoan, mangadopi sahit, mara, hajahaton, dipaporsukporsuk alani haporseaon, manang na asing. Asa boi mangurupi dongan na asing ingkon adong do asi ni roha di hita. Asi ni roha mangonjar rohanta asa burju maradophon na asing. (Eps. 4:32) I ma bagian ni parange na imbaru. Molo tapatudu parange i, boi ma tatiru Debata jala taapuli dongan na asing.​—2 Kor. 1:3, 4.

 8. Aha do labana molo tapatudu asi ni roha dohot haburjuon tu angka dongan di huria? Paboa ma sada pengalaman.

⁸ Ra di hurianta adong do dongan na pinda sian negara na asing, sian suku na asing, manang dongan na hurangan. Songon dia do hita patuduhon haburjuon tu nasida? Jangkon ma nasida, mardongan ma dohot nasida jala urupi ma nasida mangkilala na tahaporluhon do nasida di huria. (1 Kor. 12:22, 25) Donganta si Dannykarl na sian Filipina pinda tu Jepang. Ala pangaranto do ibana disi, jotjot do ndang burju angka dongan sakarejona tu ibana. Alai ro ma ibana tu parpunguan ni Sitindangi Ni Jahowa. Didok ibana ma, ”Halak Jepang do gumodangan na ro tusi. Alai mansai denggan do nasida manjangkon ahu. Hira aleale ni nasida do ahu dibahen.” Alani haburjuon ni angka dongan, gabe boi ma ibana maraleale tu Jahowa. Ujungna, tardidi ma ibana jala nunga gabe sintua. Las do roha ni donganna sintua mangida si Dannykarl dohot tungganeboruna si Jennifer. Sintua i mandok, ”Perintis na sederhana do nasida. Jala sitiruon na denggan do nasida di na manjumolohon harajaon ni Debata.”​—Luk. 12:31.

9, 10. Paboa ma sada pengalaman na patuduhon laba ni marasi ni roha tingki marbarita.

⁹ Boi do tabahen ”na denggan di saluhut halak” molo marbarita na uli hita. (Gal. 6:10) Godang do Sitindangi Ni Jahowa na patuduhon asi ni roha tu parluar negeri na pinda tu luat nasida jala mamparsiajari hata ni nasida. (1 Kor. 9:23) Godang do labana mangulahon i. Sahalak perintis di Australia na margoar si Tiffany mamparsiajari bahasa Swahili laho mangurupi huria na marbahasa Swahili di Brisbane. Ndang mura mamparsiajari bahasa i, alai gabe gumodang do dapotna las ni roha. Ibana mandok, ”Molo lomo rohamuna mandapot gumodang las ni roha, urupi ma huria na marbahasa na asing. Songon na mardalani do huhilala. Boi ma tahilala jala taida parsadaan ni angka dongan na sian marragam bangso di liat portibi on.”

¹⁰ Jala i do na diulahon sada keluarga di Jepang. Si Sakiko mandok, ”Jotjot do hami pajumpang dohot halak Brasil tingki marbarita. Tingki dipatudu hami ayat di Pangungkapon 21:3, 4 manang di Psalmen 37:10, 11, 29 sian Bibel bahasa Portugis, denggan do ditangihon nasida. Jala sipata olo do manetek ilu ni nasida.” Alani asi ni roha ni keluarga si Sakiko, gabe diparsiajari nasida ma bahasa Portugis. Ujungna, gabe dohot ma nasida mamungka huria na marbahasa Portugis di luat i. Nunga godang parluar negeri na pinda tu luat nasida diurupi gabe sisomba Jahowa. Si Sakiko mandok, ”Ndang mura laho marsiajar bahasa Portugis, alai godang do pasupasu na nilehon ni Jahowa. Mandok mauliate godang do hami tu Jahowa.”​—Jaha Ulaon ni Apostel 10:34, 35.

11, 12. (a) Aha do na mangonjar rohanta asa patuduhon parange na imbaru? (b) Aha do na boi mangurupi hita asa tongtong marserep ni roha?

¹¹ Laho pasangaphon Jahowa do umbahen na olo hita patuduhon parange na imbaru, ndang asa dipuji jolma. Taingot ma, surusuruan na so mardosa pe boi do gabe marginjang ni roha jala ujungna gabe mardosa. (Bandingkon Hes. 28:17) Jolma na mardosa do hita. Alani i, gabe maol ma hita pasidingkon ginjang ni roha. Alai boi do hita patuduhon serep ni roha. Aha do na boi mangurupi hita mangulahon i?

¹² Manjaha jala mangarimangi Hata ni Debata ganup ari, boi mangurupi hita patuduhon serep ni roha. (5 Mus. 17:18-20) Ringkot do mangarimangi ajaran ni Jesus. Dibahen ibana do sitiruon taringot cara patuduhon serep ni roha. (Mat. 20:28) Alani serep ni rohana, diburi Jesus do pat ni angka apostelna. (Joh. 13:12-17) Asing ni i, martangiang ma mangido tondi parbadia ni Jahowa. Tondi parbadiaNa boi mangurupi hita mangalo pingkiran na sala na mandok dumenggan do dirinta sian dongan na asing.​—Gal. 6:3, 4; Plp. 2:3.

13. Aha do labana molo marserep ni roha hita?

¹³ Jaha Poda 22:4. Dipangido Jahowa do hita asa marserep ni roha. Godang do labana molo marserep ni roha hita. Boi ma dame huria jala marsada. Jala patuduhonon ni Jahowa ma asi ni rohaNa na mansai balga i tu hita. Apostel Petrus mandok, ”Alai saluhutna ma hamu manolukkon haserepon sama hamu, ai dialo Debata do angka na ginjang roha, alai dilehon do asiasi tu angka na serep marroha.”​—1 Ptr. 5:5.

14. Ise do na gabe sitiruon na dumenggan laho patuduhon hasabaron?

¹⁴ Saonari on, jotjot do halak mandok, na oto do halak na sabar manang na lambok roha. Alai sala do pamingkirion sisongon i. Alana, Jahowa Pargogo na so hatudosan pe, tongtong do sabar jala lambok. Ibana ma sitiruon na dumenggan laho patuduhon parange i. (2 Ptr. 3:9) Rimangi ma songon dia Jahowa patuduhon hasabaron tingki mangalusi si Abraham dohot si Lot marhite surusuruanNa. (1 Mus. 18:22-33; 19:18-21) Rimangi ma muse songon dia Jahowa sabar maradophon halak Israel na sai mangalo lobi sian 1.500 taon.​—Hes. 33:11.

15. Songon dia do Jesus patuduhon lambok ni roha dohot hasabaron?

¹⁵ Sahalak ”na lambok” do Jesus. (Mat. 11:29) Sabar do ibana mangadopi hagaleon ni angka siseanna. Tingki di tano on, jotjot do didok halak hata na so tutu dompak Jesus. Alai nang pe songon i, sabar jala lambok do ibana sahat tu na mate. Tingki manaon na hansit di hau partinaonan, dipangido Jesus do tu Amana asa disalpuhon dosa ni halak na pamatehon ibana. Didok ibana do, ”Ndang diboto nasida na binahennasida i.” (Luk. 23:34) Nang pe marsitaonon jala marsak, alai tongtong do Jesus lambok jala sabar.​—Jaha 1 Petrus 2:21-23.

16. Songon dia do hita patuduhon lambok ni roha dohot hasabaron?

¹⁶ Dipaboa si Paulus do sada cara laho patuduhon lambok ni roha dohot hasabaron. Ibana mandok, ”Marsabar ni roha ma hamu sama hamu, masiampunan ma hamu, molo adong na marsogo ni roha na sada tu na sada nai. Ingkon masisesaan dosa do hamu sama hamu songon Tuhan i na manesa dosamuna.” (Kol. 3:13, Bibel siganup ari) Asa boi manalpuhon hasalaan ni dongan, ingkon lambok do rohanta jala sabar. Molo taulahon i, gabe marsada ma huria.

17. Boasa ringkot patuduhon lambok ni roha dohot hasabaron?

¹⁷ Dipangido Jahowa do hita asa lambok jala sabar maradophon na asing. Ringkot do parange on molo lomo rohanta mangolu di tano na imbaru. (Mat. 5:5; Jak. 1:21) Na pasangaphon Jahowa do molo lambok rohanta jala sabar hita. Jala molo taulahon i boi ma taurupi angka dongan asa sabar jala lambok.​—Gal. 6:1; 2 Tim. 2:24, 25.

18. Songon dia do holong dohot parange na so siida bohi marhaitan?

¹⁸ Marhaitan do angka parange naung taulas nangkin tu holong. Dipasingot si Jakobus do angka dongan najolo, ala humolong roha ni nasida tu halak na mamora sian na pogos. Dipaboa ibana do na maralo parange sisongon i tu uhum ni Debata na mandok, ”Haholongi donganmi songon dirim!” Jala didok ibana ma muse, ”Molo siida bohi hamu, na mangulahon dosa do hamu disi.” (Jak. 2:8, 9) Molo tahaholongi do dongan na asing, ndang olo hita paimbarimbarhon nasida alani singkolana, suku, marga, manang alani hamoraonna. Alani i, unang ma holan asa diida jolma tapatudu holong, alai patudu ma holong na sian roha.

19. Boasa ringkot tasolukhon holong?

¹⁹ Holong i ”sabar jala burju” jala ”ndang ginjang rohana”. (1 Kor. 13:4, Bibel siganup ari) Ingkon sabar, burju, jala serep do rohanta asa boi marbarita na uli tu na asing. (Mat. 28:19) Molo tapatudu sude parange on, boi ma hita tongtong maraleale tu sude donganta di huria. Molo tapatudu holong sisongon i, marsada ma huria. Boi do i parohon sangap tu Jahowa. Alana, idaon ni halak na asing ma i, jala gabe taronjar ma rohanasida laho mananda hasintongan. I do alana Bibel mandok, ”Na sumurung sian sasudena i, masihaholongan ma hamu, ai i do rahutrahut na dumenggan.”​—Kol. 3:14, Bibel siganup ari.

20. (a) Sungkunsungkun aha do na porlu tarimangi, jala boasa? (b) Aha do na tapaima?

²⁰ Tasungkun ma dirinta, ’Hamubaon aha do muse na porlu hubahen asa mananggalhon jala mambolongkon parange na buruk?’ Ingkon martangiang do hita jala tapangido ma pangurupion ni Jahowa. Marsitutu ma hita paubahon pingkiran dohot ulaon na sala, asa boi hita manean ”harajaon ni Debata”. (Gal. 5:19-21) Sungkun ma muse di rohamuna, ’Tongtong do ahu paubahon pingkiranku laho mambahen las roha ni Jahowa?’ (Eps. 4:23, 24) Ala mardosa dope hita, maol do manolukkon jala patuduhon parange na imbaru. Alai ingkon marsitutu do hita jala tongtong marhamubaon. Rimangi ma songon dia molo sude halak na mangolu patuduhon parange na imbaru jala boi maniru parange ni Jahowa na sun denggan!