Toktong ma Rade Sahat tu na Ro Ari ni Jahowa

 1. Aha do na ikkon taulahon asa malua sian ari ni Jahowa?

“ARI NI Jahowa” na dipaboa di Bibel, i ma tikki dihancurhon Jahowa sude musuna jala dipalua Ibana akka naposona. Di tikki najolo nungnga hea Jahowa manghukum akka bangso. (Jes. 13:1, 6; Hes. 13:5; Sep. 1:8) Satokkin nai dimulai ma “ari ni Jahowa” tikki dihancurhon Babel na Balga jala marujung ma i di porang Armagedon. Asa malua hita sian “ari” i, porlu do taparade diritta sian saonari. Jala didok Jesus ikkon ‘toktong do hita rade’ sahat tu na ro “hasusaan bolon”.​—Mat. 24:21; Luk. 12:40.

 2. Aha do manfaatna mamparsiajari bukku 1 Tessalonik?

² Di suratna na parjolo tu halak Tessalonik, dipakke si Paulus do piga-piga ilustrasi lao mangurupi halak Kristen asa rade tu ari panguhuman ni Jahowa. Diboto si Paulus do ari ni Jahowa dang ro di tikki i. (2 Tes. 2:1-3) Alai dijujui ibana do akka dongan di tikki i asa mangarade jala mangingot na lao ro nama ari ni Jahowa satokkin nai. Hita pe boi do menerappon nasehat ni si Paulus. Saonari tabahas ma na dipaboa ibana taringot: (1) songon dia do haroro ni ari ni Jahowa i, (2) akka ise do na so malua di ari i, jala (3) songon dia do carana asa rade hita jala boi malua di ari i.

 3. Boasa dipatudos ari ni Jahowa i songon haroro ni panakko tikki borngin? (Ida gambar.)

³ “Songon haroro ni panakko di tikki borngin.” (1 Tes. 5:2) On ma ilustrasi na parjolo sian tolu ilustrasi na dipakke si Paulus lao patorakkon taringot haroro ni ari ni Jahowa. Biasana hatop do panakko mambuat na lao takkoonna. Jala di tikki borngin do nasida manakko, tikki dang adong na mamboto. Songon i ma ari ni Jahowa, toppu do i ro jala songgot do roha ni akka halak tikki ro i. Bahkan halak Kristen na sittong pe tarsonggot do ala hatop i terjadi. Alai malua do hita tikki dihancurhon Jahowa akka parjahat.

 4. Boasa dipatudos ari ni Jahowa songon pangae ni sahalak ina na lao partus?

⁴ “Songon pangae ni sahalak ina na lao partus.” (1 Tes. 5:3) Dang diboto sahalak ina andigan pastina ibana partus. Alai diboto ibana do pasti partus do annon ibana. Tikki na partus i ibana, hatop do i, haccit dihilala, jala dang boi dipaso. Suang songon i ma, dang taboto andigan dimulai ari ni Jahowa i. Alai pos do rohatta pasti ro do ari i jala dang boi menghindar akka parjahat sian i.

 5. Boasa dipatudos hasusaan bolon songon sogot ni ari na lam tiur?

⁵ Songon sogot ni ari na lam tiur. Di ilustrasi na patoluhon, dipaboa si Paulus do muse taringot panakko di tikki borngin. Alai di ilustrasi on, dipatudos si Paulus do ari ni Jahowa i songon sogot ni ari na lam tiur. (1 Tes. 5:4) Panakko na ro di tikki borngin olo do dang sadar nungnga tiur be ari. Molo nungnga tiur ari, boi ma gabe tarboto nasida manakko. Dos songon i ma, hasusaan bolon boi patuduhon halak na songon panakko. Di haholomon do nasida ala torus mangulahon akka na dihasogohon Debata. Alai unang ma songon nasida hita. Asa rade hita, unang ma taulahon akka na dihasogohon Jahowa jala torus ma taulahon “akka na denggan, na hombar tu lomo ni roha ni Debata, dohot na sittong”. (Eps. 5:8-12) Saonari tabahas ma dua ilustrasi na dipakke si Paulus lao manggombarhon akka halak na so malua.

 6. Boasa didok godangan halak saonari tarpodom? (1 Tessalonik 5:6, 7)

⁶ “Halak na tarpodom.” (Jaha 1 Tessalonik 5:6, 7.) Dipatudos si Paulus do halak na so malua di ari ni Jahowa songon halak na tarpodom. Dang diboto nasida aha na masa di sakaliling ni nasida. Alani i dang diboto nasida masa akka peristiwa na penting jala dang adong diulahon nasida manang aha. Godangan halak saonari songon halak na tarpodom do. (Rom 11:8) Dang porsea nasida molo hita mangolu di “ari parpudi” jala na lao ro nama hasusaan bolon. Memang tikki masa perubahan na balga di portibi on, adong do piga-piga halak na tertarik tu barita Harajaon. Alai lam leleng godangan sian nasida tarpodom muse. Bahkan adong do na marpikkir leleng nai dope ro ari panguhuman i. (2 Ptr. 3:3, 4) Alai taboto do massai penting do taihutton nasehat ni si Paulus asa toktong hita sadar ganup ari.

 7. Boasa dipatudos halak na lao dihukum Debata songon halak na mabuk?

⁷ ‘Halak na mabuk.’ Dipatudos Apostel Paulus do halak na lao dihancurhon Debata songon halak na mabuk. Halak na mabuk biasana lambat do mangattusi na masa di sakalilingna jala dang dibahen nasida keputusan na denggan. Dos songon i ma, dang olo akka parjahat manangihon sipasingot ni Debata. Sian parngoluon ni nasida, dialo nasida do Debata. Akibatna gabe dihukum ma nasida. Alai molo halak Kristen, nungnga dipaboa tu nasida asa toktong sadar. (1 Tes. 5:6) Sahalak pakar ni Bibel mandok halak na sadar, i ma halak na toktong tenang, dang panik, jala denggan cara marpikkirna tikki mambahen keputusan. Boasa penting on? Ala saonari godang do masalah sosial dohot masalah politik. Lam jonok ari ni Jahowa, lam balga do tekanan lao mendukung masalah sosial dohot masalah politik. Alai dang pola porlu mabiar hita. Boi do tondi parbadia ni Debata mangurupi hita toktong tenang, dang panik, jala mambahen keputusan na denggan.​—Luk. 12:11, 12.

 8. Sesuai tu 1 Tessalonik 5:8, aha do na boi mangurupi hita asa toktong sadar? (Ida gambar.)

⁸ ‘Tapakke ma baju partahanan . . . dohot takkuluk bosi.’ Dipatudos si Paulus do hita songon tentara na marjaga-jaga jala mamakke baju porang. (Jaha 1 Tessalonik 5:8.) Sahalak tentara ikkon rade do marporang tikki sadihari pe. Suang songon i ma, ikkon rade do hita tu ari ni Jahowa. Tapakke ma baju partahanan, i ma haporseaon dohot holong jala tapakke takkuluk bosi, i ma pos ni roha tu janji ni Debata taringot haluaon.

 9. Songon dia do haporseaon boi melindungi hita?

⁹ Songon baju partahanan na boi melindungi jantung ni sahalak tentara, haporseaon dohot holong pe boi do melindungi rohatta. On mangurupi hita toktong manomba Debata jala mangihutton Jesus. Haporseaon paposson rohatta pasti lehonon ni Jahowa do upa tu hita molo talului Jahowa sian nasa rohatta. (Heb. 11:6) Jala gabe diurupi ma hita asa toktong setia tu Pamimpinta Jesus, bahkan molo masa sitaonon na borat tu hita. Asa toktong togu haporseaotta jala boi hita martahan di situasi na maol, taparsiajari ma contoh ni akka donganta di jamanta saonari na toktong setia nang pe dianiaya manang susa di parhepengon. Jala asa unang holongan di hepeng dohot arta hita, tatiru ma akka dongan na mambahen sederhana ngolu ni nasida asa boi manjumolohon ulaon Harajaon.b

10. Songon dia do holong tu Debata dohot tu na asing mangurupi hita torus marbarita?

¹⁰ Penting do holong asa sai toktong dungo jala sadar pikkiranta. (Mat. 22:37-39) Holong tu Debata boi mangurupi hita asa torus marbarita nang pe adong sitaononta. (2 Tim. 1:7, 8) Ala holong rohatta tu akka halak na so manomba Jahowa, torus do hita marbarita na uli di inganatta, bahkan marbarita sian telepon manang surat. Torus do hita berharap sada tikki akka halak na takabari boi muba jala mangulahon na sittong.​—Hes. 18:27, 28.

11. Molo holong rohatta tu akka dongan, aha do na taulahon? (1 Tessalonik 5:11)

¹¹ Tahaholongi do muse akka dongan sahaporseaon di huria. Tapatudu do holong tu nasida tikki ‘marsiurupan hita jala patoguhon na asing’. (Jaha 1 Tessalonik 5:11.) Sarupa songon akka tentara na rap marporang, hita pe rap berjuang do dohot akka dongan. Olo do sahalak tentara tarlukka dibahen donganna tikki marporang, alai dang na sengaja ibana mangulahon i. Sarupa songon i ma, dang mungkin sengaja hita mambahen haccit roha ni donganta manang sengaja hita mambalos pambahenan ni nasida na mambahen haccit rohatta. (1 Tes. 5:13, 15) Asing ni i, tapatudu do holong molo taargai akka dongan na manguluhon hita di huria. (1 Tes. 5:12) Tikki dibahen si Paulus suratna na parjolo tu huria Tessalonik, dang adong dope sataon dibentuk huria i. Bisa jadi akka sintua na dilantik disi dang marpengalaman dope jala olo do mambahen kesalahan. Alai nang pe songon i, ikkon tetap do nasida diargai. Nungnga lam jonok be hasusaan bolon, alani i sian saonari ikkon taihutton do petunjuk ni akka sintua. Bisa jadi annon, dang boi dapotta petunjuk sian akka dongan na adong di kantor pusat dohot kantor cabang. Jadi massai penting do tapatudu holong dohot pangargaion tu akka sintua. Torus ma tajaga pikkiranta dang soal aha na masa. Unang ma fokus hita tu hahurangan ni akka sintua, alai taingot ma Jahowa do na manogu-nogu nasida marhite Kristus.

12. Songon dia pos ni roha tu janji ni Debata boi melindungi pikkiranta?

¹² Sarupa songon takkuluk bosi na boi melindungi ulu ni sahalak tentara, pos ni roha tu janji ni Jahowa taringot haluaon pe boi melindungi pikkiranta. Molo togu pos ni rohatta tu janji i, gabe sadar ma hita dang mararga akka na ditawarhon portibi on. (Plp. 3:8) Boi do i mangurupi hita asa toktong tenang jala denggan cara marpikkirta. On ma na dihilala si Wallace dohot si Laurinda na melayani di Afrika. Di bagasan tolu minggu, marujung ngolu ma omak ni si Laurinda dohot bapak ni si Wallace. Alani pandemi COVID-19 dang boi nasida mulak tu huta asa boi patoguhon keluarga ni nasida. Didok si Wallace, “Janji taringot haheheon mangurupi au asa unang torus mamikkirhon songon dia keadaan ni nasida sebelum marujung ngolu, alai mamikkirhon songon dia annon nasida tikki dipahehe di tano na imbaru. Harapan i mangapuli au tikki lungun rohakku manang tikki masihol au tu nasida.”

13. Aha do na boi taulahon asa tadapot tondi parbadia?

¹³ “Unang ma abbati tondi parbadia marsigorgor di dirimuna.” (1 Tes. 5:19, surat na di toru.) Dipatudos si Paulus do tondi parbadia songon api na marsigorgor di diritta. Molo adong tondi parbadia ni Debata di hita, gabe semangat ma hita mangulahon na sittong jala ringgas marhobas tu Jahowa. (Rom 12:11) Attong aha do na boi taulahon asa tadapot tondi parbadia i? Martangiang ma hita mangido tondi parbadia, taparsiajari ma Hata ni Debata, jala tadukung ma organisasi ni Debata na diarahon tondi parbadia. Molo taulahon i, gabe diurupi ma hita patuduhon “parbue ni tondi parbadia”.​—Gal. 5:22, 23.

14. Aha do na ikkon taulahon asa torus dilehon Debata tondi parbadiana tu hita? (Ida gambar.)

¹⁴ Dung tajalo tondi parbadia ni Debata, ikkon manat do hita asa ‘unang taabbati tondi parbadia marsigorgor di diritta’. Dilehon Debata do tondi parbadiana holan tu akka halak na manjaga pikkiran dohot pangalaho toktong badia. Dang torus dilehon Ibana i tu hita molo tapikkirhon manang taulahon na so badia. (1 Tes. 4:7, 8) Asing ni i, asa boi tajalo tondi parbadia, ‘unang ma leas rohatta tu surirang’. (1 Tes. 5:20, surat na di toru) Hata “surirang” di ayat on i ma Hata ni Debata na dilehon tu hita marhite tondi parbadiana, termasuk ma i taringot ari ni Jahowa na lam jonok. Unang ma tapikkir molo ari ni Jahowa manang Armagedon dang na lao masa di tikkitta. Alai taingot ma nungnga jonok be ari i. Alani i ikkon ‘marsitutu do hita manomba Debata’ jala toktong ma ‘badia pangalahotta’ ganup ari.​—2 Ptr. 3:11, 12.

15. Songon dia do carana asa unang tartipu tu barita na sian Sibolis? (1 Tessalonik 5:21)

¹⁵ Satokkin nai lao diumumhon akka musu ni Debata ma, “Dame do sude jala dang adong be sihabiaran!” (1 Tes. 5:3) Dibahen Sibolis dohot akka suru-suruan na jahat do gabus lao mangaliluhon godang jolma. (Pgk. 16:13, 14) Alai boha do molo hita? Unang ma tartipu hita disi, gariada ‘tauji ma sasude’. (Jaha 1 Tessalonik 5:21.) Hata Junani “uji” di ayat on dipakke lao manggombarhon cara ni sasahalak manguji mas dohot perak lao mamastihon keaslianna. Alani i, porlu do hita manguji aha na tabege dohot na tajaha lao mamastihon sittong do i manang na dang. Massai penting do on tu akka halak na di huria Tessalonik najolo, jala lam penting do sipasingot i tu hita ala nungnga lam jonok hasusaan bolon i. Unang ma pittor porsea hita tu sude hata ni halak. Alai tapakke ma kesanggupan marpikkirta lao mambandingkon aha na tajaha dohot na tabege tu na nidok ni Bibel dohot organisasi ni Jahowa. Molo taulahon i, dang na lao tartipu hita tu gabus ni Sibolis.​—Poda 14:15; 1 Tim. 4:1.

16. Aha do janji ni Debata na tapaima i, jala aha do tekadta?

¹⁶ Taboto do na dipalua Debata do naposona secara kelompok sian hasusaan bolon. Alai molo hita secara pribadi dang taboto songon dia ngolutta sogot. (Jak. 4:14) Dang soal hita selamat mangalewati hasusaan bolon manang mate sebelum ro i, molo toktong hita setia dapotta do annon upatta i ma hangoluan na salelengna. Tu akka halak na dimiahi, mangolu ma nasida di surgo jala rap mamaretta dohot Kristus. Molo tu biru-biru na asing, mangolu ma nasida salelengna di Paradeiso di tano on. Sai anggiat ma hita torus fokus tu janji ni Debata na luar biasa i jala sai rade ma hita tu ari ni Jahowa!