Piga do Goar ni Debata?

Na didok Bibel

Holan sada do goar ni Debata. Di bahasa Heber, opat huruf ma disuratton goar ni Debata יהוה. Jala molo di bahasa Batak Toba diterjemahon ma i gabe “Jahowa”.a Marhite panurirang Jesaya didok Debata do, “Au do Jahowa, i do goarhu.” (Jesaya 42:8) Di akka manuskrip ni Bibel najolo, adong hira-hira 7.000 hali goar on disuratton. Unggodang ma i dibandingkon gelar ni Debata manang goar ni akka halak na disurat di Bibel.

Akka gelar ni Jahowa

Nang pe holan sada goar ni Debata na disurat di Bibel, alai godang do gelar ni Jahowa. Dipaboa do akka gelar i di tabel on. Jala akka gelar i pe patuduhon sifat ni Jahowa.

Gelar	Ayat	Lapatanna
Allah	(Dang Adong)	Sian Bahasa Arab do hata “Allah”. Dang goar i alai gelar do i, na lapatanna “Tuhan”. Hata “Allah” di Bibel bahasa Arab dohot di bahasa na asing, sarupa do lapatanna tu gelar “Debata”.
Pargogo na So Hatudosan	1 Musa 17:1	Balga situtu do gogo ni Debata. Adong pitu hali disurat di Bibel gelar “Debata Pargogo na So Hatudosan”, na diterjemahon sian bahasa Heber i ma ʼEl Shad·daiʹ.
Alpa dohot Omega	Pangungkapon 1:8; 21:6; 22:13	“Na parjolo dohot na parpudi” manang “mulana dohot ujungna” lapatanna sebelum Debata Jahowa dang adong debata na asing. Jala dukkon Ibana pe dang adong debata na gogona songon Jahowa. (Jesaya 43:10) Alpa dohot Omega i ma huruf na parjolo dohot na parpudi na adong di bahasa Junani.
Naung Adong sian Najolo	Daniel 7:9, 13, 22	Dang marmula Debata jala nungnga adong Ibana sebelum dibahen sude na di alam semesta on. Toktong do Ibana adong saleleng ni lelengna.—Psalmen 90:2.
Sitoppa	Jesaya 40:28	Na manoppa saluhutna.
Ama	Mateus 6:9	Na mangalehon hangoluan.
Debata	1 Musa 1:1	Na disomba jala na marhuaso. Di bahasa Heber gelar on i ma ʼElo·himʹ, patuduhon hasangapon dohot hamuliaon ni Jahowa.
Debata na untimbo sian sude debata na asing	5 Musa 10:17	Debata Natumimbul, dang sarupa Ibana dohot “akka debata na so marguna” na disomba akka halak.—Jesaya 2:8.
Guru na Sangap	Jesaya 30:20, 21	Na mangajar-ajari hita jala na mangalean nasehat na denggan tu hita.—Jesaya 48:17, 18.
Debata na marlas ni roha	1 Timoteus 1:11	Sai marlas ni roha do Debata.—Psalmen 104:31.
Sitangihon tangiang	Psalmen 65:2	Debata do na manangihon tangiang ni sude halak na porsea tu Ibana.
Boi do Au Mambahen Manang Aha pe na Huhalomohon	2 Musa 3:14	Boi do Jahowa gabe manang aha pe lao pasautton lomo ni rohana. On ma sada sian lapatan ni goar ni Jahowa, songon na dipaboa di ayat berikutna.—2 Musa 3:15.
Debata na mangido asa holan Ibana na disomba	2 Musa 34:14	Ibana do Debata na so olo dibahen dos songon na asing.
Raja sisaleleng ni lelengna	Pangungkapon 15:3	Sai toktong do Ibana mamaretta saleleng ni lelengna.
Tuan	Psalmen 135:5	Sian bahasa Heber ʼA·dhohnʹ manang ʼAdho·nimʹ na lapatanna nappuna manang tuan.
Pamimpin ni Akka Tentara, Tuhan Sebaot	Jesaya 1:9; Rom 9:29, Lembaga Alkitab Indonesia	Lapatanna, pamimpin ni akka tentara na di surgo. Gelar “Tuhan Sebaot” dos do lapatanna tu gelar “Jahowa Pamimpin ni Akka Tentara”.—Rom 9:29.
Debata Natumimbul	Psalmen 47:2; Daniel 7:18, 27	Ibana ma parhuaso na paling timbo di alam semesta on.
Debata Nabadia	Poda 9:10	Badia di saluhutna, dang adong na songon Jahowa badiana.
Sitopa Hudon	Jesaya 64:8	Marhak do Debata mamaretta tu jolma dohot tu akka bangso. Dos do Ibana songon sitopa hudon na marhak mambahen tano liat gabe manang aha pe.—Rom 9:20, 21.
Na manobus, Na manuhor	Jesaya 41:14	Pelean tobusan ni Jesus Kristus ma na dibahen Jahowa manobus jala manuhor jolma muse sian dosa dohot hamatean.—Johannes 3:16.
Dolok Batu	Psalmen 18:2, 46	Inganan parlinggoman na aman jala sipalua.
Sipalua	Jesaya 45:21	Diurupi Ibana do hita asa unang marjea jala dipalua do hita sian hamatean.
Siparmahan	Psalmen 23:1	Diparrohahon Ibana do akka naposona.
Tuan Natumimbul	1 Musa 15:2	Sian bahasa Heber ʼAdho·naiʹ na lapatanna huasona ma na paling balga di alam semesta on.

Goar ni akka inganan di Akka Bukku Heber

Dipakke do goar ni Debata gabe goar ni piga-piga inganan na disurat di Bibel. Alai, dang gabe manggattihon goar ni Debata i.

Goar ni inganan	Ayat	Lapatanna
Jahowa-jireh	1 Musa 22:13, 14	“Paradeon ni Jahowa do i.”
Jahowa-nissi	2 Musa 17:15	Jahowa do na gabe “Tiang”. Sai rade do Jahowa marporang lao mangurupi akka naposona.—2 Musa 17:13-16.
Jahowa-syalom	Panguhum 6:23, 24	“Jahowa do Hadameon.”

Boasa ikkon taboto jala tajou goar ni Debata?

Disurat do marribu hali goar ni Jahowa di Bibel. On patuduhon massai rikkot do goarna i di Jahowa.—Maleaki 1:11.
Jotjot do dipaboa Jesus na massai rikkot goar ni Debata. Contohna tikki martangiang ibana didok do, “Sai dipabadia ma goarmu.”—Mateus 6:9; Johannes 17:6.
Molo taboto jala tajou goar ni Jahowa, gabe lam jonok ma hubunganta tu Ibana. (Psalmen 9:10; Maleaki 3:16) Godang do gunana molo jonok hita tu Debata. Didok Jahowa, “Ala dihaholongi ibana Au, paluaokku ma ibana. Jagaokku do ibana, ala ditanda ibana do goarhu.”—Psalmen 91:14.
Bibel mandok, “Adong na digoari akka debata, di banua ginjang manang di tano on, tutu do i, godang do akka ‘debata’ jala godang do akka ‘tuan.’” (1 Korint 8:5, 6) Alai holan sada do Debata na sittong, i ma Debata na margoar Jahowa.—Psalmen 83:18.

a Piga-piga penerjemah bahasa Heber menerjemahon goar ni Debata gabe “Yahweh”.