Pamungka

1, 2. Songon dia do pangkilalaan ni sahalak pengawas wilayah tu angka na marhaporseaon na adong di Bibel, jala boasa las rohanta maraleale dohot angka na marhaporseaon i?

”SONGON na manaringoti alealena do dibahen paboahon hatorangan taringot tu baoa dohot borua na marhaporseaon na adong di Bibel.” Songon i ma didok donganta borua na mambege jamita ni pengawas wilayah naung matua. Nunga marpulu taon pengawas wilayah i marsiajar jala mangajarhon Bibel. Alani i, ndang pola longang be rohanta taringot tusi.

² Las do rohamu maraleale dohot halak na marhaporseaon na dipaboa di Bibel? Boi do tangkas ditanda hamu nasida? Pingkirhon ma songon dia do pangkilalaanta tingki rap mardalan jala mangkatahatai tu si Noak, si Abraham, si Rut, si Elia, dohot si Ester. Pingkirhon ma pangkorhon ni nasida tu parngoluonta. Pingkirhon ma poda ni nasida na patoguhon rohanta!​—Jaha Poda 13:20.

 3. (a) Boasa marlaba molo taparsiajari taringot tu halak na marhaporseaon na adong di Bibel? (b) Aha do sungkunsungkun na laho taalusi?

³ Tontu, dung ”mulak mangolu sogot angka na tigor”, boi ma hita maraleale dohot halak na marhaporseaon i. (Ul. 24:15) Alai saonari pe, tadapot do laba molo taparsiajari taringot tu nasida. Carana? Didok si Paulus, ”Tiru hamu ma angka sitean bagabaga i, marhitehite haporseaon dohot lambas ni roha!” (Heb. 6:12) Laho marsiajar taringot tu halak na marhaporseaon on, taparrohahon ma sungkunsungkun na hombar tu na nidok ni si Paulus i: Aha do haporseaon i, jala boasa i porlu? Songon dia do hita boi maniru halak na marhaporseaon?

 4. Aha do haporseaon i didok godang halak, jala boasa ndang sintong pandapot ni nasida i?

⁴ Haporseaon, i ma parange manang pangalaho na denggan, na pinatudu ni baoa dohot borua na marhaporseaon na dipaboa di buku on. Saonari, godang do halak na so mangantusi lapatan ni haporseaon. Didok nasida, sae do holan porsea sambing. Alai sasintongna ndang songon i. Haporseaon i ndang holan pangkilalaan, manang pos ni roha sambing. Gariada, molo holan porsea sambing boi do parohon jea, alana ndang sae haporseaon sisongon i tu Debata. Bibel mandok, ’Angka sibolis porsea do disi, jala angka dotdot’ tu Debata.​—Jak. 2:19.

5, 6. (a) Adong dua ojahan ni haporseaon, aha ma i? (b) Sadia togu do ojahan ni haporseaonta? Bahen ma tudosan.

⁵ Adong dope na ringkot tapatudu molo hita marhaporseaon. Taparrohahon ma lapatan ni haporseaon songon na dipaboa di Bibel. (Jaha Heber 11:1.) Didok si Paulus, adong dua ojahan ni haporseaon. Na parjolo, marojahan tu ”na so niida”. Ndang boi taida aha na adong di surgo mamangke simalolongta. Umpamana, ndang boi taida Debata Jahowa, Jesus, manang Harajaon ni Debata naung mamarenta di surgo. Na paduahon, haporseaon marojahan tu ”angka sihirimon”, i ma janji ni Debata na laho sipasautonNa. Saonari, ndang boi dope taida paradeiso na laho pasauton ni Harajaon ni Debata. Alai, nang pe ndang taida dope pangkirimon on, dohononta do na so togu ojahan ni haporseaonta taringot i?

⁶ Ndang songon i! Apostel Paulus mandok, togu do ojahan ni haporseaon i. Didok ibana, haporseaon, ”pos ni roha do i”. Dos do lapatan ni on dohot ”sertifikat ni jabu”. Pingkirhon ma sasahalak mangalehon jabu tu hamu. Dilehon ibana ma sertifikat ni jabu i, jala didok, ”Jabum nama on.” Ndang na sertifikat i na laho diingani, alai surat i patuduhon molo jabu i nunga sah gabe jabumuna. Boi ma didok, dos do ringkot manang arga ni sertifikat i tu jabu i. Songon i ma, haporseaon i paposhon rohanta na laho saut do sude janji ni Debata na disurat di Bibel.

 7. Aha do na hombar tu haporseaon na sintong?

⁷ Haporseaon na sintong, hombar do i tu pos ni roha na togu tu Jahowa. Marhite haporseaon, boi ma tahilala molo Debata doshon Ama Parholong tu hita, jala boi do pos rohanta na laho pasautonNa sude janjiNa. Alai, ingkon sai tapatogu do haporseaon i. Dung i, ingkon tapatuduhon marhite parniulaon, asa unang mate.​—Jak. 2:26.

 8. Boasa haporseaon i ringkot?

⁸ Boasa ringkot haporseaon? Bibel paboahon alusna. (Jaha Heber 11:6.) Ndang boi hita jonok tu Jahowa jala pasonangkon rohaNa, molo ndang adong haporseaonta. Alani i, ringkot do haporseaon asa boi hita pasangaphon Jahowa. Pasangaphon Jahowa ma na rumingkot di parngoluon ni sude jolma.

 9. Songon dia do Jahowa patuduhon na tahaporluhon haporseaon?

⁹ Diboto Jahowa do ringkot ni haporseaon di hita. Alani i, dilehon ibana ma sitiruon na boi mangajari hita patuduhon jala patoguhon haporseaon. Diparade do angka baoa na mangaradoti huria. Bibel mandok, ”Tiru hamu ma haporseaonnasida!” (Heb. 13:7) Asing ni i, dipaboa do taringot tu ”torop ni sitindangi”, angka baoa dohot borua na disurat di Bibel, na gabe sitiruon alani haporseaon ni nasida. (Heb. 12:1) Asing ni halak na marhaporseaon na disurat di Heber bindu 11, adong dope angka baoa dohot borua na marhaporseaon dipaboa di Bibel, na poso manang na matua, na gabe sitiruon di hita saonari.

10. Songon dia do parsiajaran Bibel sahalakta mangurupi hita maniru halak na marhaporseaon na dipaboa di Bibel?

¹⁰ Ndang boi tatiru sasahalak molo so tangkas tatanda ibana. Godang do hatorangan na diparade di buku on taringot tu halak na marhaporseaon. Angka hatorangan on mangurupi hita lam mananda baoa dohot borua na marhaporseaon i. Rade do hamu mangalului hatorangan na asing taringot tu nasida? Tingki marsiajar Bibel sahalakmuna, lului ma angka hatorangan sisongon i marhite alat riset. Tingki mangarimangi na pinarsiajaranmuna, pingkirhon ma na masa di tingki i, didia jala aha na mambahen i disurat, dohot pangkilalaan ni halak na dipaboa disi. Molo boi do taantusi pangkilalaannasida, lam tangkas ma nasida tatanda, jala lam jonok ma hita tu nasida, songon na maraleale sian na gelleng.

11, 12. (a) Songon dia do asa lam tangkas mananda si Abraham dohot si Sara? (b) Aha do labana molo tatiru haporseaon ni si Hanna, si Elia dohot si Samuel?

¹¹ Molo tangkas do tatanda halak na marhaporseaon i, taronjar ma rohanta maniru nasida. Umpamana, pingkirhon ma molo adong na laho sitontuhononmu. Ra, disuru hamu pinda tu inganan na mangkaporluhon godang parbarita, manang disuru hamu marbarita mamangke cara na baru, alai ndang songon na dihalomohon rohamuna. Di tingki sisongon i, ingot ma sitiruon sian si Abraham. Rade do ibana dohot si Sara manadingkon parngoluonna na sonang di Ur. Ujungna, dipasupasu Jahowa ma nasida. Molo tatiru do si Abraham dohot si Sara, boi ma lam tangkas tatanda nasida.

¹² Na asing muse, songon dia do pangkilalaanmu molo adong na mambahen hamu marmetmet ni roha, gabe ndang ro be hamu tu parpunguan? Molo dirimangi hamu sitiruon sian si Hanna, na mangadopi sogo ni roha ni si Pininna, boi ma pillitonmu dia na dumenggan jala lam tangkas ma tandaonmu si Hanna. Dung i, molo marmetmet ni roha hita alani hagaleonta, boi ma hita mananda si Elia jala mamboto sitaononna dohot na binahen ni Jahowa patoguhon rohana. Angka na poso na mangadopi angka elaela sian dongan di singkola, boi lam jonok tu si Samuel na manaon elaela sian anak ni si Eli di tabernakel.

13. Na hurang do haporseaonta di adopan ni Jahowa umbahen na tatiru haporseaon ni angka baoa dohot borua na marhaporseaon i? Patorang ma.

¹³ Na hurang do haporseaonta di adopan ni Jahowa umbahen na tatiru haporseaon ni angka baoa dohot borua na marhaporseaon i? Ndang songon i! Taingot ma, di Bibel dijujui do hita maniru halak na marhaporseaon. (1 Kor. 4:16; 11:1; 2 Tes. 3:7, 9) Tarlumobi halak na laho taparsiajari di buku on, ditiru nasida do halak na marhaporseaon, na mangolu di tingki naung salpu. Umpamana, di Pasal 17 sian buku on, dienet si Maria do hata ni si Hanna. On patuduhon, ditiru si Maria do si Hanna. Na umtogu do haporseaon ni si Hanna sian si Maria? Ndang dipaboa! Alai sitiruon sian si Hanna mangurupi si Maria patoguhon haporseaonna tu Jahowa.

14, 15. Aha do na tadapot sian buku on, jala songon dia do hita mamangke i di parngoluonta?

¹⁴ Buku on dibahen laho mangurupi hamu patoguhon haporseaonmuna. Angka pasal di buku on, dibuat sian artikel na adong di seri, ”Tiru ma Haporseaon ni Nasida” na dipabinsar di Menara Pengawal sian taon 2008 dohot 2013. Alai, adong do hatorangan na ditambai. Diparade do angka sungkunsungkun na mangurupi hita mangantusi jala mangulahon i di ngolunta. Godang do dibahen gombar jala diwarnai. Gombar on nunga dipabalga jala lam dipatiur. Adong do muse diparade garis waktu dohot peta. Buku Tiru ma Haporseaon ni Nasida, dipatupa tu parsiajaran Bibel tu sahalakta, panombaon na sasaripe, dohot tu huria. Godang do laba na tadapot molo marsoara hita manjaha buku on.

¹⁵ Anggiat ma buku on boi mangurupi hamu maniru haporseaon ni angka naposo ni Jahowa najolo. Dung i, anggiat ma lam togu haporseaonmu tu Jahowa jala lam jonok tu Ibana!