Patogu ma Haporseaonmu tu Angka Pangkirimon

1, 2. (a) Boasa imbar pangkirimonta dohot pangkirimon ni halak? (b) Aha do na laho taulas di artikel on?

DILEHON Jahowa do tu hita pangkirimon na mansai denggan. Marjanji do Ibana laho pabadiahon goarNa jala pasauthon lomo ni rohaNa di surgo dohot di tano on. (Mat. 6:9, 10) On ma na ringkot tapaimaima. Marjanji do Jahowa laho mangalehon ngolu salelengna tu hita, di surgo manang di tano on. Las situtu do roha mamboto janji i! (Joh. 10:16; 2 Ptr. 3:13) Maimaima do hita laho mangida songon dia Jahowa manogunogu jala mangurupi naposoNa di tingki parpudi on.

² Didok di Bibel, haporseaon, i ma ”pos ni roha” tu pangkirimon. Lapatanna, halak na marhaporseaon, porsea situtu na ingkon saut do janji ni Jahowa. (Heb. 11:1) Godang do halak saonari marpangkirimon, alai ndang pos rohanasida na boi saut pangkirimonna i. Umpamana, sasahalak lomo rohana asa monang marlotre, alai ndang pos rohana na boi ibana monang. Di artikel on, taida ma songon dia hita patoguhon haporseaon tu janji ni Debata. Taulas ma muse songon dia haporseaon na togu mangurupi hita saonari.

 3. Boasa porsea hita na laho saut sude janji ni Debata?

³ Ndang adong na pintor marhaporseaon tingki tubu. Asa boi marhaporseaon, ingkon olo do hita ditogutogu tondi parbadia. (Gal. 5:22) Tondi parbadia mangurupi hita mananda Jahowa. Tingki taboto huaso dohot bisuk ni Jahowa, pos ma rohanta na boi do Ibana pasauthon sude janjiNa. Di adopan ni Jahowa, songon naung saut do janjiNa i tingki didok, ”Nunga saut!” (Jaha Pangungkapon 21:3-6.) Sai dipasaut Jahowa do sude janjiNa. Ibana do Debata ”na bonar”. Alani i, porsea do hita tu sude na dipaboa Ibana taringot tu ari na naeng ro.—5 Mus. 7:9.

 4. Aha do na dihaporseai naposo ni Debata najolo?

⁴ Di Heber bindu 11, dipaboa do goar ni 16 baoa dohot borua na marhaporseaon na togu tu janji ni Jahowa. Didok muse disi taringot halak na mambahen las roha ni Jahowa ala haporseaon ni nasida. (Heb. 11:39) Sude do nasida paimahon ’pinompar’ naung dijanjihon Jahowa. Diboto nasida do, ’pinompar’ on laho mangaripashon sude musu ni Debata jala mambahen tano on gabe paradeiso. (1 Mus. 3:15) Pos do roha ni nasida, na boi Jahowa pahehehon nasida. Tontu, nasida ndang paimahon laho dipahehe tu surgo, alana nasida mate di tingki so ro dope Jesus. (Gal. 3:16) Alai, dipaima nasida do hangoluan salelengna di paradeiso di tano on.—Ps. 37:11; Jes. 26:19; Hos. 13:14.

5, 6. Aha do na dipaima si Abraham dohot keluargana? Songon dia do nasida tongtong marhaporseaon na togu? (Ida gombar di mula ni parsiajaran.)

⁵ Heber 11:13 mandok taringot naposo ni Debata na marhaporseaon, ”Di bagasan haporseaon do mate nasida sude. Ndang sanga dijalo nasida bagabaga i; sian na dao nama ditatap jala dihalashon.” Maimaima do nasida tu tano na imbaru jala dirimangi do songon dia ngolu ni nasida disi. Si Abraham ma sada sian nasida. Didok Jesus, las do roha ni si Abraham ”ala naeng idaonna” ari na naeng ro. (Joh. 8:56) Maimaima do si Sarah, si Isak, si Jakkob, dohot na asing tu Harajaon, ”na pinandean jala na pinauli ni Debata”, na laho mamarenta di tano on.—Heb. 11:8-11.

⁶ Songon dia do si Abraham dohot keluargana tongtong togu marhaporseaon? Sai diparsiajari nasida do taringot tu Jahowa. Mangkatai do Debata tu nasida marhite surusuruan, parnidaan, manang nipi. Marsiajar do nasida sian dongan na umtua manang surat na badia. Ndang hea lupa si Abraham dohot keluargana tu janji ni Debata, jala dirimangi do i. Pos do rohanasida, na pasauton ni Jahowa do janjiNa. Boi ma nasida marsihohot tu Jahowa nang pe godang sitaonon.

 7. Aha do na dilehon Jahowa laho patoguhon haporseaonta, jala aha do na ingkon taulahon?

⁷ Aha do na mangurupi hita togu marhaporseaon? Dilehon Jahowa do Bibel laho mangajari hita taringot tu janjiNa tu ari na naeng ro. Disi, dipaboa Ibana do na ingkon taulahon asa marlas ni roha. Alani i, ringkot do manjaha Bibel ganup ari jala mangihuthon tudutuduna. (Ps. 1:1-3; jaha Ulaon ni Apostel 17:11.) Dilehon Jahowa do hita ”mangan di tingkina” marhite ”naposo haposan jala na marroha”. (Mat. 24:45) Dos songon naposo ni Debata najolo, tajaha jala tarimangi ma taringot janji ni Debata. On mangurupi hita tongtong marsihohot tu Debata jala paimahon HarajaonNa mamarenta di liat portibi on.

 8. Songon dia do tangiang patoguhon haporseaonta?

⁸ Aha do muse na mangurupi naposo ni Debata najolo asa togu marhaporseaon? Martangiang do nasida tu Jahowa. Tingki diboto nasida na dialusi Jahowa tangiangna, lam togu ma haporseaon ni nasida. (Neh. 1:4, 11; Ps. 34:5, 16, 18; Dan. 9:19-21) Suang songon i, tingki taboto na dialusi Jahowa tangiangta jala dilehon na tahaporluhon di tingki na pas, lam togu ma haporseaonta. (Jaha 1 Johannes 5:14, 15.) Porlu do hita tongtong mangido tondi parbadia asa lam togu haporseaonta.—Luk. 11:9, 13.

 9. Taringot tu aha do na ingkon tatangiangkon?

⁹ Tingki martangiang tu Jahowa, unang ma holan mangido na tahaporluhon. Ingkon tapuji jala tadok mauliate ganup ari tu Ibana. Alana, nunga godang angka na denggan na dilehon Jahowa! (Ps. 40:6) Ditangiangkon naposo ni Jahowa do sude dongan sahaporseaonna. Umpamana, taingot do ”angka na tarhurung”. Tatangiangkon do muse ”angka na manguluhon” hita. Tingki taboto na dialusi Jahowa tangiangta, lam togu ma haporseaonta jala lam jonok ma hita tu Ibana.—Heb. 13:3, 7.

10. Aha do na mangurupi pigapiga halak gabe barani jala marsihohot tu Debata?

¹⁰ Di Heber bindu 11, didok apostel Paulus, ’Dijalo angka ina na matena sumuang sian haheheon. Alai na deba disiksa do, so saut malua, asa anggiat taruli di haheheon na dumenggan.’ (Heb. 11:35) Ala marhaporseaon na togu tu haheheon na dijanjihon Debata, adong do na tongtong marsihohot tu Debata nang pe marsitaonon. Diboto nasida, paheheon ni Debata do nasida di ari na naeng ro jala mangolu salelengna di tano on. Rimangi ma taringot si Nabot dohot si Sakaria. Ala mangoloi Debata, didangguri ma nasida sahat tu na mate. (1 Raj. 21:3, 15; 2 Kron. 24:20, 21) Si Daniel didabuhon tu hurungan ni singa, jala angka donganna dipamasuk tu parapian na balga. Di rohanasida, tumagon do mate sian apala manadingkon Jahowa. Porsea situtu do nasida tu Jahowa, na laho lehononNa tondi parbadia jala mangurupi nasida martahan mangadopi sitaonon i.—Dan. 3:16-18, 20, 28; 6:14, 17, 22-24; Heb. 11:33, 34.

11. Aha do sitaonon na diadopi angka panurirang ala haporseaon ni nasida?

¹¹ Godang do panurirang, songon si Mika dohot si Jeremia, na direhei manang dipenjara. Na asing, songon si Elia, ”marpindapinda do nasida songon pangungsi di padang pasir dohot di dolokdolok, maringanan di liangliang dohot di angka lubang di toru ni tano”. Martahan do nasida mangadopi sitaonon jala marsihohot tu Debata, ala pos roha ni nasida tu pangkirimon.—Heb. 11:1, 36-38, Bibel siganup ari; 1 Raj. 18:13; 22:24-27; Jer. 20:1, 2; 28:10, 11; 32:2.

12. Ise do na boi tatiru? Aha do na mangurupi ibana martahan mangadopi sitaonon?

¹² Martahan do Jesus Kristus mangadopi sitaonon na mansai borat jala tongtong marsihohot tu Jahowa. Boasa ibana boi martahan? Didok si Paulus, ’Jesus, na manaonhon siksaan i, singkat ni las ni roha, tohapna i hian, so dietong i hailaon, gabe hundul di siamun ni habangsa ni Debata!’ (Heb. 12:2) Dijujui si Paulus do halak Kristen asa maniru Jesus. (Jaha Heber 12:3.) Songon Jesus, godang do halak Kristen di abad na parjolo mate ala marsihohot tu Jahowa. Si Antipas ma sada sian nasida. (Pgk. 2:13) Nasida nunga mandapot upa sian Jahowa. Alai naposo ni Debata na mangolu andorang so nasida, paimahon upa i dope. (Heb. 11:35) Dung gabe Raja Jesus taon 1914, halak Kristen na miniahan naung mate, dipahehe do tu surgo laho mamarenta angka jolma.—Pgk. 20:4.

13, 14. Aha do sitaonon na diadopi si Rudolf Graichen, jala aha do na mambahen ibana tongtong marsihohot tu Debata?

¹³ Marjuta naposo ni Debata mangihuthon Jesus. Dirimangi nasida do janji ni Debata jala tongtong marsihohot nang pe marsitaonon. Umpamana si Rudolf Graichen, na tubu di Jerman taon 1925. Tingki poso dope ibana, digantung natuatuana do gombar taringot ayat ni Bibel di jabunasida. Didok ibana, ”Sada gombar patuduhon taringot gompul dohot birubiru, anak ni hambing dohot babiat, anak ni lombu dohot singa. Sude mardame jala nasida diuluhon sada dakdanak.” (Jes. 11:6-9) On mangurupi si Rudolf mangarimangi taringot paradeiso jala lam togu ma haporseaonna. Tongtong do ibana marsihohot tu Jahowa nang pe dianiaya Gestapo Nazi dohot Stasi Komunis Jerman Timur.

¹⁴ Martahan do si Rudolf mangadopi sitaonon na asing. Mate ma omakna alani tipus di kamp konsentrasi Ravensbrück. Ditandatangani bapakna ma surat na mandok, ndang olo be ibana gabe Sitindangi Ni Jahowa. Alai, tongtong do togu haporseaon ni si Rudolf. Dung kaluar sian penjara, gabe pengawas wilayah ma ibana. Dohot ma ibana tu Singkola Gilead jala ditugashon tu Cile. Gabe pengawas wilayah do ibana disi. Mangoli ma ibana tu sahalak misionaris na margoar si Patsy. Dung sataon, mate ma borunasida na posoposo dope. Mate ma si Patsy tingki marumur 43 taon. Alai, nang pe godang sitaononna, tongtong do si Rudolf manomba Jahowa. Nang pe nunga matua jala hurang sehat, gabe perintis biasa jala sintua do ibana. Boi tajaha pengalamanna di Menara Pengawal 1 Agustus 1997, halaman 20-25.^[1] (Ida catatan.)

15. Paboa ma taringot angka donganta na marlas ni roha manomba Jahowa saonari nang pe mangadopi sitaonon.

¹⁵ Saonari, godang do donganta na tongtong marlas ni roha manomba Jahowa nang pe godang sitaonon. Ala ndang olo dohot marporang, marratus donganta dipenjara di Eritrea, Singapura, dohot Korea Selatan. (Mat. 26:52) Umpamana, si Isaac, si Negede, dohot si Paulos, nunga dipenjara di Eritrea lobi sian 20 taon! Kejam do dibahen tu nasida. Alani i, gabe ndang boi nasida marhasohotan dohot mangurus natuatuana. Alai, marsihohot do nasida tu Jahowa jala marhaporseaon na togu. Saonari, diargai na manjaga penjara i do nasida. Adong do gombar ni nasida di jw.org. Mengkel do nasida nang pe marsitaonon.

16. Aha do na boi diulahon hamu molo togu haporseaonmu?

¹⁶ Ndang sude naposo ni Jahowa dipenjara manang dianiaya songon angka donganta naung taulas. Alai, godang do na marsitaonon alani bencana alam, hapogoson, manang porang. Adong do na mangihuthon sitiruon sian si Abraham, si Isak, si Jakkob, dohot si Musa, na manadingkon hasangapon dohot hamoraon asa tongtong manomba Jahowa. Aha do na mambahen donganta tongtong marlas ni roha manomba Jahowa? Holong dohot haporseaon ni nasida na togu tu Jahowa. Diboto nasida, pasupasuon ni Jahowa ma sude naposoNa jala dilehon ngolu salelengna di tano na imbaru.—Jaha Psalmen 37:5, 7, 9, 29.

17. Songon dia do hamu patoguhon haporseaon, jala aha do na laho taulas di artikel na mangihut?

¹⁷ Di artikel on, nunga taboto songon dia haporseaon mambahen pos rohanta tu pangkirimon. Asa boi marhaporseaon, martangiang jala rimangi ma janji ni Jahowa. Boi ma hita martahan mangadopi godang sitaonon. Di artikel na mangihut, taulas ma lapatan ni marhaporseaon.