Songon dia do Bebas na Dihalomohon Debata?

1, 2. (a) Aha do na dibahen halak asa boi bebas? (b) Aha do hasilna?

ANGKA halak saonari ndang lomo rohana dipaimbarimbar, jala naeng ma nian ndang susa be nasida. Na asing, lomo do rohana asa bebas mandok hata, bebas mamillit, jala lomona ma manontuhon songon dia ngoluna. Sude do halak naeng bebas.

² I do alana godang do halak na demon manang mangalo tu pamarenta. Alai, tutu do boi gabe bebas nasida? Ndang. Gariada, lam susa do nasida jala adong do na gabe mate alani i. Tutu do na didok di Parjamita 8:9, “Jolma mangarajai donganna jolma mambahen ibana marhinamago.”

 3. Aha do na ingkon taulahon asa boi marlas ni roha situtu hita?

³ Dipaboa do di Bibel songon dia carana asa boi marlas ni roha situtu. Apostel Jakkobus mandok, “Alai na mamereng torus tu bagasan uhum haluaon na sun denggan i jala mian disi, i ma na martua marhite sian pangulaonna i.” (Jak. 1:25) Jadi sian Jahowa do uhum na sun denggan i. Diboto Ibana do aha na tahaporluhon asa boi hita marlas ni roha. Asa marlas ni roha, bebas do si Adam dohot si Hawa dibahen Jahowa.

 4. Songon dia do parngoluon ni si Adam dohot si Hawa? (Ida ma gombar di mula ni parsiajaran.)

⁴ Molo tajaha buku 1 Musa bindu 1 dohot 2, taboto ma, bebas do si Adam dohot si Hawa di mulana. Ndang adong halak na hea mangkilala songon na dihilala nasida. Adong do sude na dihaporluhon. Ndang porlu nasida holsoan tu manang aha pe. Jala ndang adong sahit dohot hamatean. (1 Mus. 1:27-29; 2:8, 9, 15) Alai, bebas na songon dia do? Na gabe so adong do aturanna? Taida ma.

 5. Molo naeng bebas, aha do na porlu?

⁵ Dirimpu godang halak do molo bebas i lapatanna lomolomona mangulahon manang aha pe, jala ndang pola dipingkiri aha pangkorhonna. The World Book Encyclopedia mandok molo bebas lapatanna i ma “mambahen haputusan, jala ingkon manean hasilna”. Lapatan na asing sian hata i, boi halak bebas molo dibahen pamarenta aturan na masuk angkal jala boi diulahon. Jadi, molo naeng bebas, porlu do adong aturanna. Alai, ise do na boi manontuhon aturan na masuk angkal i?

 6. (a) Boasa holan Jahowa na so porlu batasan? (b) Alai bebas na songon dia do molo di jolma, jala boasa?

⁶ Taingot ma, holan Jahowa do na so porlu batasan laho mangulahon sangkapNa. Ala Ibana do na manompa saluhutna. (1 Tim. 1:17; Pgk. 4:11) Dipatorang Raja Daud do songon dia hasangapon dohot huasoNa. (Jaha 1 Kronika 29:11, 12.) Alai, imbar do molo angka na tinompaNa. Adong do aturan na dibahen tu saluhut tompaanNa na di surgo nang di tano on. Lomo do rohaNa asa taantusi, holan Ibana do na boi manontuhon aturan na tigor jala masuk angkal. Jadi sian mulana, dibahen Jahowa do aturan tu angka tinompaNa.

 7. Aha do pigapiga aturan na mambahen hita marlas ni roha?

⁷ Nang pe bebas si Adam dohot si Hawa, alai adong do aturan na ingkon diihuthon nasida. Pigapiga aturan i nunga gabe hasomalan ni nasida ganup ari. Umpamana, marhosa, mangan, dohot modom. Gabe ndang bebas do nasida alani i? Tontu daong. Gariada, las do roha ni nasida mangulahon i. (Ps. 104:14, 15; Pjm. 3:12, 13) Songon hita ma, tabo do pangkilalaanta molo tahirup udara na segar, mangan, jala modom di tingki borngin. Las do rohanta mangulahon i. Nasida pe songon i do.

 8. Aha do parenta na dilehon Debata tu si Adam dohot si Hawa, jala boasa?

⁸ Dilehon Jahowa do parenta tu si Adam dohot si Hawa asa marpinompari, manggohi tano on, jala manjaga i sude. (1 Mus. 1:28) Gabe so bebas do nasida alani parenta i? Ndang songon i! Gariada, alani parenta i, gabe boi ma nasida mambahen saluhut tano on gabe paradeiso, jala mangolu salelengna dohot angka pinomparna. On do sasintongna sangkap ni Debata. (Jes. 45:18) Saonari on, adong do na mamillit ndang marhasohotan manang marianakhon. Na so mangoloi parenta ni Debata do nasida? Ndang songon i. Alai adong do na mamillit laho marhasohotan jala marianakhon, nang pe diboto nasida gabe gumodang ma annon na laho diurus. (1 Kor. 7:36-38) Boasa? Ala dirimpu nasida gabe las do roha molo marhasohotan jala marianakhon. (Ps. 127:3) Jadi molo dioloi si Adam dohot si Hawa hian Jahowa, tontu boi do tongtong denggan rumatangga ni nasida, jala marlas ni roha.

 9. Boasa masuk di angkal parenta ni Debata na disurat di 1 Musa 2:17?

⁹ Adong do parenta na asing na dilehon tu si Adam dohot si Hawa. Jala dipaboa do aha na masa molo ndang dioloi nasida parenta i. Didok Ibana: “Alai anggo sian hau parbinotoan ni na denggan dohot na roa, ndang jadi panganonmu; ai sadari dipangan ho sian i, sai na mate do ho.” (1 Mus. 2:17) Na so masuk di angkal do parenta on? Gabe ndang bebas do nasida alani i? Ndang songon i. Godang pakar ni Bibel na marpandapot molo parenta on mansai denggan jala masuk di angkal. Sada sian nasida mandok molo parenta i patuduhon “holan Debata do na mamboto dia na denggan dohot na so denggan tu jolma. Asa boi mandapot na denggan, ingkon porsea do jolma i tu Debata jala unduk tu Ibana. Alai, molo ndang porsea nasida tu Debata, gabe nasida sandiri ma na manontuhon i”. Maol situtu do i di jolma.

10. Boasa bebas ndang sarupa lapatanna tu manontuhon dia na denggan dohot na sala?

¹⁰ Dirimpu godangan halak do ndang bebas si Adam dohot si Hawa mamillit na dihalomohon rohana. Alai taingot ma, bebas ndang sarupa lapatanna tu manontuhon dia na denggan dohot na so denggan. Lomo ni nasida do unduk manang ndang. Alai, marhite “hau parbinotoan ni na denggan dohot na roa”, taboto ma holan Jahowa do na boi manontuhon dia na denggan dohot na so denggan. (1 Mus. 2:9) Ndang boi tapastihon aha do hasil ni haputusan na tabahen, atik na denggan do manang ndang. Jotjot do taida halak na naeng mambahen haputusan na denggan, hape gabe susa do nasida. (Poda 14:12) Jadi, porlu do adong aturan di jolma. Alani i do umbahen dilehon parenta tu si Adam dohot si Hawa, asa dapot nasida las ni roha molo unduk. Alai, aha do na dipillit nasida?

11, 12. Boasa haputusan ni si Adam dohot si Hawa i gabe parohon jea? Paboa ma sada tudosan.

¹¹ Ndang unduk si Adam dohot si Hawa. Ditangihon si Hawa do hata ni Sibolis, na mandok, “Tonggor ma matamuna, gabe doshon Debata hamu umboto na denggan dohot na roa.” (1 Mus. 3:5) Aha do hasilna, gabe bebas do? Ndang. Gariada, gabe marjea do nasida ala ndang unduk tu Jahowa. (1 Mus. 3:16-19) Ala sian mulana, ndang ditompa jolma asa bebas manontuhon dia na denggan dohot na so denggan.​—Jaha Poda 20:24; Jeremia 10:23.

¹² Dos do on songon aturan lalu lintas. Tarimangi ma molo adong supir na so olo mangihuthon aturan lalu lintas. Gasagasaon marmotor jala lomolomona di dalan. Aha ma boi masa? Boi do marlanggar ibana manang hona langgar halak. Dos songon i ma si Adam dohot si Hawa. Holan mangasahon pingkiranna sandiri, jala ndang mangihuthon tudutudu sian Jahowa. Aha do hasilna? Gabe mardosa jala mate ma nasida, songon i nang pinomparna. (Rom 5:12) Gabe ndang bebas be nasida jala ndang marlas ni roha.

13, 14. Songon dia hita boi bebas hombar tu na dihalomohon Debata?

¹³ Dipingkir pigapiga halak, dumenggan do molo ndang pola adong aturan. Toho do i? Nang pe lomo rohanta bebas, alai tabayangkon ma molo so adong aturan di portibi on. The World Book Encyclopedia mandok, ingkon dipingkirhon pamarenta do songon dia asa bebas rayatna, alai ingkon dibahen do aturan asa unang gabe lomolomo ni rayatna. Tutu, ndang mura nasida mambahen aturan. I do alana gabe godang ma dibahen aturan, jala porlu do pengacara dohot hakim laho patorangkon aturan i.

¹⁴ Dipatorang Jesus do songon dia carana bebas hombar tu na dihalomohon Jahowa. Ibana mandok, “Molo mian hamu di bagasan hatangku, sintong ma hamu siseanku. Dung i tandaonmuna ma na sintong i, jala paluaon ni na sintong i ma hamu.” (Joh. 8:31, 32) Jadi, asa boi hita bebas hombar tu na dihalomohon ni Debata, adong do na ingkon taulahon. Na parjolo, tajangkon ma hasintongan na diajarhon Jesus. Na paduahon, ingkon gabe sisean ni Jesus do hita. Molo taulahon i, boi ma tadapot i. Alai, bebas sian aha do? Jesus mandok, “Hatoban ni dosa do ganup na mangula dosa. Molo dipalua Anak i hamu, na malua situtu ma hamu.”​—Joh. 8:34, 36.

15. Boasa holan bebas na dijanjihon Jesus i do na boi mambahen hita “malua situtu”?

¹⁵ Bebas na didok Jesus dison, dao do on umdenggan sian bebas na dihirim ni angka halak. Didok ibana, “Molo dipalua Anak i hamu, na malua situtu ma hamu.” Haluaon sian dosa do na ditaringoti Jesus disi. I do na mamparhatoban sude jolma sian najolo. Ala mardosa hita, gabe maol do hita mangulahon na denggan. I do na mambahen hita gabe marsak, susa, jala ujungna mate ma hita. (Rom 6:23) Songon si Paulus marsak do ibana ala gabe hatoban ni dosa. (Jaha Rom 7:21-25.) Molo dung disesa dosanta, gabe boi ma hita bebas jala marlas ni roha songon si Adam dohot si Hawa najolo.

16. Songon dia hita asa mandapot haluaon?

¹⁶ Didok Jesus, “Molo mian hamu di bagasan hatangku.” On lapatanna, molo olo hita mandapot haluaon i, adong do na ingkon taulahon. Aha ma i? Molo nunga tardidi hita, ingkon talehon do saluhut ngolunta jala taihuthon ma aturan na dilehon Jesus tu angka siseanna. (Mat. 16:24) Jadi alani tobusan i, gabe boi ma tadapot haluaon di ari na naeng ro.

17. (a) Songon dia carana asa tadapot las ni roha situtu? (b) Aha do na laho taulas di parsiajaran na mangihut?

¹⁷ Asa boi marlas ni roha situtu, taihuthon ma angka poda na diajarhon Jesus. Molo taihuthon i, boi do dapotta haluaon sian dosa dohot hamatean. (Jaha Rom 8:1, 2, 20, 21.) Di parsiajaran na mangihut, taulas ma songon dia hita bebas alai boi pasangaphon Jahowa salelengna.