Songon dia do Hita Patuduhon Holong tu Jahowa?

1, 2. Songon dia do Jahowa mangajari hita isara mangkaholongi Ibana?

INGKON gabe sitiruon do sada ama di keluarga asa denggan ibana mangajari ianakhonna. Tingki dipatudu ama i holongna tu ianakhonna, diajari ibana ma ianakhonna isara mangkaholongi. Alai ndang adong na humolong tu hita asing ni Debata. Marsiajar ma hita isara mangkaholongi ”ala Ibana jumolo mangkaholongi hita.”​—1 Johannes 4:19.

² Songon dia do Jahowa patuduhon molo ”Ibana jumolo mangkaholongi hita”? Didok do di Bibel, ”Uju pardosa dope hita, ai disi do mate Kristus humongkop hita.” (Rom 5:8) Debata Jahowa mangalehon AnakNa gabe tobusan asa malua hita sian dosa dohot hamatean. Marhite tobusan maraleale ma hita tu Jahowa jala tapatudu holong tu Ibana. Dipatudu Jahowa do tiruan tu hita, tingki dilehon AnakNa gabe tobusan. Diajari do hita asa marroha na burju jala ndang mangkaringkothon diri sandiri.​—1 Johannes 4:10.

3, 4. Songon dia do hita patuduhon holong tu Jahowa?

³ Parange ni Debata na umbalga, i ma holong. Alani i, taantusi ma boasa Jesus mandok molo parenta na rumingkot, i ma, ”Haholonganmu do Tuhan Debatam sian nasa ateatem, sian nasa hosam, sian nasa roham dohot sian nasa gogom!” (Markus 12:30) Dihalomohon Jahowa do asa tahaholongi Ibana sian nasa roha. Hansit do roha ni Jahowa molo humolong rohanta tu na asing sian Ibana. Alai, unang ma holan hata na tahaholongi Ibana. Dipangido Jahowa do asa tahaholongi Ibana sian nasa roha dohot sian nasa gogonta. Lapatanna, tahaholongi ma Jahowa sian pingkiran dohot parniulaonta.​—Jaha Mika 6:8.

⁴ Talehon ma dirinta dohot sude na adong di hita laho patuduhon holong tu Jahowa. Molo tapatujolo Debata di ngolunta, on patuduhon tahaholongi Ibana. Di minggu naung salpu, nunga taulas opat isara, songon dia Jahowa patuduhon holongNa tu jolma. Parrohahon ma songon dia asa lam bagas holongta tu Jahowa. Jala songon dia patuduhon holong tu Debata.

 5. Tingki tarimangi holong ni Jahowa, aha ma na taulahon tu Ibana?

⁵ Tingki adong mangalehon hadiah tu hita, tadok ma mauliate tu ibana jala tapangke ma. Si Jakobus manurat, ”Saluhutna silehonlehon na denggan, nasa ulibasa na mauliutus, i ma na ro sian ginjang, sian Ama ni na tiur, na so olo muba, na so umboto agia halinu ni hamimimbar.” (Jakobus 1:17) Mandok mauliate do hita tu Jahowa ala dilehon sude na porlu asa mangolu jala marlas ni roha hita. Ala holong do roha ni Jahowa tu hita, tapatudu ma na holong rohanta tu Ibana. Songon i do pangkilalaanmuna?

 6. Aha do diulahon halak Israel asa tongtong dipasupasu Jahowa?

⁶ Godang na denggan dijalo halak Israel sian Jahowa. Marratus taon ma lelengna, Jahowa manogunogu marhite patik jala diparade do sude na porlu tu nasida. (5 Musa 4:7, 8) Dioloi halak Israel do patik, patuduhon pangargaion tu Jahowa. Umpamana, tingki mambahen pelean tu Jahowa, dilehon nasida do ”patumonaan” manang na dumenggan sian suansuananna. (2 Musa 23:19) Molo tongtong dioloi nasida patik ni Debata jala dilehon pelean na dumenggan, sai pasupasuon ni Jahowa ma nasida.​—Jaha 5 Musa 8:7-11.

 7. Songon dia do hita mangalehon na dumenggan laho patuduhon holong tu Jahowa?

⁷ Molo talehon na dumenggan sian sude na adong di hita, on patuduhon na tahaholongi do Jahowa. (Poda 3:9) Tapangke ma sude na adong di hita pasangaphon Debata. Umpamana, talehon ma silehonlehon laho pajongjongkon dohot mangaradoti inganan parpunguanta di liat portibi on. Otik manang godang na talehon, hita mangalehon aha na adong di hita na patuduhon holong tu Jahowa. (2 Korint 8:12) Alai, adong isara na asing laho patuduhon holong tu Jahowa.

8, 9. Aha do isara na asing patuduhon holong tu Jahowa? Aha do na diulahon si Mike dohot keluargana?

⁸ Jesus mangajari hita asa jumolo mangalului Harajaon ni Debata. Unang ma mabiar hita taringot aha na ringkot di ngolunta, songon sipanganon dohot pahean. Marjanji do Jahowa mangalehon aha na ringkot tu hita. (Mateus 6:31-33) Pos do rohanta tu Jahowa jala ndang margabus Ibana tu janjiNa. Porsea do hita tu sasahalak molo tahaholongi ibana. Sasintongna, molo lam pos rohanta tu Jahowa, lam holong ma rohanta tu Ibana. (Psalmen 143:8) Tasungkun ma dirinta, ”Hupangke do tingki dohot gogongku tu Jahowa? Hupangasahon do pangurupion ni Jahowa ganup ari?”

⁹ Si Mike dohot keluargana marpos ni roha tu Jahowa. Sian na poso si Mike sahat tu na adong dua ianakhonna, lomo do rohana marbarita di negara na asing. Tingki dijaha si Mike dohot keluargana pengalaman ni angka dongan na marbarita di inganan na mangkaporluhon parbarita, dibahen nasida ma hamubaon di ngoluna. Digadis nasida ma jabuna dung i, diingani nasida ma jabu na gumelleng. Diorui si Mike ma bisnisna asa boi diurus mamangke internet sian negara na asing. Ujungna, laho ma nasida tu negara na asing jala las rohana marbarita disi. Si Mike mandok, ”Huhilala hami ma na sintong do hata ni Jesus di Mateus 6:33.”

10. Songon Raja Daud, boasa ringkot mangarimangi na taparsiajari?

¹⁰ Raja Daud manurat, ”Angka langit do mamaritahon hamuliaon ni Debata, jala jadijadian ni tanganna do pinaboa ni na ratarata ni langit.” Didok muse, ”Sun denggan do patik ni Jahowa, tau sipasabam roha; sintong do panindangion ni Jahowa, dipabisuk do na tobok marroha.” Huhut dirimangi si Daud patik dohot na tinompa ni Debata, lam solhot ma ibana jala taronjar ma rohana patuduhon holong tu Jahowa. Si Daud mandok, ”On pe, sai lomo ma roham di angka hata ni pamanganki dohot di pangkataion ni rohangki tu jolo ni bohim, ale Jahowa, partanobatoanku dohot siluluhon ahu.”​—Psalmen 19:2, 8, 15.

11. Songon dia do hita mamangke parbinotoan patuduhon holong tu Jahowa? (Ida gombar di mula ni parsiajaran.)

¹¹ Diajari Jahowa do hita taringot diriNa, sangkapNa, na tinompaNa, dohot patikNa. Dijujui portibi on do angka jolma marsingkola na timbo, alai on mambahen nasida dao sian Debata. Lomo do roha ni Debata asa marbisuk hita, ndang holan marparbinotoan. Lomo roha ni Debata tapangke parbinotoan i tu ngolunta dohot mangurupi na asing. (Poda 4:5-7) Umpamana, lomo do roha ni Debata asa tabaritahon ”hasintongan” tu jolma jala taurupi nasida asa malua. (1 Timoteus 2:4) Molo tabaritahon Harajaon ni Debata dohot sangkapNa tu jolma, tapatudu ma holong tu Jahowa dohot tu jolma.​—Jaha Psalmen 66:16, 17.

12. Aha do didok sahalak na poso tu silehonlehon ni Jahowa?

¹² Angka na poso ringkot mangarimangi na dilehon dohot na diajarhon ni Jahowa tu nasida. Tingki marumur 11 taon si Shannon, diihuthon ibana ma parpunguan bolon rap dohot anggina, marumur 10 taon. Saleleng Parpunguan Bolon Sitoluari, na martema ”Pengabdian yang Saleh” sude na poso ditogihon asa hundul di bagian khusus. Mulana, taroktokon do si Shannon, alai dung dilehon tu nasida buku Pertanyaan Kaum Muda—Jawaban yang Praktis las ma rohana. Didok ibana ma, ”Gabe huhilala, na tangkas do adong Jahowa, jala dihaholongi do ahu. Las rohangku ala dilehon Jahowa do silehonlehon na umarga tu hita!”

13, 14. Aha do na taulahon molo dipinsang Jahowa hita, jala boasa?

¹³ Disurat do di Bibel, ”Ai matua dipinsang Jahowa do na hinaholonganna, songon amaama mida anakna hasudungan ni rohana.” (Poda 3:12) Molo tajangkon pinsangpinsang ni Jahowa jala taloas Ibana mangajari hita, taulahon ma na sintong jala dame ma rohanta. ”Nasa paminsangon tutu, anggo di hamamasana, ndada las ni roha i hilalaon, tung arsak do.” (Heber 12:11) Aha do na taulahon molo dipinsang Jahowa hita? Tajangkon ma pinsangpinsang ni Jahowa, jala unang ma hansit rohanta. Molo tahaholongi do Jahowa, tatangihon ma Ibana, jala tabahen ma hamubaon.

¹⁴ Di tingki ni si Maleaki, godang halak Jahudi ndang manangihon Jahowa. Dilehon nasida do pelean na so dihalomohon Jahowa. Alani i, dipasingot Jahowa ma nasida. (Jaha Maleaki 1:12, 13.) Nunga jotjot dipasingot Jahowa nasida, alai ndang ditangihon. Didok Debata ma, ”Tongosonku ma bura tu tongatongamuna, jala toruanku ma pasupasu na tu hamu.” (Maleaki 2:1, 2) Molo ndang taargai jala ndang tajangkon pinsangpinsang ni Jahowa, sega ma paralealeonta tu Ibana.

15. Pingkiran na songon dia do na ingkon tapasiding?

¹⁵ Portibi na dirajai Sibolis, manjujui halak mangkaholongi diri sandiri. Godang do halak ndang lomo rohana dipinsang, manang dipaboa aha na ingkon ulahononna. Adong do na manangihon ala porlu di nasida. Ndang boi hita songon i. Bibel mandok, ”Unang gabe sarombang hamu dohot portibi on.” Ingkon taboto do aha pangidoan ni Debata sian hita. (Rom 12:2) Marhite organisasi, dilehon Debata do sipasingot na pas di tingkina. Umpamana, dipaingot do hita taringot na mardongandongan, rekreasi dohot mamillit aleale. Molo tajangkon pinsangpinsang ni Jahowa, jala taulahon lomo ni rohaNa, on patuduhon na taargai jala tahaholongi Ibana.​—Johannes 14:31; Rom 6:17.

16, 17. (a) Boasa ingkon tasungkun Jahowa andorang mambahen haputusan? (b) Aha do na diulahon halak Israel?

¹⁶ Diasahon dakdanak do natuatuana laho mangurupi dohot mangalinggomi nasida. Angka na poso pe, dipangido do pangurupion sian natuatuana. Nang pe sahalak na poso boi mambahen haputusan tu dirina, alai diboto nasida do natuatua boi mangalehon sipasingot na denggan. Songon i ma nang Jahowa, dipaloas do hita mambahen haputusan sandiri. Molo holong rohanta jala pos rohanta tu Debata, tapangido ma pangurupionNa jala talului lomo ni rohaNa. Molo tapangasahon Jahowa, lehononNa ma tondi parbadia mangurupi hita mangulahon na sintong.​—Pilippi 2:13.

¹⁷ Di tingki ni si Samuel, ditaluhon halak Palistim do halak Israel. Ala ndang disungkun nasida tu Jahowa aha na laho diulahon. Didok nasida ma, ”Beta ma, itaalap ma sian Silo poti parpadanan ni Jahowa, asa ro Ibana tu tongatonganta, asa dipalua hita sian tangan ni musunta!” Aha ma na masa? ”Hataluan na bolon situtu do i, marragean do sian Israel tolupulu ribu parangan angka na mardalan pat.” (1 Samuel 4:2-4, 10, 11) Dirimpu halak Israel do molo diboan poti parpadanan i, diurupi jala diondingi Jahowa nasida. Ndang disungkun nasida Jahowa jala ndang diulahon lomo ni rohaNa. Alai, diulahon halak Israel do aha na sintong di rohana sandiri, na mambahen susa nasida.​—Jaha Poda 14:12.

18. Aha do diajarhon Bibel tu hita taringot marpos ni roha tu Jahowa?

¹⁸ Dihaholongi jala dipangasahon panurat Psalmen do Jahowa. Didok ma, ”Haposi ma Debata, ai sai na pujionku dope Ibana, hatuaon ni bohingku jala Debatangku. Tungki do rohangku di bagasan, dibahen i marningot do ahu di Ho.” (Psalmen 42:6, 7) Songon i do pangkilalaanmuna? Pos do rohamu tu Jahowa? Ra, porlu dope hita marsiajar asa lam pos rohanta tu Jahowa. Didok do di Bibel, ”Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri. Sai Ibana ma tanda di nasa dalanmu, asa Ibana patigor angka dalanmu.”​—Poda 3:5, 6.

19. Songon dia do hita patuduhon holong tu Jahowa?

¹⁹ Diajarhon Jahowa do songon dia mangkaholongi Ibana, ala Ibana do parjolo patuduhon holong tu hita. Tarimangi ma sude naung dilehon Debata tu hita, na patuduhon holongNa. Alani i, tapatudu ma holong tu Ibana sian nasa ateate, hosa, roha, dohot gogonta.​—Markus 12:30.