Referensi tu Parpunguan Hangoluan dohot Pangkobasion na Laho Diparsiajari
© 2025 Watch Tower Bible and Tract Society of Pennsylvania
2-8 MARET
ARTA NA ARGA NA ADONG DI BIBEL | JESAYA 41-42
“Unang Ho Mabiar”
Tetap ma Andalhon Jahowa asa Tarapul Rohatta
13 Marjanji do Jahowa lao mambebasson halak Jahudi na ditawan di Babel. Alai diboto Jahowa, maol do annon situasi ni nasida andorang so dibebasson. Nungnga dipaboa Jahowa hian, na lao adong sahalak raja na menyerang jala menguasai akka bangso di sakaliling ni Babel, jala lao ditaluhon ibana do tong Kota Babel. (Jes. 41:2-5) Alai porlu do halak Jahudi i mabiar? Piga-piga taon sebelumna nungnga dipapos Jahowa roha ni akka naposona. Didok ibana, “Unang ho mabiar, ai hudongani do ho. Unang ganggu roham, ai Au do Debatam.” (Jaha Jesaya 41:10-13.) Aha do maksud ni Jahowa tikki didok Ibana “Au do Debatam”? Jahowa dang na paingotton halak Jahudi asa manomba Ibana, alana nungnga diboto nasida i. Alai dipaingot Jahowa do na didongani Ibana do nasida, jala lao urupanna do nasida.—Ps. 118:6.
ijwbv artikel 5 ¶4-7
Jesaya 41:10—“Unang Ho Mabiar, ai Hudongani do Ho”
“Hudongani do ho.” Dipaingot Jahowa do akka naposona asa unang mabiar nasida. Alana dang hea dipasombu Ibana nasida. Diboto Jahowa do aha na masa tu nasida jala ditangihon Ibana do tangiang ni nasida. Jadi boi dokkonon didongani Jahowa do nasida.—Psalmen 34:15; 1 Petrus 3:12.
“Au do Debatam.” Asa unang mabiar naposona, dipaingot Jahowa do nasida olo do Ibana gabe Debata ni nasida manang aha pe na masa. Gabe pos ma roha ni nasida dang adong na boi mangabbati Jahowa lao mangurupi nasida.—Psalmen 118:6; Rom 8:32; Heber 13:6.
“Jagaokku do ho jala urupanku. Tiopokku do ho gomos marhite tangan kananku na mangulahon na sittong.” Sian hata ni Jahowa on gabe boi ma taboto pasti diurupi Jahowa do naposona. Dang mungkin dipasombu Ibana nasida susa. Songon na dipaboa di ayat nakkin, molo adong sasahalak na madabu pasti ditiop Jahowa do ibana mamakke tangan kananna.—Jesaya 41:13.
Sada cara ni Jahowa lao patoguhon akka naposona, i ma marhite Bibel. (Josua 1:8; Heber 4:12) Di Bibel godang do akka poda na cocok tu akka halak na marsitaonon. Misalna tu akka halak na pogos, na marsahit, manang molo mate halak na dihaholongi nasida. (Poda 2:6, 7) Dilehon Ibana do tong tondi parbadiana tu akka naposona asa unang holan tu sitaonon i pikkiran ni nasida jala boi ma nasida tiur marpikkir.—Jesaya 40:29; Lukas 11:13.
Unang Ho Mabiar, UrupanKu do Ho
Hata ni Jahowa mangapuli rohanta. Rimangi ma janji ni Jahowa tu hita. Ndang didok di ayat i, hita mardalan di siamun ni Jahowa. Molo mardalan hita di siamun ni Jahowa, tanganta hambirang ma na ditiop tangan siamun ni Jahowa. Hape, tangan siamun ni hatigoran ni Jahowa do na maniop tangan siamunta, songon na manogu hita tingki marsitaonon. Tingki ditiop Jahowa tangan siamunta, dipatogu ma hita jala didok, “Unang ho mabiar, ahu do mangurupi ho.”
Dos songon Ama jala Aleale do Jahowa di hamu? Porsea do hamu na urupanNa hamu tingki marsitaonon? Diparrohahon Jahowa do hamu jala lomo rohaNa mangurupi hamu. Tingki marsitaonon, lomo roha ni Jahowa asa unang marsak hamu. Boasa? Ala mansai holong rohaNa tu hamu. Dilehon Ibana do “pangurupion situtu di hagogotan”.—Ps. 46:2.
Arta na Adong di Bibel
w01 1/10 20 ¶3
Songon dia do Halak na Setia i?
Didok Jahowa do tu si Abraham ale-alena, “Au do perisai di ho”. (1 Musa 15:1, surat na di toru; Jesaya 41:8) Dang holan hata Jahowa. Dijaga jala dipalua Jahowa do si Abraham dohot keluargana sian si Firaun dohot si Abimelek. Diurupi Jahowa do si Abraham paluahon si Lot sian opat raja na marsada mangalo ibana. Dibahen Jahowa do si Abraham dohot si Sara gabe boi margelleng, nang pe nga 100 taon umur ni si Abraham jala 90 taon umur ni si Sara. Jotjot do muse Jahowa makkatai tu si Abraham marhite parnidaan, nipi, manang marhite suru-suruan. Dang holan tikki mangolu si Abraham setia Jahowa tu ibana. Alai tetap do Jahowa setia tu si Abraham nang pe naung mate ibana. Buktina saleleng marratus taon digohi Jahowa do janjina tu akka pinoppar ni si Abraham, i ma halak Israel, nang pe jotjot nasida mangalo tu Jahowa. Sian hubungan ni Jahowa dohot si Abraham gabe boi ma taboto songon dia do sasittongna halak na setia, i ma halak na boi patuduhon holong ni rohana marhite pambahenanna.—1 Musa bindu 12 sahat tu 25.
9-15 MARET
ARTA NA ARGA NA ADONG DI BIBEL | JESAYA 43-44
Surirang na Dipasaut Dung Dua Ratus Taon
Sian Bibel do Boi Tadapot Informasi na Sittong
Surirang: Di abad paualuhon SM, nungnga dipaboa si Jesaya na lao ditaluhon do Babel, i ma ibukota ni pamarettaon na marhuaso di tikki i. Jala ujungna dang diingani be kota i. (Jesaya 13:17-20) Dipaboa si Jesaya do goar ni halak na manaluhon kota i, i ma si Sirus. Dipaboa ibana do songon dia cara ni si Sirus manaluhon kota i, i ma marhite pakorikkon sunge. Jala dipaboa ibana na lao tarbukka do akka gerbang ni kota i.—Jesaya 44:27–45:1.
Dipasaut: Hira-hira 200 taon dung disurat si Jesaya surirang i, ro ma raja ni Persia menyerang Babel. Ise do goarna? Si Sirus. Massai timbo do tembok ni kota Babel jala dihaliangi Sunge Euprat do kota i. Alani i, dipapinda si Sirus dohot akka tentarana ma dalan ni aek ni sunge i. Gabe marsik ma sunge i jala boi ma akka tentarana mardalan tu gerbang kota. Na mambahen longang muse, dipasombu halak Babel do tarbukka gerbang ni kota i! Gabe boi ma akka tentara ni si Sirus masuk jala manaluhon kota Babel i.
Rimangi ma Parnidaan ni si Sakaria
MASSAI las do roha ni halak Israel. Dibahen Jahowa do taronjar roha ni Raja Sirus na sian Persia lao paluahon halak Israel naung marpulu taon ditawan di Babel. Dibahen Raja i do pengumuman tu sude halak Jahudi na boi do nasida mulak tu huta ni nasida, lao pajongjokkon muse “jabu ni Jahowa Debata ni Israel”. (Esr. 1:1, 3) Pasti las do roha ni halak i mambege pengumuman i, gabe boi ma nasida muse mulak manomba Jahowa di huta ni nasida di Jerusalem.
Arta na Adong di Bibel
Sukkun-Sukkun sian na Manjaha
Contoh na paduahon, i ma surirang taringot si Sirus. Ibana do na paluahon halak Jahudi sian Babel. Jala ibana do na mamarettahon asa dipajongjong muse bagas joro ni Jahowa. (Jes. 44:26–45:4) Raja Sirus sian Persia do na dipakke Jahowa lao pasautton surirang on. (Esr. 1:1-4) Nang pe songon i, dang sisomba Jahowa si Sirus. On patuduhon dang dipaksa Jahowa si Sirus asa manomba Ibana.—Poda 21:1.
16-22 MARET
ARTA NA ARGA NA ADONG DI BIBEL | JESAYA 45-47
“Au do Debata, jala Dang Adong na Songon Au”
“Sai Dipabadia ma Goarmu”
14 Marsitutu do Sibolis mangulahon manang aha pe asa dang boi Jahowa pasautton lomo ni rohana. Alai dang marhasil Ibana. Di Bibel, dipaboa do akka naung diulahon Jahowa, na patuduhon tutu do Ibana Ama na parholong jala Parhuaso na dumenggan. Tutu, massai haccit do roha ni Jahowa tikki Sibolis dohot na asing dang mangoloi Ibana. (Ps. 78:40) Nang pe songon i, sai dipatudu Jahowa do bisuk, hasabaron, dohot hatigoranna. Jotjot do dipatudu Ibana huasona. Jala na urrikkot, dipatudu Ibana do holongna di sude ulaonna. (1 Joh. 4:8) Jadi, toktong do dipabadia Jahowa goarna.
Toktong ma Setia Nang pe Adong na So Taboto Dope
15 Memang, dang taboto aha na lao masa di ngolutta haduan. Alai taboto, lao lehonon ni Jahowa do tu hita hangoluan na salelengna di surgo manang di tano on. Taboto do muse dang olo Jahowa margabus, jala dang adong na boi mangabbati Ibana pasautton sude janjina. (Tit. 1:2) Holan Ibana do na boi mandok, “Sian mulana nungnga hupaboa hian songon dia ujungna, jala mulai sian najolo nungnga hupaboa akka na so masa dope.” Godang do surirang na dipaboa di Bibel naung saut. Jadi pos ma rohatta, pasti saut do sude surirang na asing taringot ari na naeng ro. (Jes. 46:10) Asing ni i, taboto do dang adong na boi manirang hita sian holong ni Jahowa. (Rom 8:35-39) Pasti lehononna do bisuk, las ni roha, dohot gogo tu hita asa boi hita martahan mangadopi sude na masa di ngolutta. Jadi pos ma rohatta, pasti urupan ni Jahowa do hita jala pasu-pasuonna.—Jer. 17:7, 8.
Surat na Boi Mangurupi Hita Asa Setia Sahat tu Ujungna
13 Sambil paimahon tanda andigan nasida boi lari sian Jerusalem, ikkon dijaga halak Kristen di tikki i do ngolu ni nasida asa tetap sederhana jala dang holan ‘mamikkiri hepeng’. (Jaha Heber 13:5.) Memang piga-piga sian nasida hea do makkilala hasusaan na borat alani haraparon dohot hapogoson. (Heb. 10:32-34) Nang pe marhasil jala martahan nasida mangadopi akka hasusaan alani barita na uli, adong do piga-piga na mulai berupaya mangalului godang hepeng. Didok roha ni nasida, molo godang hepeng ni nasida, boi do i melindungi nasida sian bahaya. Alai taboto do sadia godang pe hepeng ni nasida, dang boi hepeng i mambahen nasida selamat tikki dihancurhon Jerusalem. (Jak. 5:3) Jadi manang ise pe halak Kristen di tikki i na manganggap hepeng dohot arta na uppetting di ngoluna, pasti maol do nasida lari sian Jerusalem jala maninggalhon jabu dohot arta ni nasida.
14 Molo togu haporseaotta jala pos rohatta na lao dihancurhon Jahowa nama portibi na jahat on, pasti dang berupaya be hita lao mangalului godang hepeng manang manganggap hepeng dohot arta gabe na uppetting di ngolutta. Taboto do tikki masa hasusaan bolon i dang marguna be hepeng. Didok di Bibel, ‘Dibolokkon akka halak ma perak ni nasida tu akka dalan.’ Boasa? Ala diboto nasida do “dang boi nasida malua dibahen perak manang mas ni nasida di ari rimas ni Jahowa i”. (Hes. 7:19) Jadi daripada habis tikkitta lao mangalului godang hepeng saonari, tabahen ma sederhana ngolutta. Na penting terpenuhi kebutuhanta dohot kebutuhan ni keluargatta, jala boi hita toktong melayani Jahowa. Unang ma hita marutang molo dang porlu. Asing ni i, unang ma habis tikkitta lao mangurus arta na adong di hita. Ikkon manat do tong hita asa unang tabahen hepeng manang arta gabe na uppetting di ngolutta. (Mat. 6:19, 24) Ala nungnga lam jonok ujung ni portibi on, ikkon tapillit do dia na lao taandalhon, Jahowa do manang arta dohot hepengta.
Arta na Adong di Bibel
w11 1/1 14 ¶2-3
Naung Diboto Jahowa Hian do “Sian Mulana” na lao Mardosa si Adam Dohot si Hawa?
Didok Bibel do muse Jahowa i “Debata na umbisuk sian sasude”. (Rom 16:27) Jotjot do diida suru-suruan Jahowa mamakke bisukna na luar biasa. Misalna, “marsurak marlas ni roha” do nasida tikki mangida Jahowa manoppa tano on dohot nasa isina. (Job 38:4-7) Jala lomo do roha ni suru-suruan mangida akka na masa di Taman Eden. Jadi dang mungkin sengaja Jahowa di jolo ni akka suru-suruan manoppa dua jolma naung diboto ibana lao mardosa. Dang masuk akkal i.
Alai adong do ra na mandok, ‘Dang mungkin dang diboto Debata na lao mardosa si Adam dohot si Hawa, alana diboto Ibana do saluhutna!’ Memang, sada bukti na patuduhon na marbisuk Jahowa, i ma ‘sian mulana nungnga dipaboa hian songon dia ujungna.’ (Jesaya 46:9, 10) Alai sarupa do cara ni Jahowa mamakke bisukna dohot huasona. Dang sai dipakke Jahowa huasona na massai balga. Dos songon i ma, dang sai dipakke Jahowa bisukna lao mamboto akka na so masa dope. Manat, masuk akkal, jala sesuai tu situasi do Jahowa mamakke bisukna lao mamboto akka na so masa dope.
23-29 MARET
ARTA NA ARGA NA ADONG DI BIBEL | JESAYA 48-49
Tangihon jala Ulahon ma Paretta ni Jahowa
it “Guru” ¶2
Guru
Jahowa do Debata na manoppa saluhutna. Alai gabe guru do tong Ibana di akka naposona. (1Raj 8:36; Ps 27:11; 86:11; 119:102; Jes 30:20; 54:13) Boi do diboto jolma na adong Debata na marbisuk sian akka toppaanna. Jotjot do akka peneliti mamareso toppaan ni Debata jala holan otik dope na boi dipakke nasida. (Job 12:7-9) Marhite parnidaan, makkatai do Jahowa tu akka jolma lao paboahon goarna, lomo ni rohana dohot akka patikna. (Bandingkon Kel 4:12, 15; 24:12; 34:5-7.) Boi do tajaha taringot i di Bibel. Jala Bibel on ma na gabe dasar parbinotoan na sittong na dipakke Jahowa saonari lao mangajari naposona taringot lomo ni rohana. (Rom 15:4; 2Tim 3:14-17) Asing ni i dipakke Debata do tong tondi parbadiana lao mangajari akka naposona.—Joh 14:26.
Diloas Debata do Hita Manottuhon Aha na lao Tapillit? Manang Nungnga Ditottuhon Ibana Hian Songon dia Nasibta?
● Ditoppa Debata do jolma mirip songon Ibana. (1 Musa 1:26) Berbeda do jolma sian binatang. Molo binatang bertindak holan mangihutton nalurina. Alai molo hita boi do tatiru akka sifat ni Debata Sipanoppa hita, songon holong dohot keadilan. Jala dos songon Debata, bebas do hita manottuhon aha na ikkon taulahon.
● Aha na taulahon boi do manottuhon songon dia masa depanta. Di Bibel dijujui do hita asa manangihon hata ni Debata. Artina, ikkon taoloi do sude parettana, dung i boi ma dapotta hangoluan. (5 Musa 30:19, 20) Alai molo naung ditottuhon hian do songon dia nasibta, dang adong be gunana taulahon sude paretta ni Debata. Sebenarna, dang hea dipaksa Debata hita asa mangulahon hatana. Alai sebalikna didok Debata do tu hita, “Autsugari diparrohahon ho akka parettakki! Dos songon sunge ma hadameonmu.”—Jesaya 48:18.
Tahaholongi ma Standar ni Jahowa na Sittong
16 Hea do hamu merasa dang sanggup mangihutton standar ni Jahowa na sittong ganup ari? Molo hea, tapikkirhon ma ilustrasi na dipaboa Jahowa di Jesaya 48:18. (Jaha.) Disarupahon Ibana do akka pambahenanta na denggan “songon galumbang ni laut”. Bayakkon ma hamu jongjong di topi ni laut na bidang. Diida hamu ma dang marna so galumbang ni laut i. Dang hea ro tu pikkiranmuna sada tikki so galumbang di laut i. Alana torus do ro galumbang ni laut i sian tikki tu tikki.
17 Songon dia do carana asa boi pambahenanta na denggan i disarupahon songon galumbang ni laut? Tikki naeng mambahen keputusan, sai tapikkirhon ma aha na dihalomohon Jahowa. Dung i pittor taulahon ma i. Taingot ma dang soal sadia maol keputusan na ikkon tabahen, sai urupan ni Jahowa do hita. Lehononna do tu hita gogo asa boi hita torus mangulahon na sittong ganup ari.—Jes. 40:29-31.
Arta na Adong di Bibel
it “Ari Parasi Rohaon” ¶1-3
Ari Parasi Rohaon
Surirang na di Jesaya 49:8 do na dienet Apostel Paulus di 2 Korint 6:2. Di ayat i didok, “Songon on ma hata ni Jahowa, ‘Di tikki hupatudu asi ni rohakku, hualusi do ho. Jala huurupi do ho di ari haluaon i, sai hujaga do ho lao mambahen ho gabe songon sada jaminan tu bangso i, lao padenggatton luat i. Lao paulakkon parbagianan ni nasida naung tarulang i.’” Di mulana tu bangso Israel do tujuan ni ayat i. (Jes 49:3) Alana taringot bangso na lao dipadenggan do na dipaboa di surirang i. Saut ma surirang na dipaboa di ayat i tikki dipalua halak Israel sian Babel. Tikki ditawan dope nasida didok do, “Kaluar ma hamu!” Dung i mulak ma nasida tu huta ni nasida lao padenggatton huta ni nasida naung tarulang i.—Jes 49:9.
Alai di ayat 8 didok “hubahen do ho gabe songon sada jaminan tu bangso i”. Jala di ayat sebelumna, i ma di ayat 6 didok do na lao bahenon ni Jahowa do ‘naposona’ lao “gabe sinondang tu akka bangso, asa sahat haluaon na sian Au i tu akka ujung ni tano on”. Sian dua ayat on gabe boi ma tasimpulhon, taringot Mesias do na dipaboa di surirang i. Jadi Jesus Kristus do na dipaboa di ayat on alana ibana do ‘naposo’ ni Debata na didok di ayat i. (Bandingkon Jes 42:1-4, 6, 7 dohot Mat 12:18-21.) Ala ‘dialusi’ jala ‘diurupi’ Jahowa do naposona di “ari parasi ni rohaon” i, marlakku do tong surirang i tu diri ni Jesus tikki ‘dipasahat ibana tangiangna dohot pangidoanna marhite angguk-angguk dohot ilu-ilu tu Debata. Ai Debata do na boi paluahon ibana sian hamatean. Ditangihon do tangiangna i, ala dihabiari ibana do Debata’. (Heb 5:7 -9; bandingkon Joh 12:27, 28; 17:1-5; Luk 22:41-44; 23:46.) Alani i tu Anak ni Debata do tong marlakku “ari haluaon” i. Alana di tikki i ma ibana boi patuduhon na setia do ibana tu Debata Jahowa. Hasilna “gabe boi ma akka halak na mangoloi ibana selamat jala mandapot hangoluan na saleleng ni lelengna marhite ibana”.—Heb 5:9.
Asing ni i marlakku do tong surirang i tu halak Kristen di abad na parjolo. Alani i ma didok si Paulus tu nasida, “Unang ma marisuang bahen hamu asi ni roha ni Debata na massai balga naung dijalo hamu.” Jala dipaboa ibana do muse (dung dienet ibana Jes 49:8), “Ida ma! Saonari ma ari parasi rohaon i. Jala saonari ma ari haluaon i.” (2Kor 6:1, 2) Di ari Pentakosta taon 33 M, nungnga gabe “Israel ni Debata” nasida. (Gal 6:16) Alai porlu do dipatudu nasida na tama nasida manjalo asi ni roha ni Debata na massai balga i. Dung i boi ma “ari parasi ni rohaon” i gabe “ari haluaon” di nasida.
6-12 APRIL
ARTA NA ARGA NA ADONG DI BIBEL | JESAYA 50-51
Tangihon ma Jesus Naung Diajari Debata
Mangajari Angka Parbarita Harajaon
5 Dung dapot tingkina, dipaboa Jahowa ma tu Jesus taringot tu siulahononna di tano on. Taparrohahon ma surirang na manggombarhon songon dia Jahowa na gabe Guru tu AnakNa. (Jaha Jesaya 50:4, 5.) Dipaboa di surirang i, didungoi Jahowa do AnakNa “ganup sogot”. Digombarhon do Jahowa songon guru na mandungoi muridna laho mangajari muridna i. Sada karya referensi taringot tu Bibel paboahon, “Jahowa . . . mamboan ibana tu singkola songon murid, dung i diajari ma ibana taringot tu marbarita na uli.” Di “singkola” na adong di surgo, diajarhon Jahowa do tu Jesus taringot tu ‘sidohononna dohot sihatahononna’. (Joh. 12:49) Dung i, diajarhon Jahowa do tu Jesus carana mangajari na asing.a Pangajarion ni Jahowa, mangurupi Jesus marbarita tingki di tano on. Ndang holan i, diurupi Jesus do muse siseanna asa denggan nasida di ulaon marbarita.
cf 133 ¶13
“Holong do Rohakku tu Damang i”
13 Sebelum gabe jolma Jesus, lomo do rohana marsiajar sian Bapakna. Molo tajaha surirang di Jesaya 50:4-6 boi ma taboto diajari Jahowa do Jesus songon sahalak murid taringot aha do tugasna tikki gabe Mesias. Nang pe gabe diboto Jesus hasusaan na lao dihilala ibana, tetap do ibana semangat marsiajar sian Bapakna. Dung ro ibana tu tano on jala magodang, toktong do lomo roha ni Jesus marsiajar sian Jahowa tikki marpungu jala mangajari akka halak taringot lomo ni roha ni Jahowa. Alani i ma didok Bibel ringgas do Jesus lao tu bagas joro nang tu akka sinagoga. (Lukas 4:16; 19:47) Asa toktong bagas holongta tu Jahowa, ikkon ringgas do hita marpungu. Alana tikki marpungu boi ma hita manomba Jahowa, manambai parbinotoanta, jala gabe lam taargai ma Ibana.
Arta na Adong di Bibel
it “Tambang” ¶2
Tambang
Marhite si Jesaya dipaboa Jahowa do sada tudosan na paingotton hita taringot sahalak penambang dohot na diulahon ibana. (Jes 51:1) Songon na dipaboa di ayat 2, si Abraham do “dolok batu” i. Alana ibana do na gabe bapak ni sude halak Israel. Jala si Sara do “lubang” na dipaboa di ayat i. Alana sian bortianna do tubu si Isak na gabe ompu ni halak Israel. (Jes 51:2) Alai ala marhite mukjizat do si Isak tubu, adong do lapatan ni tambang i na ussangap. Alani i di 5 Musa 32:18 didok do Jahowa songon ‘dolok Batu, ama’ ni halak Israel, “Debata na mangalehon ngolu tu hamu.” [Sarupa do kata kerja na dipakke di ayat on dohot na di Jes 51:2 lao mandok tu si Sara].
13-19 APRIL
ARTA NA ARGA NA ADONG DI BIBEL | JESAYA 52-53
Massai Balga do Holong ni Jesus!
w10 15/11 7 ¶2
Hamu Akka na Poso—Unang ma Olo Hamu Dipengaruhi Dongan Sebayamuna
2 Mura do ho dipengaruhi akka donganmu? Molo mura, boasa songon i? Ala lomo do roham asa godang donganmu? Dang sala i molo i do alasanna. Halak naung dewasa pe, lomo do rohana godang donganna. Dang adong halak na lomo rohana godang musuna. Alai dang sai lomo roha ni halak molo taulahon na sittong. I ma na dihilala Jesus. Nang pe songon i, sai diulahon Jesus do na sittong. Adong do piga-piga halak na gabe muridna, alai adong do na gabe leas rohana tu Anak ni Debata i, jala didok nasida “dang marlapatan ibana di hami”.—Jes. 53:3.
Patudu ma Lambok ni Roha jala Bahen Las Roha ni Jahowa
15 Piga-piga bulan andorang so mate, marsak do Jesus. Ala diboto, laho dibahen do ibana susa jala diuhum mate. (Joh. 3:14, 15; Gal. 3:13) Didok Jesus marsak situtu do rohana alani i. (Luk. 12:50) Piga-piga ari andorang so mate, didok Jesus do muse, “Susa do huhilala.” Didok ibana do di tangiangna, “Ale Amang, palua ma ahu sian hasusaan on. Alai alani on do ahu umbahen na ro, asa hubolus hasusaan i. Ale Amang, pasangap ma goarmi.” (Joh. 12:27, 28) Sian tangiangna taboto ma na serep do roha ni Jesus jala unduk do ibana tu Debata. Dung dapot tingkina, ro ma angka musu ni Debata, disiksa ma ibana jala diuhum. Alai barani do Jesus mangadopi i. Nang pe songon i situasina, tongtong do Jesus marlambok ni roha. Tangkas ma, sitiruon na denggan do Jesus taringot patuduhon lambok ni roha nang pe tingki marsak.—Jaha Jesaya 53:7, 10.
Arta na Adong di Bibel
it “Peralatan” ¶2
Peralatan
Jotjot do dipakke hata keli di bahasa Heber lao patuduhon akka peralatan na dipakke di bagas joro. Akka peralatan i, i ma piring, cakkir, makkuk, ceret, baskom, garpu, sekop, inganan ni gara ni api, ember inganan ni abuna, dohot penjepit ni sumbu. (2Mus 25:29, 30, 39; 27:3, 19; 37:16, 23; 38:3; 1Raj 7:40-50; 2Kron 4:11-22) Badia do akka peralatan i ala dipakke di bagas joro. (1Raj 8:4) Tikki mulak halak Jahudi sian Babel taon 537 SM, diboan nasida do tong mulak akka peralatan naung dibuat raja Nebukadnesar sian Jerusalem. Sada hasangapon do i di nasida. Alani i ikkon dijaga nasida do diri ni nasida asa ias pangalahona dohot hubungan ni nasida tu Jahowa. Jala gabe marlakku ma tu nasida surirang na mandok, “Mandao ma hamu, mandao ma hamu, lao ma hamu kaluar sian [Babel], unang jama hamu na ramun. Kaluar ma hamu sian tonga-tongana i, jaga hamu ma dirimuna toktong ias.” (Jes 52:11) Dang holan daging ni nasida na ikkon ias, alai dohot do tong rohana. Tikki mambahen surat tu halak Korint, dipakke Apostel Paulus do hata na tarsurat di Jesaya 52:11. Dipaingot ibana do halak Kristen di tikki i asa manjaga dirina toktong ias sian akka na mambahen ramun daging dohot pikkiran ni nasida.—2Kor 6:14-18; 7:1.
20-26 APRIL
ARTA NA ARGA NA ADONG DI BIBEL | JESAYA 54-55
Pengorbanan Aha ma na Dibahen Hamu asa Boi Marsiajar sian Jahowa?
w09 15/9 21 ¶3
Sada Hasangapon do Boi Diajari Jahowa
3 Alani asi ni rohana, olo do Jahowa mangajari jolma na so sempurna. Misalna, songon on ma na didok di Jesaya 54:13 taringot halak Kristen na dimiahi, “Na lao diajari Jahowa ma sude anakkonmu, jala gok situtu ma dame di akka anakkonmu.” Alai marlakku do tong prinsip na adong di ayat i tu “biru-biru na asing”. (Joh 10:16) Boi do takkas taida na digohi surirang i di jamanta saonari. Di sada parnidaan, diida si Jesaya do marroan akka halak sian saluhut bangso lao manomba Debata na sittong. Di parnidaan i didok na sada ma tu na asing, “Beta, nakkok ma hita tu dolok ni Jahowa, tu jabu ni Debata ni si Jakkob. Ajaranna ma hita taringot akka dalanna, jala taihutton ma akka dalanna i.” (Jes. 2:1-3) Sada hasangapon do di hita boi diajari Debata!
“Tuhor ma Hasintongan jala Unang Gadis”
6 Jaha Jesaya 55:1-3. Di ayat on dipaboa Jahowa do songon dia carana mangantusi lapatan ni manuhor hasintongan. Jala dipatudos Jahowa do hasintongan i songon aek, susu, dohot anggur. Songon halak na mauas, molo dung manginum aek tontu gabe tabo do pangkilalaanna. Suang songon i ma hasintongan, boi mambahen dame rohanta. Tudosan na asing, asa boi dakdanak lam balga jala sehat ingkon minum susu do ibana. Suang songon i ma hasintongan na tadapot, boi do i mambahen hita lam jonok jala patoguhon parale-aleanta tu Jahowa. Alai dipatudos Jahowa muse hasintongan i songon anggur. Boasa? Alana, jotjot do dipaboa di Bibel molo anggur boi mambahen las roha ni sasahalak. (Ps. 104:15) Jadi, molo taulahon Hata ni Debata boi do mambahen hita marlas ni roha. (Ps. 19:9) Dibahen Jahowa pe angka tudosan i, laho mangajari hita do asa taboto aha labana molo taparsiajari jala taulahon hasintongan i. Saonari, taulas ma lima pengorbanan na boi tabahen laho ‘manuhor hasintongan’.
PENGORBANAN LAHO MANUHOR HASINTONGAN
7 Tingki. Porlu do tingki di sasahalak laho manangihon barita na uli, manjaha Bibel dohot angka publikasi, marsiajar Bibel dohot Sitindangi, persiapan laho tu parpunguan dohot marpungu. Alani i, ingkon gumodang ma tapangke tingkinta laho mangulahon i sude, sian tu ulaon na asing. (Jaha Epesus 5:15, 16, dohot surat na di toru di ayat 16.) Sadia leleng do hita laho mamparsiajari ajaran dasar ni Bibel? Ndang sai sarupa pangantusion ni piga-piga halak. Jadi, ingkon torus do hita mamparsiajari taringot bisuk ni Jahowa, pingkiranna dohot angka naung diulahonna. (Rom 11:33) Di Watch Tower edisi na parjolo sahali, dipatudos do hasintongan i songon “bunga na buni”. Didok disi, “Molo nunga tadapot sada bunga, i ma hasintongan, unang ma didok rohanta nunga sae holan i. Ingkon talului do muse godang hasintongan na asing.” Boi ma tarimangi sungkun-sungkun on, ‘Nunga sadia godang na huboto taringot Jahowa?’ Nang pe mangolu salelengna hita, sai adong do na boi taparsiajari taringot Jahowa. Alani i, ringkot do tapangke tingkinta asa ringgas marsiajar. Taulas ma sada contoh na boi tatiru.
be 14 ¶3-5
“Parrohahon ma Songon Dia Hamu Manangihon”
Godang do na boi mambahen hita maol berkonsentrasi. Misalna godang na tapikkirhon, adong soara bising, manang adong na marhusor di bagasan manang di luar ni inganan parpunguanta. Olo do muse dang nyaman tahilala. Akka donganta na adong gellengna pe maol do berkonsentrasi. Jadi boha ma carana asa boi hita berkonsentrasi tikki marpungu?
Boi do matatta mangurupi hita asa berkonsentrasi. Jadi tikki marpungu bereng ma tu parjamita. Tikki ditogihon ibana hita manjaha ayat ni Bibel, bukka ma i. Ihutton ma tikki dijaha ibana ayat i, nang pe nga jotjot tajaha ayat i. Molo tung pe adong soara manang adong halak na marhusor, unang ma pittor bereng hamu. Alana molo dibereng hamu i boi do gabe dang konsentrasi be hamu. Jala gabe dang boi dibege hamu sude hatorangan na dipasahat sian jolo.
Molo “marsak situtu” hamu, olo do ra gabe maol hamu berkonsentrasi tikki marpungu. Molo songon i do situasimuna, martangiang ma hamu tu Jahowa asa boi dame roha dohot pikkiranmuna. (Ps 94:19; Plp. 4:6, 7) Molo porlu tangiangkon ma i piga-piga hali. (Mat 7:7, 8) Sian Jahowa do acara parpunguan i, jadi pos ma rohamuna lomo do rohana asa godang dapotmuna manfaat sian acara parpunguan i.—1Joh 5:14, 15.
Arta na Adong di Bibel
“Unang Ganggu Rohamu, ai Ahu do Debatam”
14 Na parjolo, molo gabe sisean ni Jesus, ingkon dihasogohon angka halak do hita. (Mat. 10:22) Jala nunga didok Jesus hian, na laho susa do dibahen muse angka siseanna di ari parpudi. (Mat. 24:9; Joh. 15:20) Na paduahon, di surirang ni si Jesaya pe nunga dipaboa, ndang holan di hasogohon musu hita. Alai dibahen nasida do muse godang cara laho mangalo hita. Umpamana, didok nasida do angka hata na so tutu taringot hita manang gabe disiksa hita. (Mat. 5:11) Dipaloas Jahowa do on masa tu hita. (Eps. 6:12; Pgk. 12:17) Nang pe songon i, boasa ndang pola mabiar hita?
15 Na patoluhon, tongtong ma taingot hata ni Jahowa na mandok, “tung so adong sinjata na mampan” manang marhasil mangalo hita. Songon tembok na mangalinggomi hita sian udan haba-haba, songon i ma Jahowa mangalinggomi hita. (Jaha Jesaya 25:4, 5.) Aha pe na dibahen musu laho mangalo hita, ndang laho boi nasida marhasil.—Jes. 65:17.
27 APRIL–3 MEI
ARTA NA ARGA NA ADONG DI BIBEL | JESAYA 56-57
Las Hian do Rohatta ala Jahowa Debatanta
ip-2 269 ¶14-16
Dipamalum Jahowa do Roha ni Halak na Malala Ate-atena
14 Dang torus Jahowa sabar tu halak Juda. Na lao marujung do i. Didok Jahowa, “Patuduokku ma akka ulaonmu na ‘denggan’ i dohot sude pambahenanmu, jala dang adong guna ni i sude di ho. Tikki marsurak ho mangido asa diurupi, dang paluaon ni akka debata na pinapungumi ho. Boanon ni alogo nama i sude, habang ma i sude diullus hosa na sangombus.” (Jesaya 57:12, 13a) Na lao patuduon ni Jahowa ma munafik do sude na diulahon halak Juda jala dang marlapatan i. Dang boi ‘akka debata na pinapungu’ ni nasida paluahon nasida. Tikki ro jea, na lao dihabangkon alogo do akka debata ni nasida i.
15 Saut do hata ni Jahowa i di taon 607 SM tikki ro Raja Nebukadnesar na sian Babel manaluhon kota Jerusalem. Di tikki i ditutung do bagas joro ni Jahowa, jala godang do halak Juda na diboan gabe tawanan. Bibel mandok, “Songon i ma halak Juda dipalao sian luat i jala diboan tu luat ni musu.”—2Raja 25:1-21.
16 Dos songon i ma di ari rimas ni Jahowa, dang na lao boi akka patung na disomba agama Kristen na so sittong paluahon nasida. (Jesaya 2:19-22; 2 Tessalonik 1:6-10) Jala na lao dihancurhon do agama Kristen na so sittong i rap dohot bagian na asing sian “Babel na Balga”, i ma sude agama palsu na adong saonari. Buaton ni binatang buas na merah songon api jala na adong sappulu tandukna ma ‘sude arta ni [Babel na balga] jala bahenon ni nasida ma ibana dang marpakkean. Allangon ni nasida ma dagingna jala tutungon ni nasida ma ibana dohot api’. (Pangungkapon 17:3, 16, 17) Pasti las do rohatta di tikki i ala nungnga mangihutton paretta ni Debata na mandok, “kaluar ma hamu sian ibana, asa unang dohot hamu mangulahon akka dosana jala asa unang dohot hamu hona hukum”! (Penyingkapan 18:4, 5) Sai anggiat ma dang olo hita mulak tusi jala mangihutton akka dalanna.
“Ndang Sian Portibi on Harajaonku”
16 Ringkot do marhamubaon! Bibel mandok, jolma i dos songon parhasak ni laut na so hea dame. (Jes. 17:12; 57:20, 21; Pgk. 13:1) Holan mambahen gaor do politik on, jala gabe tubu do parbadaan alani i. Alai molo hita, tongtong do dame jala marsada. Nang pe diida Jahowa tarbagi angka halak saonari, alai las hian do rohaNa ala tongtong marsada angka naposoNa.—Jaha Sepania 3:17.
it “Dame” ¶3
Dame
Mangalului Hadameon. Debata hadameon do Jahowa. (1Kor 14:33; 2Kor 13:11; 1Tes 5:23; Heb 13:20) Jala sian Ibana do ro hadameon. (4Musa 6:26; 1Kron 22:9; Ps 4:8; 29:11; 147:14; Jes 45:7; Rom 15:33; 16:20) Alana sada sian parbue ni tondi parbadiana do hadameon i. (Gal 5:22) Alani i molo denggan hubungan ni sasahalak tu Debata pasti boi ma dihilala ibana dame ni roha. Alai molo diulahon sasahalak dosa na balga, gabe sega ma hubunganna tu Debata jala dang boi dihilala ibana dame ni roha. Songon na didok panurat Psalmen, “dang dame be rohakku alani dosakki.” (Ps 38:3) Jadi molo naeng dilului sasahalak hadameon, ikkon ‘dipasiding ibana do akka ulaon na jahat jala diulahon na denggan’. (Ps 34:14) Molo dang diulahon ibana na sittong, dang boi dihilala ibana dame ni roha. (Ps 72:3; 85:10; Jes 32:17) Alani i ma dang boi halak na jahat makkilala dame ni roha. (Jes 48:22; 57:21; bandingkon Jes 59:2-8.) Alai molo dilehon sasahalak ngoluna tu Jahowa, dihaholongi ibana akka patikna (Ps 119:165), jala diulahon ibana akka parettana, pasti boi ma dihilala ibana dame ni roha.—Jes 48:18.
Arta na Adong di Bibel
w07 15/1 10 ¶3
Akka na Denggan sian Buku Jesaya—II
56:6—Ise do “halak na sian bangso na asing”, jala boha do cara ni nasida patuduhon na ‘torus nasida setia tu parjanjian [ni Jahowa]’? Akka “biru-biru na asing” do “halak na sian bangso na asing” na didok di ayat i. (Johannes 10:16) Godang do bukti na patuduhon setia do nasida tu parjanjian baru. Misalna dioloi nasida do paretta ni Jahowa na adong di parjanjian i. Olo do nasida mangihutton pengaturan na dibahen organisasi ni Jahowa na sadalan tu parjanjian i. Sarupa do sipanganon partondion na diparsiajari nasida tu na diparsiajari halak Kristen na miniahan. Jala dohot do nasida di ulaon marbarita na uli dohot mambahen sisean.
w06 1/11 27 ¶1
Taargai ma Akka Parpunguanta
NUNGNGA dipapungu Jahowa akka naposona, i ma akka halak Kristen na miniahan dohot biru-biru na asing lao manomba Ibana di ‘dolokna na badia’. Dibahen Jahowa do nasida marlas ni roha di ‘jabu partangianganna’, i ma di bagas jorona na mulia na gabe “jabu partangiangan ni sude bangso”. (Jesaya 56:7; Markus 11:17) Nang pe nungnga muba caratta manomba Jahowa saonari, alai tetap do badia jala mulia ibadatta tu Jahowa. Alani i ikkon taargai do akka acara parpunguanta. Alana disi ma hita boi marsiajar sian Jahowa jala manomba Ibana. Molo taulahon i on patuduhon na sadalan do cara marpikkirta tu Jahowa taringot akka acara parpunguan i.