Porsea ma tu Jahowa di Sasudena

1-2. (a) Boasa godang halak saonari dang porsea tu kalangan berwenang? (b) Aha do na lao tabahas di artikel on?

GODANG do akka halak saonari on dang porsea tu kalangan berwenang. Diida nasida do molo sistem politik dohot hukum lebih melindungi halak na mora manang halak na sangap, alai dang adil tu halak na pogos. Bibel pe mandokkon songon i do, “Gabe susa do molo jolma na mangarajai jolma.” (Pjm. 8:9) Asing ni i, godang do pamimpin agama na marpangalaho na so suman. On mambahen akka halak dang porsea be tu Debata. Jadi tikki taurupi sasahalak marsiajar Bibel, olo do gabe tantangan mangurupi ibana asa porsea tu Jahowa dohot tu akka halak na dilehon tanggung jawab di organisasina.

² Tottu dang holan parsiajar Bibel na porlu paposson rohana tu Jahowa dohot tu organisasina. Bahkan hita naung leleng manomba Jahowa pe, porlu do torus patoguhon pos ni rohatta memang cara ni Jahowa i do na undenggan. Sipata adong do situasi na mambahen ganggu rohatta. Di artikel on tabahas ma tolu situasi na boi manguji pos ni rohatta tu Jahowa: (1) tikki tajaha contoh na adong di Bibel, (2) tikki adong tudu-tudu sian organisasi ni Jahowa, jala (3) tikki mangadopi tantangan di masa depan.

 3. Tikki tajaha contoh na adong di Bibel olo do gabe ragu hita tu Jahowa. Boasa songon i?

³ Tikki manjaha Bibel, olo do ra gabe sukkun-sukkun rohatta tu cara ni Jahowa memperlakukan halak dohot tu keputusan na dibahen Ibana. Misalna di bukku 4 Musa, dipamate Jahowa do halak na papunguhon soban di ari Sabat. Hape Raja Daud na berzina dohot mambunu disalpuhon Jahowa do hasalaanna i, songon na dipaboa di bukku 2 Samuel. (4 Mus. 15:32, 35; 2 Sam. 12:9, 13) Olo do gabe sukkun-sukkun rohatta, ‘Boasa disalpuhon Jahowa hasalaan ni si Daud na mambunu dohot berzina, hape halak na so pola balga dosana dipamate Ibana?’ Lao mangalusi sukkun-sukkun on, adong tolu na porlu taingot tikki manjaha Bibel. Aha ma i?

 4. Sian 1 Musa 18:20, 21 dohot 5 Musa 10:17, boasa boi pos rohatta tu cara ni Jahowa mangadili?

⁴ Dang dipaboa Bibel sude hatorangan taringot sada peristiwa. Misalna taboto do botul-botul si Daud bertobat. (Ps. 51:2-4) Alai dang godang na taboto taringot halak na mangalanggar Patik taringot ari Sabat i. Dang taboto bertobat do ibana manang na dang, jala dang taboto atik na hea do dilanggar ibana patik ni Jahowa sebelumna. Asing ni i dang taboto atik na hea do ibana dipasingot, alai dang olo ibana mangulahon sipasingot i. Memang dang dipaboa Bibel sude faktana, alai pos ma rohatta dang olo Jahowa “mangulahon na so tigor”. (5 Mus. 32:4) Dang songon cara ni jolma cara ni Jahowa mangadili. Jahowa mangadili berdasarkan fakta, dang mangihutton hata ni halak jala dang dipaimbar-imbar Ibana jolma. (Jaha 1 Musa 18:20, 21; 5 Musa 10:17.) Lam godang na taboto taringot Jahowa dohot akka aturanna, gabe lam pos ma rohatta tu carana mangadili sada situasi. Jadi nang pe dang dipaboa di Bibel sude alus ni sukkun-sukkunta saonari, alai pos do rohatta “sittong do dalan ni Jahowa” i.​—Ps. 145:17.

 5. Ala dang sempurna hita, aha do pengaruhna tu caratta mangida sada situasi? (Ida kotak “Dang Sempurna Cara Pandangta”.)

⁵ Ala dang sempurna hita, olo do sala caratta mangida sada situasi. Memang ditoppa Debata do hita asa boi maniru sifatna. Jadi pasti lomo do rohatta asa adil tu na asing. (1 Mus. 1:26) Alai ala dang sempurna hita, olo do sala caratta mangida sada situasi nang pe tarippu nga taboto sude faktana. Contohna si Jona. Muruk do ibana ala dang jadi dihukum Jahowa halak Ninive. (Jona 3:10–4:1) Hape alani asi ni roha ni Jahowa i, gabe boi ma selamat lobi sian 120.000 halak Ninive na bertobat. Sian on taboto ma, cara marpikkir ni si Jona do na sala dang cara marpikkir ni Jahowa.

 6. Ikkon dipatorang Jahowa do tu jolma aha alasan ni Ibana mambahen sada keputusan?

⁶ Dang wajib Jahowa paboahon tu hita alasanna mambahen sada keputusan. Memang diloas Jahowa do akka naposona najolo paboahon pandapot ni nasida taringot keputusan na dibahen Ibana. (1 Mus. 18:25; Jona 4:2, 3) Jala sipata dipaboa Ibana do alasanna mambahen keputusan i. (Jona 4:10, 11) Alai sebenarna dang wajib Jahowa paboahon tu jolma alasanna mambahen sada keputusan. Ala Ibana do na manoppa hita, dang pola ikkon sukkunonna pandapotta sebelum manang dukkon dibahen Ibana sada keputusan.​—Jes. 40:13, 14; 55:9.

 7. Tikki dibahen akka na martanggung jawab di organisasi sada keputusan, sukkun-sukkun aha do na olo ro tu rohatta?

⁷ Pos do rohatta manang aha pe na diulahon Jahowa, sittong do i. Alai boha molo tu akka halak na dilehon Ibana tanggung jawab? Pos do tong rohatta tu nasida? Olo do ra sukkun-sukkun dope rohatta, ‘Naung diihutton nasida do petunjuk sian Bibel tikki mambahen keputusan, manang holan sian pikkiran ni nasida do i?’ Songon i do ra na dihilala piga-piga halak najolo. Taingot ma muse contoh na dipaboa di paragraf 3 nakkin. Bisa jadi sukkun-sukkun do roha ni keluarga ni bawa na dipamate ala papunguhon soban di ari Sabat i. Olo do ra didok nasida, ‘Memang sian Jahowa do keputusan na dibahen si Musa i?’ Jala songon i do ra na dihilala akka dongan ni si Uria halak Het i. Bisa jadi didok roha ni nasida, ala raja si Daud gabe boi diorui hukumanna. Alai taingot ma, pos do roha ni Jahowa tu akka halak na dilehon Ibana tanggung jawab di organisasi. Jadi molo dang pos rohatta tu nasida, berarti dang pos rohatta tu Jahowa.

 8. Sesuai tu Ulaon ni Apostel 16:4, 5 songon dia do Jahowa mangarahon organisasina sahat tu saonari?

⁸ Saonari marhite “naposo haposan jala na marbisuk” do Jahowa mangarahon organisasina na di tano on. (Mat. 24:45) Sarupa do tugas ni nasida songon punguan na mangaradoti di abad na parjolo. Nasida do na mengawasi naposo ni Jahowa di saluhut portibi on jala mangalehon petunjuk tu akka sintua. (Jaha Ulaon ni Apostel 16:4, 5.) Dung i dipastihon akka sintua do sude petunjuk i diulahon di huria. Jadi molo taihutton petunjuk na dibahen nasida, on patuduhon na pos do rohatta tu Jahowa.

 9. Di situasi na songon dia do hita maol mangihutton keputusan na dibahen akka sintua, jala boasa?

⁹ Sipata olo do maol tahilala mangihutton petunjuk na dibahen akka sintua. Misalna piga-piga taon parpudi on, adong do huria na digabung manang na dipapinda tu wilayah na asing. Asing ni i, adong penyiar na dipangido pinda asa boi godang ni penyiar di huria i memenuhi kapasitas ni Bale Harajaon. Molo hita na dipangido pinda tu huria na asing, olo do maol tahilala mangihutton i. Alana bisa jadi gabe tatinggalhon keluarga dohot akka donganta. Jala taboto memang dang adong petunjuk langsung sian Jahowa tu akka sintua, lao manugasson akka penyiar. Alai taingot ma, pos do roha ni Jahowa tu keputusan na dibahen akka sintua. Alani i porlu do taihutton petunjuk i.b

10. Boasa ikkon unduk hita tu keputusan na dibahen akka sintua? (Heber 13:17)

¹⁰ Boasa ikkon taihutton petunjuk ni akka sintua nang pe hurang setuju hita tu petunjuk i? Alana molo taulahon i, na mangurupi akka dongan di huria do hita asa toktong marsada ni roha. (Eps. 4:2, 3) Asing ni i, gabe boi ma marlas ni roha huria molo unduk hita tu keputusan na dibahen punguan ni sintua. (Jaha Heber 13:17.) Jala na uppetting molo olo hita kerja sama dohot akka dongan na dilehon Jahowa tanggung jawab di organisasina, on patuduhon na pos do rohatta tu Jahowa.​—Ul. 20:28.

11. Aha do na boi mangurupi hita asa lam pos rohatta mangihutton petunjuk na dibahen akka sintua?

¹¹ Boi do lam pos rohatta tu petunjuk na tajalo sian akka sintua, molo taingot songon dia cara ni nasida mambahen keputusan. Misalna jolo martangiang do nasida mangido tondi parbadia. Dung i jolo dipareso nasida do akka prinsip ni Bibel dohot petunjuk na diparade organisasi ni Jahowa. Lomo do roha ni akka sintua mambahen las roha ni Jahowa jala mambahen na terbaik tu naposo ni Debata. Diboto nasida do na martanggung jawab do nasida tu Debata ala diparrohahon Debata do songon dia nasida berurusan tu akka naposona. (1 Ptr. 5:2, 3) Pikkirhon ma on, nang pe tarbagi portibi on saonari alani ras, agama dohot politik, alai naposo ni Jahowa toktong do marsada manomba Jahowa Debata na sittong. Boasa boi songon i? Ala dipasu-pasu Jahowa do organisasina.

12. Aha do na ikkon dipartimbakkon akka sintua lao mamboto tutu do bertobat halak na mangulahon dosa serius?

¹² Nungnga dilehon Jahowa tanggung jawab tu akka sintua lao manjaga huria asa toktong ias. Molo adong sahalak Kristen na mangulahon dosa na serius, dilehon Jahowa do tugas tu akka sintua lao manottuhon boi do ibana tetap di huria manang na dang. Alai na uppetting, ikkon dipastihon nasida do naung botul-botul bertobat halak na mangulahon dosa na serius i manang na dang. Olo do didok ibana nungnga bertobat ibana. Alai tutu do i? Bertekad do ibana dang olo be mangulahon dosana i? Molo alani pergaulan buruk do ibana mangulahon dosa na serius, olo do ibana maninggalhon akka donganna i? Porlu do akka sintua martangiang asa diurupi Jahowa nasida mampartimbakkon sude fakta na adong, dohot mangalului prinsip ni Bibel na sesuai tusi. Dung i diputusson nasida ma boi do ibana tetap di huria manang na dang. Di piga-piga kasus, ikkon dipecat do halak na mangulahon dosa na serius.​—1 Kor. 5:11-13.

13. Tikki dipecat keluarga manang dongan akrabta, aha do na boi ro tu pikkiranta?

¹³ Molo dang keluargatta manang dongan akrabta halak na dipecat i, mungkin dang pola sukkun-sukkun rohatta tu keputusan na dibahen akka sintua. Alai boha ma molo na dipecat i keluargatta manang dongan akrabta? Olo do ragu hita, tutu do naung diboto akka sintua sude faktana? Manang tutu do naung dibahen nasida keputusan na sesuai tu lomo ni roha ni Jahowa? Molo songon i, aha ma na boi mangurupi hita asa pos rohatta tu keputusan na dibahen akka sintua?

14. Tikki adong keluarga manang dongan akrabta na dipecat, aha do na porlu taingot?

¹⁴ Sai taingot ma pemecatan i pengaturan sian Jahowa do, jala bermanfaat do i tu huria dohot tu halak na mangulahon dosa na serius. Molo torus ibana dipasombu di huria, boi do ibana mempengaruhi akka dongan na asing. (Gal. 5:9) Asing ni i gabe dang disadari ibana kesalahanna, dang diboto ibana porlu do diuba ibana cara marpikkirna dohot pangalahona. Ujungna gabe sogo ma roha ni Jahowa tu ibana. (Pjm. 8:11) Jadi massai balga do tanggung jawab ni akka sintua tikki manottuhon ikkon dipecat do sasahalak manang na dang. Pos ma rohatta ‘nasida mangadili dang di bagasan goar ni jolma, alai di bagasan goar ni Jahowa do’ songon akka hakim di jaman Israel najolo.​—2 Kron. 19:6, 7.

15. Boasa ikkon pos rohatta tu petunjuk na dilehon Jahowa saonari?

¹⁵ Ala nga lam jonok ari ni Jahowa, ikkon lam pos do rohatta tu Ibana. Boasa? Alasan na parjolo, molo nga ro hasusaan bolon olo do adong petunjuk na so masuk akkal tahilala jala maol diulahon. Na paduahon, dang langsung Jahowa makkatai tu hita. Marhite akka bawa na terlantik do dilehon Ibana petunjuk tu hita. Molo nga ro hasusaan bolon i, dang tikkina be disi hita ragu tu petunjuk na dilehon Jahowa. Unang be sukkun-sukkun rohatta, ‘Toho do on sian Jahowa, manang na holan sian pikkiran ni akka bawa na terlantik i do?’ Molo hatop hita saonari mangihutton petunjuk na dilehon organisasi ni Jahowa, haduan pe tikki masa hasusaan bolon gabe ummura ma hita mangihutton petunjuk.​—Luk. 16:10.

16. Aha do muse na boi manguji haporseaotta tu Jahowa haduan?

¹⁶ Asing ni i ikkon tapikkirhon do boha annon reaksitta tikki ro ari panguhuman ni Jahowa. Pasti lomo do rohatta asa godang halak gabe sisomba Jahowa sebelum ro ari panguhuman i, termasuk ma keluargatta na so Saksi. Di Armagedon, tu Jesus do dilehon Jahowa tugas lao manottuhon ise na lao diselamatton jala ise na lao dihukum. (Mat. 25:31-33; 2 Tes. 1:7-9) Dang marhak hita manottuhon i. (Mat. 25:34, 41, 46) Setuju do hita annon tu keputusan ni Jahowa i, manang gabe dang tasomba be Jahowa alani i? Jadi ikkon tapatogu do haporseaotta tu Jahowa saonari, asa pos situtu rohatta tu Ibana haduan.

17. Dung sae ari panguhuman ni Jahowa, pasu-pasu aha do na lao tadapot?

¹⁷ Bayakkon ma na lao masa di tano on dung sae ari panguhuman ni Jahowa. Dang adong be agama palsu, dang adong be sistem perdagangan na tamak, dohot pamarettaon na mambahen godang halak susa. Dang adong be na marsahit, na matua, jala dang adong be hamatean. Dang boi be Sibolis dohot suru-suruan na jahat mangganggu jolma saleleng saribu taon. Dang hilalaotta be sude hasusaan na dibahen nasida. (Pgk. 20:2, 3) Tikki masa i, pasti massai las do rohatta ala nungnga marpos ni roha tu Jahowa saleleng ni ngolutta.

18. Parsiajaran aha do na boi tadapot sian halak Israel songon na dipaboa di 4 Musa 11:4-6 dohot 21:5?

¹⁸ Bisa jadi dung sahat hita di tano na imbaru, adong dope na boi manguji haporseaotta tu Jahowa. Misalna taingot ma contoh ni halak Israel najolo dung kaluar nasida sian Mesir. Sebenarna nungnga dilehon Jahowa manna lao allangon ni nasida. Alai magigi do nasida mangallang manna i, jala masihol do nasida tu sipanganon na diallang nasida tikki di Mesir. (Jaha 4 Musa 11:4-6; 21:5.) Songon halak Israel i do annon sikapta dung sae Armagedon? Godang do annon karejotta lao padenggatton portibi on jala mambahen tano on gabe Paradeiso. Mulana pasti dang mura mangulahon i. Marungut-ungut do hita tu persediaan na dilehon Jahowa di tikki i? Taingot ma on: Molo taargai persediaan na dilehon Jahowa tu hita saonari, pasti gabe taargai do muse persediaan na dilehon Jahowa haduan.

19. Parsiajaran aha do na tadapot sian artikel on?

¹⁹ Pos ma rohatta sai sittong do ulaon ni Jahowa. Jala pos ma rohatta tu akka halak na dilehon Jahowa tanggung jawab lao mangalehon petunjuk tu hita. Toktong ma taingot hata ni Jahowa na disurat Panurirang Jesaya na mandok, “Molo torus do hamu porsea jala dang busisaon, lam margogo ma hamu.”​—Jes. 30:15.