Aha do Ibadat I?

Ibadat i boi do lapatanna, “parniulaon ni sasahalak na patuduhon dipasangap jala dihaholongi ibana Debata”. Di Bibel hata asli ni “ibadat” on boi do lapatanna gabe parniulaon ni sasahalak lao patuduhon na dihargai manang na dioloi ibana sada-sada toppaan. (Mat. 28:9) Hata on pe boi do patuduhon na marsomba sasahalak tu Debata manang tu sada dewa. (Joh. 4:23, 24) Jadi boi do taboto arti ni hata on molo tajaha konteksna.

Holan Jahowa do na tama tasomba, ai Ibana do Sitoppa saluhutna jala Natumimbul sian sude. (Pgk. 4:10, 11) Tapatudu do na tasomba Jahowa marhite mangakkui Ibana, Debata Natumimbul jala tapasangap goarna. (Ps. 86:9; Mat. 6:9, 10) Jotjot do dipaboa taringot kedudukan dohot goar ni Jahowa di bukku Hesekiel. Holan di bukku Hesekiel, adong do dipaboa 217 hali hata “Jahowa Tuan Natumimbul” jala lobi sian 50 hali dipaboa hata “botoonmuna ma na Au do Jahowa”.​—Hes. 2:4; 6:7.

Ibadatta i dang holan sian roha alai ikkon tapatudu do sian pambahenatta. (Jak. 2:26) Tikki talehon diritta tu Jahowa, marjanji do hita tu Ibana na lao taoloi Ibana di saluhut parngoluotta. Molo taulahon on, tapatudu ma na tabahen Ibana gabe parhuaso di hita jala na tapasangap goarna. Taingot ma, sian alus ni Jesus tikki digoda Sibolis ibana patoluhalihon, dikaitton Jesus do manomba i dohot ulaon “marhobas”. (Mat. 4:10) Jadi molo sisomba Jahowa do hita, ikkon las do rohatta marhobas tu Ibana.a (5 Mus. 10:12) Molo marhobas hita tu Debata, taulahon ma akka ulaon na sesuai tu lomo ni roha ni Debata, jala porlu do talehon tikki dohot upaya mangulahon i. Akka aha ma i?

Godang do na termasuk tu ulaon marhobas. Umpamana, ulaon marbarita, marpungu jala mangalehon komentar di parpunguan, mambangun jala mangurus inganan parpunguan, mangulahon ibadat keluarga, mangurupi dongan na hona bencana, relawan di kebaktian, manang karejo di Betel. Diargai Jahowa do molo taulahon ulaon on. (Heb. 13:16; Jak. 1:27) Molo tabahen do ibadat na sittong ulaon na uppetting di roha dohot di pikkiranta, ‘marhobas ma hita tu Ibana arian nang borngin’ jala las ma rohatta marhobas tu Jahowa Debatanta i!​—Pgk. 7:15.