PELAJARAN 27
Boasa Hamatean ni Jesus Boi Paluahon Sude Jolma?
Ala dialo si Adam dohot si Hawa Debata, gabe sude ma jolma mardosa, susa, jala mate.a Alai boi do hita malua sian i. Nungnga dilehon Jahowa Anakna i ma Jesus Kristus lao paluahon hita sian dosa dohot hamatean. Bibel mandok marhite hamatean ni Jesus do Jahowa paradehon tobusan. Tobusan, i ma jaminan na ikkon digarar lao paluahon sasahalak. Ngoluna na sempurna do na dilehon Jesus lao manobus jolma. (Jaha Mateus 20:28.) Tikki di tano on, boi do sebenarna Jesus mangolu saleleng ni lelengna. Alai ala olo ibana mate, gabe boi ma hita sempurna songon si Adam dohot si Hawa hian. Hamatean ni Jesus pe patuduhon na balga situtu do holong ni Jahowa dohot Jesus tu hita. Marhite pelajaran on, diurupi ma hita asa lam taargai tobusan ni Jesus i.
1. Aha do manfaat ni hamatean ni Jesus tu hita saonari?
Ala mardosa do hita sude, jotjot do hita mambahen haccit roha ni Jahowa. Alai boi do jonok muse hubungatta tu Debata molo taakui hasalaatta. Jala tapangido ma tu Jahowa asa disesa dosatta marhite Jesus Kristus. Dung i berusaha ma hita asa unang taulahon muse hasalaatta i. (1 Johannes 2:1) Bibel mandok, “Ai Kristus na mangulahon lomo ni roha ni Debata pe, mate do ibana alani akka parjahat. Holan sahali do ibana mate ro di saleleng ni lelengna lao manogu-nogu hamu tu Debata.”—1 Petrus 3:18.
2. Aha do manfaat ni tobusan ni Jesus tu hita haduan?
Disuru Jahowa do Jesus tu tano on lao mangalehon ngoluna na sempurna “asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna”. (Johannes 3:16) Ala olo Jesus mangulahon i, gabe boi ma Jahowa mambahen jolma sempurna muse haduan. Jadi molo porsea hita tu tobusan ni Jesus jala tapatudu i sian parniulaon dohot pangalahotta, boi ma hita mangolu saleleng ni lelengna di Paradeiso di tano on!—Jesaya 65:21-23.
ASA LAM TAATTUSI
Lam godang ma taparsiajari boasa ikkon mate Jesus. Jala aha do manfaat ni hamatean ni Jesus tu hita masing-masing.
3. Hamatean ni Jesus paluahon hita sian dosa dohot hamatean
Putar ma VIDEO, dung i bahas ma sukkun-sukkun on:
Aha do na masa tu si Adam ala dialo ibana paretta ni Debata?
Jaha Rom 5:12, dung i bahas ma sukkun-sukkun on:
Aha do akibat dosa ni si Adam tu hita?
Jaha Johannes 3:16, dung i bahas ma sukkun-sukkun on:
Boasa disuru Jahowa Anakna tu tano on?
Sempurna do si Adam. Alai ala dang dioloi ibana Debata, gabe dohot do sude jolma mardosa jala mate
Sempurna do Jesus. Ala dioloi ibana Debata, gabe boi ma jolma sempurna muse jala mangolu saleleng ni lelengna
4. Marguna do hamatean ni Jesus tu sude halak
Putar ma VIDEO, dung i bahas ma sukkun-sukkun on:
Boasa hamatean ni sahalak jolma boi manobus sude jolma?
Jaha 1 Timoteus 2:5, 6, dung i bahas ma sukkun-sukkun on:
Sempurna do si Adam. Alai ala mardosa ibana, gabe dohot do sude jolma mardosa jala mate. Sempurna do Jesus songon si Adam. Alani i, aha ma na boi diulahon Jesus? Jala aha ma manfaatna tu jolma?
5. Hadiah sian Jahowa do tobusan i
Di akka naposo ni Debata, dos songon hadiah do tobusan i na dilehon tu nasida sandiri. Contohna, jaha ma Galatia 2:20, dung i bahas ma sukkun-sukkun on:
Hata na dia ma di ayat i na patuduhon dianggap Apostel Paulus do tobusan i dos songon hadiah na dilehon Debata tu ibana?
Ala mardosa si Adam, ikkon mate do ibana dohot akka pinopparna. Alai disuru Jahowa do Anakna mate humokkop sude jolma. Alani i boi ma hamu mangolu saleleng ni lelengna di masa depan.
Tikki dijaha hamu akka ayat on, bayakkon hamu ma songon dia perasaan ni Jahowa tikki disiksa Anakna. Jaha Johannes 19:1-7, 16-18, dung i bahas ma sukkun-sukkun on:
Boha do perasaanmuna mamboto balga ni pengorbanan ni Jahowa dohot Jesus tu hamu?
ADONG DO NA MANDOK: “Boasa hamatean ni sahalak jolma boi manobus sude jolma?”
Molo adong na mandok songon i, boha ma alusmuna?
KESIMPULAN
Alani hamatean ni Jesus, boi ma disesa Jahowa dosatta jala boi ma hita mangolu saleleng ni lelengna di masa depan.
Tinjauan
Boasa ikkon mate Jesus?
Ala sempurna Jesus, aha ma na boi diulahon ibana? Jala aha ma manfaatna tu jolma?
Aha do manfaat ni hamatean ni Jesus tu hamu sandiri?
LULUI MA
Boasa cocok Jesus gabe tobusan?
“Aha do Maksudna Jesus Gabe ‘Tobusan tu Godang Jolma’?” (Artikel web)
Aha do na porlu taulahon asa disesa dosatta?
Olo do Jahowa manesa dosa na balga?
“Alus ni Bibel” (Joujou Paboahon, 1 Mei 2013)
Jaha ma pengalaman ni sahalak bawa na boi padenggatton pangalahona ala mamikkirhon tobusan ni Jesus.
a Dosa lapatanna dang holan akka na jahat na taulahon. Alai dohot do keinginan na sala na adong di bagasan roha dohot pikkiranta, ala pinoppar ni si Adam dohot si Hawa do hita sude.