2 Famiɛn Mun

9 Cɛn kun’n, Ɲanmiɛn nuan ijɔfuɛ Elize flɛli Ɲanmiɛn nuan ijɔfuɛ’m be mma’m be nun kun, kpɛkun ɔ seli i kɛ: “Fa ɔ tralɛ’n ci ɔ afiɛn, yɛ fa ngo sɛ nga ndɛndɛ naan kɔ Ramɔtu-Galaadi.+ 2 Sɛ a ju lɔ’n, kunndɛ Zei+ m’ɔ ti Zozafati i wa’n, mɔ i kusu ti Nimisi i wa’n, wlu sua’n nun lɔ, yɛ flɛ i maan ɔ jaso i niaan’m be afiɛn. I sin’n fɛ i naan amun wɔ sua’n i klun lɔ sua ba kun nun. 3 Kpɛkun fa ngo sɛ’n naan guɛ i ti su ngo naan se kɛ: ‘Ndɛ nga Zoova kan’n yɛ: “Ń gúa ɔ ti su ngo naan a yo Izraɛli famiɛn.”’+ I sin’n, tike anuan’n naan wanndi kɔ, nán sisi ɔ bo.”

4 Ɔ maan Ɲanmiɛn nuan ijɔfuɛ’n i sufuɛ’n fali atin’n ɔli Ramɔtu-Galaadi. 5 Kɛ ɔ́ jú lɔ’n, nn sonja’m be su kpɛn’m be titi lɛ. Ɔ seli kɛ: “Nannan, n klo kɛ ń kán ndɛ kun ń klé wɔ.” Yɛ Zei usɛli i kɛ: “?Ndɛ’n ti e nun onin liɛ?” Ɔ tɛli i su kɛ: “Nannan, ɔ ti ɔ bɔbɔ liɛ.” 6 Ɔ maan Zei jaso wluli sua’n nun lɔ. Ɲanmiɛn nuan ijɔfuɛ’n i sufuɛ’n fali ngo’n guɛli i ti’n su, kpɛkun ɔ seli kɛ: “Ndɛ nga Zoova m’ɔ ti Izraɛli Ɲanmiɛn’n kan’n yɛ: ‘Ń gúa ɔ ti su ngo naan a yo Zoova i nvle’n su famiɛn, naan a yo Izraɛli famiɛn.+ 7 Ɔ fata kɛ a kun ɔ min Akabu i awlo’n nunfuɛ mun, kpɛkun ń má tú min sufuɛ Ɲanmiɛn nuan ijɔfuɛ mun, ɔ nin Zoova i sufuɛ kwlaa nga Zezabɛli kunnin be’n be klunngbɔ.+ 8 Akabu i awlo’n nunfuɛ’m be kwlaa bé wú, ń núnnún Akabu i awlo’n nun yasua’m* be kwlaa, be nun nga be leman ɲrun Izraɛli mɛn’n nun bɔbɔ’n ń núnnún be wie.+ 9 Ń má yó Akabu i awlo’n kɛ Nebati i wa Zeroboamun i awlo’n+ sa. Ń yó i kɛ Aia i wa Baasa i awlo’n+ sa. 10 Zezabɛli liɛ’n, alua’m bé dí i fuɛn’n fie ng’ɔ o Zizreɛli lɔ’n nun,+ sran fi su siemɛn i.’” Kɛ ɔ yoli sɔ’n, ɔ tikeli anuan’n, kpɛkun ɔ wanndi ɔli.+

11 Kɛ Zei sɛli i sin i min’n i sufuɛ’m be wun lɔ’n, be usɛli i kɛ: “?Ndɛ kan-ɔn? ?Ngue ti yɛ fiaunfuɛ sɔ’n bali ɔ wun wunlɛ-ɔ?” Ɔ tɛli be su kɛ: “Amun si sran kɛ ngalɛ’n sa mun nin be ndɛ kanlɛ wafa’n.” 12 Sanngɛ be seli i kɛ: “Nán bua ato kle e! Yaci, kan sa ng’ɔ juli’n kle e.” Ɔ kannin ndɛ nga bian’n kan kleli i’n, kpɛkun ɔ kan guali su kɛ: “Ndɛ nga Zoova kan’n yɛ: ‘Ń gúa ɔ ti su ngo naan a yo Izraɛli famiɛn.’”+ 13 Kɛ ɔ yoli sɔ’n, be tinuntinun be yili be tralɛ mun ndɛndɛ be fa siesieli i asikalie’n su be mɛnnin i,+ kpɛkun be boli awɛ, yɛ be seli kɛ: “Zei w’a kaci famiɛn!”+ 14 I sin’n, Zei+ m’ɔ ti Zozafati i wa’n, mɔ i kusu ti Nimisi i wa’n, ɔ cicili Zoramun i wun ndɛ.

Famiɛn Azaɛli+ m’ɔ ti Siri famiɛn’n i dunman nun’n, Zoramun nin Izraɛlifuɛ’m be kwlaa be ɔli Ramɔtu-Galaadi+ naan bé kó kún Izraɛlifuɛ’m be ti alɛ. 15 Kɛ ɔ cɛli kan’n, Famiɛn Zoramun sɛli i sin Zizreɛli+ lɔ naan ɔ́ kó yó i wun ayre. Afin kɛ ɔ nin Famiɛn Azaɛli m’ɔ ti Siri famiɛn’n bé kún alɛ’n, Sirifuɛ’m be yoli i like yaya.+

Zei seli kɛ: “Sɛ ɔ ti amun klun su’n, nán e yaci sran fi nun naan ɔ fin klɔ’n nun fite, naan ɔ ko kan ndɛ sɔ’n sin Zizreɛli klɔ’n nun.” 16 Zei fuli i kakaklolo’n nun ɔli Zizreɛli, afin Zoramun mɔ like yaya yoli i’n ɔ la lɔ. Famiɛn Akazia m’ɔ ti Zida famiɛn’n kusu ɔli Zoramun i osu nianlɛ. 17 Kɛ klɔ sasafuɛ’n wo Zizreɛli lɔ sua fleiin’n su’n, ɔ wunnin kɛ Zei i sran’m be su ba. Ɔ ka lɛ seli kɛ: “ N wun sran wie mun.” Zoramun seli kɛ: “Sunman nnɛn kpanngɔ su fufuɛ kun naan ɔ ko kpa be atin, maan ɔ usa be kɛ: ‘?Wɛtɛɛ su yɛ amun ba-ɔ?’” 18 Ɔ maan nnɛn kpanngɔ su fufuɛ kun ko kpɛli i atin, kpɛkun ɔ seli i kɛ: “Ndɛ nga famiɛn’n kan’n yɛ: ‘?Wɛtɛɛ su yɛ a ba-ɔ?’” Sanngɛ Zei seli i kɛ: “?‘Wɛtɛɛ su’ balɛ liɛ? Sin min sin lɔ!”

Klɔ sasafuɛ’n seli kɛ: “Sran nga e sunmɛnnin i’n ɔ juli be wun lɔ, sanngɛ ɔ sɛmɛn i sin.” 19 Ɔ sunmannin nnɛn kpanngɔ su fufuɛ kun ekun, kɛ ɔ juli be wun lɔ’n ɔ seli kɛ: “Ndɛ nga famiɛn’n kan’n yɛ: ‘?Wɛtɛɛ su yɛ a ba-ɔ?’” Sanngɛ Zei seli i kɛ: “?‘Wɛtɛɛ su’ balɛ liɛ? Sin min sin lɔ!”

20 Klɔ sasafuɛ’n seli kɛ: “Ɔ juli be wun lɔ, sanngɛ ɔ sɛmɛn i sin. Yɛ sran ng’ɔ dun be ɲrun mmua’n kusu’n ɔ ba kɛ Nimisi i anunman* Zei sa, afin ɔ ba kɛ fiaunfuɛ wie sa.” 21 Zoramun seli kɛ: “Amun tanndan kakaklolo’n!” Ɔ maan be tɛnndɛnnin i alɛ kunlɛ kakaklolo’n, kpɛkun Famiɛn Zoramun m’ɔ ti Izraɛli famiɛn’n nin Famiɛn Akazia+ m’ɔ ti Zida famiɛn’n, be tinuntinun be fuli be kakaklolo’m be nun be ɔli naan bé kó kpá Zei i atin. Be nin i yiali Nabɔtu+ m’ɔ ti Zizreɛlifuɛ’n i fie’n nun lɛ.

22 Kɛ Zoramun wunnin Zei cɛ’n, ɔ seli kɛ: “?Zei, Wɛtɛɛ su yɛ a ba-ɔ?” Sanngɛ ɔ seli i kɛ: “?Sɛ Zezabɛli+ m’ɔ ti ɔ nin’n i tekle bolɛ nin i bae dilɛ’n+ nin-a wieman’n, n kwla ba wɛtɛɛ su?” 23 Zoramun ka lɛ kpɛli i kakaklolo’n i wun naan ɔ́ wánndi. Ɔ seli Akazia kɛ: “Akazia, b’a sua e wun aya!” 24 Zei fɛli i ta’n, ɔ cuɛnnin nun fa wɔli Zoramun i walɛ nɲɔn’m be afiɛn’n nun. Ta mma’n fitili i awlɛn ba’n nun boli nun lɔ, kpɛkun Zoramun tɔli i alɛ kunlɛ kakaklolo’n nun. 25 Zei seli Bidkaa m’ɔ ti i awlo lɔ sonja’n kɛ: “Fɛ i naan ko yi i Nabɔtu m’ɔ ti Zizreɛlifuɛ’n i fie’n nun lɔ.+ Maan ɔ wla kpɛn su kɛ i nun mɔ min nin wɔ e o e nnɛn kpanngɔ’m be su mɔ é sú i si Akabu i su’n, Zoova kɛnnin i ndɛ seli kɛ:+ 26 ‘Ndɛ nga Zoova kan’n yɛ: “Nabɔtu i mmoja+ nin i mma’m be mmoja mɔ n wunnin i anunman’n ti’n, saan ń tú ɔ fɔ+ fie nga nun,” Zoova yɛ ɔ kan sɔ-ɔ.’ Ɔ maan siɛn’n, fɛ i ko yi i fie’n nun lɔ, kɛ nga Zoova fa kannin’n sa.”+

27 Kɛ Akazia m’ɔ ti Zida famiɛn’n+ wunnin sa ng’ɔ juli’n, ɔ wanndili, ɔ fali fie dan’n* i atin’n. (I sin’n, Zei suli i su, ɔ seli kɛ: “Amun kun i wie!” Ɔ maan be yoli i like yaya i kakaklolo’n nun. Kɛ ɔ́ yó sɔ’n, nn ɔ su kɔ Guu m’ɔ o Ibleamun+ i wun lɔ’n su. Sanngɛ ɔ wanndi juli Megido yɛ ɔ wuli lɛ. 28 I sufuɛ’m be fɛli i kakaklolo kun nun be ɔli Zerizalɛmun, kpɛkun be sieli i i asieliɛ’n nun, be sieli i nin i nannan mun Davidi Klɔ lɔ.+ 29 Kɛ Akabu i wa Zoramun kacili famiɛn’n, i afuɛ blu-nin-kun (11) su yɛ Akazia+ kacili Zida famiɛn-ɔn.)

30 Kɛ Zei juli Zizreɛli+ lɛ’n, Zezabɛli+ tili. Ɔ maan ɔ fali like ble wie fa jɛjɛli i ɲinma sin klanman kpa. Ɔ yoli i ti’n i klanman kpa, yɛ ɔ jin lɛ nían fenɛtri’n nun. 31 Kɛ Zei juli anuan’n nun lɛ’n, Zezabɛli seli kɛ: “?Kɛ Zimiri kunnin i min’n i bo guali kpa mɛnnin i?”+ 32 Zei mɛnnin i ti’n su niannin fenɛtri’n nun lɔ, yɛ ɔ seli kɛ: “?Wan yɛ ɔ o min sin-ɔn? ?Wan-ɔn?”+ Famiɛn’n i awlo lɔ junman difuɛ nɲɔn annzɛ nsan be ka lɛ niɛnnin i lɔ. 33 Ɔ seli kɛ: “Amun to i yi i asiɛ wun wa.” Ɔ maan be toli i yili i asiɛ wun lɔ. I mmoja’n wie guali talɛ’n i wun, yɛ wie guali nnɛn kpanngɔ’m be wun. Zei i nnɛn kpanngɔ’m be tiatiali Zezabɛli su. 34 I sin’n, ɔ ɔli awlo, ɔ dili like yɛ ɔ nɔnnin su nzan. Kpɛkun ɔ seli kɛ: “Amun yaci, an nian bla sɔ mɔ be boli i sannzan’n i lika, yɛ an sie i. Afin ɔ ti famiɛn wa.”+ 35 Sanngɛ kɛ be ɔli i falɛ naan bé kó síe i’n, i ti kongloman’n nin i ja mun nin i sa ngbabua mun yɛ be wunnin be-ɔ.+ 36 Kɛ be sali be sin mɔ be ko kan kleli i’n, ɔ seli kɛ: “Ndɛ nga Zoova sinnin i sufuɛ Eli m’ɔ ti Tisibefuɛ’n i lika kannin’n yɛ w’a kpɛn su+ lɛ-ɔ. Ɔ seli kɛ: ‘Alua’m bé wá dí Zezabɛli fie ng’ɔ o Zizreɛli lɔ’n nun.+ 37 Yɛ Zezabɛli i fuɛn’n káci kɛ nnɛn wakasu sa fie ng’ɔ o Zizreɛli lɔ’n nun. Ɔ maan sran’m be su kwlá seman kɛ: “Zezabɛli yɛ ɔ o yɛ.”’”