Zɔbu

2 “Nanwlɛ, sran nga be si sa’n, be yɛle amun,*

kɛ amun ko wu’n, nn ngwlɛlɛ’n w’a wie!

 3 Sanngɛ n kusu n wun sa wlɛ* wie.

Amun timan kpa traman min.

?Wan yɛ ɔ siman sa sɔ mun-ɔn?

 4 Min janvuɛ mun yɛ be sri min-ɔn,+

sran m’ɔ su kpan flɛ Ɲanmiɛn naan ɔ tɛ su’n.+

Sran m’ɔ nanti seiin’n, mɔ be kwlá sacimɛn i wun’n yɛ be sri i-ɔ.

 5 Sran nga sa nunmɛn i su’n, ɔ buman ɲrɛnnɛn’n i like,

ɔ bu i kɛ be nga be ja’n w’a takaman kpa’n,* be yɛ sa ɲan be-ɔ.

 6 Awiefuɛ’m be tannin sua’m be bo ti fɔuun,+

yɛ be nga be klɔklɔ Ɲanmiɛn’n, be o be olɛ lɛ diin,+

be sɔfuɛ’m be amuin’m be o be sa nun.

 7 Sanngɛ yaci, usa nnɛn mun, bé klé ɔ like.

Usa anunman mɔ be tu sin nglo lɔ’n wie, bé kán wie klé wɔ.

 8 Annzɛ fa ɔ ɲin sie i asiɛ’n su,* ɔ́ klé ɔ like,

jenvie’n nun jue’m be kusu bé kán wie klé wɔ.

 9 ?Be nun onin yɛ ɔ siman kɛ

Zoova i sa’n yɛ ɔ yoli i sɔ liɛ’n niɔn?

10 Ninnge kwlaa nga be o nguan nun’n,

ɔ nin klɔ sran’m be kwlakwla be nguan’n be o i sa nun.+

11 Kɛ nga be taaman’n yɛ be fa nian aliɛ’n i fɛ’n+ sa’n,

be sukpɔ’n yɛ be fa tie ndɛ naan b’a wun ng’ɔ ti kpa nin ng’ɔ ti tɛ’n niɔn.

12 ?Nán kpɛnngbɛn mun yɛ ngwlɛlɛ’n wo be sa nun-ɔn?+

?Nán be nga be o lɛ w’a cɛ’n yɛ be wun sa wlɛ-ɔ?

13 Ngwlɛlɛ’n nin tinmin’n be o i wun lɔ.+

I yɛ ɔ wun sa wlɛ-ɔ, yɛ ɔ́ wá yó i klun sa’n.+

14 Kɛ ɔ bubu like kun’n, be kwlá kplɛnmɛn i kun.+

Kɛ ɔ ko ɲin like kun’n, sran fi kwlá tikeman.

15 Kɛ ɔ jran nzue mun’n, like kwlaa wu kee.+

Kɛ ɔ sunman be’n be yi asiɛ’n piɛ.+

16 Wunmiɛn’n nin ngwlɛlɛ ng’ɔ yo sa ye’n, be o i sa nun.+

Sran ng’ɔ su mlin’n, nin sran ng’ɔ mlin sran’n, be ti i liɛ.

17 Ɔ yo maan afɔtuɛ manfuɛ’m be nanti be ja ngbɛn,*

yɛ ɔ yo maan jɔlɛ difuɛ’m be di sinnzin.+

18 Ɔ ɲannji like nga famiɛn’m be cicili’n,+

yɛ ɔ fa cisu fa ci be bo.

19 Ɔ yo maan amuin’m be ɲrun jranfuɛ’m be nanti be ja ngbɛn,+

yɛ be nga be kwlalɛ’n w’a taka zia’n, ɔ yi be ase.+

20 Ɔ yo maan afɔtuɛ manfuɛ nga be lafi be su’n be kwlá ijɔman kun,

yɛ ɔ de ngwlɛlɛ’n sran oke’m* be sa nun.

21 Ɔ yo maan sran dandan mun be wun ɲannzuɛn,+

yɛ ɔ yo maan be nga be le kwlalɛ’n be yo fakafaka.*

22 Aosin’n nun ninnge nga be bo ti kploun’n, ɔ yi be nglo,+

yɛ ɔ fa aosin tritri kpa’n fa fite wia’n nun.

23 Ɔ yo maan nvlenvle’m

be yo dan naan ɔ́ núnnún be.

Ɔ yo maan nvlenvle’m be trɛ naan ɔ́ trá be kɔ́.

24 Ɔ yo maan nvle su kpɛnngbɛn’m be wunman sa wlɛ kun,

yɛ ɔ yo maan be wlan aawlɛ flɛnnɛn mɔ atin nunman nun’n i nun sa daan.+

25 Bé nánti’n be fuafua be sa aosin’n nun,+ kan like fi kpajaman lɛ’n.

Ɔ fa be wlan daan kɛ sran mɔ b’a nɔn nzan b’a bo’n sa.+