Ezai

20 Afuɛ nga Famiɛn Saagɔn m’ɔ ti Asiri famiɛn’n ɔ sunmannin Taatan’n* Asdɔdu+ lɔ’n, ɔ* ko tɔli Asdɔdu klɔ’n su yɛ ɔ fali klɔ’n.+ 2 Blɛ sɔ’n nun’n, Zoova kannin ndɛ kleli Amɔzu i wa Ezai.+ Ɔ seli i kɛ: “Kɔ, yi bajɛ tralɛ m’ɔ o ɔ wun’n, yɛ yi ɔ ja ngbabua’n.” I sɔ yɛ ɔ yoli-ɔ. Kɛ ɔ́ wlán sín’n, i wun ti kplɛn,* yɛ ɔ nanti i ja ngbɛn.

3 I sin’n Zoova seli kɛ: “Min sufuɛ Ezai nantili i wun kplɛn nin i ja ngbɛn afuɛ nsan naan i sɔ’n yo Ezipti+ nin Etiopi+ be nzɔliɛ like,+ naan ɔ yo sa ng’ɔ́ wá jú be su’n i nzɔliɛ. 4 I wafa kunngba’n, Asiri famiɛn’n wá fá be ng’ɔ trali be Ezipti lɔ’n,+ ɔ nin be ng’ɔ trali be Etiopi lɔ’n ɔ́ kɔ́. Kɛ bé kɔ́’n, i bakan-o, i kpɛnngbɛn-o, be wun kplɛn, be ja ngbɛn, yɛ be bondrɛ’n gúa su. Ɔ́ yó Ezipti i ɲannzuɛn like. 5 Etiopi mɔ be fa be wla guɛ i su’n, ɔ nin Ezipti mɔ be fa di be nuan’n* be ti’n, srɛ dan kpa wá kún be, yɛ ɲannzuɛn wá kún be. 6 Cɛn sɔ’n nun’n, be nga be tran nvle sɔ m’ɔ o jenvie’n i nuan’n i nun’n, bé sé kɛ: ‘Be mɔ e fa e wla e gua be su’n, mɔ e wanndi ɔli be sin kɛ be uka e naan be de e Asiri famiɛn’n i sa nun’n, an nian sa ng’ɔ juli be su’n. ?É yó sɛ naan y’a fite nun siɛn’n?’”