Zeremin

6 Famiɛn Zoziasi+ i blɛ su’n, Zoova seli min kɛ: “‘?A wunnin like nga Izraɛli m’ɔ ti bian kunndɛfuɛ’n yoli’n? Ɔ ɔli oka’m be kwlaa be ti su nglo lɔ, ɔ nin waka kwlaa nga be le nɲa kpanngban’n be bo ɔ ko boli tekle.+ 7 Ɔ nin i sɔ ngba’n n seli i titi kɛ ɔ sɛ i sin min wun.+ Sanngɛ w’a baman. Yɛ Zida kusu, i ɲin ta i niaan bla m’ɔ yo ninnge mun gblɛ nun’n.+ 8 Kɛ n wunnin i sɔ’n, n mannin Izraɛli m’ɔ ti kɛ bla kun m’ɔ kunndɛ bian i wun bo’n sa’n i yralɛ fluwa. Kpɛkun n kɛnnin i bo,+ i bian kunndɛlɛ’n ti.+ Sanngɛ srɛ w’a kunmɛn i niaan bla Zida m’ɔ yo ninnge mun gblɛ nun’n. I kusu ɔli ko boli tekle wie.+ 9 Ɔ seli i wun kɛ tekle bolɛ’n timan like tɛ. I ti’n, ɔ sacili nvle’n, ɔ yoli kɛ bla m’ɔ kunndɛ bian i wun bo’n sa. Yɛle kɛ ɔ sɔli yɔbuɛ mun nin waka mun.+ 10 Kannzɛ sa kwlaa sɔ’m be juli’n, i niaan bla Zida m’ɔ yo ninnge mun gblɛ nun’n, ɔ yoli kɛ ɔ sɛli i sin min wun wa sa, sanngɛ i awlɛn kwlaa nunman min su.’ Zoova yɛ ɔ kan sɔ-ɔ.”

11 Zoova seli min ekun kɛ: “Izraɛli m’ɔ ti kɛ bla kun m’ɔ kunndɛ bian i wun bo’n sa’n, ɔ kleli kɛ ɔ yo sa i nuan su tra Zida m’ɔ yo ninnge mun gblɛ nun’n.+ 12 Kɔ ko kan ndɛ nga kle be nga be tran nglo lɔ lika’n nun’n:+

“‘ Zoova waan yoo: “Ee Izraɛli, ɲin keklefuɛ, sa ɔ sin.+ N su faman ɔ wun ya.*+ Afin e nin sran e nanti klanman.” Zoova yɛ ɔ kan sɔ-ɔ.’” ‘“N su faman sa n sieman min klun sa trilili. 13 Ɔ li di i nanwlɛ kɛ a yoli sa tɛ. Afin a yoli ɲin kekle Zoova m’ɔ ti ɔ Ɲanmiɛn’n i su. A kunndɛli aofuɛ mun* lelele waka kwlaa nga be le nɲa kpanngban’n be bo. Sanngɛ w’a tieman min nuan ndɛ’n.” Zoova yɛ ɔ kan sɔ-ɔ.’”

14 Zoova waan yoo: “Ba ɲin keklefuɛ mun, amun sa amun sin. Afin min yɛ m’an kaci amun min* kpakpafuɛ’n niɔn. Ń fá amun. Ń fá sran kun klɔ kun su, yɛ ń fá sran nɲɔn awlobo kun nun. Kpɛkun ń fá amun kɔ́ Siɔn.+ 15 Ń fá kpɛnngbɛn nga be yo min klun sa’n* ń mán amun.+ Bé klé amun like. Yɛ bé klé amun ngwlɛlɛ. 16 Blɛ sɔ’n nun’n, amún sɔ́n kpanngbanngban, yɛ amún trɛ́ nvle sɔ’n nun.” Zoova yɛ ɔ kan sɔ-ɔ.+ “Be su boman ‘Zoova i aenguɛ’n i alaka’n’ i dunman kun. Ɔ su kpɛnman be klun. Be wla su kpɛnmɛn i su, be wla su lomɛn i. Yɛ be su yomɛn i uflɛ. 17 Blɛ sɔ’n nun’n, bé flɛ́ Zerizalɛmun kɛ Zoova i famiɛn bia.+ Nvlenvle’m be kwlaa be nunfuɛ’m be bo yó kun bé kó mánmán Zoova i dunman’n Zerizalɛmun lɔ.+ Be su yoman be bɔbɔ be klun akunndan tɛ’n i nuan su like kun.”

18 “Blɛ sɔ’n nun’n, Zidafuɛ mun nin Izraɛlifuɛ’m bé sán nun.+ Bé fín mɛn ng’ɔ o nglo lɔ lika’n nun’n i nun, kpɛkun mɛn nga n fa mannin amun nannan mun naan ɔ yo be aja like’n, bé wlú nun likawlɛ.+ 19 Yɛ n seli min wun kɛ: ‘I nun mɔ n fali wɔ n sieli i ba yasua’m be nun’n, mɔ n fali asiɛ’n i klanman kpafuɛ’n n mannin wɔ’n, ɔ yoli min fɛ dan. Nvlenvle’m be nun lika klanman kpafuɛ’n* yɛ ɔ o lɛ-ɔ.’+ N buli i kɛ á flɛ́ min kɛ ‘Min Si’ naan a su kaciman ɔ sin siman min. 20 Ɔo Izraɛlifuɛ mun, kɛ nga bla kun kpɛ i wun’n* i bo waka, m’ɔ jaso i bo’n sa’n, i kunngba’n, amun kusu amun kpɛli min bo waka.’+ Zoova yɛ ɔ kan sɔ-ɔ.”