Fluwa klikli nga Zan klɛli’n

5 Sran kwlaa ng’ɔ lafi su kɛ Zezi yɛ ɔ ti Klisi’n, ɔ ti Ɲanmiɛn i wa.+ Yɛ sran kwlaa ng’ɔ klo Siɛ’n, ɔ klo sran ng’ɔ ti i wa’n wie. 2 Like ng’ɔ kle kɛ e klo Ɲanmiɛn i mma mun’n+ yɛle Ɲanmiɛn i klolɛ’n nin i mmla’m be su nantilɛ’n. 3 Ɲanmiɛn i klolɛ’n yɛle kɛ e fɛ i mmla’m be su.+ Yɛ kusu i mmla’m be su falɛ yoman ya.+ 4 Afin sran kwlaa* ng’ɔ ti Ɲanmiɛn i wa’n, ɔ kwla mɛn’n.+ Yɛ like nga ti yɛ e kwla mɛn’n, yɛle kɛ e lafi i su.+

5 ?Wan yɛ ɔ kwla mɛn’n niɔn?+ ?Nán sran ng’ɔ lafi su kɛ Zezi yɛ ɔ ti Ɲanmiɛn i Wa’n niɔn?+ 6 Sran ng’ɔ bali’n, yɛle Zezi Klisi. Nzue nin mmoja yɛ maan ɔ bali-ɔ. Nán nzue ngunmin yɛ maan ɔ bali-ɔ,+ sanngɛ nzue nin mmoja yɛ maan ɔ bali-ɔ.+ Yɛ Ɲanmiɛn wawɛ’n di i ti lalo,+ afin Ɲanmiɛn wawɛ’n yɛ ɔ ti nanwlɛ’n niɔn. 7 Afin like nsan be di i ti lalo. 8 Be yɛle Ɲanmiɛn wawɛ’n,+ ɔ nin nzue’n,+ ɔ nin mmoja’n.+ Be nsan’n be di lalo kunngba’n.

9 Ndɛ nga klɔ sran’m be kan’n, e fa su. Sanngɛ ndɛ nga Ɲanmiɛn kan’n, ɔ ti dan tra klɔ sran’m be liɛ’n. Afin ndɛ nga Ɲanmiɛn kan’n yɛle i Wa’n i su ndɛ’n. 10 Sran ng’ɔ lafi Ɲanmiɛn i Wa’n su’n, Ɲanmiɛn i Wa’n i su ndɛ nga Ɲanmiɛn kannin’n wo i klun. Sanngɛ sran ng’ɔ lafiman Ɲanmiɛn su’n, ɔ bu Ɲanmiɛn ato buafuɛ,+ afin ɔ lafiman Ɲanmiɛn i Wa’n i su ndɛ nga Ɲanmiɛn kannin’n su. 11 Lalo nga Ɲanmiɛn di’n yɛle kɛ ɔ mannin e nguan m’ɔ leman awieliɛ’n.+ Yɛ nguan sɔ’n fin i Wa’n.+ 12 Sran ng’ɔ sɔ Ba’n i nun’n, ɔ le nguan sɔ’n. Sanngɛ sran ng’ɔ sɔman Ɲanmiɛn i Wa’n nun’n, ɔ leman nguan sɔ’n.+

13 Ń klɛ́ ndɛ nga ń blɛ́ amun mɔ an lafi Ɲanmiɛn i Wa’n i su’n,*+ naan an wun i wlɛ kɛ amun le nguan m’ɔ leman awieliɛ’n.+ 14 E lafi i su.* Like nga ti yɛ e lafi i su’n yɛle kɛ+ srɛlɛ kwlaa nga e srɛ i m’ɔ ti i klun su’n, ɔ sie i su tie.+ 15 Kɛ mɔ e lafi su kɛ srɛlɛ kwlaa nga e srɛ i’n, ɔ ti’n ti’n, e si kɛ ninnge nga e srɛli i kɛ ɔ fa man e’n, ɔ́ fá mán e. Afin e srɛli i kɛ ɔ fa ninnge sɔ mun man e.+

16 Sɛ sran kun wun kɛ i niaan’n su yo sa tɛ m’ɔ timan wie liɛ’n, maan ɔ srɛ Ɲanmiɛn, kpɛkun Ɲanmiɛn wá mán sran sɔ’n i nguan.+ Be nga be yo sa tɛ m’ɔ timan wie liɛ’n, be ndɛ yɛ n kan-ɔn. Sanngɛ sa tɛ kun o lɛ’n, ɔ ti wie liɛ.+ Nán sa tɛ sɔ’n i ti yɛ n se i kɛ ɔ srɛ Ɲanmiɛn-ɔn. 17 Sa kwlaa nga be yo m’ɔ timan su’n, ɔ ti sa tɛ.+ Sanngɛ sa tɛ kun o lɛ’n, ɔ timan wie liɛ.

18 E si kɛ sran kwlaa ng’ɔ ti Ɲanmiɛn i wa’n, ɔ faman sa tɛ yolɛ’n kacimɛn i nzuɛn. Sanngɛ sran ng’ɔ ti Ɲanmiɛn i wa’n* ɔ niɛn i su, yɛ klunwifuɛ’n kwlá yomɛn i like fi.+ 19 E si kɛ e ti Ɲanmiɛn liɛ, sanngɛ mɛn wunmuan’n wo klunwifuɛ’n i sa nun.+ 20 E si kɛ Ɲanmiɛn i Wa’n bali.+ Yɛ ɔ mannin e ngwlɛlɛ* naan e si sran ng’ɔ ti nanwlɛfuɛ’n. E nin sran ng’ɔ ti nanwlɛfuɛ’n e o nun+ i Wa Zezi Klisi ti. I yɛ ɔ ti Ɲanmiɛn Kpli ɔ nin nguan m’ɔ leman awieliɛ’n niɔn.+ 21 Ba kanngan mun, an nian amun wun su amuin’m be lika.+