Sa nga Akoto’m be yoli’n

7 Ɲanmiɛn ɲrun jranfuɛ dan’n usali kɛ: “?Ɔ yoli sɔ sakpa?” 2 Etiɛnin tɛli su kɛ: “Nja mun, min niaan nin min si mun, amun tie. Kwlaa naan e nannan Abraamun w’a ko tran Aran lɔ’n,+ Ɲanmiɛn mɔ i aɲrunɲanʼn ti danʼn, ɔ yili i wun nglo kleli i Mezopotamin lɔ. 3 Kpɛkun ɔ seli i kɛ: ‘Jaso ɔ mɛn’n nun, nin ɔ osufuɛ’m be wun wa naan kɔ mɛn nga ń wá klé wɔ’n nun lɔ.’+ 4 Yɛ ɔ jasoli Kaldefuɛ’m be mɛn’n nun ko trannin Aran lɔ-ɔ. Kɛ i si wuli’n,+ Ɲanmiɛn maan ɔ jasoli Aran lɔ, ɔ wa trannin mɛn nga andɛ amun tran nun yɛ’n i nun.+ 5 Kusu’n, w’a mɛnmɛn i aja like fi mɛn sɔ’n nun. W’a mɛnmɛn i i ja tiawlɛ kaan sa bɔbɔ. Sanngɛ ɔ seli kɛ mɛn sɔ’n wá káci i liɛ, naan ɔ́ káci i mma’m be liɛ wie.+ Kusu nn ɔ nin-a wuman ba. 6 Asa ekun’n, Ɲanmiɛn seli i kɛ i osu’n nunfuɛ’m bé káci aofuɛ mɛn kun m’ɔ timan be liɛ’n i nun. Yɛ lɔfuɛ’m bé fá be yó be kanga, kpɛkun bé klé be yalɛ lele afuɛ ya nnan (400).+ 7 Ɲanmiɛn seli kɛ: ‘Nvle nga bé káci kanga nun’n, ń dí i jɔlɛ.+ I sin’n, bé fín nvle sɔ’n nun bé fíte, kpɛkun bé wá sú min lika nga nun wa.’+

8 “Ɔ nin i be trali klɛn wlalɛ aenguɛ.+ I sin’n, ɔ wuli Izaaki.+ Kɛ ɔ dili lemɔcuɛ kun’n, ɔ wlɛli i klɛn.+ Kpɛkun Izaaki kusu wuli Zakɔbu,* yɛ Zakɔbu wuli awlobo kpɛn blu-nin-nɲɔn (12) mun. 9 Awlobo kpɛn’m be ɲin wa cili Zozɛfu,+ ɔ maan be yoli i atɛ Eziptifuɛ’m be sa nun.+ Sanngɛ Ɲanmiɛn jrɛnnin i sin.+ 10 Ɲanmiɛn deli i ɲrɛnnɛn kwlaa nga be tɔli i su’n, be nun. Ɔ mɛnnin i ngwlɛlɛ, yɛ ɔ yoli maan Faraɔn m’ɔ ti Ezipti famiɛn’n i klun jɔli i wun. Kpɛkun ɔ fɛli i sieli i Ezipti mɛn’n nin i awlo wunmuan’n su.+ 11 Sanngɛ awe wie wa kpɛnnin Ezipti nin Kanaan lɔ. W’a yoman blɛblɛ. Ɔ maan e nannan’m be ɲanman like be diman.+ 12 Zakɔbu tili i kɛ aliɛ o Ezipti mɛn’n nun lɔ. Ɔ maan ɔ sunmannin e nannan mun lɔ. Kpɛ klikli nga ɔ́ súnman be lɔ’n yɛ ɔ o lɛ-ɔ.+ 13 I kpɛ nɲɔn su’n, Zozɛfu fɛli i wun kleli i niaan mun, ɔ maan Faraɔn wa sili Zozɛfu i osufuɛ mun.+ 14 Zozɛfu ko mɛnnin i si Zakɔbu i ngaliɛ kɛ ɔ nin i osufuɛ’m be kwlaa be bla.+ Yɛ sran ableso-nin-nnun (75) be jasoli be mɛn’n nun be ɔli-ɔ.+ 15 Ɔ maan Zakɔbu ɔli Ezipti,+ yɛ ɔ wuli lɔ.+ E nannan’m be kusu be wuli lɔ wie.+ 16 Be fali be ɔli Sisɛmun. Asieliɛ nga Abraamun fali sika toli i Amɔɔ i mma’m be sa nun Sisɛmun lɔ’n, i nun yɛ be sieli be-ɔ.+

17 “Kɛ nda nga Ɲanmiɛn tali Abraamun’n i su kpɛnlɛ blɛ’n mantannin’n, e nvle’n nunfuɛ’m be wa sɔnnin kpanngban kpa Ezipti mɛn’n nun lɔ. 18 Sanngɛ famiɛn uflɛ m’ɔ siman Zozɛfu’n,+ ɔ wa sieli Ezipti mɛn’n. 19 Famiɛn sɔ’n lakali e nvle’n nunfuɛ mun, ɔ miannin siɛ mun naan be yaci be mma nɔnman’m be lɛ, kɛ ɔ ko yo naan b’a kaman nguan nun’n ti.+ 20 Blɛ sɔ’n nun yɛ be wuli Moizi-ɔ. Ɲanmiɛn ɲrun bɔbɔ’n, ɔ ti klanman. Be tɛli i i si i awlo’n nun anglo nsan.+ 21 Sanngɛ kɛ be yili i blo’n,+ Faraɔn i wa bla’n fɛli i, naan w’a tɛ i kɛ i bɔbɔ i klun ba sa.+ 22 Ɔ maan be fali Eziptifuɛ’m be ngwlɛlɛ’n i kwlaa kleli Moizi. I sɔ’n ti’n, ɔ si ijɔ kpa, kpɛkun i sa si like yo.+

23 “Kɛ ɔ ɲannin afuɛ ablanan’n (40), ɔ fali ajalɛ kɛ* ɔ́ kó nían i niaan Izraɛlifuɛ’m be osu.+ 24 Kɛ ɔ wunnin kɛ Eziptifuɛ kun su yo i niaan Izraɛlifuɛ kun i tɛtɛ’n, ɔ jrɛnnin i niaan’n i sin. Kpɛkun ɔ kunnin Eziptifuɛ’n. 25 Ɔ buli i kɛ i niaan’m bé wún i wlɛ kɛ Ɲanmiɛn su sin i lika de be. Sanngɛ b’a wunmɛn i wlɛ sɔ. 26 Kɛ aliɛ cɛnnin’n, ɔ́ fíte i niaan’m be su-ɔ, be su di utre. Ɔ maan ɔ kunndɛli kɛ ɔ́ síesíe be afiɛn. I sɔ’n ti’n, ɔ seli kɛ: ‘Nja mun, amun ti niaan. ?Ngue ti yɛ amun yo amun wiengu tɛtɛ sɔ-ɔ?’ 27 Sanngɛ kun ng’ɔ su yo i wiengu kun’n i tɛtɛ’n suli i bo, naan w’a se i kɛ: ‘?Wan yɛ ɔ sieli wɔ kɛ a yo e su kpɛn nin e jɔlɛ difuɛ-ɔ? 28 ?A kunndɛ kɛ á kún min wie, kɛ nga anunman’n a fa kunnin Eziptifuɛ’n sa?’ 29 Kɛ Moizi tili ndɛ sɔ’n, ɔ wanndi ko trannin aofuɛ, Madian mɛn’n nun lɔ. I sin’n, ɔ wuli ba yasua nɲɔn lɔ.+

30 “Kɛ afuɛ ablanan (40) sinnin’n, anzi kun yili i wun nglo kleli i Sinai Oka’n i wun lɛ aawlɛ flɛnnɛn’n nun. Ɔ o susrɛ kun m’ɔ ti owieowie mɔ sin o nun’n i nun.+ 31 Kɛ Moizi wunnin i sɔ’n, ɔ boli i nuan. Sanngɛ kɛ ɔ wunngeli lɔ kɛ ɔ́ kó níɛn i kpa’n, ɔ tili Zoova* i nɛn’n. Ɔ seli kɛ: 32 ‘N ti ɔ nannan’m be Ɲanmiɛn. N ti Abraamun nin Izaaki nin Zakɔbu be Ɲanmiɛn.’+ Yɛ Moizi boli usulɛ bo-ɔ. Srɛ m’ɔ kun i’n ti’n, w’a kwlá nianman lɔ kun. 33 Zoova* seli i kɛ: ‘Yi ɔ ja ngbabua’n. Afin lika nga a jin nun lɛ’n ti min liɛ klonglo. 34 N wunnin afɛ ng’ɔ o min sran’m be su Ezipti lɔ’n, yɛ n tili kplinlɛ mɔ be kplin’n.+ I sɔ’n ti’n, n bali be delɛ. Nian, ń má súnman wɔ Ezipti lɔ.’ 35 Moizi kunngba sɔ’n, be kacili be sin be sili i. Afin be seli kɛ: ‘?Wan yɛ ɔ sieli wɔ kɛ a yo e su kpɛn nin e jɔlɛ difuɛ-ɔ?’+ Kusu nn sran sɔ’n yɛ Ɲanmiɛn sunmɛnnin i+ kɛ ɔ sie be naan ɔ de be-ɔ. Ɔ sinnin anzi ng’ɔ fiteli i ɲrun susrɛ’n nun’n i lika naan w’a sunmɛn i. 36 Bian sɔ’n fali be fiteli.+ Ɔ yoli abonuan sa mun nin sa dandan mun Ezipti mɛn’n nun lɔ,+ ɔ nin Jenvie Ɔkwlɛ’n+ su lɔ, ɔ nin aawlɛ flɛnnɛn’n nun lɔ lele afuɛ ablanan (40).+

37 “Moizi sɔ’n seli Izraɛlifuɛ’m be kɛ: ‘Ɲanmiɛn ɔ́ wá fá sran kun amun niaan’m be nun mán amun naan ɔ ijɔ i nuan kɛ min sa.’+ 38 Bian sɔ’n wo be nga be yiali aawlɛ flɛnnɛn’n nun lɔ’n be nun wie. Anzi kun+ kannin ndɛ kleli i,+ ɔ nin e nannan mun Sinai Oka’n su lɔ. Kpɛkun be fali Ɲanmiɛn i ndɛ m’ɔ le ta’n be mɛnnin i kɛ ɔ fa man e.+ 39 E nannan’m be ɲinfu be ɲin w’a yimɛn i, be yili i blo.+ Kpɛkun be wla loli Ezipti mɛn’n.+ 40 Be seli Aarɔn kɛ: ‘Yo ɲanmiɛn wie mun man e naan be dun e ɲrun mmua. Afin Moizi sɔ m’ɔ fali e Ezipti mɛn’n nun lɔ bali’n, e siman sa nga w’a ju i su’n.’+ 41 Ɔ maan be yoli nannin ba kun blɛ sɔ’n nun. Kpɛkun be yili tɛ mannin amuin sɔ’n. Be dili be sa nuan like sɔ mɔ be yoli’n, i su aklunjɔɛ.+ 42 I sɔ’n ti’n, Ɲanmiɛn yili be blo. Ɔ maan be sɔli ɲanmiɛn su lɔ sonja mun,+ kɛ nga be klɛli i Ɲanmiɛn nuan ijɔfuɛ’m be fluwa’n nun’n sa. Be klɛli i kɛ: ‘?Izraɛlifuɛ mun, ninnge nga amun fa mannin’n, ɔ nin tɛ nga amun yili be afuɛ ablanan (40) aawlɛ flɛnnɛn’n nun lɔ’n, amun bu i kɛ min yɛ amun yoli i kwlaa sɔ’n mannin min-ɔn? 43 Molɔki+ i tannin sua’n, ɔ nin amuin Refan i nzraama’n, yɛ amun fali-ɔ. Amun yoli amuin sɔ’m be nzɔliɛ ninnge mun, kpɛkun amun sɔli be. I sɔ’n ti’n, ń wá fá amun ń kɔ́ Babilɔnin’n i sin lɔ.’+

44 “Aawlɛ flɛnnɛn’n nun lɔ’n, tannin sua’n* wo e nannan’m be sa nun. Kɛ Ɲanmiɛn kán ndɛ klé Moizi’n, ɔ seli i kɛ ɔ nian ng’ɔ wunnin i’n su yo.+ 45 Tannin sua sɔ’n yoli e nannan’m be liɛ. Kpɛkun be nin Zozie be fa ɔli be nga Ɲanmiɛn fuannin be e nannan’m be ɲrun’n,+ be mɛn’n nun lɔ.+ Ɔ kali lɔ lele Davidi i blɛ su. 46 Ɲanmiɛn klun jɔli i wun. Ɔ maan ɔ srɛli atin kɛ ɔ́ kplán sua kun mán Zakɔbu i Ɲanmiɛn’n.+ 47 Sanngɛ Salomɔn yɛ ɔ wa kplannin sua kun mɛnnin i-ɔ.+ 48 Sanngɛ kɛ nga Ɲanmiɛn nuan ijɔfuɛ’n fa kannin’n sa’n, Ɲanmiɛn m’ɔ o Like Kwlaa Ti Su’n, ɔ tranman sua mɔ klɔ sran kplan’n i nun.+ Ɔ seli kɛ: 49 ‘Zoova* waan ɲanmiɛn su’n ti min famiɛn bia,+ yɛ asiɛ’n ti min ja takatakawlɛ.+ ?Sua wafa onin yɛ amún kplán mán min-ɔn? ?Annzɛ lika onin nun yɛ ń trán ń ló wunmiɛn-ɔn? 50 ?Nán min sa’n yɛ ɔ yoli ninnge kwlaa sɔ mun-ɔn?’+

51 “Amun ɲin su ti kekle. Amun awlɛn’n w’a kete, yɛ amun a tannin amun su mun. Amun loman amun wun manman Ɲanmiɛn wawɛ’n naan ɔ sie amun. Like nga amun nannan’m be yoli’n, i wie yɛ amun yo-ɔ.+ 52 ?Ɲanmiɛn nuan ijɔfuɛ onin yɛ amun nannan’m b’a klemɛn i yalɛ-ɔ?+ Be kunnin be nga be kannin Ɲanmiɛn i sufuɛ kpa’n i balɛ’n i ndɛ’n.+ Sran sɔ’n, amun yili i mannin, yɛ amun kunnin i.+ 53 Amun yɛ anzi’m be fali Mmla’n mannin amun-ɔn,+ sanngɛ amun a nantiman su.”

54 Nanwlɛ, kɛ be tili ndɛ sɔ mun’n, be fali ya dan kpa. I sɔ’n ti’n, be waan bé yó i like yaya. 55 Sanngɛ i liɛ’n, kɛ Ɲanmiɛn wawɛ’n wo i su’n ti’n, ɔ mɛnnin i ɲin su niannin ɲanmiɛn su lɔ, naan w’a wun Ɲanmiɛn i aɲrunɲan’n. Kpɛkun ɔ wunnin Zezi, ɔ jin Ɲanmiɛn i sa fama su lɛ,+ 56 naan w’a se kɛ: “An nian! N wun kɛ ɲanmiɛn su lɔ’n w’a tike. Yɛ sran Wa’n+ jin Ɲanmiɛn i sa fama su.”+ 57 Kɛ be tili ndɛ sɔ’n, be kpannin kekle kpa. Be fali be sa be tannintanninnin be su mun, kpɛkun be kwlaa be ko tɔli i su. 58 Be cuɛnnin i ɔli klɔ’n i sin lɔ, naan b’a ko finfin i yɔbuɛ.+ Be nga be tɔnnin i suɛn’n+ be fali be tralɛ mun guɛli i gbanflɛn kun mɔ be flɛ i kɛ Sɔlu’n i bo lɛ.+ 59 Kɛ bé fínfín Etiɛnin i yɔbuɛ’n, ɔ mɛnnin i nɛn’n su seli kɛ: “E Min Zezi, ń fá min nguan’n* ń wlá ɔ sa nun.” 60 Ɔ kotoli, kpɛkun ɔ mɛnnin i nɛn’n su kekle kpa seli kɛ: “Zoova,* yaci sa tɛ nga cɛ be.”+ Kɛ ɔ kannin ndɛ sɔ’n, yɛ ɔ wuli-ɔ.