1 Be Ɲoliɛ

5 Ribɛnin+ m’ɔ ti Izraɛli i wa kpɛn’n i mma mun yɛ. Ɔ ti ba kpɛn sɔ, sanngɛ ɔ kunndɛli i si i yi’m be nun kun* ti’n,+ be fɛli i awuliɛ kpɛn’n mannin Izraɛli i wa Zozɛfu.+ I sɔ’n ti’n, kɛ bé klɛ́ sran’m be dunman be awlobo’m be fluwa’m be nun’n, b’a klɛmɛn i dunman kɛ i yɛ ɔ ti ba kpɛn’n niɔn. 2 Zida+ ɲannin ɲrun trɛli i niaan bian mun. Asa ekun’n, i osu’n nun yɛ sran ng’ɔ́ yó ɲrun dinfuɛ’n fin-ɔn.+ Sanngɛ awuliɛ kpɛn’n yoli Zozɛfu liɛ. 3 Ribɛnin m’ɔ ti Izraɛli i wa kpɛn’n i mma mun yɛle Anɔku, nin Palu, nin Ɛzrɔn, ɔ nin Kaamin.+ 4 Zoɛli i mma mun yɛ: Semaia ti i wa, Gɔgu ti i wa, Simei ti i wa, 5 Mise ti i wa, Reaya ti i wa, Baali ti i wa, 6 yɛ Beɛra ti i wa. Beɛra sɔ’n ti Ribɛnin i osu’n nunfuɛ’m be su kpɛn’n kun. I yɛ Tilgati-Pilnezɛɛ+ m’ɔ ti Asiri lɔ famiɛn’n trɛli i ɔli’n niɔn. 7 I niaan mɔ be klɛli be nin be awlofuɛ’m be dunman’n mun yɛ: Zeiɛli m’ɔ ti kpɛnngbɛn’n, nin Zakari, 8 ɔ nin Bela. Bela ti Azazi i wa. Azazi kusu ti Sema i wa, yɛ Sema ti Zoɛli i wa. Bela i awlofuɛ’m be tranwlɛ’n fɛ i Aroɛɛ+ lele fa ju Nebo nin Baali-Meɔn.+ 9 Be nnɛn’m be wa sɔnnin dan Galaadi+ lika’n nun lɔ ti’n, lika nga be ko trannin’n fɛ i wia afiliɛ lɔ lele fa gua aawlɛ flɛnnɛn’n su lɔ. Aawlɛ sɔ’n bo i bo Efrati Nzue’n+ i nuan lɔ. 10 Saili blɛ su’n, be fali alɛ wlali Agaafuɛ’m be sin. Kpɛkun be kwlali be. Ɔ maan be ko trannin be tannin sua’m be nun, Galaadi i wia afiliɛ lɔ lika wunmuan’n nun.

11 Gadi i osu’n nunfuɛ’m be trannin be wun koko lɛ. Be tranwlɛ’n fɛ i Basan asa’n su lɔ lele fa ju Saleka.+ 12 Zoɛli yɛ ɔ ti be su kpɛn’n niɔn. Sran ng’ɔ mɛntɛn i’n yɛle Safamun. Zanai nin Safati be o Basan lɔ wie. 13 Be osufuɛ mun yɛle Misɛli, nin Mesulamun, nin Saba, nin Zorai, nin Zakan, nin Zia, ɔ nin Ebɛɛ. Be kwlaa be ti nso. 14 Abiaili i mma mun yɛ be o lɛ-ɔ. Abiaili sɔ’n ti Uri i wa, Uri ti Zaroa i wa, Zaroa ti Galaadi i wa, Galaadi ti Misɛli i wa, Misɛli ti Zesisai i wa, Zesisai ti Zado i wa, Zado ti Bizi i wa. 15 Gunin i wa Abdiɛli i wa liɛ Ai ti be su kpɛnngbɛn. 16 Be trannin Galaadi lɔ,+ Basan asa’n su lɔ.+ Yɛ be trannin klɔ nga be o Basan asa’n su lɔ’n* be su wie, nin Sarɔn lɔ lika nga be ti nnɛn’m be didiwlɛ’n lele fa ju lika sɔ’m be tiwa lɔ. 17 Be klɛli be dunman be awlobo’m be fluwa’m be nun. Zotamun+ m’ɔ yoli Zida famiɛn’n, nin Zeroboamun*+ m’ɔ yoli Izraɛli famiɛn’n, be blɛ su yɛ be klɛli be dunman-ɔn.

18 Ribɛnin akpasua’n, nin Gadi akpasua’n, nin Manase akpasua’n i bue kun be nun sonja kpakpa’m be ti akpiakpi ablanan-nin-nnan nin ya nso ablesiɛn (44.760). Sonja sɔ’m be si ɲrɛn nin tokofi nun tra, yɛ be si ta to. Asa ekun’n, be si alɛ kun kpa. 19 Be fali alɛ wlali Agaafuɛ mun,+ nin Zetiri, nin Nafisi,+ ɔ nin Nodabu be sin. 20 Kɛ be nin be kún’n, be kpan flɛli Ɲanmiɛn kɛ ɔ uka be. Ɲanmiɛn kusu tɛli be su klanman, afin be fali be wla’n guɛli i su. Ɲanmiɛn ukali be, ɔ fali Agaafuɛ mun nin be kwlaa nga be o be sin’n wlali be sa nun.+ 21 Be trali be ɲɔnngɔnmin akpiakpi ablenun (50.000), nin bua akpiakpi ya nnyɔn akpiakpi ablenun (250.000), nin aflunmun akpi nɲɔn (2.000). Asa ekun’n, be trali sran akpiakpi ya (100.000). 22 Be kunnin sran kpanngban kpa. Afin Ɲanmiɛn Kpli yɛ ɔ kunnin alɛ’n mannin be-ɔ.+ Yɛ be trannin be lika’n nun lɛ lele naan b’a tra be b’a wɔ.+

23 Manase akpasua’n i bue kun nunfuɛ’m+ be tranwlɛ’n fɛ i Basan lɔ lele fa ju Baali-Ɛrmɔn, nin Sɛnii, nin Ɛrmɔn Oka’n+ i asa’n su lɔ. Be sɔnnin kpa. 24 Be si’m be awloboawlobo’m be su kpɛnngbɛn mun yɛ: “Efɛɛ, Isei, Eliɛli, Azriɛli, Zeremin, Ɔdavia, Yadiɛli. Be ti safuɲrɛn ngunmin. Asa ekun’n, be dunman’n fuli yɛ be ti be si’m be awloboawlobo’m be su kpɛnngbɛn. 25 Sanngɛ be nin be si’m be Ɲanmiɛn’n b’a nantiman klanman. Be suli mɛn’n sɔ’n nunfuɛ’m be ɲanmiɛn liɛ mun,*+ kusu nn Ɲanmiɛn nunnunnin nvle sɔ’m be nunfuɛ mun naan w’a fa be mɛn’n w’a man Izraɛlifuɛ mun. 26 I sɔ’n ti’n, Ɲanmiɛn suli Pili m’ɔ ti Asiri famiɛn’n+ (Yɛle kɛ Tilgati-Pilnezɛɛ+ m’ɔ ti Asiri famiɛn’n) i bo naan ɔ tra Ribɛninfuɛ mun, nin Gadifuɛ mun, nin Manase akpasua’n i bue kun nunfuɛ mun wɔ. Ɔ trali be ɔli Ala, nin Abɔɔ, nin Ara, ɔ nin Gozan’n+ i nuan lɔ. Andɛ nin andɛ’n, be te o lɔ.