Fluwa nɲɔn su nga Pɔlu klɛli Timote’n

1 Min Pɔlu, nguan mɔ Ɲanmiɛn waan sran’m bé ɲɛ́n i Klisi Zezi i dunman nun’n ti’n,+ Ɲanmiɛn maan n ti Klisi Zezi i akoto. 2 Ń klɛ́ fluwa nga ń blɛ́ wɔ Timote mɔ a ti min awlɛn su ba’n:+

Maan e Si Ɲanmiɛn nin e Min Klisi Zezi be yo wɔ ye, yɛ be si wɔ aunnvɔɛ, yɛ maan be yo naan a di fɔundi.

3 Ń lá Ɲanmiɛn i ase. Kɛ ń sú i’n, min klun titiman min, kɛ nga min nannan’m be fa yoli’n sa. Kɛ ń srɛ́ i kɔnguɛ nin wia nun’n, min wla fiman ɔ su. 4 Min wla kpɛn sunlɛ mɔ a sunnin’n su, yɛ n kunndɛ kpa kɛ ń wún wɔ naan min klun jɔ kpa. 5 Afin min wla te kpɛn Ɲanmiɛn su mɔ a lafi sakpa’n su.+ Ɔ nannan Loisi nin ɔ nin Enisi be dun mmua lafili Ɲanmiɛn su, yɛ n si kɛ a lafi Ɲanmiɛn su kɛ be sa wie.

6 I sɔ’n ti’n, like mɔ kɛ n fali min sa n fuali ɔ su’n Ɲanmiɛn fa cɛli wɔ’n,+ ń sé wɔ kɛ a yo naan ɔ jue kɛ sin sa. 7 Afin Ɲanmiɛn w’a fɛmɛn i wawɛ’n w’a manman e kɛ srɛ kun e.+ Sanngɛ ɔ fa mannin e kɛ e ɲan wunmiɛn,+ e klo Ɲanmiɛn nin sran, yɛ e si ngwlɛlɛ. 8 I sɔ’n ti’n, nán ɲannzuɛn kun wɔ e Min’n i ndɛ kanlɛ nun,+ yɛ nán ɲannzuɛn kun wɔ min mɔ i dunman nun’n, n ti bisuafuɛ’n ti. Sanngɛ ɲrɛnnɛn nga e wun i jasin fɛ’n ti’n, maan ɔ sɔn ɔ nun+ Ɲanmiɛn mɔ a fa ɔ wla guɛ i su’n i fanngan nun.+ 9 Ɔ deli e, yɛ ɔ flɛli e kɛ e yo i liɛ klonglo.+ Nán sa kpa mɔ e yo’n ti-ɔ, sanngɛ i bɔbɔ i klun sa’n nin ye m’ɔ kunndɛ kɛ ɔ́ yó e’n be ti-ɔ.+ Ye sɔ’n yɛ Klisi Zezi ti’n Ɲanmiɛn yoli e’n niɔn. Ɔ yoli e ye sɔ’n i osu w’a cɛ kpa. 10 Sanngɛ siɛn’n, e Defuɛ Klisi Zezi i wun nglo yilɛ’n ti’n, ye sɔ’n i ɲin fite weiin.+ Ɔ nunnunnin wie’n,+ yɛ jasin fɛ’n+ ti’n ɔ kleli e wafa nga é ɲán nguan’n+ nin like nga e ko yo naan e wunnɛn’n w’a saciman’n.+ 11 Jasin fɛ sɔ’n ti’n, be kpali min kɛ n yo jasin bofuɛ, n yo akoto, yɛ n yo like klefuɛ.+

12 I sɔ’n ti yɛ n kusu n su wun min ɲrun-ɔn.+ Sanngɛ ɲannzuɛn kunman min.+ Afin n si Sran nga n lafi i su’n, yɛ n lafi su kɛ like nga n fa wlɛli i sa nun’n, ɔ́ nían su lele cɛn sɔ’n jú.+ 13 Ndɛ kpakpa nga n kan kleli wɔ’n, nian be su nanti titi.+ Kɛ́ á yó sɔ’n, yi sulafilɛ’n nin klolɛ’n be nglo Klisi Zezi mɔ a nin i be o nun’n ti. 14 Like kpa sɔ mɔ be fa mannin wɔ m’ɔ o e nun’n, maan Ɲanmiɛn wawɛ’n uka ɔ naan a nian su kpa.+

15 A si kɛ be kwlaa nga be o Azi mɛn’n+ nun lɔ’n b’a kaci be sin b’a si min. Fizɛli nin Ɛɛmozɛnin be o be nun wie. 16 Maan e Min’n si Onezifɔɔ+ i awlofuɛ’m be aunnvɔɛ. Afin blɛ sunman nun’n, ɔ wlali min fanngan. Yɛ jrɔkɔ mɔ be fa cili min bisua wa’n, w’a yomɛn i ɲannzuɛn. 17 I kpa bɔbɔ’n, kɛ ɔ juli Rɔmun wa’n, ɔ kunndɛli min kpa, yɛ ɔ wunnin min. 18 Maan e Min’n yo maan Zoova* si i aunnvɔɛ cɛn ng’ɔ sieli’n nun. Ninnge kwlaa ng’ɔ yo mannin min Efɛzi lɔ’n, a si be kpa.