Sa nga Akoto’m be yoli’n

13 Ɲanmiɛn nuan ijɔfuɛ mun nin like klefuɛ wie’m be o Antiɔsu lɔ asɔnun’n nun.+ Be yɛle Baanabasi nin Simeɔn mɔ be flɛ i ekun kɛ Nizɛɛ’n, ɔ nin Lisiisi m’ɔ fin Sirɛnin’n, ɔ nin Manaɛn m’ɔ nin Erɔdu m’ɔ ti Galile asa’n i siefuɛ’n be dili suklu laa’n, yɛ Sɔlu. 2 Le kun’n, kɛ bé sú Zoova* mɔ bé cí nglɛmun’n, Ɲanmiɛn wawɛ’n seli kɛ: “Amun kpa Baanabasi nin Sɔlu+ sie be ngunmin naan be di junman nga ti yɛ n flɛli be’n.”+ 3 Kɛ be cili nglɛmun mɔ be srɛli Ɲanmiɛn wieli’n, be fali be sa fuali be su naan b’a yaci be nun b’a wɔ.

4 Ɲanmiɛn wawɛ’n maan yasua sɔ’m be ɔli Selesi. Kpɛkun be ko fali mmeli lɔ be ɔli Sipri. 5 Kɛ be juli Salaminin lɛ’n, be kannin Ɲanmiɛn ndɛ’n Zifu’m be Ɲanmiɛn sulɛ sua’m be nun. Zan yɛ ɔ ti be ukafuɛ-ɔ.+

6 Kɛ be boli jasin fɛ’n lika sɔ’n i bue kwlaa su lele fa juli Pafɔsu lɔ’n, be nin Zifu bian kun m’ɔ suan Bar-Zezi’n be yiali. Ɔ ti wunnzue yifuɛ, kpɛkun ɔ tɔn i wun suɛn kɛ ɔ ti Ɲanmiɛn nuan ijɔfuɛ. 7 Ɔ di junman man Sɛɛzisi Polisi m’ɔ ti klɔ dan su kpɛn’n.* Sɛɛzisi Polisi sɔ’n si ngwlɛlɛ kpa. Ɔ seli Baanabasi nin Sɔlu be kɛ be bla, afin ɔ klo kpa kɛ ɔ́ tí Ɲanmiɛn ndɛ’n. 8 Sanngɛ wunnzue yifuɛ sɔ’n mɔ be flɛ i ekun kɛ Elimasi’n (i bo’n yɛle “wunnzue yifuɛ”) ɔ tanndannin be ɲrun. I waan ɔ́ yó sɔ naan klɔ dan su kpɛn’n* w’a lafiman e Min’n su. 9 Ɔ maan Ɲanmiɛn wawɛ’n jrali Sɔlu mɔ be flɛ i ekun kɛ Pɔlu’n i su. Kpɛkun ɔ niannin Elimasi siin, 10 naan w’a se kɛ: “Gblɛ’n i wafawafa’n kwlaa nin sa tɛtɛ’n kwlaa b’a yi wɔ piɛ. A ti Suɛn Tɔnfuɛ’n i wa.+ A kpɔ ninnge kwlaa nga be ti kpa’n. ?Ngue ti yɛ ninnge nga Zoova* siesie be sɛsɛ’n, a yaciman be sacilɛ-ɔ? 11 Nian! Zoova* i sa su wa kan wɔ. Ɔ ɲin wá sí. Á dí le nɲɔn kun a su wunman wia’n i kpajalɛ’n.” Be ja nun lɛ’n, i ɲin su luli i tuun. Ɔ maan ɔ kpɛ i wun daan ɔ kunndɛ sran naan ɔ trɛ i sa kle i atin. 12 Kɛ klɔ dan su kpɛn’n* wunnin sa ng’ɔ juli’n, ɔ ka lɛ lafili e Min’n su. Afin like ng’ɔ suɛnnin i Zoova* su’n, ɔ boli i nuan.

13 I sin’n, Pɔlu nin i wiengu’m be fali mmeli Pafɔsu lɛ be ɔli Pɛɛze m’ɔ o Panfili lɔ’n su. Sanngɛ Zan+ yacili be, ɔ sɛli i sin Zerizalɛmun lɔ.+ 14 Be jasoli Pɛɛze lɛ be ɔli Antiɔsu m’ɔ o Pizidi lɔ’n su. Wunmiɛn-lolɛ-cɛn’n nun’n, be wluli Zifu’m be Ɲanmiɛn sulɛ sua kun nun.+ Be trannin ase lɛ. 15 Kɛ be wieli Mmla’n ɔ nin Ɲanmiɛn nuan ijɔfuɛ’m be fluwa’m be nun kanngan’n,+ Zifu’m be Ɲanmiɛn sulɛ sua’n i su kpɛn’m be seli be kɛ: “Nja mun, aniaan mun, sɛ amun waan amún kán ndɛ wie fá wlá sran’m be fanngan’n, amun kan.” 16 Ɔ maan Pɔlu jaso jrannin, kpɛkun ɔ mɛnnin i sa’n su kɛ be muan be nuan, naan w’a se be kɛ:

“Nja mun, Izraɛlifuɛ mun nin amun kwlaa nga amun sro Ɲanmiɛn’n, amun sie amun su. 17 Izraɛlifuɛ’m be Ɲanmiɛn’n kpali e nannan mun. Kpɛkun i nun nga be ti aofuɛ Ezipti mɛn’n nun lɔ’n, ɔ yoli maan be ɲannin ɲrun. Asa kusu’n, ɔ fɛli i tinmin dan’n* fali be mɛn sɔ’n nun fiteli.+ 18 Ɔ trɛli i awlɛn be wun afuɛ kɔe ablanan (40) aawlɛ flɛnnɛn’n nun lɔ.+ 19 Kɛ ɔ nunnunnin nvle nso Kanaan mɛn nun lɔ’n, ɔ fali nvle sɔ’m be mɛn’n mannin be.+ 20 I kwlaa sɔ’n dili afuɛ kɔe ya nnan ablenun (450).

“Kɛ blɛ sɔ’n sinnin’n, ɔ mannin be jɔlɛ difuɛ lele fa juli Ɲanmiɛn nuan ijɔfuɛ Samiɛli blɛ su.+ 21 I sin’n, be seli kɛ be man be famiɛn kun.+ Yɛ Ɲanmiɛn fali Kisi i wa yasua Saili mannin be-ɔ. Ɔ ti Bɛnzamɛn akpasua’n nunfuɛ.+ Ɔ dili famiɛn afuɛ ablanan (40). 22 Kɛ ɔ tuli i’n, ɔ sieli Davidi famiɛn mannin be.+ Ɔ kɛnnin i ndɛ seli kɛ: ‘N wunnin Zese i wa yasua Davidi.+ Ɔ ti min awlɛn su sran.+ Like kwlaa nga n klo kɛ ɔ yo’n yɛ ɔ́ yó-ɔ.’ 23 Kɛ nga Ɲanmiɛn bɔbɔ fa tali nda sa’n, ɔ fali defuɛ kun i mma’m be nun mannin Izraɛlifuɛ mun. Defuɛ sɔ’n yɛle Zezi.+ 24 Yɛ kwlaa naan defuɛ sɔ’n w’a ba’n, Zan kan kleli Izraɛlifuɛ’m be kwlaa kɛ be yo be batɛmun be fa kle kɛ b’a kaci be akunndan’n.+ 25 Kɛ Zan wá wíe i junman’n i dí’n, ɔ seli kɛ: ‘?Amun bu i kɛ sran onin yɛle min? Nán min yɛle sran sɔ’n. Sanngɛ Sran kun su ba min sin. Min nin i ngbabua ɲanman’n i ɲannjilɛ fataman.’+

26 “Nja mun, aniaan mun. Amun mɔ amun ti Abraamun i awlobo’n nun ba’n, ɔ nin be nga be o amun afiɛn mɔ be sro Ɲanmiɛn’n, e yɛ be kannin sran delɛ ndɛ sɔ’n be kleli e-ɔ.+ 27 Afin Zerizalɛmunfuɛ mun nin be siefuɛ mun b’a wunman defuɛ sɔ’n i wlɛ. Sanngɛ i jɔlɛ nga be dili i lɛ’n, ɔ yiali ndɛ nga Ɲanmiɛn nuan ijɔfuɛ’m be kannin+ mɔ wunmiɛn-lolɛ-cɛn kwlaa nun’n be kanngan nun sran’m be ɲrun’n, i nuan. 28 B’a wunman sa tɛ fi mɔ be kwla jran su be kun i-ɔ.+ Ɔ nin i sɔ’n ngba’n, be seli Pilati kɛ maan be kun i.+ 29 Kɛ be wieli i wun ndɛ kwlaa nga be klɛli’n i su sa’m be yo’n, be fɛli i waka’n su be jrali, kpɛkun be ko sieli i asieliɛ kun nun.+ 30 Sanngɛ Ɲanmiɛn cɛnnin i.+ 31 Kpɛ sunman’n, ɔ fɛli i wun kleli be nga ɔ nin be fɛ i Galile lɛ be ɔli Zerizalɛmun’n. Be yɛ siɛn’n, be kɛn i ndɛ kle sran mun-ɔn.+

32 “Ɔ maan e su bo nda nga be tali e nannan mun’n i su jasin fɛ’n é klé amun. 33 Kɛ Ɲanmiɛn cɛnnin Zezi’n,+ ɔ yoli maan i kwlaa kpɛnnin su mannin e mɔ e ti be mma mun’n. I sɔ yɛ be klɛli i jue nɲɔn su’n nun-ɔn. Be klɛli i kɛ: ‘A ti min wa. Andɛ m’an kaci ɔ si.’+ 34 Kpɛkun Ɲanmiɛn cɛnnin i yɛ i wunnɛn’n su saciman kun le. I sɔ liɛ’n, i ɲin fite ndɛ ng’ɔ kannin’n nun. Ɔ seli kɛ: ‘Nda nga n tali Davidi kɛ ń yí klolɛ dan’n i nglo i lika’n, saan ń yí i nglo amun lika, nda sɔ’n be kwla lafi su.’*+ 35 Asa ekun’n, ɔ kɛnnin i jue uflɛ kun nun kɛ: ‘A su kplinman su kɛ ɔ sufuɛ kpa’n ɔ kplɔ.’+ 36 Davidi liɛ’n, ɔ suli Ɲanmiɛn* lele ɔ fa wuli. Kɛ ɔ wuli’n, be sieli i i nannan’m be wun lɛ, yɛ ɔ kplɔli.+ 37 Sanngɛ sran mɔ Ɲanmiɛn cɛnnin i’n, w’a kplɔman.+

38 “I sɔ’n ti’n, aniaan mun, maan amun si kɛ sran sɔ’n i dunman nun ti yɛ be su kan sran’m be wun sa yaci cɛlɛ’n i ndɛ kle amun-ɔn.+ 39 Asa kusu’n, Moizi i Mmla’n maan be te bu amun sa tɛ yofuɛ.+ Sanngɛ sran kwlaa ng’ɔ lafi i su’n, be su bumɛn i sa tɛ yofuɛ kun sran sɔ’n i dunman nun.+ 40 I sɔ’n ti’n, amun nian amun wun kpa naan sa nga be kɛnnin i ndɛ Ɲanmiɛn nuan ijɔfuɛ’m be fluwa’m be nun’n, w’a tɔman amun su. Be seli kɛ: 41 ‘Amun mɔ amun buman sran fi sran’n, maan amun fa amun ɲin sie su kpa. Maan ndɛ’n bo amun nuan, yɛ maan amun nunnun. Afin ń má yó sa kun amun blɛ su. Yɛ kannzɛ be yiyi sa sɔ’n i kwlaa nun be kle amun’n, amun su faman su le.’”+

42 I sin’n, kɛ bé fíte’n, sran’m be srɛli be kɛ be yiyi ndɛ sɔ’n nun kle be Wunmiɛn-lolɛ-cɛn ng’ɔ́ bá lɔ’n nun. 43 Kɛ be nga be yiali Ɲanmiɛn sulɛ sua’n nun be sanndili’n, Zifu mun nin be nga be timan Zifu mɔ b’a kaci Zifu’n be Ɲanmiɛn sulɛ wafa’n i nunfuɛ’n, be nun kpanngban be suli Pɔlu nin Baanabasi be su. Be kusu be seli sran sɔ’m be kɛ be yo like nga be yo-ɔ, Ɲanmiɛn yó be ye titi’n.+

44 Wunmiɛn-lolɛ-cɛn ng’ɔ suli i su’n nun’n, klɔ’n nunfuɛ’m be sunman lika be yiali be tili Zoova* i ndɛ’n. 45 Kɛ Zifu’m be wunnin sran mun’n, ɔ yoli be ya. Kpɛkun be kannin ndɛ tɛtɛ wie mun be fa sili ndɛ nga Pɔlu su kan’n i su akplowa.+ 46 Ɔ maan Pɔlu nin Baanabasi be seli be yakpa su kɛ: “Amun yɛ ɔ fata kɛ be dun mmua kan Ɲanmiɛn i ndɛ’n be kle amun-ɔn.+ Sanngɛ kɛ mɔ amun kloman kɛ amún tíe’n, mɔ amun bu i kɛ nguan m’ɔ leman awieliɛ’n nin amun fataman’n, siɛn’n, e su kpɛ e ɲin be nga be timan Zifu’n be su lɔ.+ 47 Afin ndɛ nga Zoova* kan kleli e’n yɛ: ‘N kpali wɔ kɛ a yo kɛ kannin sa naan a kpaja nvlenvle’m be su, naan delɛ’n fin wɔ ju asiɛ’n i tiwatiwa’m be su.’”+

48 Kɛ be nga be timan Zifu’n be tili ndɛ sɔ’n, be klun jɔli dan kpa. Kpɛkun ndɛ sɔ’n ti’n, be manmannin Zoova.* Yɛ be kwlaa nga be nin nguan m’ɔ leman awieliɛ’n fata’n, be lafili Zezi su. 49 Asa ekun’n, Zoova* i ndɛ’n truli nvle wunmuan’n nun. 50 Sanngɛ Zifu’m be wlawlali bla nga be le ɲrun kpa mɔ be sro Ɲanmiɛn’n, ɔ nin klɔ’n su yasua mɔ be ti sran dan’n. Ɔ maan be yoli maan be kleli Pɔlu nin Baanabasi be yalɛ,+ kpɛkun be fuannin be be asiɛ’n su. 51 Be kusu be kpukpuli be ja wun ndutre’n naan be wun kɛ like nga be yoli’n timan kpa. Kpɛkun be ɔli Ikoniɔmun.+ 52 Zezi i sɔnnzɔnfuɛ’m be klun jɔli kpa titi,+ yɛ Ɲanmiɛn wawɛ’n sieli be titi.