Fluwa nɲɔn su nga Pɔlu klɛli Korɛntifuɛ mun’n

5 E si kɛ e wunnɛn m’ɔ ti kɛ tannin sua sa’n ɔ́ sáci,+ yɛ Ɲanmiɛn mán e sua uflɛ ɲanmiɛn su lɔ. Ɔ timan sran sa nuan like,+ yɛ ɔ su saciman le. 2 Nanwlɛ, kɛ e o sua* nga nun’n, e fɛfɛ. Afin e kunndɛ kpa kɛ é ɲán ɲanmiɛn su lɔ liɛ’n, naan é wlɛ́ i kɛ tralɛ sa.+ 3 I liɛ’n, be su wunman kɛ e wun ti kplɛn. 4 Nanwlɛ, e mɔ e o tannin sua nga nun’n, e fɛfɛ, yɛ e koko dan. Afin e kunndɛman kɛ é yí gúa. Sanngɛ e kunndɛ kɛ é wlá uflɛ’n+ naan nguan’n sin like ng’ɔ saci’n i osu.+ 5 Ɲanmiɛn yɛ ɔ sieli e kɛ e ɲan nguan sɔ’n niɔn.+ Ɔ fɛli i wawɛ’n mannin e. Ɔ yoli i sɔ’n fa kleli kɛ é ɲán like kpa nga i waan ɔ́ mán e’n sakpa.+

6 Ɔ maan e lafi su kpa, yɛ e si kɛ blɛ kwlaa nga e wunnɛn nga te yo kɛ e awlo sa’n, e wo e Min’n i wun mmua.+ 7 Afin nán like nga sran ɲinma wun i’n i su yɛ e nian e nanti-ɔ. Sanngɛ like nga sran ɲinma wunmɛn i’n i su yɛ e nian e nanti-ɔ. 8 Ɔ maan e klun titiman e kaan sa, yɛ e kunndɛ kɛ é yáci e wunnɛn nga naan e nin e Min’n é kó trán.+ 9 I sɔ’n ti’n, sɛ e nin i e tran-o, sɛ e nin i e tranman-o, e mian e ɲin naan e wun yo i fɛ titi. 10 Afin e kwlaa é jrán Klisi’n i jɔlɛ diwlɛ’n i ɲrun naan sa nga e tinuntinun e fali e wunnɛn nga e yoli’n, sɛ ɔ ti kpa-o, sɛ ɔ ti tɛ-o,* e ɲɛn i nuan like.+

11 I sɔ’n ti’n, kɛ mɔ e wun i wlɛ kɛ ɔ fata kɛ e sro e Min’n ti’n, maan e kan ndɛ’n i weinwein e kle sran mun kpa titi naan be lafi i su. Sanngɛ Ɲanmiɛn si e kpa. Asa kusu’n, e lafi su kɛ amun si e kpa wie. 12 Nán kɛ e waan é kán e su ndɛ kpa é klé amun ekun ti-ɔ. Sanngɛ e su man amun atin kɛ an fa e di amun nuan. I liɛ’n, be nga be fa like nga sran ɲinma wun i’n be fa di be nuan’n,+ mɔ nán like ng’ɔ o sran awlɛn’n nun’n yɛ be fa di be nuan’n, amún kwlá tɛ́ be su. 13 Afin sɛ e yoli sa kɛ sran m’ɔ kpɛnman su’n sa’n,+ nn Ɲanmiɛn yɛ e yo e mɛnnin i-ɔ. Sɛ e yo sa kɛ sran m’ɔ kpɛn su’n sa’n, nn amun ti yɛ e yo-ɔ. 14 Sɛ klolɛ nga Klisi’n fa klo e’n ti sran’n, nn é sé kɛ ɔ sie e mlɔnmlɔn. Afin ndɛ nga e wunnin i wlɛ’n yɛle kɛ sran kunngba wuli sran’m be kwlaa be ti.+ Ɔ yoli sɔ afin sran’m be kwlaa be dun mmua wuli. 15 Ɔ wuli sran’m be kwlaa be ti. I sɔ’n ti’n, be nga be o nguan nun’n, be timan be bɔbɔ be liɛ kun.+ Sanngɛ be ti sran ng’ɔ wuli be ti’n, m’ɔ cɛnnin’n i liɛ siɛn’n.

16 I sɔ’n ti’n kɛ ɔ fin andɛ’n, e wunman sran mun kɛ klɔ sran fa wun be’n sa.+ Sɛ i li bɔbɔ laa’n e wun Klisi kɛ klɔ sran fa wun i wiengu klɔ sran mun sa’n, nɛ́n i sɔ yɛ e fa wun i siɛn’n niɔn.+ 17 Ɔ maan sɛ sran kun nin Klisi be o nun’n, nn w’a yo sran uflɛuflɛ.+ Laa ninnge’m b’a sin. An nian, ninnge uflɛuflɛ’m b’a ba! 18 Sanngɛ like kwlaa fin Ɲanmiɛn mɔ Klisi ti’n, ɔ siesieli e nin i e afiɛn’n.+ Yɛ ɔ mannin e junman kɛ e uka sran mun naan be nin i be afiɛn sɛ ekun.+ 19 Yɛle kɛ Ɲanmiɛn fali Klisi fa siesieli i bɔbɔ nin mɛn nunfuɛ’m be kwlaa be afiɛn.+ W’a nianman be sa tɛ nga be yoli’n.+ Yɛ ɔ fali afiɛn siesielɛ’n ndɛ’n mannin e kɛ e kan kle sran mun.+

20 Ɔ maan e ti Ɲanmiɛn i janunfuɛ+ Klisi dunman nun.+ Ɔ ti kɛ Ɲanmiɛn su sin e lika kpata sran mun sa. Klisi dunman nun’n, é srɛ́ amun kpa: “Amun siesie amun nin Ɲanmiɛn amun afiɛn.” 21 Sran mɔ w’a yoman sa tɛ le’n,+ Ɲanmiɛn fɛ i yili e sa tɛ’m be ti tɛ naan i dunman nun ti’n Ɲanmiɛn bu e sran kpa.+