Fluwa nga Pɔlu klɛli Filipufuɛ mun’n

3 Aniaan mun, min ndɛ’n i atabo’n yɛ: Maan e Min’n mɔ amun nin i be o nun’n ti’n, amun di aklunjɔɛ titi.+ Ndɛ nga ti yɛ n klɛli amun fluwa laa’n, i kunngba’n ti yɛ n su klɛ amun fluwa ekun-ɔn. I sɔ’n kleman min yalɛ, afin amun bɔbɔ amun kpa yolɛ ti yɛ n yo sɔ-ɔ.

2 An nian amun wun be mɔ be ti kɛ alua sa’n be lika. An nian amun wun be nga be yo be wiengu tɛ’n be lika. An nian amun wun be nga be kunndɛ kɛ amun wla klɛn’n* be lika.+ 3 E yɛ be wlali e klɛn kpafuɛ’n niɔn.+ Afin Ɲanmiɛn wawɛ’n i fanngan nun ti’n, e di Ɲanmiɛn i junman’n. Asa ekun’n, e fa Klisi Zezi e di e nuan.+ Kpɛkun e faman e wla e guaman klɔ sran’m be ninnge’m be su, 4 kusu nn n kwla fa min wla n guɛ i ninnge sɔ’m be su tra sran kwlaa.

Sɛ sran wie bu i kɛ ɔ kwla fɛ i wla gua klɔ sran’m be ninnge’m be su’n, min liɛ’n, n kwla yo sɔ lele kpe nun. 5 Afin kɛ be wuli min’n, i cɛn ba mɔcuɛ su’n be wlali min klɛn,+ Izraɛlifuɛ yɛle min, yɛ n ti Bɛnzamɛn akpasua’n i nunfuɛ. Asa ekun’n, min si nin min nin be ti Ebre. Ɔ maan Ebre ba yɛle min.+ Yɛ mmla’n i su falɛ nun’n, n ti Farizifuɛ.+ 6 Sɛ ɔ ti be klun mɔ be tu be yo like’n, n tuli min klun n kleli asɔnun’n i nunfuɛ’m be yalɛ.+ Like nga mmla’n kle kɛ ɔ ti kpa’n i yolɛ nun’n, be kwlá saciman min wun kaan sa. 7 Ninnge nga laa be ti kpa man min’n, Klisi ti’n, n ma buli be kɛ be timan like fi.*+ 8 Asa ekun’n, min Min Klisi Zezi i silɛ mɔ n ma sili i m’ɔ ti like kpa dan’n ti’n, n buman ninnge onga’m be like fi. Klisi ti’n, n guali ninnge’m be kwlaa be blo, yɛ n bu be kɛ wla sa naan e nin i e afiɛn w’a mantan kpa, 9 naan be wun kɛ e nin i e o nun. Sanngɛ i su mɔ n lafi’n+ i ti yɛ bé bú min sran kpa-ɔ, nán Mmla mɔ n fa su’n ti-ɔ. Ɲanmiɛn bu be nga be lafi+ Klisi+ su’n be sran kpa sakpa. 10 N kunndɛ kɛ ń sí i naan ń sí tinmin nga be fa cɛnnin+ i’n wie, naan fɛlɛ ng’ɔ fɛli’n ń fɛ́ sɔ wie,+ naan n klun klo su ń wú kɛ nga ɔ fa wuli’n sa wie.+ 11 N yo sɔ naan ń yó like kwlaa nga n kwla yo’n naan m’an kwla tran sran nga bé dún mmua cɛ́n be’n be nun wie.+

12 Like nga Klisi Zezi kpali min+ kɛ n ɲɛn i’n, nán kɛ m’an dun mmua m’an ɲɛn i ti-ɔ, kusu nán kɛ dɔ nga su b’a yi fɔ ng’ɔ o min nun’n ti-ɔ. Sanngɛ n mian min ɲin kpa+ naan m’an kwla ɲan like sɔ’n. 13 Aniaan mun, n bumɛn i kɛ m’an dun mmua m’an ɲɛn i. Nga n si i’n yɛle kɛ: N wla fi ninnge nga n yacili be siɛn lɔ’n,+ kpɛkun n tinndin naan m’an ɲan ninnge nga be o min ɲrun lɔ’n,+ 14 n mian min ɲin kpa naan m’an kwla ɲan akatua’n.+ Akatua sɔ’n yɛle flɛlɛ mɔ Klisi Zezi ti’n Ɲanmiɛn flɛ́ min nglo lɔ’n.+ 15 I sɔ’n ti’n, maan e nun sran nga b’a tin’n,+ be bu akunndan kunngba sɔ’n wie. Sanngɛ sɛ amun buman akunndan sɔ’n wie’n, Ɲanmiɛn bɔbɔ ɔ́ wá úka amun naan amun bu akunndan kunngba sɔ’n wie. 16 I kwlaa yoli-o, kan kwlaa nga y’a wɔ e ɲrun y’a ju lɛ’n, maan e fa ajalɛ kunngba’n e wɔ e ɲrun tititi.

17 Aniaan mun, maan amun kwlaa amun bo yo kun naan amun nian like nga n yo’n su be yo wie.+ Kpɛkun be nga be yo like nga e kleli amun’n, maan amun nian be liɛ’n su titi yo. 18 Afin sran kpanngban kpa be o lɛ’n, wafa nga be yo ninnge mun’n ɔ kle kɛ be buman wulɛ mɔ Klisi wuli ɲrɛnnɛn waka’n* su’n i like fi. Cɛn kunngun, n kan sran sɔ’m be ndɛ. Sanngɛ siɛn’n kɛ ń kán be ndɛ’n, n sun. 19 Sran sɔ’m be agualiɛ’n yɛle be nunnunlɛ. Be ɲanmiɛn’n yɛle be ku’n. Like ng’ɔ gua sran ɲin ase’n yɛ be fa di be nuan-ɔn. Asiɛ’n su wa ninnge’m be akunndan yɛ be bu-ɔ.+ 20 Sanngɛ e tranwlɛ’n+ wo ɲanmiɛn su lɔ,+ yɛ e su minndɛ kɛ e defuɛ mɔ yɛle e Min Zezi Klisi’n ɔ fin lɔ bla.+ 21 Ɔ́ wá káci e wunnɛn fakafaka ng’ɔ o yɛ’n naan ɔ yo kɛ i liɛ m’ɔ le ɲrun’n sa.+ I kwlalɛ dan m’ɔ fa sie ninnge’m be kwlaa’n,+ yɛ ɔ́ fá káci e-ɔ.