LIKE SUANLƐ 46
?Ngue ti yɛ ɔ fata kɛ e fa e wun e man Ɲanmiɛn naan be yo e batɛmun-ɔn?
Kɛ be se kɛ sran kun fɛ i wun man Zoova’n, yɛle kɛ ɔ se i srɛlɛ nun kɛ ɔ́ sú i kunngba cɛ, naan i klun sa yolɛ’n ɔ́ yó i cinnjin trá like kwlaa. (Jue Mun 40:8) I sin’n, be yo sran sɔ’n i batɛmun. I sɔ’n yi i nglo sran’m be kwlaa be ɲrun kɛ w’a fɛ i wun w’a man Zoova. Ajalɛ’n be nun cinnjin kpafuɛ nga á fá’n yɛ ɔ o lɛ-ɔ. ?Ngue yɛ ɔ kwla uka ɔ naan w’a fa ajalɛ cinnjin sɔ’n niɔn?
1. ?Ngue ti yɛ sran kun kwla se kɛ ɔ́ fɛ́ i wun mán Ɲanmiɛn-ɔn?
Klolɛ mɔ e klo Zoova’n, i ti yɛ e fa e wun e mɛn i-ɔ. (1 Zan 4:10, 19) Biblu’n se e kɛ: “Fa ɔ awlɛn’n kwlaa, ɔ nin ɔ nguan’n kwlaa, ɔ nin ɔ akunndan’n kwlaa, ɔ nin ɔ wunmiɛn’n kwlaa klo Zoova m’ɔ ti ɔ Ɲanmiɛn’n.” (Marki 12:30) Nán e ijɔlɛ’n nun ngunmin yɛ e kle kɛ e klo Zoova-ɔ. Sanngɛ like nga e yo’n ɔ o nun wie. Yasua nin bla nga be klo be wun sakpa’n be ja. I wafa kunngba’n, sɛ e klo Zoova’n i sɔ’n yó maan é fá e wun é mɛ́n i kpɛkun bé yó e batɛmun.
2. ?Wafa sɛ yɛ Zoova yra be kwlaa nga be yo be batɛmun’n be su-ɔ?
Kɛ be ko yo wɔ batɛmun’n, a kaci Zoova i anuannzɛ’n i nunfuɛ. Ɔ maan sa sunman nun’n ɔ́ yí i klolɛ’n i nglo ɔ lika, kpɛkun a nin i amun afiɛn mántan kpa ekun trá laa’n. (Kanngan Malasi 3:16-18 nun.) Zoova káci ɔ Si, kpɛkun be kwlaa nga be klo Zoova mɛn wunmuan’n nun’n, bé káci ɔ niaan yɛ bé kló ɔ wie. (Kanngan Marki 10:29, 30 nun.) I yo, ɔ fata kɛ a yo ninnge wie mun ka naan b’a kwla yo ɔ batɛmun. Ɔ fata kɛ a suan Zoova i su like, a klo i, kpɛkun a lafi i Wa’n su. I sin’n, ɔ fata kɛ a srɛ Zoova naan a fa ɔ wun mɛn i. Sɛ a yo i kwlaa sɔ’n naan be yo ɔ batɛmun’n, á kwlá ɲán nguan m’ɔ leman awieliɛ’n. Ɲanmiɛn Ndɛ’n se kɛ: ‘Batɛmun yolɛ’n de e.’—1 Piɛli 3:21.
SI NDƐ’N NUN KPA EKUN
É wá kán like nga ti yɛ ɔ ti cinnjin kɛ a fa ɔ wun man Zoova naan be yo ɔ batɛmun’n i ndɛ.
3. Ɔ fata kɛ a kle sran nga á sú i’n
Izraɛlifuɛ’m be blɛ su’n, sran wie’m be buli i kɛ be kwla su Zoova kpɛkun be sɔ Baali. Sanngɛ Zoova sunmɛnnin i nuan ijɔfuɛ Eli naan ɔ ko se be kɛ ɔ su kwlá yoman ye. An kanngan 1 Famiɛn Mun 18:21 nun, i sin’n an koko kosan yɛ’n i su yalɛ:
?Ajalɛ benin yɛ ɔ fata kɛ Izraɛlifuɛ’m be fa-ɔ?
Kɛ laa Izraɛlifuɛ mun sa’n e kusu ɔ fata kɛ e kle sran nga é sú i’n. An kanngan Liki 16:13 nun, i sin’n an koko kosan yɛ’m be su yalɛ:
?E kwla su Zoova kpɛkun e su like uflɛ? ?Ngue ti-ɔ?
?Wafa sɛ yɛ e kwla kle Zoova kɛ i kunngba yɛ é sú i-ɔ?
4. Bu klolɛ mɔ Zoova klo wɔ’n i akunndan
Zoova mannin e ninnge kpanngban. ?Ngue yɛ e kusu e kwla yo e mɛn i-ɔ? An bo VIDEO’N.
?Ninnge benin nun yɛ Zoova kleli kɛ ɔ klɔ wɔ-ɔ? An kanngan Jue Mun 104:14, 15 nin 1 Zan 4:9, 10 nun, i sin’n an koko kosan yɛ’m be su yalɛ:
?Ninnge nga Zoova mannin wɔ’n be nun’n beninfuɛ’n yɛ ɔ klun jɔ su kpa-ɔ?
?Kɛ a bu ninnge sɔ’m be akunndan’n wafa sɛ yɛ a bu Ɲanmiɛn-ɔn?
Kɛ be cɛ e like wie mɔ e klo i’n, e kunndɛ kɛ é klé sran ng’ɔ cɛli e like’n kɛ e si ye. An kanngan Mmla’n 16:17 nun, i sin’n an koko kosan yɛ’n i su yalɛ:
?Kɛ a bu like kwlaa nga Zoova yo mannin wɔ’n be akunndan’n, ngue yɛ a kunndɛ kɛ á yó mɛ́n i-ɔ?
5. Kɛ e fa e wun e man Ɲanmiɛn’n ɔ yra e su dan
Sran kpanngban be bu i kɛ sɛ be ɲan junman kpa, ɔ nin sika, yɛ sɛ be ɲan ɲrun’n, i lɛ nun yɛ bé dí aklunjɔɛ. ?I sɔ’n ti su? An bo VIDEO’N, i sin’n an koko kosan yɛ’m be su yalɛ.
?Kannzɛ bɔbɔ bian nga be kleli i video’n nun’n ɔ klo balɔn tolɛ’n, ngue ti yɛ w’a fa yomɛn i junman kun-ɔn?
W’a fɛmɛn i wun w’a wlaman balɔn tolɛ’n nun mlɔnmlɔn kun sanngɛ ɔ fɛli i wun mannin Zoova. ?Kɛ a niɛn i sa’n ajalɛ kpa yɛ ɔ fɛli i lɛ-ɔ? ?Ngue ti-ɔ?
Kwlaa naan akoto Pɔlu w’a kaci Klisifuɛ’n, ɔ suannin Zifu’m be mmla’n like klefuɛ kun m’ɔ le ɲrun kpa’n i sa nun. Ɔ maan sɛ ɔ klo’n ɔ kwla kaci sran dan, sanngɛ ɔ yacili i kwlaa sɔ’n kpɛkun ɔ kacili Klisifuɛ. ?I sɔ m’ɔ yoli’n yoli i nsisɔ? An kanngan Filipufuɛ Mun 3:8 nun, i sin’n an koko kosan yɛ’m be su yalɛ:
?Ngue ti yɛ Pɔlu seli kɛ ninnge ng’ɔ yoli be ka naan w’a kaci Klisifuɛ’n ɔ “bu be kɛ wla sa-ɔ”?
?Yɛ ngue yɛ ɔ ɲɛnnin i-ɔ?
?Like uflɛ o lɛ mɔ e kwla yo m’ɔ ti kpa tra Zoova i sulɛ’n niɔn?
Kɛ Pɔlu kacili Klisifuɛ’n, like ng’ɔ ɲɛnnin i’n ɔ tra ninnge ng’ɔ kpɔcili be’n.
SRAN WIE’M BE WAAN: “Ɔ fataman kɛ e fa e wun e man Ɲanmiɛn kɛ é sú i.”
?Ngue ti yɛ a bu i kɛ sɛ e fa e wun e man Zoova kɛ é sú i’n i sɔ’n ti su-ɔ?
NDƐ’N I KPƆLƐ BOLƐ
Kɛ mɔ e klo Zoova’n ti’n e fa e wun e mɛn i kpɛkun be yo e batɛmun.
Ndɛ’n i nun flanlɛ
?Ngue ti yɛ sɛ e klo Zoova naan e tu e klun e su i’n i sɔ’n ti su-ɔ?
?Wafa sɛ yɛ Zoova yra be nga be yo be batɛmun’n be su-ɔ?
?A kunndɛ kɛ á fá ɔ wun mán Zoova naan á sú i?
NDƐ WIE MUN EKUN
Bla kun m’ɔ bo miziki’n, ɔ nin bian kun m’ɔ si wanndilɛ’n nun akplowa’n, be fali ajalɛ kɛ bé fá be wun mán Zoova mlɔnmlɔn.
Gbanflɛn nin talua’m be kosan mun: ?Ngue yɛ ń yó-ɔ?: Ajalɛ nga aniaan wie’m be fali’n (6:54)
Sa wie mɔ be ti’n ɔ fata kɛ a fa ɔ wun man Ɲanmiɛn kɛ á sú i’n.
“?Ngue ti yɛ e fa e wun e man Zoova-ɔ?” (Sasafuɛ Tranwlɛ’n, afuɛ 2010, Zanvie 1)
Be nga be fa be wun be man Zoova kɛ bé sú i’n be aklunjɔɛ nga be di’n, i su miziki kun yɛ.
Bla kun wa buli ninnge nga be ti i cinnjin’n be wun akunndan uflɛ.